Filipenses 2:12 - Xochapa Mixteco

¹² Na taꞌan yo, na kúꞌvi ni ini i xíni i, yachi tá ndi̱xiyo i xiꞌin ndo ta ndiꞌi saa ichí xa̱a súvi ni ndo tuꞌun Ndioxi ya ndi̱kaꞌan i xiꞌin ndo. Ta saa tu vitin va, vani köo íyo i xiꞌin ndo ta ndee ni ka xíniñuꞌu ndo xaa nduxa ndo ya ikan ndo ya vaꞌa taꞌan ya íkan naꞌa, na síkaku Ndioxi. Ikan ndo saa xaꞌa ya xáa toꞌo ndo Ndioxi, saa tu xaꞌa ya íꞌvi ndo xíni ndo ra.

Filipenses 2:12 Referans Kwoze

1 Corintios 15:58

Ñani mani, xaꞌa ya ñaa kua xíniñuꞌu ndo ndee ni ndee kundikun ndo ichí Ndioxi, xaꞌa ni ndo ndee ta ndïko koo ini ndo ya íkan ndo saa, iin tuun saa chikaa ini ndo xaa chiñu ni ndo xaꞌa Tata yo, saa chi chiñu íkan ndo nuu ra, ta süvi ya uun ku ya.

HEBREOS 4:11

Yakan kua xíniñuꞌu yo chikaa ni yo ndee ya ná kiꞌvi yo nuu ndikundee yo xiꞌin ra. Süvi ka vi ya ndoꞌo yó tá ndo̱ꞌo na xii sikua yo köo ndi̱xiin na kandixa ñaꞌa na, xaꞌa ya ikán kua köo ndi̱kuchiñu na kiꞌvi na koo na nuu ndikundee na xiꞌin ra.

1 Pedro 2:11

Ñani yo tin kuꞌva yo, ndóꞌo̱ ta tá íin naꞌa, na ndóo tóo xiꞌin na xíka tóo ñuu ivi yóꞌó saa íin ndo, yakan xíkan ni i ya mani nuu ndo, ndee koo ini ndo ta täxi ka ndo kaꞌnda chiñu ya väꞌa kúni kaꞌnda chiñu nuu ikin kuñu ndo, chi ndiꞌi ya väꞌa ñaa ta kánitaꞌan ya xiꞌin ya vaꞌa ndo.

San Mateo 11:29

Xaa súvi ndo ya káꞌan i xiꞌin ndo ya káa tá káa itun yuku i. Sikuaꞌá ndo tá kuꞌva íyo i, chi yeꞌe ta köo kueꞌe ini i, ndaꞌvi ni ini i, vaꞌa ni taa ku i, ikán ndo saa, ta saa kuchiñu ndo ndikundee ndo.

Filipenses 1:27

Ta kuenta ni koo ndo xaa súvi ndo ndisaa ya káꞌan tuꞌun ra xiꞌin ndo. Án xaa i koto i ndóꞌo̱ án xäa i nuu ndo, sundi kúni i kuni soꞌo i tuꞌun vaꞌa xaꞌa ndo ya ndaku ni íyo ndo xiꞌin tuꞌun Tata yo, ta iin yuꞌu ni ku ndo, iin ítaꞌan ndiꞌi ndo xáa chiñu ndo xaꞌa ra.

2 Pedro 3:18

Ta ndóꞌo̱ xíniñuꞌu ndo kunitaꞌan vaꞌa ka ndo xiꞌin Tata yo Jesucristo, ra síkaku yoo, ra kúꞌvi ni ini xíni yoo. Ta ná xaa kaꞌnu ni yo ra ndiꞌi saa kivi xiꞌin ndiꞌi kivi ya vaxi. Saa ná koo.

HEBREOS 5:9

Yakan tá sindiꞌi ra xa̱a súvi ra ndiꞌi ya ndi̱kaꞌan Ndioxi xiꞌin ra, saa kua ndi̱xinu ra ndu̱u ra taa, ra ndee ni ndixa xíniñuꞌu yo ya sikaku ra yoo koo yo xiꞌin ra ndiꞌi saa ichí tá tu xáa súvi yo ya káꞌan ra.

