El Apocalipsis 4:6 - Xochapa Mixteco

⁶ Ta suvi maꞌñu nuu ndíchi tai toꞌo ikán, xi̱ni i ndíkaa nduta ñûꞌu kuíi̱ ka vi rá, tá káa iin yuyu yéꞌe̱ nda inka ñaꞌñu ya, saa kuíi rá. Ta suvi maꞌñu nuu ndíchi mií tai toꞌo ikán ndi̱kava nduu kumi ya táku, ta kumi saa ya kúu mií ya nina nduchi nuu kándika ya tin sata ya.

El Apocalipsis 4:6 Referans Kwoze

El Apocalipsis 15:2

Saa xi̱ni i inka ñaꞌa tá káa yuyu yéꞌe̱ ni saa káa nduta ñûꞌu xi̱ni i, ta sáka ñu̱ꞌu̱ xiꞌin rá. Ta yuꞌu nduta ñûꞌu ikán ndíta kuaꞌa ni naꞌa na xa ku̱chiñu nuu kiti ìyo ni káa ikán, ta ni köo ndi̱xaa kaꞌnu na naꞌna ri ya ndíchi, saa ni köo ndi̱taxi na ndikunuu sello ri taan na án ndaꞌa na ya kúu mií número ya ndítuꞌun xaꞌa unkua náni ri. Saa ndíta na nuu nduta ñûꞌu yéꞌe̱ ni tá káa yuyu ya yeꞌe ni ikán, ñaa ta̱xi Ndioxi itun arpa ndaꞌa iin iin na.

El Apocalipsis 5:6

Saa xi̱ni i iin Levo loꞌo ndíchi ri yati nuu íin tai toꞌo ikán. Ta ndíchi tai toꞌo ikán maꞌñu kumi saa ya táku xiꞌin oko kumi saa na xikuaꞌa. Ta Levo loꞌo ikán tá náꞌa kiti ndi̱xiꞌi ndi̱soko naꞌa nuu Ndioxi, saa náꞌa ri. Ta íyo uxa ndikin ri tin íyo uxa nduchi nuu ri. Ta uxa nduchi nuu ri tin uxa ndikin ri ku ya káꞌan xaꞌa uxa tachi Ndioxi, ya ti̱ꞌvi ra kuaꞌan ndiꞌi ni kúu xaꞌa ñuu ivi yóꞌó.

El Apocalipsis 14:3

Naꞌa, na kuaꞌa ni ikán ku nda taa nda ndíta nuu íyo tai toꞌo nuu íyo Ndioxi, xíta nda iin yaa i̱í xa̱á. Saa íyo kumi saa ya táku ikán xiꞌin oko kumi saa na xikuaꞌa nuu íyo tai toꞌo ikán, ta xíni soꞌo na yaa ya xíta nda ikán. Ta nda iin ka naꞌa köo xíni kata yaa i̱í xíta nda ikán. Ndisaa nda kúu iin ciento uvi xiko kumi mil ikán ku nda xíni kata ya. Ndioxi si̱kaku ra nda ikán tañu naꞌa, na väꞌa íyo ñuu ivi yóꞌó.

El Apocalipsis 19:4

Saa si̱kusiti ndiꞌi oko kumi na xikuaꞌa xiꞌin kumi ya táku, ndi̱kuita ndee na si̱kusiti na nda nuu ñuꞌú ya xáa kaꞌnu na Ndioxi, ra íyo nuu tai toꞌo chee ni. Saa ndi̱kaꞌan na, káchi na saa: “Saa ná koo. Ná xaa kaꞌnu ni yo Ndioxi”, káchi na.

El Apocalipsis 5:14

Saa ndi̱kuiin kumi saa ya táku káchi ya saa: ―Saa ná koo ―káchi ya. Saa si̱kusiti ndiꞌi na xikuaꞌa nuu ra ndi̱kuita ndee ndiꞌi na nuu ra nda nuu ñuꞌú xáa kaꞌnu na ra táku ndiꞌi saa kúu kivi.

El Apocalipsis 7:11

Ta ndíta na tatun Ndioxi, ndi̱kava nduu ndiꞌi na sata tai toꞌo ikán nuu índuꞌu ra kaꞌnu, saa tu oko kumi saa nda xikuaꞌa xiꞌin kumi saa ya táku ikán. Ñaa si̱kusiti ndiꞌi na nda nuu ñuꞌú, yati nuu ndíchi tai toꞌo, ta xáa kaꞌnu na Ndioxi.

El Apocalipsis 22:1

Saa si̱naꞌa tatun ikán iin i̱tà nuu i, ta ndee ni yaa rá, ta rá ikán ku rá táxi ichí ya kutaku naꞌa ndiꞌi saa kivi xiꞌin Ndioxi. Ta kána koo rá nuu ndíchi tai toꞌo nuu índuꞌu Ndioxi xiꞌin Levo loꞌo. Tá kuꞌva yéꞌe̱ taxan vidrio, saa yéꞌe̱ rá.

