Filipenses 1:6 - Xochapa Mixteco

⁶ Ta yeꞌe, ta xa kúndaa teꞌe ini i xaꞌa ndo, chi Ndioxi ku ra xa̱á xáa chiñu xiꞌin nima ndo, ta saa xaa chiñu ka ra xiꞌin ndo ndakua ná xinu ndo nduu ndo tá kuꞌva kúni mií ra, nda kivi tá ná ndiko koo Tata yo Jesucristo ñuu ivi yóꞌó.

Filipenses 1:6 Referans Kwoze

Filipenses 2:13

Saa chi Ndioxi ku ra chíkaa ya vaꞌa ini ndo ya kuni ndo ikan ndo ya vaꞌa, ta suvi ra chíndee ndóꞌo̱ ya xaa súvi ndo ya kúni mií ra.

Efesios 4:12

Ta mií Cristo ku ra si̱niꞌi ndee vaꞌa yóꞌó nuu ndiꞌi yo kúu ñuu ra, yo i̱í, xa̱a ndúvi ra xiꞌin yo xaꞌa chiñu ra ya chindee taꞌan yo xiꞌin taꞌan yo, saa xaꞌa ni yo ndee xiꞌin na kúu ikin kuñu ra.

1 Pedro 5:10

Sundi ndóꞌo̱ ta kündiꞌi ini ndo chi tá sindiꞌi ndi̱yaꞌa uvi ndaa kivi ya ndi̱xuꞌvi ni ndo, ta mií Ndioxi ku ra ndasa xuxa ini ndo, ta saa taxi ra ndee ndaꞌa ndo ya tuun ni kundikun ndo ra, saa niꞌi ndo ndee nuu ra ndundee ini ndo ta ta̱xi ra ichí ndaꞌa ndo tuun ni koo ndo xiꞌin ra.

1 Corintios 1:8

Chi suvi mií Ndioxi ku ra xáꞌa ni ndee xiꞌin ndo, nda kivi tá ná ndiko koo Tata yo Jesucristo, ta nditaꞌan ra ndóꞌo̱ ya köo nda iin kuachi kúu mií ndo.

2 Tesalonicenses 1:11

Xaꞌa ya ñaa kua káꞌan ni nde xaꞌa ndo xiꞌin Ndioxi, ndiꞌi saa tiempo ya ná chindee ra ndóꞌo̱ ya kuu ndo naꞌa, na ndee ni ndáa yaꞌvi nuu ra, ya ndi̱kaxin ra ndóꞌo̱ kundikun ndo Tata yo Jesucristo koo ndo tá kuꞌva kúni mií ra. Ta saa ná ikan ra ya vaꞌa xiꞌin ndo sixinu ra ya ndíkani ini ndo ikan ndo, saa chi ndáa ni ini ndo ra xaꞌa chiñu íkan ndo.

HEBREOS 10:35

Yakan ndóꞌo̱, ta sïndikoo ndo ya ndáa ni ini ndo xíni ndo Ndioxi, saa chi vaxi kivi ta yáꞌa ni vaꞌa ya niꞌi ndo nuu ra.

San Juan 6:29

Saa ndi̱kuiin ra ndi̱kaꞌan ra, káchi ra saa: ―Ya yóꞌó kua kúni Ndioxi xaa súvi ndo nuu ra: Kandixa ndo Taa, ra ti̱ꞌvi ra vaxi nuu ndo ―káchi ra xiꞌin na.

Filipenses 1:10

Ta saa kuchiñu ndo ndikaxin ndo ikan ndo nina ya vaꞌa, ya ndee ni ndáa yaꞌvi nuu Ndioxi, ta kivi ná ndiko koo Jesucristo ta nditaꞌan ra ndóꞌo̱ ya íyo vií ni ndo nuu ra, ta köo kuachi kúu mií ndo.