2 Timoteo 2:10

Ta xaꞌa ya ikán kua xáꞌa ndee ndiꞌi ini i ndóꞌo̱ ni i xaꞌa naꞌa, na ndi̱kaxin Ndioxi ya ná niꞌi na ya vaꞌa kaku na tixin Tata yo Jesucristo, ta saa kuchiñu na koo na xiꞌin ra ndiꞌi saa kivi nuu luvi ni káa nuu ndee ni yéꞌe̱.

HEBREOS 4:1

Yakan yoo, ta ná kundiꞌi ni ini yo, kiꞌvi yo koo yo nuu ndikundee yo xiꞌin Ndioxi. Ta kuenta ni ná koo yo süvi ka vi ya ndoo sava yo chí sata, ta küchiñu yo kiꞌvi yo koo yo nuu ndikundee yo xiꞌin ra.

HEBREOS 12:1

Ta xa xíni yo yáꞌa ni kuaꞌa ku naꞌa, na xi̱ndaa ni ini xi̱ni Ndioxi. Ta saa ná ikan yoo tá kuꞌva i̱kan na ikán. Ta ná xaꞌa ni ka yo ndee xiꞌin mií yo, ndinuꞌu ni ini yo ná kaka yo ichí Iva yo Ndioxi, ta saa ná sindoo ndiꞌi yo ya sási nuu yo, xiꞌin ya väꞌa ya síkoyo yoo nuu kuachi.

Filipenses 4:1

Xaꞌa ya ñaa kua káꞌan ni i xiꞌin ndo ñani yo xiꞌin kuꞌva yo, tuun ni kundikun ndo Tata yo Jesucristo. Xa xíni mií ndo ndee ni kúꞌvi ini i xíni i ndóꞌo̱, ta kúni ni i kuni i ndóꞌo̱. Chi ndóꞌo̱ ku ndo xáa sií ni ini i, ta vaꞌa ni kée i xiꞌin ndo, kúsini ni i xiꞌin ndo, tá káa ñaꞌa ya níꞌi iin ra xínu, saa íyo ndo nuu i, ndáa yaꞌvi ni ndo.

ROMANOS 2:7

Ndiꞌi naꞌa, na i̱kan ya vaꞌa, ta saa ikan Ndioxi xiꞌin na. Na ikán ku naꞌa, na köo ndi̱xikuiin ikan ya vaꞌa. Saa chi ku̱ni na xaa kaꞌnu na ra, saa taxi na ya toꞌo chee ni ndaꞌa ra. Ta na ikán ku na niꞌi ichí koo na xiꞌin ra ndiꞌi saa kivi.

1 Tesalonicenses 1:3

Ta táxi ni nde tixaꞌvi ndaꞌa Iva yo Ndioxi xaꞌa kuꞌva ya kándixa ni ndo ra, saa kúꞌvi ni ini ndo xíni ndo ra, ta ya ñaa kua xáꞌa ni ndee xiꞌin ndo ya ndee ni vaꞌa xáa chiñu ndo nuu ra, chi kúndaa teꞌe ini ndo ya xaa súvi ra ya ndi̱kaꞌan ra xiꞌin ndo, ta ya ñaa kua chíndee ni ndóꞌo̱ ndee ni tuun ndíkun ndo Tata yo Jesucristo.

Filipenses 1:29

Ta mií Ndioxi ku ra chi̱kaa ya vaꞌa ndóꞌo̱ ya kandixa ndo Cristo xiꞌin ya ndoꞌo ni ndo xaꞌa ra.

2 Corintios 7:15

Ndee ni vaꞌa ndíkaꞌán ini ra xaꞌa ndo, ta kúꞌvi ni ka ini ra xíni ra ndóꞌo̱, chi vií ni ndi̱kiꞌin ndo ra, ta ndee ni vaꞌa xi̱ni soꞌo ndo ya ndi̱kaꞌan ra xiꞌin ndo.

1 Corintios 2:3

Yachi tá ndi̱xaꞌan i nuu ndo ta vita ni kúni i, íꞌvi ni i ndakua kísi ya yeꞌe.

