2 Timoteo 1:12 - Xochapa Mixteco

¹² Xaꞌa ya káꞌan ndoso i tuꞌun vaꞌa xaꞌa ra kua ndóꞌo ni i vitin. Sundi köo kúkaꞌán nuu i xaꞌa ya ndóꞌo i. Chi yeꞌe, ta xa kúndaa teꞌe ini i unku ra ndáa ni ini i xíni i, ta ndee ni ndee kúu mií ra ya chindee ra yeꞌe ya xaa súvi i ndiꞌi chiñu ya ta̱xi ra ndaꞌa i xaa súvi i.

2 Timoteo 1:12 Referans Kwoze

2 Timoteo 1:8

Xaꞌa ya ñaa kua kükaꞌán nuu un ndikuiin un kaꞌan un xaꞌa Tata yo Jesucristo. Ni xaꞌa yeꞌe kükaꞌán nuu un xaꞌa ya ndíkaa i veꞌe kàà yóꞌó xaꞌa ra. Ya ndee ni ka xíniñuꞌu un ikan un kua xaꞌa ndee ni ini un ndoꞌo un xiꞌin i xaꞌa tuꞌun vaꞌa xaꞌa ra. Ta mií ra taxi ndee ndaꞌa yo ya kuchiñu yo nuu ndiꞌi tindoꞌo vaxi nuu yo.

Judas 1:24

Ná xaa kaꞌnu ni yo Ndioxi chi ndee ni ndee kúu mií ra ya chindee ra yoo ya ná sïndikoo yo ichí ra ya ndaa kándixa yo. Ta vaxi kivi kundita yo nuu ra nuu íyo ndiꞌi ya kaꞌnu luvi ni. Saa ndasa vaꞌa ra yoo nduu yo naꞌa, na köo ka kuachi kúu mií nuu ra, ta yáꞌa ni kusini yo kivi ikán.

1 Pedro 4:19

Xaꞌa ya ñaa kua ndiꞌi ndóꞌo̱ tá ndóꞌo ni ndo tíxuꞌvi ni ndo xaꞌa ya xáa súvi ndo ya kúni Ndioxi, ta vaꞌa nditaxi ndiꞌi ndo mií ndo ndaꞌa ra xaꞌa ya vaꞌa ni si̱kuaꞌa ra ya vaꞌa ndo, chi nda iin ichí sïndoo ndaꞌa ra ndóꞌo̱, ta saa niꞌi ndo ndee ya ikan ka ndo ya vaꞌa.

2 Timoteo 4:8

Ta xíni i vaꞌa ni ini Ndioxi ta nina ya ndaa íkan ra xiꞌin naꞌa, chi mií ra ku ra xáa nani kuachi xiꞌin na. Ta saa ikan ra xiꞌin i taxi ra ya vaꞌa ndaꞌa i, tá kuꞌva íkan na xiꞌin naꞌa, na kéꞌe taꞌan níꞌi na ñaꞌa xaꞌa ya vaꞌa íkan na. Kuꞌva saa ikan Ndioxi xiꞌin i, taxi ra ya vaꞌa ndaꞌa i chi xa xa̱a súvi ndiꞌi i chiñu ya ta̱xi ra ndaꞌa i. Ta süvi ndisaa yeꞌe niꞌi ya vaꞌa ikan ra, ndiꞌi na ndíkun ichí ra ta ndátun na ndiko koo ra, na ikán ku na niꞌi ya vaꞌa.

HEBREOS 7:25

Xaꞌa ya ikán kua vaꞌa síkaku ra yoo, yo kúyati nuu Ndioxi xaꞌa mií ra. Ta ndiꞌi saa ichí kutaku yo xiꞌin ra, saa chi ndiꞌi saa ichí táku mií ra, yakan vaꞌa káꞌan ra xaꞌa yo xiꞌin Ndioxi.

1 Timoteo 6:20

Ñani yo Timoteo, chikaa ni un ndee ya xaa súvi un chiñu ya ta̱xi Ndioxi ndaꞌa un. Ta küni soꞌo un tuꞌun síki, ya köo ndáa yaꞌvi ya káꞌan naꞌa, na káꞌan ndee ni ndíchi na, xíni ni na tuꞌun Ndioxi, saa íyo ni ya xínituni na, káchi na, ta süvi ya ndaa kua ya síki va kua káꞌan na.

