2 Timoteo 4:2 - Xochapa Mixteco

² ya ná chikaa ni un ndee ya kaꞌan ndoso un tuꞌun ra xiꞌin naꞌa ndiꞌi saa kivi. Koo ndúvi un kaꞌan un xiꞌin na tá kivi vaꞌa ni kúni un án tá väꞌa kúni un. Ta teꞌe kaꞌan un xiꞌin na, sinaꞌa un na ya ná kundaa ini na xaꞌa ya väꞌa kéꞌe na, ta kaꞌan xiꞌin na ná sindoo na ya, saa xaꞌa ni un ndee xiꞌin na ya ná kundikun vaꞌa na ichí Tata yo Jesucristo. Ta toꞌo kaꞌan un xiꞌin na sinaꞌa un na, kaꞌnu koo ini un xiꞌin na.

2 Timoteo 4:2 Referans Kwoze

1 Tesalonicenses 5:14

Ta saa káꞌan tu nde xiꞌin ndo xaꞌa naꞌa, na köo xíin xaa chiñu, ndaꞌi ndo xiꞌin na ná xaa chiñu na, ta sindiko ndo ini tá kúu naꞌa, na ndíkava ni ini, saa chindee ndo na vita ini. Ta kaꞌnu koo ini ndo xiꞌin ndiꞌi naꞌa.

Tito 2:15

Ta ya yóꞌó kua xíniñuꞌu un sinaꞌa un na ñani yo. Ta xa íyo ichí ta̱xi Tata yo Jesucristo ndaꞌa un ya xaꞌa un ndee xiꞌin na, saa ndaꞌi un xiꞌin na tá väꞌa íkan na. Ta nda iin na ná kündasi nuu kuni yóꞌo̱.

1 Timoteo 4:13

Ta ya yóꞌó kua xíniñuꞌu un ikan un xiꞌin na ñani yo tin kuꞌva yo nda kivi ná xaa i: Vaꞌa kaꞌvi un tuꞌun Ndioxi xiꞌin na, ta xaꞌa ni un ndee xiꞌin na sixinu un ini na, saa sinaꞌa un na.

El Apocalipsis 3:19

Káꞌan i tuꞌun uꞌvi ni yóꞌó xiꞌin ndo, chi saa káꞌan uꞌvi i xiꞌin naꞌa, na kúꞌvi ini i xíni i. Saa táxi i tíxuꞌvi ni na ya ná ndiko koo ini na kuꞌun na ichí vaꞌa. Saa ndóꞌo̱, xíniñuꞌu ndo ndiko koo ini ndo xaꞌa ya väꞌa íkan ndo, ta ndinuꞌu ni ini ndo ndiko koo ini ndo kundikun ndo Ndioxi.

Tito 1:13

Ta ya ndaa ni ndixa kua ndi̱kaꞌan ra xaꞌa na, yakan yóꞌo̱, ta ndee koo ini un xiꞌin na ndaꞌi un xiꞌin na ya ná ïkan na ya väꞌa, sinaꞌa un na, ya ná kutuun tuꞌun Ndioxi nima na ta ná kundaa ni ini na ra.

2 Timoteo 2:21

Tá tu ná küni soꞌo un ya sínaꞌa nda vata ikán, saa kua vaꞌa koo un tá kuꞌva íyo ndaꞌa chiñu, ya vaꞌa ni xíniñuꞌu na nuu viko ya íyo veꞌe kaꞌnu ikán. Ta kuꞌva saa ná nduvaꞌa nima yo nuu Ndioxi, ná ndu i̱í yo nuu ra tá kuꞌva kúni mií ra. Ta saa kua vaꞌa kuniñuꞌu ra yoo xaꞌa ndá ka chiñu ya kúni mií ra kuniñuꞌu ra yoo.