HEBREOS 12:2

Ta iindaa mituꞌun xaꞌa Tata yo Jesucristo kua ná kundiꞌi ni ini yo, saa chi mií ra ku ra sínaꞌa yoo ndá kuꞌva kua kundaa ni ini yo kuni yo Ndioxi, saa tu iindaa mituꞌun mií ra ku ra chíndee yoo, ndása vaꞌa ra kuꞌva ndáa ni ini yo xíni yo Ndioxi. Ta saa ndi̱xaꞌa ndee ndiꞌi ini ra ndoꞌo ni ra nuu cruzin, ta köo ndi̱kiꞌin ra kuenta xaꞌa ya kúkaꞌan nuu ra, chi kúndaa ini ra tá si̱ndiꞌi ndo̱ꞌo ra saa ta kusini ni ra. Ta vitin ndi̱kunduꞌu ra ñaꞌñu kuáꞌá Ndioxi xáꞌnda chiñu ra xiꞌin Ndioxi.

1 Tesalonicenses 1:3

Ta táxi ni nde tixaꞌvi ndaꞌa Iva yo Ndioxi xaꞌa kuꞌva ya kándixa ni ndo ra, saa kúꞌvi ni ini ndo xíni ndo ra, ta ya ñaa kua xáꞌa ni ndee xiꞌin ndo ya ndee ni vaꞌa xáa chiñu ndo nuu ra, chi kúndaa teꞌe ini ndo ya xaa súvi ra ya ndi̱kaꞌan ra xiꞌin ndo, ta ya ñaa kua chíndee ni ndóꞌo̱ ndee ni tuun ndíkun ndo Tata yo Jesucristo.

FILEMÓN 1:21

Táa i tutu yóꞌó xaa ya ndaꞌa un ñani yo, chi yeꞌe ta ndáa ni ini i xíni i yóꞌo̱ ya xaa súvi un chiñu ya ndúku i nuu un, ta nda kuaꞌa ka ya ikan un xiꞌin i.

Filipenses 1:29

Ta mií Ndioxi ku ra chi̱kaa ya vaꞌa ndóꞌo̱ ya kandixa ndo Cristo xiꞌin ya ndoꞌo ni ndo xaꞌa ra.

2 Tesalonicenses 3:4

Ta ndáa ni ini nde xíni nde Tata yo Jesucristo ya chindee ra ndóꞌo̱ xaa súvi ndo ndiꞌi ya ndi̱kaꞌan nde xiꞌin ndo, ta ndiꞌi saa ichí ná ikan ndo saa.

Colosenses 2:12

Chi tá kivi chi̱chi ndo xaꞌa ya kándixa ndo Jesucristo, ta kúni kachi ya, tá íin ndo ndi̱nduxin xiꞌin ra saa íin ndo, ta ndi̱taku ndo xiꞌin ra xaꞌa ya ndáa ni ini ndo xíni ndo Ndioxi ya si̱taku ra Tata yo Jesucristo tá ndi̱xiꞌi ra.

2 Corintios 7:16

Kúsini ni i chi yáꞌa ni ndáa ini i xíni i ndóꞌo̱ xaꞌa ya íkan ndo saa.

Los Hechos 11:18

Tá xi̱ni soꞌo na ya ndi̱kaꞌan ra Pedro, ta ku̱taxin yuꞌu na. Ñaa xa̱á káꞌan na ya vaꞌa xaꞌa Ndioxi, káchi na saa: ―Tá tu saa ku̱u, ta kúni kachi ya, nda na köo kúu judío va ta̱xi Iva yo Ndioxi ichí ndaꞌa ya ndiko koo ini na xaꞌa kuachi na, ta saa kutaku na xiꞌin ra ―káchi na.

Los Hechos 16:14

Ta iin yá taꞌan ná ikán náni yá Lidia ke̱e yá iin ñuu vaꞌa ya chee ni Tiatira nani ya, saa kúu mií yá chiñu xíko yá toto, ta ya vaꞌa ni ku ya xíko yá, ndakua ndíꞌi tuun ya xíko yá. Ta káñuꞌu ni yá ikán Ndioxi. Saa xíni soꞌo ni yá ya káꞌan ra Pablo, ta chi̱ndee Iva yo yá xu̱na yá nima yá nuu tuꞌun ra.

