2 Corintios 11:11 - Xochapa Mixteco

¹¹ Xaꞌa ya káꞌan i saa xiꞌin ndo, ta süvi ya köo kúꞌvi ini i xíni ndóꞌo̱ kua, mií Ndioxi xíni ya ndee ni kúꞌvi ini i xíni i ndóꞌo̱.

2 Corintios 11:11 Referans Kwoze

2 Corintios 12:15

Vaꞌa ni kúni i ya tíin ndiꞌi i xuꞌun ya kúu mií i xiꞌin ndo, ta nda mií i ta taxi i mií i xaꞌa ya chindee i ndóꞌo̱. Ndee ni va kúꞌvi ka ini i xíni i ndóꞌo̱, sundi ndóꞌo̱ ta loꞌo ni va kúꞌvi ini ndo xíni ndo yeꞌe.

2 Corintios 7:3

Ya káꞌan i soꞌva xiꞌin ndo ta köo káꞌan i saa xiꞌin ndo ya táxi i kuachi xaꞌa ndo, saa chi ndee ni kúꞌvi ini nde xíni nde ndóꞌo̱, tá íyo ya xa ndi̱kaꞌan nde xiꞌin ndo, saa íyo ya. Ta nda iin ñaꞌa täꞌvi yoo xiꞌin taꞌan yo, ni ya táku yo vitin ni ya ná kuvi yo, köo ñaꞌa taꞌvi mií yo.

El Apocalipsis 2:23

Ta naꞌa, na kúu seꞌe yá, ta taxi i kueꞌe kuvi ndiꞌi na. Saa kundaa ini ndiꞌi naꞌa, na kándixa yeꞌe ya xíni ndiꞌi i ya íyo nima na xiꞌin ya ndíkani ini na. Ta saa chaꞌvi i iin iin na, tá kuꞌva íyo ya i̱kan na, saa koo yaꞌvi na.

HEBREOS 4:13

Nda iin ñaꞌa ya si̱kuaꞌa Ndioxi küvi tiseꞌe ya nuu ra, saa chi mií ra si̱kuaꞌa ndiꞌi ya, ta íyo túvi ndiꞌi ya nuu ra. Ta suvi mií ra ku ra xaꞌa yo kuenta nuu xaꞌa ndiꞌi ñaꞌa ya íkan yo.

2 Corintios 11:31

Chi mií Ndioxi Iva mií Tata yo Jesucristo ku ra xíniñuꞌu ni yo xaa kaꞌnu yo ndiꞌi saa ichí, ta mií ra ku ra xíni xaꞌa ya kaꞌan i ya ndaa xiꞌin ndo.

Los Hechos 15:8

Ta Ndioxi ku ra xíni ndiꞌi ya íyo nima ivi, ta iin káchi ta̱xi ra Tachi I̱í ra ndaꞌa yo na kúu judío xiꞌin na köo kúu judío. Tá kuꞌva i̱kan ra xiꞌin yoo saa i̱kan tu ra xiꞌin na ikán va.

San Juan 21:17

Ichí uni ndi̱ndakan tuꞌun tuku Jesús ra Simón Pedro, káchi ra saa: ―Simón, seꞌe ra Jonás, ¿án kúꞌvi ini un xíni un yeꞌe? ―káchi ra xiꞌin ra. Ta saa ku̱chiꞌña ni ini ra, saa chi xa ndi̱xinu uni ichí kua ndákan tuꞌun ñaꞌa ra, ¿án kúꞌvi ini ra xíni ñaꞌa ra? Saa ndi̱kuiin ra Simón Pedro, káchi ra saa: ―Tata, mií un ku un xíni ndiꞌi ñaꞌa. Ta xíni un ya kúꞌvi ni ini i xíni i yóꞌo̱ ―káchi ra xiꞌin ra. Saa ndi̱kuiin Jesús káchi ra saa: ―Tá tu saa, ta kundaa levo sana i ―káchi Jesús xiꞌin ra.

2 Corintios 11:10

Ta kúndaa teꞌe ini i ya íyo ya ndaa xaꞌa Cristo xiꞌin i, saa kúndaa teꞌe ini i ya nda iin naꞌa küchiñu kindaa ya kúsini ni i, ya kïꞌin i xuꞌun ndaꞌa nda iin ndóꞌo̱ ndóo ñuu Corinto ya ndóꞌni estado Acaya ñaa.

ROMANOS 1:9

Ta mií Iva yo Ndioxi ndíkuiin xaꞌa i ya köo xíkuiin i káꞌan ni i xiꞌin ra xaꞌa ndo. Ndinuꞌu ni ini i xáa chiñu i nuu ra káꞌan ndoso i tuꞌun vaꞌa xaꞌa Jesucristo, ra kúu Seꞌe ra.

2 Corintios 2:17

Ndeꞌe, ta köo kíꞌin nde yaꞌvi nde xaꞌa ya ndítuꞌun nde tuꞌun Ndioxi xiꞌin naꞌa, tá kuꞌva íkan sava na, chi síndaꞌvi na ivi. Sundi ndeꞌe, ta ndaa ni ndítuꞌun nde xiꞌin na. Nuu Ndioxi káꞌan nde xiꞌin na, chi mií ra ku ra ti̱ꞌvi ndeꞌe kaꞌan ndoso nde xaꞌa ra, xaꞌa ya xa iin ndi̱kitaꞌan nde xiꞌin Jesucristo.