Gálatas 6:6

Ta naꞌa, na síkuaꞌa xiꞌin iin ra maestro, sínaꞌa ra na xaꞌa tuꞌun Ndioxi, ta xíniñuꞌu na chindee taꞌan na xiꞌin ra xiꞌin ndiꞌi ndá ka ñaꞌa vaꞌa kúu mií na.

ROMANOS 12:12

Ta kusini ni ndo chi ndátun ndo taxi Ndioxi ya vaꞌa ndaꞌa ndo, tá vaxi tindoꞌo nuu ndo tíxuꞌvi ndo, ta kuaꞌa ndee ni ini ndo xiꞌin ya, ta xïkuiin ndo, kaꞌan ni ndo xiꞌin Ndioxi.

2 Timoteo 3:10

Ta yóꞌo̱ ñani yo, ta xa xíni vaꞌa un yeꞌe, ndá kuꞌva sínaꞌa i, ta ndá kuꞌva íyo i, ta xíni un unkua ndíkani ini i xaa súvi i, saa xíni un ya ndáa ni i ini i xíni Ndioxi, ta kúꞌvi ni ini i xíni i naꞌa, saa xíni un ya kaꞌnu ni ini i.

1 Timoteo 5:20

Tá tu ya ndixa kua íyo kuachi nda ta köo xíin nda sindoo nda ya väꞌa íkan nda, ta vaꞌa kaꞌan un xiꞌin nda nuu chútu ndiꞌi na veꞌe ñuꞌu ya ná sindikoo nda ya väꞌa íkan nda. Ta saa ku íꞌvi naꞌa ya ná ïkan na tá kuꞌva íkan nda.

Colosenses 1:25

Ta xaꞌa mií ndo kua ta̱xi Ndioxi chiñu ndaꞌa i ya chindee taꞌan i xiꞌin ndo nuu káꞌan ndoso i tuꞌun ra xiꞌin naꞌa ndiꞌi ni kúu ñaꞌñu.

ROMANOS 10:15

Ta ¿unkua ikan na kuꞌun na ndituꞌun na tuꞌun Ndioxi xiꞌin inka naꞌa, ta köo naꞌa tiꞌvi na kuꞌun na? Tá káchi tuꞌun Ndioxi ya ta̱a na xinaꞌa: “Vaꞌa ka vi kúni yo tá xa̱a naꞌa ndítuꞌun na tuꞌun vaꞌa xaꞌa Ndioxi xiꞌin yo”, káchi ya ta̱a na.

Los Hechos 20:7

Tá ti̱ndaa kivi núnu̱ú xaꞌa semana saa ndi̱kitaꞌan ndiꞌi nde ndíkun Jesús ya taꞌvi nde xita vaꞌa kuxi nde xiꞌin taꞌan nde xiꞌin ra Pablo, saa káꞌan ndoso ra tuꞌun Ndioxi xiꞌin naꞌa, síin kivi saa íyo ra ñuu na, ta tuvi xitaan keta ra kuꞌun ra inka ñaꞌñu, káchi ra. Yakan ndíꞌi ni ini ra nda sava ñǔu ta káꞌan ka ra xiꞌin na.

Los Hechos 16:13

Ta iin kivi ndíkundee na judío ke̱e nde kuaꞌan nde nuu ñuu nuu yáꞌa ita, nuu ndíkitaꞌan na judío káꞌan na xiꞌin Ndioxi. Saa ndi̱xaa nde ndi̱kundoo nde ikán, ta ndi̱kitaꞌan nde xiꞌin sava ná síꞌi ná ndíkitaꞌan ikán. Ñaa xa̱á nde káꞌan nde tuꞌun vaꞌa xaꞌa Jesús xiꞌin ná.

San Lucas 9:60

Ñaa ndi̱kuiin Jesús káꞌan ra: ―Kündiꞌi ini un sinduxin un na ndíi, ná kundiꞌi ini mií na xaꞌa taꞌan na. Sundi yóꞌo̱, ta kuaꞌan kaꞌan un xiꞌin inka naꞌa xaꞌa ichí nuu xáꞌnda chiñu Ndioxi ―káchi Jesús xiꞌin ra.