ROMANOS 1:16

Kúni i ná kundaa ini ndo, chi yeꞌe ta köo kúkaꞌan nuu i ya kándixa i tuꞌun vaꞌa xaꞌa Jesucristo, chi tuꞌun yóꞌó kúu mií ya ndee Ndioxi ya sikaku ya ndiꞌi naꞌa, na kándixa ya káꞌan ya. Xiꞌna ni ka na judío ku na xi̱ni soꞌo tuꞌun vaꞌa xaꞌa Jesucristo, saa xi̱ni soꞌo tu naꞌa, na köo kúu judío va ya.

San Mateo 24:36

’Nda iin naꞌa köo xíni maa ndiko koo i, ndá kivi kua ni ndá hora kua ndiko koo i ñuu ivi yóꞌó, ni na tatun Ndioxi köo xíni, ni yeꞌe kúu Seꞌe ra köo xíni. Iindaa mií Iva i Ndioxi ku ra xíni.

1 Pedro 1:5

Xaꞌa ya ndáa ni ini ndo Ndioxi kua kundaa ra ndóꞌo̱ xiꞌin ndee ra, chi saa chi̱tuni ra sikaku ra ndóꞌo̱ iin saa nda ná tindaa kivi sindiꞌi.

2 Timoteo 1:18

Ta mií Tata yo Jesucristo ná kundaꞌvi ni ini kuni ra ñani yo ra Onesíforo, tá kivi ná taxi Ndioxi kuachi xaꞌa na ñuu ivi yóꞌó. Chi xa̱ xíni mií un ndee ni chi̱ndee taꞌan ra xiꞌin yo ñuu Éfeso.

Filipenses 3:21

Ta ndinama ra ikin kuñu yo ya vita ni kúu mií yo, saa nduu ya tá káa ikin kuñu mií ra, ya luvi ni. Ta xiꞌin ndee kúu mií ra ya xáꞌnda chiñu ra nuu ndiꞌi ñaꞌa kua ndisama ra yoo.

2 Timoteo 2:9

Ta suvi xaꞌa tuꞌun vaꞌa ikán kua ndee ni ndóꞌo̱ i ndíkaa i veꞌe kàà yóꞌó, nda tá íyo iin ra ndee ni kaꞌnu kuachi kúu mií, saa íyo i, núꞌni i xiꞌin kàà ndíkaa i. Ta vaꞌa chi tuꞌun Ndioxi ta köo núꞌni vi ya.

Filipenses 3:10

Saa chi ya kúni ni i kua yóꞌó: Kúni ni i kuni taꞌan vaꞌa ka i xiꞌin Cristo, saa kúni i koo ndee Ndioxi ya si̱taku Jesús xiꞌin i, ta xa íyo ndúvi i ndoꞌo i tá kuꞌva ndi̱xiyo ndúvi mií ra ndi̱xiꞌi ra.

Filipenses 3:8

Ta ndiꞌi ya vaꞌa ni ndi̱xiyo nuu i yachi, ta nda loꞌo ka köo ndáa yaꞌvi ya nuu i vitin xaꞌa ya xi̱ni taꞌan i xiꞌin Tata yo Jesucristo, ra Chee ni nuu yo. Xaꞌa ra yóꞌó kua si̱ndoo ndaꞌa ndiꞌi i ñaꞌa ya ndee ni vaꞌa xi̱ndaa yaꞌvi nuu i tá yachi, ta ni köo xaꞌa ka ya nuu i vitin, tá íyo taka va saa íyo ya nuu i chi ya ndee ni vaꞌa ka kua nduu i kuenta Jesucristo.

1 Corintios 3:13

Sundi tá ná tindaa kivi ya ndiꞌi xaꞌa ñuu ivi yóꞌó, ta saa kua ndituvi teꞌe ndiꞌi ya xaꞌa chiñu ya i̱kan iin iin naꞌa. Ta ndee ni koko ñu̱ꞌu̱, ta xiꞌin ya ikán kua kuchiñu koto ndoso Ndioxi chiñu iin iin na ndá kuꞌva vaꞌa xa̱a chiñu na.

San Juan 17:15

Ta köo xíkan i ya mani nuu un, ya tava un na kee na tañu na ñuu ivi yóꞌó, ya xikan i nuu un kua, kundaa ni un na nuu ya väꞌa.

San Mateo 12:21

Ta ndiꞌi na köo kúu judío kandixa ni ñaꞌa na. káchi Ndioxi, xaꞌa Jesús nuu ta̱a ra profeta Isaías ra ndi̱kaꞌan ndoso tuꞌun yuꞌu Ndioxi xinaꞌa.

