1 Timoteo 6:2 - Xochapa Mixteco

² Saa na xáa chiñu nuu xitoꞌo na, ra kándixa Tata yo Jesucristo, xíniñuꞌu na xaa toꞌo ni na xitoꞌo na, xaꞌa ya kúu ra ñani yo, ra kándixa Tata yo Jesucristo. Ta ndee ni ka vaꞌa xíniñuꞌu na chikaa ni na ndee ya xaa chiñu vií ni na nuu ra, chi ñani yo ra kúꞌvi ni ini yo xíni yo ku ra, ta ra ikán ku ra níꞌi ni ya vaꞌa xaꞌa chiñu ya íkan na nuu ra. Ñani yo Timoteo ya yóꞌó kua xíniñuꞌu un sinaꞌa un na veꞌe ñuꞌu, saa kaꞌan un xiꞌin na, xaꞌa un ndee xiꞌin na.

1 Timoteo 6:2 Referans Kwoze

Colosenses 4:1

Saa ndóꞌo̱ xáa chiñu naꞌa nuu, ikan ndo ya vaꞌa, ya ndaa xiꞌin na xáa chiñu nuu ndo. Ta ndikaꞌán ini ndo chi saa tu ndóꞌo̱ va, nuu ndivi íyo ra xáꞌnda chiñu nuu ndo.

1 Timoteo 4:11

Ta ya káꞌan i xiꞌin un yóꞌó kua sinaꞌa un ndiꞌi naꞌa, saa kaꞌnda chiñu un nuu na ná xaa súvi na ya.

Judas 1:8

Ta kuꞌva saa kua i̱kan tu nda vata, nda sínaꞌa tuꞌun Ndioxi chi ndiꞌi ya ndíxani nda kua íkan nda, saa xáa yakua nda ikin kuñu nda, ta köo táxi nda kaꞌnda chiñu Ndioxi nuu nda, saa káꞌan kini nda xaꞌa ndee naꞌnu ya íyo nuu sukun.

2 Pedro 2:10

Ta xaa nduvaꞌa ni va Ndioxi xiꞌin ndiꞌi naꞌa, na íkan ya väꞌa, ya kúni ni mií ikin kuñu na, ta ni köo xáa súvi mií na chiñu ya xáꞌnda chiñu Ndioxi nuu na. Ta na vata ikán ta ndee ni tuun ini na, ni köo íꞌvi na kaꞌan ndivaꞌa na xaꞌa na kúu mií ndee naꞌnu ka nuu na.

1 Pedro 5:1

Ta xáku ndaꞌvi ni i nuu nda ñani yo, nda xikuaꞌa nda ñúꞌu xiꞌin ndo, nda ndóso nuu na ñani yo na veꞌe ñuꞌu, nda xikuaꞌa taꞌan yeꞌe. Chi yeꞌe ta ndíkuiin i xaꞌa Tata yo Jesucristo ya ndee ni ndi̱xuꞌvi ra xaꞌa yo. Ta kivi tá ná ndiko koo ra ta saa kuni yo ya yéꞌe̱ luvi ni xiꞌin ndee chee ni kúu mií ra, ya ndituvi kuni yo.

HEBREOS 3:14

Ta ya ndixa kua táxi Cristo ndiꞌi ya kúu mií ra ndaꞌa yo, tá tu köo síndoo yo ya tuun ni ndíkun yo ra, tá tu ndáa ni ini yo xíni yo ra tá kuꞌva ndi̱xiyo yo xiꞌin ra nda tá xaꞌa, tá sikan xa̱á yo ndikun yo ra.

HEBREOS 3:1

Ñani yo xiꞌin kuꞌva yo, ndóꞌo̱ ku ndo ndi̱kaxin Ndioxi, saa ka̱na ra ndóꞌo̱ ta xa̱a i̱í ra ndóꞌo̱ koo ndo xiꞌin ra. Yakan kiꞌin ni ndo kuenta, chi suvi mií Jesús ku ra ku apóstol, ra ti̱ꞌvi Ndioxi vaxi xaa chiñu ra nuu ra, ta kúu tu ra sutu ra chee ni nuu ndiꞌi yo kándixa ñaꞌa.