San Lucas 7:4

Ta saa ke̱e na kuaꞌan na nuu Jesús. Tá ndi̱xaa na nuu ra, xa̱á na xáku ndaꞌvi na nuu ra káchi na saa xiꞌin ra: ―Tata, vaxi nde xíkan nde ya mani nuu un kuꞌun loꞌo un xiꞌin nde sindaꞌa un moso ra ndíso chiñu nuu iin ciento nda lapa chi vaꞌa ni taa kúu mií ra.

1 Tesalonicenses 5:20

Kündasi nuu ndo kuni ndo tuꞌun Ndioxi ya síkaꞌán ra ini naꞌa kaꞌan na xiꞌin ndo.

San Lucas 7:23

Ta vaꞌa ni kée na köo xíka uvi ini xaꞌa ñaꞌa ya íkan i ―káchi ra xiꞌin nda.

2 Timoteo 2:25

Ta vaꞌa vií ndikani un nuu naꞌa, na köo xíin kandixa tuꞌun Ndioxi, án sana niꞌi na ya vaꞌa nuu Ndioxi ta ndisama nima na, ya ná kundaa ini na xaꞌa ya ndaa.

HEBREOS 13:22

Na taꞌan yo, xíkan ni i ya mani nuu ndo, kaꞌnu ni koo ini ndo xaꞌa ya loꞌo ni kua táa i nuu tutu yóꞌó xaa ndaꞌa ndo. Ta taa ni soꞌo ndo ya káꞌan i xiꞌin ndo, ya xáꞌa ni i ndee xiꞌin ndo.

Los Hechos 28:16

Tá ndi̱xaa nde ñuu Roma ta ta̱xi ra xáꞌnda chiñu nuu nda lapa ndiꞌi nda preso ndaꞌa ra kaꞌnu nuu ndiꞌi nda lapa ñuu Roma. Sundi ra Pablo ta ta̱xi na chiñu ñuu Roma ichí ndaꞌa ra koo ra inka ñaꞌñu nuu koo iin ra lapa kundaa ñaꞌa ra.

Los Hechos 13:5

Tá ndi̱xaa nda ñuꞌú íchi ikán, ta ndi̱xaa nda ñuu Salamina ta saa ndi̱kiꞌvi nda veꞌe ñuꞌu sinagoga na judío, xa̱á nda káꞌan ndoso nda tuꞌun Ndioxi xiꞌin naꞌa. Saa kuaꞌan tu inka ra náni Juan Marcos va xiꞌin nda. Kuaꞌan ra chindee taꞌan ra xiꞌin nda.

Colosenses 4:3

Ta kaꞌan ni ndo xiꞌin ra ya ná kuna ra yeꞌe nuu nde ya ndituꞌun ka nde tuꞌun vaꞌa xaꞌa ra xiꞌin naꞌa ya ná kuchiñu ndituꞌun nde xaꞌa ñaꞌa ya ndi̱xiyo sěꞌe yachi, chi vitin ta xa si̱tuvi ra ya tixin Tata yo Jesucristo nuu na, ta xaꞌa ya ndítuꞌun i xaꞌa ra kua ndíkaa i veꞌe kàà yóꞌó.

1 Tesalonicenses 1:6

Saa ta ndi̱nama ini ndo xa̱á ndo íkan ndo tá kuꞌva i̱kan nde, chi ndeꞌe ta i̱kan nde tá kuꞌva íkan mií Tata yo Jesucristo kivi xi̱ndoo nde xiꞌin ndo. Vani ndee ni ndi̱xiyo tindoꞌo nuu ndo xaꞌa tuꞌun ra, ta saa ni ndi̱kiꞌin ndo tuꞌun ra ya ndi̱kaꞌan nde xiꞌin ndo, saa ndu̱u sií ni ini ndo i̱kan mií Tachi I̱í ra.