ROMANOS 9:33

Tuꞌun Ndioxi ya ta̱a na xinaꞌa, káchi ya saa: Koto ndo chi tiꞌvi i iin taa xaa ra ñuu Jerusalén. Tá íyo yu̱ú ya kákiꞌi xaꞌa naꞌa, saa koo ra. Ta na kóyo nuu yu̱ú ikán, ta ndee ni tixuꞌvi na. Sundi naꞌa na kándixa ra ta ndïko koo ini na xaꞌa ya kándixa na ra, káchi Ndioxi xaꞌa ra.

1 Pedro 4:16

Sundi tá xaꞌa ya ndíkun ndo Cristo kua ndóꞌo̱ ni ndo ta kükaꞌán nuu ndo, taxi ni ndo tixaꞌvi ndaꞌa Ndioxi xaꞌa ya ndóꞌo ndo saa xaꞌa ra.

HEBREOS 12:2

Ta iindaa mituꞌun xaꞌa Tata yo Jesucristo kua ná kundiꞌi ni ini yo, saa chi mií ra ku ra sínaꞌa yoo ndá kuꞌva kua kundaa ni ini yo kuni yo Ndioxi, saa tu iindaa mituꞌun mií ra ku ra chíndee yoo, ndása vaꞌa ra kuꞌva ndáa ni ini yo xíni yo Ndioxi. Ta saa ndi̱xaꞌa ndee ndiꞌi ini ra ndoꞌo ni ra nuu cruzin, ta köo ndi̱kiꞌin ra kuenta xaꞌa ya kúkaꞌan nuu ra, chi kúndaa ini ra tá si̱ndiꞌi ndo̱ꞌo ra saa ta kusini ni ra. Ta vitin ndi̱kunduꞌu ra ñaꞌñu kuáꞌá Ndioxi xáꞌnda chiñu ra xiꞌin Ndioxi.

HEBREOS 2:18

Tá kúu mií ra, yaꞌa ni ndee xi̱ndikaa ra nuu tindoꞌo, ndi̱xiyo ni ñaꞌa xi̱to ndoso ya ra, yakan vaꞌa kúndaa ini ra ya ndóꞌo yo tá kivi ñúꞌu yo nuu tindoꞌo, chi ndee ni ndee kúu mií ra ya chindee ra yoo, tá vaxi ya väꞌa xíto ndoso ya yoo.

1 Tesalonicenses 2:16

Tá kúni nde kaꞌan nde xiꞌin naꞌa, na köo kúu judío ya kuchiñu na kaku na, ta köo táxi na judío taꞌan nde kaꞌan nde xiꞌin na ikán. Ta xaꞌa ya íkan na saa, ta ndee ni kuandaa kuachi sata na ndúkuaꞌa ka ya, yáꞌa ni ndee kundoꞌo na tixuꞌvi ni na.

Filipenses 1:20

Chi yeꞌe ta ya ndee ni kúni i kua xaa kaꞌnu ni i Tata yo Jesucristo xiꞌin ikin kuñu i ndiꞌi saa ichí tá táku i án tá ndi̱xiꞌi i, saa chi kúndaa teꞌe ini i ya täxi Tata yo kukaꞌan nuu i, ta siín mií ra ná chindee yeꞌe ya kuchiñu i xaa kaꞌnu ni i ra vitin xiꞌin ndiꞌi saa kivi ya vaxi.

Los Hechos 21:13

Ta ndi̱kuiin ra, káchi ra saa: ―Küaku ndo chi nda yeꞌe kúchiꞌña ini íkan ndo. Tá ti̱in na yeꞌe ka̱tun na, ta vaꞌa ná tiin va na yeꞌe, chi yeꞌe ta xa íyo tuꞌva i kundoꞌo i xaꞌa Tata yo Jesús, vani kaꞌni na yeꞌe xaꞌa va ra ―káchi ra xiꞌin na.

Los Hechos 13:50

Ta saa xaá nda judío táva nda kuachi xiꞌin ra Pablo tin ra Bernabé. Chi chi̱kaa nda yuꞌu na chiñu tin ná síꞌi ná ínuu vaꞌa ni tuꞌun, ná káñuꞌu ni Ndioxi. Ndi̱kaꞌan nda xiꞌin ndiꞌi na ikán, si̱xinu nda ini na ya ná kundasi na kuni na ra Pablo xiꞌin ra Bernabé. Ñaa ndi̱kitaꞌan ndiꞌi na ta̱xin na nda xiꞌin ya uꞌvi ta̱va na nda ka̱na koo nda ñuu na.

