Filipenses 2:11 - Xochapa Mixteco

¹¹ Ta ndiꞌi ni kúu naꞌa ndikuni ra ta kaꞌan na xaꞌa ra, kachi na saa: “Jesucristo ku ra Chee ni xáꞌnda chiñu nuu ndiꞌi yo”, kachi na. Ta saa kua ndikunuu sukun ni ya toꞌo Iva yo Ndioxi nduu chee ni ya.

Filipenses 2:11 Referans Kwoze

1 Juan 4:15

Ndiꞌi na ndíkuni Jesús ta káꞌan na xaꞌa ra kúu ra Seꞌe Ndioxi, ta na ikán ku na ítaꞌan vaꞌa xiꞌin Ndioxi. Saa íyo na xiꞌin ra.

ROMANOS 14:11

Tá káchi tuꞌun ra, ya káchi saa: Ya káꞌan i xiꞌin ndo ta chínaꞌa i xaꞌa mií i. Vaxi kivi ta ndiꞌi ni kúu naꞌa sikusiti nuu i. Saa kua kaꞌan ndiꞌi naꞌa ya kúu i Ndioxi, káchi Tata yo. káchi ya ta̱a na xinaꞌa.

San Juan 13:13

Ndóꞌo̱, ta káꞌan ndo xiꞌin i kúu i Maestro ta kúu i ra kaꞌnu nuu ndo, káchi ndo. Ta ya ndaa ndixa kua káꞌan ndo xiꞌin i, saa chi ikán ku i.

1 Juan 4:2

Ta xiꞌin ya yóꞌó ndíkuni ndo na, tá tu ndixa Tachi Ndioxi síkaꞌán ini na kaꞌan na: tá ndíkuni na Tata yo Jesucristo ya ki̱xi ra ñuu ivi yóꞌó ta ndu̱u ra ra ivi tá íin mií yo na ivi yóꞌó, káchi na, ta na ñaa ku na kúu mií Tachi Ndioxi.

ROMANOS 14:9

Jesucristo ku ra ndi̱xiꞌi ta ndi̱taku ra, xaꞌa ya ikán kua ndu̱u ra, Ra Chee, Ra Xáꞌnda chiñu nuu ndiꞌi naꞌa, na táku xiꞌin na ndíi.

1 Corintios 12:3

Xaꞌa ya ñaa kua káꞌan i xiꞌin ndo, nda iin naꞌa, küvi tavi chiꞌña na Jesús tá tu kúu mií na Tachi I̱í Ndioxi. Ta saa tu nda iin na küvi kaꞌan: “Jesús kúu Tata nde ra chee ni nuu nde”, kachi na, tá tu köo Tachi I̱í Ndioxi kúu mií na.

San Juan 14:13

Ta ndiꞌi ya ndúku ndo nuu Iva i Ndioxi xiꞌin kivi i, ta xaa súvi i ya xiꞌin ndo. Xaꞌa ya ikan i xiꞌin ndo kua ndikunuu vaꞌa ni ya toꞌo Iva i Ndioxi tixin yeꞌe kúu Seꞌe ra.

1 Pedro 1:21

Xaꞌa ya vaꞌa i̱kan Tata yo Jesucristo kua xa̱á ndo kándixa ni ndo Iva yo Ndioxi, ra si̱taku Tata yo Jesucristo tañu na ndíi, saa ta̱xi ni Ndioxi ya toꞌo ndaꞌa ra. Yakan kua ndátun ni ndo, saa ndáa ni ini ndo ya xaa súvi ndiꞌi ra ya ndi̱kaꞌan ra xiꞌin ndo taxi ra ndaꞌa ndo.

1 Corintios 8:6

Sundi nuu mií yo, ta iindaa mituꞌun va ku Iva yo Ndioxi mií ra ndaa ni, ta ndaꞌa mií ra kua vaxi ndiꞌi ñaꞌa ya xíniñuꞌu yo, xaꞌa mií ra kua táku yo. Ta saa íyo iindaa Tata yo Jesucristo ta tixin mií ra kua ndi̱kuaꞌa ndiꞌi ñaꞌa, ta si̱kuaꞌa tu ra mií va yo.

El Apocalipsis 3:5

Ndiꞌi naꞌa, na kúndee nuu ya väꞌa, ta ndinuꞌu ni ini na ndíkun na yeꞌe, ta taxi i toto yaa kundixi na, ta ndïkata i kivi na nuu tutu i, nuu xa ndi̱kaꞌi kivi na ya koo na xiꞌin Ndioxi ndiꞌi saa kivi. Ta kaꞌan ndoso i nuu Ndioxi tin nuu na tatun ra xaꞌa na yóꞌó, kachi i saa: “Na yóꞌó ku na kutaku xiꞌin i”, kachi i xaꞌa na.

San Mateo 10:32

Saa ndi̱kaꞌan tuku Jesús, káchi ra saa: ―Ndiꞌi na köo kúkaꞌan nuu xaꞌa ya ndíkun na yeꞌe, ni yeꞌe ta kükaꞌan nuu i ndikuiin i xaꞌa na nuu Iva i Ndioxi, ra íyo nuu ndivi.

