Efesios 5:27 - Xochapa Mixteco

²⁷ I̱kan ra saa xiꞌin yo ya kuchiñu yo kuu yo na veꞌe ñuꞌu, na ndee ni vaꞌa náꞌa, na luvi ni íin. Chi ndi̱xiꞌi Cristo xaꞌa yo ya kuchiñu yo nduu yo naꞌa, na köo nda loꞌo paꞌa kuachi kúu mií nuu ra, ni tá kúꞌva ndóꞌo toto ya nda loꞌo páꞌa ka yakua köo nuu ya ta ni köo kútii ya. Chi mií ra ta kúni ra ná kuu yo naꞌa, na ií nuu ra.

Efesios 5:27 Referans Kwoze

Colosenses 1:22

xaꞌa ya ndi̱xiꞌi Cristo tá xi̱tikaa ndaa ikin kuñu ra ndaꞌa cruzin kua ndi̱kitaꞌan mani ndo xiꞌin Ndioxi. Saa nda̱sa i̱í Cristo ndóꞌo̱ nuu Ndioxi, ndu̱u ndo naꞌa, na vaꞌa, na köo yakua ka, na köo ka kuachi kúu mií nuu ra.

HEBREOS 9:14

Tá tu ku̱chiñu nií ikán xiꞌin yaá nda̱sa vaꞌa ya sata ikin kuñu na, ta ¡ndisaa ka vi nií Jesucristo, ndee ni ka ndee kúu mií rá ikán chi nda loꞌo kuachi ra köo, yakan vaꞌa ndasa vaꞌa rá yoo xaꞌa Tachi ra ya táku ndiꞌi saa ichí! Saa chi nií mií ra ku rá ndása vaꞌa nima yo, ndúvaꞌa yo nuu kuachi ya xáꞌni yoo, ta saa kua kuchiñu yo xaa chiñu yo nuu Ndioxi, ra táku.

1 Pedro 1:19

tá kuꞌva yáꞌa ni ndee kúu mií nií Tata yo Jesucristo nduta ndáa yaꞌvi ni, rá vaꞌa, rá ndi̱xita nuu cruzin, rá káa tá káa nií kiti levo loꞌo ri sóko sutu nuu Ndioxi, ri vaꞌa ni, ri köo nda loꞌo ya väꞌa kúu mií. Kuꞌva saa ndi̱xiyo nií ra, rá cha̱ꞌvi Ndioxi xaꞌa kuachi yo.

Efesios 1:4

Nda yachi ka tá täꞌan xikoo xaꞌa ñuu ivi vi kua ndi̱kaxin ra yoo tixin Jesucristo ya ná nduu yo naꞌa, na i̱í, na köo nda iin kuachi ku mií nuu ra.

2 Corintios 11:2

Chi yeꞌe, ta ndee ni ndíꞌi ini i xaꞌa ndo, tá kuꞌva ndíꞌi ini Ndioxi xíni ra ndóꞌo̱, saa ndíꞌi ni ini i xíni i ndóꞌo̱. Chi ki̱ndoo i taxi i ndóꞌo̱ ndaꞌa ra, tá kuꞌva íkan taa, táxi ra seꞌe síꞌi ra tíndaꞌa yá xiꞌin iin taa. Ta kuꞌva saa íyo yeꞌe nditaxi i ndóꞌo̱ ndaꞌa Jesucristo tindaꞌa ndo xiꞌin ra. Tá kuꞌva íin ná kuâán taki vali ná täꞌan tindaa nda iin taa, kuꞌva saa kúni i koo ndo nditaxi i ndóꞌo̱ ndaꞌa Jesucristo.

Colosenses 1:28

Ta ndeꞌe káꞌan ndoso nde xaꞌa ra xiꞌin ndiꞌi naꞌa, ndíkani nde nuu na, saa sínaꞌa nde na xaꞌa ndiꞌi tuꞌun ra ya ndíchi táxi Ndioxi ndaꞌa nde. Chi kúni i sinaꞌa i na yóꞌó nuu Ndioxi ya nduu na naꞌa, na ndǎku ni ini nuu ra, ta xa ku̱ndaa vaꞌa ini na xiꞌin tuꞌun ra.

2 Corintios 4:14

Saa chi ndeꞌe, ta xíni nde ya si̱taku Ndioxi Jesús ta saa sitaku tu ra yoo va. Saa tu ndóꞌo̱ va, iin káchi sitaku ra ndiꞌi yo, ta saa kundaka ra yoo kuꞌun yo xiꞌin ra nuu íyo mií ra.

Judas 1:24

Ná xaa kaꞌnu ni yo Ndioxi chi ndee ni ndee kúu mií ra ya chindee ra yoo ya ná sïndikoo yo ichí ra ya ndaa kándixa yo. Ta vaxi kivi kundita yo nuu ra nuu íyo ndiꞌi ya kaꞌnu luvi ni. Saa ndasa vaꞌa ra yoo nduu yo naꞌa, na köo ka kuachi kúu mií nuu ra, ta yáꞌa ni kusini yo kivi ikán.

2 Pedro 3:14

Xaꞌa ya ñaa kua, nani ndátun yo kuu saa, ñani mani, ta yáꞌa ni vi kuenta koo ndo xiꞌin mií ndo, täxi ndo kuyakua ndo xiꞌin kuachi, vií ni koo ndo xiꞌin Ndioxi.

Judas 1:21

Ta sïndoo ndo ya ndíkun ndo ichí Ndioxi, ra kúꞌvi ni ini xíni ndóꞌo̱, ta saa niꞌi ndo koo ndo xiꞌin ra ndiꞌi saa ichí xaꞌa ya kúndaꞌvi ni ini ra xíni ra ndóꞌo̱.

1 Tesalonicenses 5:23

Ta mií Ndioxi, ra táxi koo vaꞌa ni ini yo ná xaa i̱í ni ra ndiꞌi ni kúu ya vaꞌa ndo xiꞌin ya xínituni ndo xiꞌin ikin kuñu ndo. Saa ná chivaꞌa ra ndóꞌo̱, nda iin kuachi ná küu mií ndo tá kivi ná ndiko koo tuku Tata yo Jesucristo kixi ra ñuu ivi yóꞌó.

El Apocalipsis 14:4

Vaꞌa ni xi̱ndaa nda ikán mií nda, chi köo ndi̱kiꞌvi nda xiꞌin nda iin ná ñaꞌa, nda tá íyo iin taa ra köo ndi̱tindaa iin ñaꞌa, saa ndi̱xiyo nda ikán. Ta ndinuꞌu ni ini nda ndíkun nda sata Levo loꞌo ikán, nda mií nuu kuaꞌan ri ta ndíkun nda kuaꞌan nda sata ri. Chi ndee ni yaꞌvi cha̱ꞌvi Ndioxi xaꞌa nda. Tá káa ya vaꞌa, ya núnu̱ú sóko naꞌa nuu Ndioxi xiꞌin nuu kiti levo loꞌo, saa íyo nda ikán nuu ra.