2 Timoteo 2:2 - Xochapa Mixteco

² Taꞌan ya xi̱ni soꞌo un ndi̱kaꞌan i tá si̱naꞌa i kuaꞌa ni naꞌa, taꞌan ya ikán kua xíniñuꞌu un sinaꞌa un ñani yo nda ndinuꞌu ni ndíkun Tata yo Jesucristo ta saa ná koo ya sinaꞌa nda inka naꞌa.

2 Timoteo 2:2 Referans Kwoze

1 Timoteo 4:6

Tá sínaꞌa un tuꞌun ya ndaa yóꞌó nuu na ñani yo xiꞌin kuꞌva yo, na veꞌe ñuꞌu, saa kua koo un iin ra vaꞌa ni xáa chiñu nuu Tata yo Jesucristo. Saa chi tá íyo ya vaꞌa ni xíxi yo táxi ndee ndaꞌa yo, kuꞌva saa íyo tuꞌun Tata yo Jesucristo ya kándixa ni yo xiꞌin tuꞌun ra ya xa si̱kuaꞌa un.

1 Timoteo 6:12

Xaꞌa ya ndáa ni ini un xíni un Tata yo Jesucristo, ta tá káa iin ra kéꞌe taꞌan saa káa un, chikaa ni ka un ndee ikan un tá kuꞌva íkan iin ra lapa ra ndee ni chíkaa ndee tá kuaꞌan ra nuu kuachi. Ta saa ikan un ya ná kuchiñu un niꞌi un koo un xiꞌin Ndioxi ndiꞌi saa kivi ya vaxi. Chi xaꞌa ya kutaku un xiꞌin ra kua ka̱na ra yóꞌo̱, ta nuu ndiꞌi na kua ki̱ndoo un ya xaa súvi un tuꞌun ra ya kándixa un.

2 Timoteo 3:10

Ta yóꞌo̱ ñani yo, ta xa xíni vaꞌa un yeꞌe, ndá kuꞌva sínaꞌa i, ta ndá kuꞌva íyo i, ta xíni un unkua ndíkani ini i xaa súvi i, saa xíni un ya ndáa ni i ini i xíni Ndioxi, ta kúꞌvi ni ini i xíni i naꞌa, saa xíni un ya kaꞌnu ni ini i.

San Lucas 12:42

Saa ndi̱kaꞌan Jesús xiꞌin ra, káchi ra saa: ―Iin ra moso, ra ndíso chiñu xiꞌin ñaꞌa xitoꞌo ra, ra ndaa ni ini ta ni xitoꞌo ra köo xíka ini ra xíni ñaꞌa ra, táxi ndiꞌi ra ñaꞌa kúu mií ra ndaꞌa moso ra. Ndáa ndiꞌi moso ra ñaꞌa ra, saa táxi ra ñaꞌa xitoꞌo ra xíxi ndiꞌi na xáa chiñu xiꞌin xitoꞌo ra.

1 Timoteo 1:18

Ñani yo Timoteo, tá káa seꞌe i saa káa un, ta chiñu yóꞌó kua ndúku i nuu un xaa súvi un, chi ya yóꞌó, ta iin káchi ku ya xiꞌin tuꞌun ya ndi̱kaꞌan nda ñani yo, nda ndi̱kaꞌan tuꞌun yuꞌu Ndioxi ya ta̱xi Tachi Ndioxi ndaꞌa un tixin nda ñani yo ikán tá yachi. Chi tá ná ikan un saa ta koo un tá kuꞌva íyo iin ra lapa, ra xíni ni kaka nuu kuachi.

1 Timoteo 1:12

Táxi ni i tixaꞌvi ndaꞌa Tata yo Jesucristo, taa ra ta̱xi ni ndee ndaꞌa i, saa chi ndáa ni ini ra xíni ra yeꞌe yakan ndi̱kaxin ra yeꞌe ya xaa súvi i chiñu nuu ra.

1 Timoteo 4:14

Ta kuenta ni koo un, ndïndoso ini un xaꞌa ndee vaꞌa ni ta̱xi Ndioxi ndaꞌa un, tá kivi síndikaꞌán mií Tachi ra ini nda ñani yo, nda xikuaꞌa veꞌe ñuꞌu nuu chi̱nuu ndaꞌa nda xi̱ní un.

