Filipenses 1:10 - Xochapa Mixteco

¹⁰ Ta saa kuchiñu ndo ndikaxin ndo ikan ndo nina ya vaꞌa, ya ndee ni ndáa yaꞌvi nuu Ndioxi, ta kivi ná ndiko koo Jesucristo ta nditaꞌan ra ndóꞌo̱ ya íyo vií ni ndo nuu ra, ta köo kuachi kúu mií ndo.

Filipenses 1:10 Referans Kwoze

ROMANOS 12:2

Ta köo ndo tá kuꞌva íyo na ñuu ivi yóꞌó, vaꞌa ka nditaxi ndiꞌi ndo mií ndo ndaꞌa ra ná ndinama ra ya xínituni ndo. Ná nduxaa kuꞌva ndíkani ini ndo. Saa kuchiñu ndo kundaa ini ndo, ta xaa súvi ndo ya kúni mií ra, ta saa kua ikan ndo ya vaꞌa, ya ndaa, ya xáa sini ndo ini ra.

1 Tesalonicenses 3:13

Ta káꞌan ni nde xiꞌin Ndioxi ya ná chindee ra ndóꞌo̱ koo tuun ni tuꞌun ra nima ndo, saa nduu ndo naꞌa, na i̱í ni, na köo nda iin kuachi kúu mií nuu Iva yo Ndioxi. Ta saa kua koo ndúvi ndo, tá ná ndiko koo tuku Tata yo Jesucristo kixi ra xiꞌin ndiꞌi na ñuu ra, na i̱í.

1 Tesalonicenses 5:23

Ta mií Ndioxi, ra táxi koo vaꞌa ni ini yo ná xaa i̱í ni ra ndiꞌi ni kúu ya vaꞌa ndo xiꞌin ya xínituni ndo xiꞌin ikin kuñu ndo. Saa ná chivaꞌa ra ndóꞌo̱, nda iin kuachi ná küu mií ndo tá kivi ná ndiko koo tuku Tata yo Jesucristo kixi ra ñuu ivi yóꞌó.

ROMANOS 2:18

Ta xíni ni ndo xaa súvi ndo ya kúni Ndioxi, ta saa ndee ni vaꞌa kúndaa teꞌe ini ndo ikan ndo ñaꞌa ya ndixa ndaa ni xiꞌin ya väꞌa, chi xa si̱kuaꞌa ni ndo ley ra, túvi ndo.

Efesios 5:10

Ta ndiꞌi saa kivi kiꞌin xiní ndo ya ikan ndo ndisaa ya vaꞌa kúni mií Ndioxi.

1 Juan 4:1

Ñani yo, ndóꞌo̱ ku ndo kúꞌvi ni ini i xíni i, ta vitin káꞌan i xiꞌin ndo. Kändixa ndo ndiꞌi na káꞌan Tachi I̱í Ndioxi síkaꞌán ini na kaꞌan na, káchi na. Chi vitin ta xa kuaꞌa ni na vata ka̱na koo ñuu ivi yóꞌó, ta káꞌan na síkaꞌán Tachi Ndioxi ini na kaꞌan na tuꞌun ra.

Filipenses 1:6

Ta yeꞌe, ta xa kúndaa teꞌe ini i xaꞌa ndo, chi Ndioxi ku ra xa̱á xáa chiñu xiꞌin nima ndo, ta saa xaa chiñu ka ra xiꞌin ndo ndakua ná xinu ndo nduu ndo tá kuꞌva kúni mií ra, nda kivi tá ná ndiko koo Tata yo Jesucristo ñuu ivi yóꞌó.

1 Tesalonicenses 5:21

Sundi koto ndoso ndo ndiꞌi tuꞌun ya káꞌan na xiꞌin ndo sínaꞌa na ndóꞌo̱, tá tu ya ndaa kua ta ndikiꞌin ndo ya.

1 Corintios 1:8

Chi suvi mií Ndioxi ku ra xáꞌa ni ndee xiꞌin ndo, nda kivi tá ná ndiko koo Tata yo Jesucristo, ta nditaꞌan ra ndóꞌo̱ ya köo nda iin kuachi kúu mií ndo.

El Apocalipsis 2:2

Xa xíni i xaꞌa ndiꞌi ya vaꞌa íkan ndo, saa xíni i ndee ni ndee xáa chiñu ndo nuu i, saa xíni i ya xáꞌa ndee ni ini ndo xiꞌin ya tíxuꞌvi ndo. Ta xíni i ya kúndasi ni nuu ndo xíni ndo naꞌa, na íkan ya väꞌa. Saa xíni i ya xi̱to ndoso ndo nda káꞌan xáa chiñu nda nuu Iva yo Ndioxi, ta süvi ya ndaa ku ya xáa chiñu nda nuu ra.

