Filipenses 2:8 - Xochapa Mixteco

⁸ Xaꞌa ya nda̱sa ra mií ra taꞌan yo ivi yóꞌó, nda̱sa ni̱nu̱ ra mií ra. Xi̱ni soꞌo ndiꞌi ra ya ndi̱kaꞌan Ndioxi xiꞌin ra, vani ndi̱kaꞌan Ndioxi xiꞌin ra kuvi ra ndaꞌa cruzin, ta xa̱a súvi ndiꞌi ra ya.

Filipenses 2:8 Referans Kwoze

San Juan 10:18

Nda iin naꞌa küchiñu kindaa ya táku i ndaꞌa i, chi kúu mií i ichí ya taxi i kutaku i. Chi yeꞌe ta íyo ndee ndaꞌa i ya taxi i mií i kuvi i, ta íyo tu ndee ndaꞌa i ya sitaku i mií va i. Ta ichí yóꞌó kua ta̱xi Iva i ndaꞌa i ―káchi Jesús xiꞌin na.

HEBREOS 12:2

Ta iindaa mituꞌun xaꞌa Tata yo Jesucristo kua ná kundiꞌi ni ini yo, saa chi mií ra ku ra sínaꞌa yoo ndá kuꞌva kua kundaa ni ini yo kuni yo Ndioxi, saa tu iindaa mituꞌun mií ra ku ra chíndee yoo, ndása vaꞌa ra kuꞌva ndáa ni ini yo xíni yo Ndioxi. Ta saa ndi̱xaꞌa ndee ndiꞌi ini ra ndoꞌo ni ra nuu cruzin, ta köo ndi̱kiꞌin ra kuenta xaꞌa ya kúkaꞌan nuu ra, chi kúndaa ini ra tá si̱ndiꞌi ndo̱ꞌo ra saa ta kusini ni ra. Ta vitin ndi̱kunduꞌu ra ñaꞌñu kuáꞌá Ndioxi xáꞌnda chiñu ra xiꞌin Ndioxi.

ROMANOS 5:19

Xaꞌa ya köo ndíxiin iin taa kuni soꞌo ra ya ndi̱kaꞌan Ndioxi xiꞌin ra, xaꞌa ya ikán kua ndu̱u na, naꞌa na kúu mií kuachi nuu Ndioxi. Ta saa ni xaꞌa ya vaꞌa ni xi̱ni soꞌo iin taa ya ndi̱kaꞌan Ndioxi xiꞌin ra, xaꞌa ya i̱kan ra saa, ta kuaꞌa ni na ñuu ivi ndi̱niꞌi ya vaꞌa sata ra. Xaꞌa ya ikán kua ndasa vaꞌa ra na, ndu̱u na na vaꞌa, na köo ka kuachi kuu mií nuu ra.

1 Pedro 2:24

Tá ndi̱xiꞌi Cristo nuu itun cruzin ta nuu nu ikán kua ndi̱kundiso ndiꞌi ra kuachi yo to̱so ra ya sata ikin kuñu ra kuaꞌan ya xiꞌin ra. I̱kan ra saa xiꞌin yo ya ná köo ka ndee kuu mií kuachi yo ya kaꞌnda chiñu ka ya nuu yo, saa kutaku yo ikan yo ya vaꞌa. Xaꞌa ya ndo̱ꞌo ni ra yakan si̱ndaꞌa ra yoo.

1 Pedro 3:18

Saa chi saa kua ndo̱ꞌo tu mií va Tata yo Jesucristo xaꞌa yo, ndi̱xiꞌi ra xaꞌa kuachi yo, ta iindaa ichí ndo̱ꞌo ra ndi̱xiꞌi ra, ta küvi ka ra. Ra vaꞌa ni ndi̱xiyo ra, ta ndi̱xiꞌi ra xaꞌa ndiꞌi yo ivi kuachi ya kuchiñu kundaka ra yoo kuꞌun yo nuu Ndioxi. Tá ndi̱xiꞌi ra ta ndi̱ꞌi xaꞌa ikin kuñu ra, saa tá ndi̱taku ra xiꞌin ikin kuñu ra ya xa̱á küvi kuni yo.

2 Corintios 8:9

Chi xa xíni mií ndo ya kúꞌvi ni ini mií Tata yo Jesucristo xíni ra yoo kua nda̱sa ndaꞌvi ra mií ra, vani kuika ni ndi̱xiyo ra ta saa nda̱sa ndaꞌvi ra mií ra xaꞌa ndóꞌo̱, ya ná ndukuika ndo.

San Mateo 26:39

Saa ke̱e ra kuaꞌan xika loꞌo ka ra, ñaa ndi̱xaa ra si̱kusiti ra ta nda nuu ñuꞌú ndi̱xinu taan ra, ta xa̱á ra káꞌan ra xiꞌin Ndioxi, káchi ra saa: ―Tata Iva mií i, tá tu kúni un ta täxi un kundoꞌo i tindoꞌo yóꞌó, sundi ïkan un ya kúni yeꞌe, vaꞌa ikan un ya kúni mií va un ―káchi Jesús xiꞌin Ndioxi.