El Apocalipsis 21:11

Ta ndee ni luvi yéꞌe̱ táxan mií ñuu i̱í chee ikán, mií ndee Ndioxi ku ya síndiyeꞌe ni ya. Tá kuꞌva yéꞌe̱ taxan yu̱ú ya yaꞌvi ni ya náni jaspe saa yéꞌe̱ ya. Tá yéꞌe̱ tuku ya tá yéꞌe̱ vidrio ya vaꞌa xíto yo inka ñaꞌñu sata, saa yéꞌe̱ ya, yáꞌa ni luvi yéꞌe̱ ñuu ikán.

El Apocalipsis 15:7

Ta iin taꞌan ya kumi ya táku ikán, ta̱xi ya iin copa ya oro ndaꞌa iin iin tatun ikán. Ta chútu ndaa ya sáa ni ini Ndioxi ini iin iin copa ya oro ikán chi mií ra ku ra táku ndiꞌi saa kúu kivi.

El Apocalipsis 21:21

Ta uxi uvi saa yéꞌe mií nama ya ndi̱kava nduu sata mií ñuu i̱í ikán, ndi̱kuaꞌa ya xiꞌin iin iin yu̱ú vaꞌa ni ya luvi ni yéꞌe̱, ya náni perla. Ta mií ichí kaꞌnu mi ñuu i̱í ikán ndi̱kuaꞌa ya xiꞌin oro nina. Ta luvi ka vi yéꞌe̱ nuu mií ichí ikán, tá káa iin vidrio ya vaꞌa xíto yo inka ñaꞌñu sata saa káa ya.

El Apocalipsis 21:18

Nama sukun ikán ndi̱kuaꞌa ya xiꞌin nina yu̱ú luvi ni ya yéꞌe̱ taxan, ya náni jaspe. Ta mií ñuu i̱í chee ikán ndi̱kuaꞌa ya xiꞌin nina mií oro. Tá káa vidrio ya yéꞌe̱ ta xíto yo inka ñaꞌñu sata ya, saa káa oro ikán.

El Apocalipsis 7:17

Saa chi Levo loꞌo kiti índuꞌu maꞌñu nuu ndíchi tai toꞌo ku ri kundaa na tá kuꞌva ndáa iin ra taa levo sana ra saa kundaa ri na. Ta kundaka ri na kuꞌun na koꞌo na tikuii, chi tikuii ikán taxi rá kutaku na. Ta Ndioxi ndiyakun ra ndiꞌi tikuii nuu na xaꞌa ya xáku ni na, chi sindiꞌi ra ya kúsuchi ni ini na.

El Apocalipsis 4:4

Ta nuu ndíchi tai toꞌo chee ikán ndíta ka oko kumi tai toꞌo, ndi̱kava nduu ndiꞌi nu sata itun tai toꞌo chee ikán, ta ndóo oko kumi na xikuaꞌa nuu nu, yaa ka vi toto ndíxi iin iin na xikuaꞌa ikán, saa ínuu iin corona ya oro xiní iin iin na.

El Apocalipsis 5:8

Tá ti̱in soꞌva ri tutu ikán, ta ndikun si̱kusiti kumi saa ya táku ikán xiꞌin oko kumi saa na xikuaꞌa, si̱kusiti na nuu kiti Levo loꞌo ikán. Ta níꞌi iin iin na xikuaꞌa ikán itun arpa xiꞌin iin koꞌo chôꞌma ya oro nuu xíxi xuxa vaꞌa ya támi ni xáꞌan, ta iꞌma kána koo ini ya ikán kua káꞌan xaꞌa tuꞌun ya káꞌan naꞌa, na i̱í xiꞌin Ndioxi.

El Apocalipsis 5:11

Tá ndi̱ꞌi saa ndi̱koto i, ta xi̱ni soꞌo i káꞌan kuaꞌa ni na tatun Ndioxi, na ikán ta yaꞌa ni kuaꞌa millón ku na. Saa chu̱tu ndaa na nuu índuꞌu ra kaꞌnu, ra índuꞌu nuu tai toꞌo, xiꞌin kumi saa ya táku tin oko kumi saa na xikuaꞌa ikán.

El Apocalipsis 6:1

Saa xi̱ni i xa̱ꞌnda Levo loꞌo ikán iin sello ya núnu̱ú, ya ndási tutu ikán. Saa ndi̱kaꞌan iin taꞌan kumi ya táku ikán xiꞌin i, ta ndee ni ndi̱kaꞌan ya xiꞌin i tá kúu ndáꞌi savi saa kúu ndi̱kaꞌan ya xiꞌin i, káchi ya saa: ―¡Naꞌa yóꞌó, koto un! ―káchi ya xiꞌin i.

El Apocalipsis 6:6

Saa xi̱ni soꞌo i tachi iin na, ke̱ta ya maꞌñu kumi saa ya táku ikán, káꞌan ya káchi ya saa: ―Xa nda̱a ni yaꞌvi trigo xiꞌin cebada. Tá kuꞌva cháꞌvi naꞌa iin na xáa chiñu xiꞌin na iin nduvi ndaa, saa yaꞌvi iin kilo trigo xiꞌin uni kilo cebada. Ta koto vaꞌa ndo sïtivi ndo nduta ceite ni nduta vino ―káchi tachi na ndi̱kaꞌan xi̱ni soꞌo i.