Los Hechos 10:36

Ta ndi̱kaꞌan Ndioxi xiꞌin ndeꞌe judío, tá ti̱ꞌvi ra Tata yo Jesucristo ki̱xi ra ndi̱kaꞌan ndoso ra tuꞌun vaꞌa ya táxi koo vaꞌa ni ini yo, chi ra ikán ku ra xáꞌnda chiñu nuu ndiꞌi yo ―káchi ra Pedro xiꞌin na.

Los Hechos 2:36

Ta xaꞌa ya ñaa kua xíniñuꞌu kundaa ini ndiꞌi ndóꞌo̱ na taꞌan yo Israel chi suvi mií Jesús ra chi̱nuu ndo nuu cruzin ku ra kúu Cristo ra sikaku yoo ―káchi ra Pedro xiꞌin nda.

San Juan 9:22

Ndi̱kaꞌan iva siꞌí ra saa xaꞌa ya íꞌvi na nuu nda naꞌnu nuu na judío, chi xa chi̱taꞌan tuꞌun nda tá ndá naꞌa káꞌan xaꞌa Jesús ya kúu ra Cristo, ta tava ndaꞌa ñaꞌa nda ini veꞌe ñuꞌu sinagoga, káchi nda.

San Juan 5:23

chi kúni Ndioxi ya ná xaa toꞌo ndiꞌi na Seꞌe ra, tá kuꞌva xáa toꞌo na mií ra, saa ná xaa toꞌo na Seꞌe ra. Saa chi ndiꞌi na köo xíin xaa toꞌo Seꞌe ra, ta kúni kachi ya köo xáa toꞌo na Iva ra, ra ti̱ꞌvi ra vaxi.

2 Juan 1:7

Kuenta ni koo ndo chi xa kuaꞌa ni na vata íyo ñuu ivi yóꞌó, ta na ñaa ta köo xíin na ndikuni na Jesucristo ya ki̱xi ra ñuu ivi yóꞌó ta ndu̱u ra ra ivi taꞌan mií yo ivi yóꞌó. Ndiꞌi na köo xíin ndi̱kuni ñaꞌa ta na ñaa ku na vata, na sáa ini xíni Jesucristo.

1 Corintios 15:47

Chi taa ra núnu̱ú, ta xiꞌin ñuꞌú ndi̱kuaꞌa ra, ta ra ivi yóꞌó ku ra, sundi taa ra uvi, ra ku Tata yo Jesucristo, ta ra ke̱e nuu ndivi ku ra ikán.

ROMANOS 15:9

Saa ki̱xi tu ra ya i̱kan ra ya vaꞌa xiꞌin naꞌa, na köo kúu judío, ya ná xaa kaꞌnu na Ndioxi, xaꞌa ya kúndaꞌvi ini ra xíni ra na, tá káchi tuꞌun ra ya káchi saa: Tata Ndioxi, nda tañu naꞌa, na köo xíni yóꞌo̱, xaa kaꞌnu i yóꞌo̱. Ta kata i yaa i̱í nuu un. káchi ya.

San Juan 20:28

Saa ndi̱kuiin ra Tomás, káchi ra saa: ―¡Tata, yóꞌo̱ ku Tata i tin Ndioxi mií i! ―káchi ra xiꞌin Jesús.

San Juan 17:1

Tá sindiꞌi Jesús ndi̱kaꞌan ra tuꞌun ikán, saa nda̱niꞌi nuu ra ndi̱koto ra nuu ndivi, ta saa ndi̱kaꞌan ra xiꞌin Ndioxi káchi ra saa: ―Tata Iva i Ndioxi, vitin ti̱ndaa kivi ya xaa kaꞌnu un yeꞌe kúu Seꞌe un, ta saa yeꞌe xaa kaꞌnu ni i yóꞌo̱.

San Juan 12:42

Vani köo ndi̱xiin sava na kandixa na ra, sundi kuaꞌa ni na chiñu kúu mií chiñu ndee ka̱ndixa ñaꞌa, ta köo ndi̱tuꞌun na xiꞌin naꞌa, xaꞌa ya íꞌvi na nuu nda fariseo, chi koto ka tava ndaꞌa ñaꞌa nda veꞌe ñuꞌu sinagoga.

San Lucas 2:11

Kivi vitin ka̱ku iin ra loꞌo sikaku ndóꞌo̱ ñuu ra rey David, ta ra ikán ku Cristo ra ndi̱kaxin Ndioxi kaꞌnda chiñu nuu na ñuu ivi.

San Juan 14:23

Saa ndi̱kuiin Jesús, káꞌan ra: ―Na kúꞌvi ini xíni yeꞌe, ta xáa súvi na ya káꞌan i xiꞌin na ta kuꞌvi ini Iva i kuni ra na, ta saa kixi Iva i tin yeꞌe, kixi nde koo nde xiꞌin na.

San Juan 13:14

Tá tu yeꞌe ku Maestro ndo tin ra kaꞌnu nuu ndo, ta ndi̱kata i xaꞌa ndo. Ta saa ndóꞌo̱, saa xíniñuꞌu ndo ndikata ndo xaꞌa taꞌan ndo.