Los Hechos 8:33

Si̱kaꞌán na nuu ra, ta köo ndi̱kan na ya ndaa xiꞌin ra. Ndaꞌvi ni ra, ni seꞌe ra köo, ni seꞌe sikua ra köo, chi kama ni si̱ndiꞌi na xaꞌa ra, xa̱ꞌni ñaꞌa na, káchi tuꞌun Ndioxi ya ta̱a ra Isaías, ya káꞌvi ra ñuu Etiopía ikán kuaꞌan ra.

Tito 2:14

Chi ndi̱taxi ra mií ra ndi̱xiꞌi ra xaꞌa yo, ya yóꞌó ku yaꞌvi cha̱ꞌvi ra xaꞌa yo nuu si̱kaku ra yoo ndaꞌa ndee ya väꞌa i̱kan yo, ta nda̱sa vaꞌa ra yoo ndu̱u yo na ñuu mií ra, ya kuchiñu yo ikan yo ya vaꞌa nuu ra.

Gálatas 3:13

Chi Cristo ku ra cha̱ꞌvi xaꞌa yo nuu chiꞌña ya ta̱xi ley ya ta̱a Moisés ndaꞌa yo, chi köo ndi̱kuchiñu yo sixinu yo ya káꞌan ley ikán. Xaꞌa ya ikán kua cha̱ꞌvi Jesucristo xaꞌa yo chi ndi̱xaꞌa ndee ini ra si̱kuiso ra chiꞌña xiꞌin mií ra, saa ku̱chiñu ra ki̱ndaa ra chiꞌña sata yo. Chi saa káꞌan mií tuꞌun Ndioxi, káchi ya saa: “Ndiꞌi naꞌa, na tíkaa ikin kuñu nuu itun cruzin, ta na ndíso chiꞌña ku na”, káchi ya.

San Juan 14:31

Sundi ya ná kundaa ini na ñuu ivi, ya ndixa kua kúꞌvi ini i xíni i Iva i Ndioxi, yakan xáa súvi i chiñu ya xa̱ꞌnda chiñu ra nuu i. Ta vitin ndikuita ndo, koꞌo yo ―káchi Jesús xiꞌin nda ítaꞌan xiꞌin ra.

San Juan 15:10

Tá tu xáa súvi ndo ya xáꞌnda chiñu i nuu ndo, ta saa kua koo tuun ndo xiꞌin i, chi kúꞌvi ni ini i xíni i ndóꞌo̱, ta kuꞌva saa kua xáa súvi yeꞌe ya xáꞌnda chiñu Iva i yakan íyo tuun i xiꞌin ra ta kúꞌvi ni ini ra xíni ra yeꞌe.

San Mateo 26:42

Saa ke̱e tuku ra kuaꞌan ra kaꞌan ra xiꞌin Ndioxi ichí uvi, káchi ra saa: ―Tata Iva mií i, tá xíniñuꞌu i ndoꞌo ni i, ta íyo ndúvi i xaa súvi i ya kúni mií un ―káchi ra.

San Mateo 17:2

Ta ikán xi̱ni nda ndee ni ndi̱yeꞌe taxan nuu ra ndi̱nama ndiꞌi ra, nda tá kuꞌva yéꞌe̱ ñu̱ꞌù tá kaꞌñu sava, saa ndi̱yeꞌe nuu ra. Saa tu toto ra, ndee ni ndu̱yaa sami ya tá kuꞌva yéꞌe̱ ñu̱ꞌù, saa nduu ya.

San Juan 4:34

Ta saa ndi̱kuiin Jesús káꞌan ra xiꞌin nda, káchi ra saa: ―Tá káa ñaꞌa ya xíxi i saa káa ya xáa súvi ndiꞌi i ya kúni Ndioxi ta ndakua sixinu ndiꞌi i chiñu ya ta̱xi ra ndaꞌa i.

San Lucas 9:29

Tá káꞌan ra xiꞌin Ndioxi ta iin ndi̱nama ndiꞌi nuu ra yáꞌa ni yaa ndu̱u toto ra, ndakua iin ndi̱yeꞌe táxan ndiꞌi ra.

HEBREOS 12:4

Chi ndóꞌo̱, vani ndee ni kánitaꞌan ndo xiꞌin tindoꞌo ya vaxi nuu ndo, sundi nda iin ndo täꞌan kuvi xaꞌa ya kánitaꞌan ndo xiꞌin ya väꞌa, köo ndóꞌo ndo tá kuꞌva ndo̱ꞌo mií Tata yo Jesucristo ndi̱xiꞌi ra xaꞌa yo.