Gálatas 5:10

Ta yeꞌe, ta kándixa i ya chindee Ndioxi ndóꞌo̱ ya kundaa ini ndo, ya ná kändixa ndo ya káꞌan nda vata ñaa xiꞌin ndo. Chi nda ñaa ku nda sáka ini ndo xaꞌa ñaꞌa ya káꞌan nde xiꞌin ndo, ta vaꞌa chi mií Ndioxi ku ra sindoꞌo ini nda xaꞌa ya íkan nda saa, án ndá ka mií naꞌa kúu va na, ta saa ikan ra xiꞌin na.

2 Pedro 3:10

Sundi tá xa ná ndiko koo Tata yo Jesucristo, ta iin kuu soꞌva va ndiko koo ra, tá kuꞌva íkan ra kuiꞌna kuakiꞌvi veꞌe na, saa koo ná ndiko koo ra, chi nda iin na kündaa ini ndá kivi kua ndiko koo ra, yáꞌa ni ìyo niꞌi, saa ndiꞌi xaꞌa ndivi xiꞌin ñu̱ꞌu̱ koko ndiꞌi ya. Saa tu ñuu ivi yóꞌó xiꞌin ndiꞌi ñaꞌa kúu mií ya, iin kuꞌva saa ndiꞌi xaꞌa yaa ya.

2 Corintios 9:4

Chi án sana kuꞌun sava nda ñani yo ñuu Macedonia yóꞌó xiꞌin i ta sana nditaꞌan nde ndóꞌo̱ ya köo íyo ndúvi ndo, ta ndee ni sikaꞌán ndo nuu i, ta saa kukaꞌan ni tu nuu mií va ndo, chi ndee ni vaꞌa ndi̱kaꞌan nde xaꞌa ndo xiꞌin na.

2 Corintios 2:3

Xaꞌa ya ñaa kua vaꞌa ka ta̱a i tutu xaa ya nuu ndo, ta köo ndi̱xaa mií i nuu ndo, ya ná xäa suchi i ini ndo. Chi tá ná ndi̱kitaꞌan tuku i xiꞌin ndo ta xäa suchi ndo ini i, xaa sií va ndo ini i.

2 Corintios 1:15

Ta xaꞌa ya ndáa ni ini i ya kuchiñu ndo kundaa ini ndo xiꞌin ya ndi̱kaꞌan i xiꞌin ndo, yakan ndi̱kani ini i xaa i koto i ndóꞌo̱, ta vaꞌa ni kee ndo, chi uvi ichí vi xaa i nuu ndo.

Filipenses 2:12

Na taꞌan yo, na kúꞌvi ni ini i xíni i, yachi tá ndi̱xiyo i xiꞌin ndo ta ndiꞌi saa ichí xa̱a súvi ni ndo tuꞌun Ndioxi ya ndi̱kaꞌan i xiꞌin ndo. Ta saa tu vitin va, vani köo íyo i xiꞌin ndo ta ndee ni ka xíniñuꞌu ndo xaa nduxa ndo ya ikan ndo ya vaꞌa taꞌan ya íkan naꞌa, na síkaku Ndioxi. Ikan ndo saa xaꞌa ya xáa toꞌo ndo Ndioxi, saa tu xaꞌa ya íꞌvi ndo xíni ndo ra.

Filipenses 2:16

Chi tuun ni ndíkun ndo tuꞌun ra ya táxi táku ndo xiꞌin Ndioxi. Tá íkan ndo ya yóꞌó, ni yeꞌe, ta vaꞌa ni kúni i xiꞌin ndo. Chi kivi tá ná ndiko koo Cristo ñuu ivi yóꞌó ta kuni ra ya ndixa kua xa̱a chiñu i xiꞌin ndo, ta köo ndi̱xaa chiñu uun i xiꞌin ndo.