Efesios 5:27

I̱kan ra saa xiꞌin yo ya kuchiñu yo kuu yo na veꞌe ñuꞌu, na ndee ni vaꞌa náꞌa, na luvi ni íin. Chi ndi̱xiꞌi Cristo xaꞌa yo ya kuchiñu yo nduu yo naꞌa, na köo nda loꞌo paꞌa kuachi kúu mií nuu ra, ni tá kúꞌva ndóꞌo toto ya nda loꞌo páꞌa ka yakua köo nuu ya ta ni köo kútii ya. Chi mií ra ta kúni ra ná kuu yo naꞌa, na ií nuu ra.

San Juan 1:47

Tá xi̱ni Jesús kúyati ra Natanael xaa ra nuu ra, ta saa ndi̱kaꞌan ra xaꞌa ra, káchi ra saa: ―¡Ra vaxi yóꞌo̱ ta mií ra ñuu Israel, ra ndaa ni ini ku ra, ta ni köo ya síki íyo ini ra! ―káchi Jesús xaꞌa ra.

San Mateo 16:23

Saa ndi̱ko koo Jesús ndi̱kaꞌan ra xiꞌin ra, káchi ra saa: ―¡Kuataꞌa nuu i, Timiaꞌa! Saa chi sási un nuu i ya ná ïkan i ya kúni Iva i Ndioxi. Chi yóꞌo̱ ta köo ndíkani ini un tá kuꞌva ndíkani ini Ndioxi. Ndíkani ini un tá kuꞌva ndíkani ini na ñuu ivi yóꞌó va ―káchi Jesús xiꞌin ra Pedro.

2 Corintios 1:12

Ta ndeꞌe, ta ndee ni va kúsini nde chi vívií ni va ndi̱xiyo nde xiꞌin ndiꞌi ni kúu naꞌa, ta ndee ni ka vaꞌa xi̱taꞌan nde xiꞌin ndóꞌo̱. Chi köo ndi̱xiyo nde xiꞌin ndo tá kuꞌva ndíkani ini mií na ñuu ivi yóꞌó, tá kuꞌva kúni mií Ndioxi kua ndi̱xiyo nde xiꞌin ndo xaꞌa ya kúꞌvi ni ini ra xíni ra ndóꞌo̱.

ROMANOS 12:9

Tá kúꞌvi ni ini ndo xíni taꞌan ndo, ta ndixa ndinuꞌu ini ndo kuꞌvi ini ndo kuni taꞌan ndo. Kundasi nuu ndo kuni ndo ya väꞌa, ta chikaa ni ndo ndee ya kundikun ndo ya vaꞌa.

ROMANOS 8:7

Naꞌa na ndíkani ini xaꞌa ya väꞌa ya kútoo ni mií ikin kuñu na ikan ya, na ikán, ta na káni taꞌan xiꞌin Ndioxi ku na. Chi köo xíin na xaa súvi na ley ra, ta ni köo kúu mií na ndee xaa súvi na ya.

San Mateo 26:33

Saa ndi̱kuiin ra Pedro, káꞌan ra: ―Tata, vani sindikoo ndaꞌa ndiꞌi nda yóꞌo̱, sundi yeꞌe ta sïndikoo ndaꞌa i yóꞌo̱ ―káchi ra xiꞌin Jesús.

Filipenses 1:16

Chi xaꞌa ya kúni mií va na kua káꞌan ndoso na xaꞌa tuꞌun ra, süvi ndinuꞌu ini na íkan na saa, na síkaku kuachi xiꞌin i ndíkaa i veꞌe kàà yóꞌó va ku na.

Efesios 6:24

Ta mií Ndioxi ná chikaa ni ya vaꞌa ndiꞌi ndóꞌo̱ yáꞌa ni kúꞌvi ini xíni Tata yo Jesucristo. Saa ná koo.

Efesios 4:15

Vaꞌa ka ná kuxuxa ini yo xaꞌa ndiꞌi ni kúu kuꞌva ya ndíkani ini yo, ta saa nduu yo tá káa mií Cristo, ná sinaꞌa taꞌan yo xiꞌin ya ndaa xaꞌa ya kúꞌvi ini yo xínitaꞌan yo. Chi mií Tata yo Cristo ku ra ku xi̱ní, ra xáꞌnda chiñu nuu yo veꞌe ñuꞌu.