1 Corintios 4:2

Xa xíni yo, iin naꞌa, na ndíso chiñu xiꞌin ñaꞌa ya ta̱xi Ndioxi ndaꞌa na, ta xíniñuꞌu na kuu na naꞌa, na ndaa ini, na ndixa xáa súvi chiñu ndi̱kiꞌvi ndaꞌa na.

2 Timoteo 3:14

Sundi yóꞌo̱, ta xíniñuꞌu un xaa súvi un tuꞌun ya ndaa ya xa si̱kuaꞌa un, chi xa xíni un ya ndaa ni kua, ta saa xíni vaꞌa un na si̱naꞌa ya yóꞌó.

Colosenses 1:7

Ta ya yóꞌó kua xi̱ni soꞌo ndo si̱naꞌa ra ñani yo, ra Epafras, ra xáa chiñu xiꞌin nde nuu Tata yo Jesucristo. Ta ndinuꞌu ni ini ra xáa chiñu ra nuu Tata yo ya chindee ra ndóꞌo̱.

HEBREOS 2:17

Xaꞌa ya ndu̱u ra iin káchi tá kuꞌva íin mií yo na ivi yóꞌó, na kúu ñani ra. Xaꞌa ya ikán kua vaꞌa ndi̱xinu ra ndu̱u ra sutu, ra ndee ni ndinuꞌu xáa súvi ndiꞌi ñaꞌa, ta saa kúndaꞌvi ni ini ra xíni ra naꞌa. Xaꞌa ya ndi̱taxi ra mií ra ndi̱xiꞌi ra, yakan vaꞌa ku̱chiñu ra ndi̱soko ra mií ra nuu Ndioxi ya xaa kaꞌnu ini ra xaꞌa kuachi yoo, na kúu ñuu Ndioxi.

1 Timoteo 5:22

Saa kuenta ni koo un tá chínuu ndaꞌa un sata iin ra ñani yo ya ndíkuiso chiñu ra xiꞌin na veꞌe ñuꞌu. Saa chi tá väꞌa íkan ra, ta mií un ndíkuiso kuachi xaꞌa ya íkan ra ñaa. Yakan yóꞌo̱, ta kuenta ni koo un, kundaa ni un mií un, nina ya vaꞌa ndikani ini un ikan un.

San Mateo 24:25

Xa yachi ka ndítuꞌun i xiꞌin ndo, tá ná kuu saa ta kuenta ni koo ndo xiꞌin mií ndo.

San Mateo 13:52

Saa ndi̱kaꞌan ka Jesús xiꞌin nda, káchi ra saa: ―Tá kúu sava nda sínaꞌa ley Ndioxi ya ta̱a ra Moisés, ndíkundikun nda ichí nuu xáꞌnda chiñu Ndioxi, ta nda tá káa iin taa xiꞌin veꞌe ra nuu chivaꞌa ra ñaꞌa yata ra xiꞌin ñaꞌa xa̱á ra, saa íyo nda. Saa chi nda ikán, ta kúchiñu nda táva nda ya kuika yata ya xa xíni nda xiꞌin ya kuika xa̱á ―káchi ra xiꞌin nda.

2 Corintios 2:14

Ta táxi ni i tixaꞌvi ndaꞌa Ndioxi xaꞌa Jesucristo chi ndiꞌi saa ichí chíndee taꞌan ra xiꞌin nde kúchiñu nde xáa kanaa nde nuu na sáa ini xíni ndeꞌe. Ta tixin ndeꞌe kua xíta niꞌnu ndiꞌi tuꞌun xaꞌa ra iníi kúu. Chi tá káa nduta támi ka vi xáꞌan, saa káa tuꞌun vaꞌa xaꞌa ra nuu naꞌa, na xíni soꞌo ya.

2 Corintios 3:5

Ta köo kúni kaꞌan nde xaꞌa ya ndíchi ni kúu mií nde, yakan vaꞌa ni íkan nde saa chi süvi saa íyo ya. Ndiꞌi ya íkan nde ta nuu mií Ndioxi kua vaxi ndiꞌi ndee ndaꞌa nde ya íkan nde saa.