Tito 3:8

Ñani yo, tuꞌun ya káꞌan i xiꞌin un yóꞌó, ta ya ndaa ni kua, yakan ndinuꞌu ni ini un sinaꞌa un ya, ya ná kundaa ini na taꞌan yo na kándixa Ndioxi ikan na ya vaꞌa, chi ya yóꞌó kua ndee ni vaꞌa, chíndee ni ya ndiꞌi na ñuu ivi.

Tito 2:15

Ta ya yóꞌó kua xíniñuꞌu un sinaꞌa un na ñani yo. Ta xa íyo ichí ta̱xi Tata yo Jesucristo ndaꞌa un ya xaꞌa un ndee xiꞌin na, saa ndaꞌi un xiꞌin na tá väꞌa íkan na. Ta nda iin na ná kündasi nuu kuni yóꞌo̱.

Tito 2:1

Sundi yóꞌo̱, ñani yo Tito, ta xíniñuꞌu un sinaꞌa un ndisaa ya ndaa xaꞌa ichí Tata yo Jesucristo ya kándixa yo.

1 Timoteo 5:1

Ñani yo Timoteo, tá ndá chiñu väꞌa íkan na ñani yo na xikuaꞌa, ta käꞌan kueꞌe un xiꞌin na, vívií ndikani un nuu na, tá kuꞌva káꞌan un xiꞌin tata un, saa kaꞌan un xiꞌin na. Ta saa tu nda kuâán va, tá kuꞌva íkan un xiꞌin ñani un, saa ikan un xiꞌin nda.

2 Tesalonicenses 1:3

Ñani yo xiꞌin kuꞌva yo, ndiꞌi saa ichí xíniñuꞌu ni nde kaꞌan nde xaꞌa ndo xiꞌin Ndioxi. Chi ndóꞌo̱, ta kándixa ni ndo ra, ta vitin taan xáꞌnu ka ndo xiꞌin tuꞌun ra, saa kúꞌvi ni ini ndo xíni taꞌan ndo.

Colosenses 1:4

Saa chi ndeꞌe, ta ku̱ndaa ini nde xaꞌa ndo, ya ndee ni ndáa ini ndo xíni ndo Tata yo Jesucristo, ta saa kúꞌvi ni ini ndo xíni ndo na ñuu Ndioxi, na i̱í.

Colosenses 1:2

xaa ya nuu ndóꞌo̱, na i̱í, na kúu ñuu Ndioxi, na ndinuꞌu ni ndíkun Tata yo Jesucristo, na ndóo ñuu Colosas. Saa ná ikan ni ra ya vaꞌa xiꞌin ndo ná taxi ni ra koo vaꞌa ni ini ndo.

Efesios 3:6

Ta ya yóꞌó ku ya chi̱tuni Ndioxi ndi̱xiyo sěꞌe: Iin káchi niꞌi naꞌa, na köo kúu judío xiꞌin na judío. Niꞌi na ñaꞌa ya ki̱ndoo Ndioxi taxi ra ndaꞌa naꞌa, na ndixa kúu seꞌe ra. Nda na köo kúu judío niꞌi ya yóꞌó xaꞌa ya kándixa na Jesucristo ya sikaku ra na.

Efesios 1:15

Xaꞌa ya ikán kua tá ku̱ndaa ini i xaꞌa ndo ya ndee ni ndáa ini ndo xíni ndo Tata yo Jesús, ta saa kúꞌvi ni ini ndo xíni ndo na ñuu ra,

Efesios 1:1

Yeꞌe Pablo, ra ndi̱kaxin mií Ndioxi xáa chiñu i nuu ra ku i táa tutu yóꞌó xaa ya nuu ndiꞌi ndóꞌo̱, ndóo ñuu Éfeso, chi na i̱í, na kúu ñuu Ndioxi ku ndo ta ndinuꞌu ni ini ndo kándixa ndo Jesucristo.