Efesios 6:5

Ndóꞌo̱, xáa chiñu nuu naꞌa xiꞌin ya nduxa ñuu ivi yóꞌó, ta xaa súvi ndo ya xáꞌnda chiñu na nuu ndo. Toꞌo ni koo ndo xiꞌin na, saa ndinuꞌu ni nima ndo xaa súvi ndo chiñu nuu na, chi tá íkan ndo saa ta tá íkan ndo xiꞌin mií Cristo, saa íkan ndo xiꞌin na.

San Mateo 11:12

Saa ndi̱kaꞌan tuku ra, káchi ra saa: ―Nda kivi xa̱á ra Juan káꞌan ndoso ra tuꞌun Ndioxi, iin saa nda kivi vitin íyo ni naꞌa káni taꞌan ya kúni na sindiꞌi xaꞌa na ichí nuu xáꞌnda chiñu Ndioxi, ni saa ndóꞌo ya, ta ndisaa naꞌa, na ndaku ni ini ku na kúchiñu kuakiꞌvi koo nuu xáꞌnda chiñu Ndioxi.

Filipenses 1:5

Saa chi ndóꞌo̱, ta nda kivi núnu̱ú iin saa nda kivi vitin köo ndíko koo ini ndo ya chíndee taꞌan ndo xiꞌin nde ya káꞌan ndoso nde tuꞌun vaꞌa xaꞌa Tata yo Jesucristo.

Los Hechos 9:6

Ñaa xa̱á kísi ya ra íꞌvi ka vi ra, saa ndi̱kuiin ra káꞌan ra: ―¿Unkua ikan i kúni un, Tata? ―káchi ra. Ta saa ndi̱kuiin Tata yo Jesús ndi̱kaꞌan ra xiꞌin ra, káchi ra saa: ―Kuandikoo, ta ná xaa un ñuu Damasco, ta ñaa kaꞌan na xiꞌin un unkua xíniñuꞌu un ikan un ―káchi Jesús xiꞌin ra.

Filipenses 2:19

Mií Ndioxi ná kaꞌan ta kama ni tiꞌvi i ra Timoteo ñani yo xaa ra koto ra ndóꞌo̱, ta saa kusini ni i chi ndiko koo ra xiꞌin tuꞌun kundaa ini i xaꞌa ndo.

1 Corintios 4:14

Ta süvi xaꞌa ya kúni i sikaꞌán i nuu ndo kua táa i tutu yóꞌó xaa ya nuu ndo. Sundi yeꞌe, ta kúni i kundaa yuꞌu i ndóꞌo̱, tá kuꞌva ndáa yuꞌu iin taa seꞌe ra, saa íkan i xiꞌin ndo xaꞌa ya kúꞌvi ni ini i xíni i ndóꞌo̱.

Filipenses 4:15

Ndóꞌo̱, na ñuu Filipos, ta xa xíni vaꞌa ndo chi tá ke̱ta i ñuu ndo mií estado Macedonia ñaa kuaꞌan i, tá sikan xa̱á i ndítuꞌun i tuꞌun vaꞌa xaꞌa Tata yo xiꞌin naꞌa, ta ndisaa ndóꞌo̱, na veꞌe ñuꞌu, ndóo ñaa ku ndo chi̱ndee taꞌan ni xiꞌin i.

Los Hechos 16:29

Ñaa ndu̱ku ra ñu̱ꞌu̱ ta xínu ra ndi̱kiꞌvi ra ini veꞌe kàà. Íꞌvi ka vi ra ndakua kísi ya ra, ndi̱kiꞌvi ra si̱kusiti ra nuu ra Pablo xiꞌin ra Silas.

Filipenses 1:6

Ta yeꞌe, ta xa kúndaa teꞌe ini i xaꞌa ndo, chi Ndioxi ku ra xa̱á xáa chiñu xiꞌin nima ndo, ta saa xaa chiñu ka ra xiꞌin ndo ndakua ná xinu ndo nduu ndo tá kuꞌva kúni mií ra, nda kivi tá ná ndiko koo Tata yo Jesucristo ñuu ivi yóꞌó.