Efesios 4:21 - Xochapa Mixteco

²¹ Saa chi ya ndixa kua xa xi̱ni soꞌo ndo tuꞌun vaꞌa xaꞌa ra, ta xa ku̱ndaa ini ndo xaꞌa ya ndaa ya kúu mií ra.

Efesios 4:21 Referans Kwoze

1 Juan 5:20

Xíni tu yo ya ki̱xi Jesús Seꞌe Ndioxi ñuu ivi yóꞌó ta ta̱xi ra ya xínituni yo ya kundaa vaꞌa ini yo xaꞌa Ndioxi, ra ndaa. Ta iin yuꞌu ku yo xiꞌin Seꞌe ra, ra kúu Jesucristo, ra ndaa. Saa chi Jesucristo ku Ndioxi ra ndaa, ra táxi ichí ya kutaku yo xiꞌin Ndioxi ndiꞌi saa tiempo.

Efesios 1:13

Ta saa i̱kan tu Ndioxi xiꞌin ndóꞌo̱ va, tá xi̱ni soꞌo ndo tuꞌun vaꞌa ya ndaa, ya kúu tuꞌun vaꞌa xaꞌa Cristo nuu kuchiñu ndo kaku ndo, ta ka̱ndixa ndo ya. Saa chi̱nuu ra tuni ra ndóꞌo̱, ta ya ikán ku Tachi I̱í ra, ya xa ki̱ndoo ra taxi ra ndaꞌa ndo.

Colosenses 2:7

Tá kuꞌva kúnu ni ñúꞌu tioꞌo itun án tá kuꞌva kúnu ni kuáꞌa xaꞌa veꞌe, kuꞌva saa ndee ni tuun kandixa ndo ra, xaꞌa ni ndo ndee xiꞌin taꞌan ndo, koo ndo tá kuꞌva xa ku̱ndaa ini ndo xaꞌa ya ndaa si̱naꞌa nde ndóꞌo̱, ta saa taxi ni ndo tixaꞌvi ndaꞌa ra.

San Juan 14:17

Ta ya ikán ku Tachi Ndioxi ya sinaꞌa ndóꞌo̱ xaꞌa ya ndaa. Ta na köo ndíkun yeꞌe ta küvi ndikiꞌin na ya koo ya xiꞌin na, chi köo xíni na ya, ta ni küchiñu na kuni xiꞌin nuu na ya. Sundi ndóꞌo̱ ndíkun yeꞌe ta xíni ndo ya, ta íyo ya xiꞌin ndo, saa koo ya xiꞌin ndo ndiꞌi saa ichí.

2 Corintios 11:10

Ta kúndaa teꞌe ini i ya íyo ya ndaa xaꞌa Cristo xiꞌin i, saa kúndaa teꞌe ini i ya nda iin naꞌa küchiñu kindaa ya kúsini ni i, ya kïꞌin i xuꞌun ndaꞌa nda iin ndóꞌo̱ ndóo ñuu Corinto ya ndóꞌni estado Acaya ñaa.

2 Corintios 1:20

Saa chi mií ra ku ra síxinu ndiꞌi ya ndi̱kaꞌan Ndioxi taxi ra ndaꞌa yo. Xaꞌa ya ñaa kua tá xáa kaꞌnu yo Ndioxi ta káꞌan yo soꞌva: “Saa ná koo”, káchi yo, chi tixin mií Jesucristo kua káꞌan yo saa.

San Juan 14:6

Saa ndi̱kuiin Jesús ndi̱kaꞌan ra xiꞌin ra, káchi ra saa: ―Yeꞌe ku ra ku ichí, ta yeꞌe ku mií ya ndaa, yeꞌe ku ra táxi kutaku na. Nda iin na küvi kuꞌun nuu Iva i, tá tu süvi xiꞌna nuu yeꞌe vaxi na.

San Juan 10:27

Chi levo sana i ta ndíkuni ri tachi i, yakan vaꞌa ndíkundikun ri yeꞌe, ta saa tu yeꞌe va xíni ndiꞌi i ri ikán.

San Juan 1:17

Ta ley Ndioxi ta ndaꞌa xii sikua yo ra Moisés ta̱xi Ndioxi ya xa̱ꞌnda chiñu ya nuu yo. Sundi ya ndaa xiꞌin ya kúꞌvi ni ini Ndioxi xíni ra yoo ta tixin Jesucristo kua xa̱a ya nuu yo.

San Lucas 10:16

Ta saa ndi̱kaꞌan ra xiꞌin uni xiko uxi saa nda ikán, káchi ra saa: ―Ndiꞌi na ndíkiꞌin tuꞌun ya káꞌan ndóꞌo̱, tuꞌun yeꞌe kua ndíkiꞌin na. Ta ndiꞌi na kúndasi ndóꞌo̱, yeꞌe ku i kúndasi na. Ndiꞌi na kúndasi yeꞌe, Ndioxi ku ra kúndasi na ikán, saa chi Ndioxi ku ra ti̱ꞌvi yeꞌe vaxi i ñuu ivi yóꞌó ―káchi Jesús xiꞌin nda.

San Mateo 17:5

Saa káꞌan ka ra Pedro xiꞌin ra, ñaa iin ndi̱kava nduu ndiꞌi viko yéꞌe taxan sata nda, ta tañu viko ikán xi̱ni soꞌo nda tachi Ndioxi, ndi̱kaꞌan ya xiꞌin nda, káchi ya saa: ―Ra yóꞌó ku seꞌe i, ra kúꞌvi ni ini i xíni i, ta kúsini ni i xiꞌin ra. Kuni soꞌo ndo ya káꞌan ra xiꞌin ndo ―káchi tachi Ndioxi xiꞌin nda.

ROMANOS 10:14

Ná ndikani ini yo vitin, ¿ta unkua ikan na kana na ra, kaꞌan na xiꞌin ra, ta täꞌan kundaa ini na xaꞌa ra, ni täꞌan kuni soꞌo na tuꞌun xaꞌa ra? chi köo naꞌa ndituꞌun xiꞌin na xaꞌa ra.

Efesios 2:17

Chi tá kivi ki̱xi ra ta ndi̱kaꞌan ndoso ra tuꞌun vaꞌa ya koo vaꞌa ni ini ndóꞌo̱ ndi̱xiyo xíka ni nuu ra, xiꞌin ndeꞌe ndi̱xiyo yati ni nuu ra.

Colosenses 1:5

Íkan ndo saa ndáa ni ini ndo Ndioxi, saa kúꞌvi ni ini ndo xíni ndo ra chi ku̱ndaa teꞌe ini ndo ya niꞌi ndo ñaꞌa nuu ra, ya chi̱vaꞌa ra xaꞌa ndo nuu ndivi. Chi xa ku̱ndaa teꞌe ni ini ndo tá xi̱ni soꞌo ndo tuꞌun vaꞌa ya ndaa ni xaꞌa Tata yo Jesucristo.

Colosenses 1:6

Ta tuꞌun yóꞌó kua xa ndi̱xaa nuu ndo, ta xa kuaꞌa ni naꞌa kúndaa ini xaꞌa ya ndiꞌi ni kúu ñaꞌñu. Ta vaꞌa ni íkan ya xiꞌin na chi ndísama ya na, saa ndúkuaꞌa ka na kúndaa ini xaꞌa ya. Ta saa tu ndóꞌo̱ va, nda tá xi̱ni soꞌo ndo ya, saa ku̱ndaa ini ndo xaꞌa ya ndaa, ya ndee ni kúꞌvi ini Ndioxi xíni ra ndóꞌo̱.