Gálatas 5:11

Ñani yo, tá tu yeꞌe sínaꞌa ku i naꞌa xaꞌa ya ná xaa súvi ka na costumbre ya ndikunuu tuni Ndioxi na, ni na judío ta xäa nduvaꞌa ka na xiꞌin i, ndíkuu. Chi tá saa ná kaꞌan i xiꞌin na ta säa ka ini na kuni yeꞌe xaꞌa ya sínaꞌa i ya ndi̱xiꞌi Jesucristo nuu cruzin xaꞌa kuachi yo, ndikuu.

2 Corintios 8:8

Ta ya káꞌan i xiꞌin ndo kuꞌva soꞌva, ta süvi yeꞌe xáꞌnda chiñu ku i nuu ndo, káꞌan i xiꞌin ndo saa ya kúni i ná kuni ndo ndá kuꞌva íyo ndúvi inka na taꞌan yo ya chindee taꞌan na xiꞌin na taꞌan yo, na ndaꞌvi. Ta kuꞌva saa kúni i ná ikan ndo tá kuꞌva íkan na taꞌan yo ikán. Saa kua vaꞌa sinaꞌa ndo mií ndo nuu na ya ndixa kua kúꞌvi ni ini ndo xíni ndo na.

2 Corintios 6:3

Ta ndee ni kuenta íyo nde xaꞌa ñaꞌa ya íkan nde, chi köo íkan ndikuu nde ndá ka ñaꞌa väꞌa nuu naꞌa ya ná nïꞌi na ndá ka ñaꞌa kaꞌan ndikuu na xaꞌa chiñu íkan nde.

2 Corintios 2:17

Ndeꞌe, ta köo kíꞌin nde yaꞌvi nde xaꞌa ya ndítuꞌun nde tuꞌun Ndioxi xiꞌin naꞌa, tá kuꞌva íkan sava na, chi síndaꞌvi na ivi. Sundi ndeꞌe, ta ndaa ni ndítuꞌun nde xiꞌin na. Nuu Ndioxi káꞌan nde xiꞌin na, chi mií ra ku ra ti̱ꞌvi ndeꞌe kaꞌan ndoso nde xaꞌa ra, xaꞌa ya xa iin ndi̱kitaꞌan nde xiꞌin Jesucristo.

1 Corintios 10:32

Ta küvi ikan ndo ñaꞌa xiꞌin na taꞌan yo, ya sindikava ndo ini na, án na judío ku na, án süvi na judío ku na, án na kándixa Tata yo Jesucristo ku na, ta küvi ikan ndo saa xiꞌin na.

1 Corintios 8:13

Yakan tá xaꞌa ya xíxi yo kuñu kua síndikava yo na taꞌan yo nuu kuachi, ta vaꞌa ka kua ná küxi ka yo kuñu nda iin ichí, ya ná täxi yo koyo na taꞌan yo nuu kuachi.

ROMANOS 16:17

Ñani yo xiꞌin kuꞌva yo, xíkan ni i ya mani nuu ndo, kundaa ni ndo mií ndo nuu naꞌa, na táꞌvi naꞌa veꞌe ñuꞌu. Kuenta ni koo ndo xiꞌin na, saa chi köo íyo yuꞌu na xiꞌin ya si̱naꞌa nde ndóꞌo̱, ta kúni na ndi̱kasi na nuu ndo ya ná kändixa ndo tuꞌun vaꞌa xaꞌa Jesucristo. Kuxika ndo nuu na ñaa, kütaꞌan ndo xiꞌin na.

ROMANOS 7:22

Ndinuꞌu ni va ini i kúsini i xíni i ley Ndioxi.

ROMANOS 7:16

Tá tu íkan i ñaꞌa ya väꞌa, ya köo kútoo i ikan i, ta ya ñaa kúni kachi ya: kúndaa ini i ya ndaa ni ku ley Ndioxi.

Los Hechos 24:16

Xaꞌa ya kándixa i ya ñaa yakan kua kíꞌin ni i kuenta xaꞌa ñaꞌa íkan i nuu Ndioxi xiꞌin nuu na ñuu ivi yóꞌó.

San Juan 3:20

Chi ndiꞌi na íkan ya väꞌa ta kúndasi nuu na xíni na ya yéꞌe̱, yakan köo xíin na kuyati na nuu yéꞌe̱, chi köo kúni na ndituvi ndiꞌi ya väꞌa íkan na.

Filipenses 2:16

Chi tuun ni ndíkun ndo tuꞌun ra ya táxi táku ndo xiꞌin Ndioxi. Tá íkan ndo ya yóꞌó, ni yeꞌe, ta vaꞌa ni kúni i xiꞌin ndo. Chi kivi tá ná ndiko koo Cristo ñuu ivi yóꞌó ta kuni ra ya ndixa kua xa̱a chiñu i xiꞌin ndo, ta köo ndi̱xaa chiñu uun i xiꞌin ndo.