Los Hechos 13:46

Saa xa̱á ra Pablo xiꞌin ra Bernabé káꞌan nda, ndinuꞌu ini nda káꞌan nda, káchi nda saa: ―Xiꞌna ndóꞌo̱ ku ndo xíniñuꞌu kuni soꞌo tuꞌun Ndioxi, chi ndo judío ku ndo, sundi ndóꞌo̱ ta köo xíin ndo ndikiꞌin ndo ya, saa chi ndíkani ini ndo ni köo ndáa yaꞌvi ndo kutaku ndo ndiꞌi saa kivi xiꞌin Ndioxi, káꞌan ndo. Ta vaꞌa va chi vitin ndituꞌun nde xiꞌin na köo kúu judío.

Los Hechos 9:16

Saa chi yeꞌe ta sinaꞌa i ra ndá kuꞌva xíniñuꞌu ra ndoꞌo ni ra xaꞌa kivi i ―káchi Jesús xiꞌin ra Ananías.

Los Hechos 7:59

Tá súkun na yu̱ú sata ra Esteban ta xa̱á ra káꞌan ra xiꞌin Ndioxi, káchi ra saa: ―Tata Jesús, ndikiꞌin un ya vaꞌa i ―káchi ra.

San Juan 6:44

Nda iin naꞌa küvi kixi nuu i, tá tu süvi mií Iva i, ra ti̱ꞌvi yeꞌe vaxi i, ku ra ndáka na vaxi na nuu i, ta yeꞌe sitaku i na kivi sindiꞌi.

San Lucas 23:46

Saa iin ndendee ndi̱ndaꞌi koꞌo Jesús, káchi ra saa: ―¡Tata, ndítaxi i ya vaꞌa i ndaꞌa un! ―káchi ra xiꞌin Ndioxi. Tá ndi̱kaꞌan ra saa ta ndi̱xiꞌi va ra.

1 Tesalonicenses 5:4

Sundi ndóꞌo, ñani yo, ta xa kúndaa vaꞌa ini ndo xaꞌa ya yóꞌó, süvi ndóꞌo̱ xíka ichí nuu naá ku ndo yakan ndikanda ni ini ndo tá ná kuu saa. Chi iin kuu soꞌva ndiko koo Tata yo Jesucristo, tá kuꞌva íkan ra kuiꞌna saa ikan ra.

San Lucas 10:12

Saa ndi̱kaꞌan ka ra xiꞌin nda, káchi ra saa: ―Ndinuꞌu ni ini i káꞌan i xiꞌin ndo, ndiꞌi na köo xíin ndikiꞌin vaꞌa tuꞌun Ndioxi ta ndoꞌo ni na ná ndiꞌi xaꞌa ñuu ivi. Ndee ni ka kundoꞌo na ikán nuu na ñuu Sodoma ―káchi Jesús xiꞌin nda.

San Mateo 7:22

Kivi vaxi tá ná xaa nani Ndioxi kuachi xiꞌin na ñuu ivi, ta kuaꞌa ni na kaꞌan xiꞌin i, kachi na saa: “Tata, ndi̱xika nde ndi̱kaꞌan ndoso nde tuꞌun un xiꞌin naꞌa, ta xiꞌin kivi un ta̱va nde tachi nduvaꞌa kúu mií na ta suvi ni xiꞌin kivi un i̱kan nde yatuꞌun xiꞌin na”, kachi na.

1 Corintios 1:8

Chi suvi mií Ndioxi ku ra xáꞌa ni ndee xiꞌin ndo, nda kivi tá ná ndiko koo Tata yo Jesucristo, ta nditaꞌan ra ndóꞌo̱ ya köo nda iin kuachi kúu mií ndo.

2 Timoteo 1:14

Mií Tachi I̱í Ndioxi ya íyo xiꞌin yo ná chindee yóꞌo̱ ya kuchiñu un kiꞌin ni un kuenta xiꞌin tuꞌun vaꞌa ya si̱kuiso chiñu Ndioxi yóꞌo̱, ta säma un ya.

2 Timoteo 1:16

Saa káꞌan ni i xiꞌin Iva yo Ndioxi ya ná kundaꞌvi ni ini ra kuni ra na veꞌe ra ñani yo, ra Onesíforo. Chi ndee ni kuaꞌa ichí ndi̱xaꞌa ra ndee xiꞌin i, ta köo ndi̱kukaꞌán nuu ra kuni ra yeꞌe xaꞌa ya ndíkaa i veꞌe kàà yóꞌó.

Tito 3:8

Ñani yo, tuꞌun ya káꞌan i xiꞌin un yóꞌó, ta ya ndaa ni kua, yakan ndinuꞌu ni ini un sinaꞌa un ya, ya ná kundaa ini na taꞌan yo na kándixa Ndioxi ikan na ya vaꞌa, chi ya yóꞌó kua ndee ni vaꞌa, chíndee ni ya ndiꞌi na ñuu ivi.