Gálatas 5:6

Chi tá kándixa yo Jesucristo ta köo ndáa yaꞌvi ka ya án kúu mií yo tuni Ndioxi án köo ya kúu mií yo, chi ya ndee ni ndáa yaꞌvi nuu ra kua ndáa ni ini yo xíni yo ra xaꞌa ya kúꞌvi ni ini ra xíni ra yoo.

ROMANOS 11:17

Ta ya káꞌan i xiꞌin ndo xaꞌa itun yóꞌó kua, kúni i ná kundaa ini ndo. Saa chi sava na judío, Tá íyo ndaꞌa itun olivo, itun tàtà, ta ndi̱taꞌnu ndaꞌa nu, saa íin na. Ta ndaꞌa nu nuu ndi̱taꞌnu ikán kua ndi̱kunuꞌni inka ndaꞌa olivo itun ikú, ya kuchiñu kuaꞌnu itun ikú xiꞌin sikui vaxi tioꞌo itun olivo tàtà. Tá íin ndaꞌa itun olivo ikú, saa íin ndóꞌo̱, köo kúu judío.

ROMANOS 8:29

Ta tá täꞌan ka kuaꞌa ñuu ivi yóꞌó, ta xa xíni mií ra unku na ndi̱kaxin ra ya kundikun na ra. Xa saa chi̱tuni mií ra ya nduu na seꞌe ra tá kuꞌva káa Jesucristo Seꞌe ra. I̱kan ra saa ya ná nduu Jesucristo, ra núnu̱ú nuu ndiꞌi ñani ra xiꞌin kuꞌva ra.

San Mateo 25:40

Saa ndikuiin yeꞌe, rey, kaꞌan i xiꞌin na, kachi i saa: “Ya ndaa káꞌan i xiꞌin ndo, kivi i̱kan ndo ya vaꞌa xiꞌin na ndíkun yeꞌe, vani ndaꞌvi ni na, ta süvi xiꞌin na ikán ndi̱xaa ndo ya vaꞌa, sundi xiꞌin yeꞌe i̱kan ndo ya vaꞌa”, kachi i xiꞌin na ―káchi Jesús.

San Mateo 23:8

’Sundi ndóꞌo̱ ta ïkan ndo saa, täxi ndo kaꞌan naꞌa xiꞌin ndo “maestro”, saa chi iindaa Cristo ku maestro nuu ndo, ta ndiꞌi ndo ta iin káchi íin ndo nuu taꞌan ndo.

San Mateo 6:24

Saa ndi̱kaꞌan tuku Jesús, káchi ra saa: ―Nda iin naꞌa ta küvi xaa chiñu na nuu uvi xitoꞌo na. Tá íyo uvi xitoꞌo na, ta kundasi nuu na kuni na iin ra ta inka ra ta vaꞌa ni kuni na xiꞌin ra. Án iin ra koto vaꞌa ra nuu ta inka ra köto vaꞌa ra nuu. Saa ndóꞌo̱, tá táxi ndo xáꞌnda chiñu Ndioxi nuu ndo, ta küvi taxi ndo kaꞌnda chiñu ya kuika nuu ndo. Ta saa tu tá táxi ndo xáꞌnda chiñu ya kuika nuu ndo, ta küvi taxi ndo kaꞌnda chiñu Ndioxi nuu ndo ―káchi Jesús.

Los Hechos 1:15

Iin kivi ndi̱kitaꞌan ndiꞌi na kándixa Jesús ndóo na, iin kuꞌva ciento oko ku na ndóo. Ta saa ndi̱kundichi ra Pedro tañu na, ñaa xa̱á ra káꞌan ra xiꞌin na, káchi ra saa: