Efesios 5:20 - Xochapa Mixteco

²⁰ Ndiꞌi saa ichí taxi ni ndo tixaꞌvi ndaꞌa Iva yo Ndioxi, xaꞌa ndiꞌi ni kúu ñaꞌa tixin Tata yo Jesucristo.

Efesios 5:20 Referans Kwoze

Colosenses 3:17

Ta ndiꞌi ñaꞌa íkan ndo án ya káꞌan ndo, ta vaꞌa ikan ndo ndiꞌi ya xaꞌa ya chinuu vaꞌa ndo tuꞌun mií Tata yo Jesús, saa taxi ni ndo tixaꞌvi ndaꞌa Iva yo Ndioxi.

1 Tesalonicenses 5:18

Ndiꞌi saa ichí taxi ndo tixaꞌvi ndaꞌa ra xaꞌa ndiꞌi ñaꞌa, saa chi saa kúni Ndioxi ikan ndo xaꞌa ya ndíkun ndo Jesucristo.

HEBREOS 13:15

Ta vitin, xaꞌa ya íyo Jesucristo nima yo kua ná xaa kaꞌnu ni yo Ndioxi ndiꞌi saa kivi, chi tá íkan yo saa ta tá íin ñaꞌa ya sóko yo nuu Ndioxi saa íin ya vaꞌa kána koo yuꞌu yo káꞌan yo, yakan kua ná xaa kaꞌnu yo Iva yo Ndioxi.

Filipenses 4:6

Ta nda iin ya kündiꞌi ini ndo xaꞌa. Tá ndá ya kúmani nuu ndo ta kuaku ndaꞌvi ndo nuu Ndioxi. Nduku ndo ñaꞌa ya xíniñuꞌu ndo nuu ra, saa taxi ni ndo tixaꞌvi ndaꞌa ra xaꞌa ya chíndee ra ndóꞌo̱.

Efesios 5:4

Ni käꞌan kini ndo, ni ndá ka tuꞌun ya köo ndáa yaꞌvi käꞌan ndo, ni käꞌan siki ndo xaꞌa ndá ka ñaꞌa ya kini ni káa, ni käꞌan ndo ndá ka tuꞌun ya kini. Ta ya vaꞌa ni ikan ndo kua kaꞌan ndo tuꞌun vaꞌa ya táxi ndo tixaꞌvi ndaꞌa Ndioxi.

2 Tesalonicenses 1:3

Ñani yo xiꞌin kuꞌva yo, ndiꞌi saa ichí xíniñuꞌu ni nde kaꞌan nde xaꞌa ndo xiꞌin Ndioxi. Chi ndóꞌo̱, ta kándixa ni ndo ra, ta vitin taan xáꞌnu ka ndo xiꞌin tuꞌun ra, saa kúꞌvi ni ini ndo xíni taꞌan ndo.

2 Tesalonicenses 2:13

Sundi ndeꞌe, ta ndiꞌi saa ichí táxi ni nde tixaꞌvi ndaꞌa Ndioxi xaꞌa ndo, chi Ndioxi ta kúꞌvi ni ini ra xíni ra ndóꞌo̱. Saa ndi̱kaxin ra ndóꞌo̱ ya sikaku ra xiꞌna ndóꞌo̱, nda̱sa vaꞌa ra ini ndo tixin Tachi I̱í ra. Xaꞌa ya ndáa ni ini ndo xíni ndo ya ndaa xaꞌa Tata yo Jesucristo.

1 Pedro 2:5

Ta saa ndóꞌo̱ tá káa yu̱ú táku ikán saa íin ndo, chi yu̱ú ikán kua ndee ni xíniñuꞌu ra síkuaꞌa ra veꞌe ñuꞌu i̱í ya küvi kuni yo. Ta ndóꞌo̱ ku ndo xáa chiñu ini veꞌe ñuꞌu ikán chi tá íin sutu nda i̱í, saa íin ndo xáa chiñu ndo ini ya, ta tixin Jesucristo kua sóko ndo ya i̱í, ya vaꞌa nuu Ndioxi.

1 Corintios 1:4

Ndiꞌi saa kivi táxi ni i tixaꞌvi xaꞌa ndo ndaꞌa Ndioxi, ra kándixa i, chi vaꞌa ni ra si̱niꞌi uun ra ya vaꞌa nuu ndo xaꞌa ya ti̱ꞌvi ra Tata yo Jesucristo ki̱xi ra ñuu ivi sikaku ra ndóꞌo̱.

San Juan 15:16

Ta süvi mií ndo ndi̱kaxin yeꞌe, mií i ndi̱kaxin ndóꞌo̱. Ta ndi̱kaxin i ndóꞌo̱ ya ná ikan ndo nina ya vaꞌa. Tá íin itun kuiꞌi kána kuaꞌa ni ñaꞌa ndaꞌa saa ná koo ndo. Ndiꞌi saa ichí koo ndo tá íin kuiꞌi vaꞌa ni kúun. Tá íkan ndo saa ta vaꞌa nduku ndo ndiꞌi ya kúmani nuu ndo nuu Iva i. Ta tixin kivi yeꞌe taxi ra ya ndúku ndo nuu ra ndaꞌa ndo.

1 Pedro 4:11

Ta ndóꞌo̱ ndi̱niꞌi ya vaꞌa xínituni ke̱e nuu Ndioxi ya kaꞌan ndoso ndo, ta vaꞌa kaꞌan ndoso ndo tá kuꞌva kúni mií Iva yo Ndioxi. Ta saa ndóꞌo̱ ndi̱niꞌi ya vaꞌa chindee taꞌan ndo xiꞌin inka naꞌa, ta vaꞌa chindee taꞌan ndo xiꞌin na xiꞌin ndiꞌi ndee ya ta̱xi Iva yo Ndioxi ndaꞌa ndo. Ta ndiꞌi ya íkan ndo, ta vaꞌa ikan ndo ya, ya xaa kaꞌnu ndo Ndioxi tixin Tata yo Jesucristo, ra ndee ni ndee ku mií xiꞌin ya luvi ni kúu mií ra, ta saa koo ra ndiꞌi saa kúu tiempo. Saa ná koo.

Filipenses 1:3

Ndiꞌi saa ichí tá ndíkaꞌán ini i xaꞌa ndo ta táxi i ndixaꞌvi xaꞌa ndo ndaꞌa Ndioxi yo, ra káñuꞌu i.

Los Hechos 5:41

Tá ka̱na koo nda kuaꞌan nda ta kúsini ni nda kuaꞌan nda, chi ta̱xi Ndioxi ichí ndo̱ꞌo nda xaꞌa ya ndítuꞌun nda xiꞌin naꞌa xaꞌa kivi Jesús.

1 Tesalonicenses 3:9

Ta ndixaꞌvi ni ndo ya íkan ndo saa, yáꞌa ni vi kúsini nde nuu Ndioxi xaꞌa ya xi̱ni soꞌo nde íkan ndo saa, ni köo níꞌi nde kuꞌva taxi nde tixaꞌvi ndaꞌa ra xaꞌa ndo.

ROMANOS 1:8

Xiꞌna kúni i kaꞌan i xiꞌin ndo tuꞌun yóꞌó: tixin ichí Jesucristo káꞌan i xiꞌin Ndioxi, táxi ni i tixaꞌvi ndaꞌa ra xaꞌa ndo. Saa chi ndee ni kándixa ndo Jesucristo yakan ndiꞌi ni kúu ñuu xíni soꞌo na tuꞌun vaꞌa xaꞌa ndo.

1 Corintios 15:24

Tá si̱ndiꞌi si̱taku ra naꞌa ikán, saa sindiꞌi xaꞌa ra ndiꞌi ndee ya xáꞌnda chiñu nuu na ñuu ivi yóꞌó, xiꞌin ndiꞌi ndee ya kúu mií na kúnaꞌnu xáꞌnda chiñu, xiꞌin ndiꞌi ñaꞌa ya xáꞌnda chiñu nuu ndivi. Saa nditaxi ra ichí ya kúu mií ra ndaꞌa Iva yo Ndioxi.