1 Timoteo 5:10 - Xochapa Mixteco

¹⁰ Ta saa tu ná ndóso vaꞌa tuꞌun xaꞌa ya íkan ná ya vaꞌa, ta vaꞌa ni xi̱ndaa ná seꞌe ná, ta saa ndi̱kuiso vaꞌa ni ná na xáa veꞌe ná, ta ndi̱kata ná xaꞌa nda ñani yo xiꞌin ná kuꞌva yo, saa chi̱ndee taꞌan ná xiꞌin naꞌa tá xi̱ñúꞌu na nuu tindoꞌo, ta vaꞌa ni i̱kan ná xiꞌin ndiꞌi naꞌa.

1 Timoteo 5:10 Referans Kwoze

1 Timoteo 6:18

Vaꞌa kaꞌan un xiꞌin nda ñani yo, nda ndúkuika ni, ya xíniñuꞌu nda ikan ni nda ya vaꞌa. Ta ná küxiꞌnda nda, ná kusini ni nda nditaꞌvi nda ñaꞌa nda xiꞌin inka naꞌa.

Tito 3:8

Ñani yo, tuꞌun ya káꞌan i xiꞌin un yóꞌó, ta ya ndaa ni kua, yakan ndinuꞌu ni ini un sinaꞌa un ya, ya ná kundaa ini na taꞌan yo na kándixa Ndioxi ikan na ya vaꞌa, chi ya yóꞌó kua ndee ni vaꞌa, chíndee ni ya ndiꞌi na ñuu ivi.

Los Hechos 9:36

Ta kivi ikán íyo iin yá kándixa Jesús ñuu Jope náni yá Tabita, ta tuꞌun griego kúni kachi ya Dorcas. Ta nina ya vaꞌa íkan yá, chíndee ni yá na ndaꞌvi.

Tito 3:1

Ta sinaꞌa un nda ñani yo, xiꞌin ná kuꞌva yo na veꞌe ñuꞌu, ya ná xaa toꞌo ni na ndiꞌi na chiñu, na xáꞌnda chiñu nuu yo, án na chiñu naꞌnu ku na, án na chiñu vali ku na, ta ná xaa toꞌo ni ñaꞌa na. Ndiꞌi saa ichí ná koo ndúvi na ya ikan na ya vaꞌa.

Tito 2:7

Tá kuꞌva kúni un ikan nda ñani yo, kuꞌva saa xíniñuꞌu un vívií koo un nuu na ya ná kuni na ikán na tá íkan un. Tá sínaꞌa un na ñani yo ta ndinuꞌu ni ini un sinaꞌa un na, toꞌo ndituꞌun un tuꞌun ya ndaa xiꞌin na.

2 Timoteo 3:17

Ta saa kua kuchiñu nduu yo naꞌa, na xa íyo ndúvi, na xa si̱kuaꞌa xaa súvi chiñu vaꞌa nuu Ndioxi.

ROMANOS 12:13

Saa koo ndúvi ndo ya chindee ndo na ndaꞌvi veꞌe ñuꞌu, na ñuu Ndioxi. Ta ndikuiso vaꞌa ndo naꞌa, na xáa veꞌe ndo, án ñuu yati vaxi na, án ñuu xika vaxi na, ta ndikuiso ndo na. Saa taxi ndo kuxi na, ta taxi ndo nuu kusun na.

San Lucas 7:44

Saa ndi̱koto ra nuu yá ñaꞌa ikán, ta ndi̱kaꞌan ra xiꞌin ra Simón, káchi ra saa: ―¿Án xíto un ya íkan yá yóꞌó xiꞌin i? ―Yóꞌo̱, tá ndi̱kiꞌvi i veꞌe un ta köo ndi̱taxi un tikuii ndoo xaꞌa i. Ta yá yóꞌó xa̱á yá ndíkata yá xaꞌa i xiꞌin tikuii nuu yá, saa ndi̱yakun yá ya xiꞌin ixi xiní yá.

San Mateo 5:16

Saa ndóꞌo̱, koo ndo tá kuꞌva kúni Ndioxi, ta saa kuchiñu ndiyeꞌe ndo tá kuꞌva ndíyeꞌe ñu̱ꞌu̱ xaꞌa ñaꞌa ya vaꞌa íkan ndo, ta saa kuni naꞌa ya íkan ndo ta kaꞌan vaꞌa na xaꞌa Iva yo Ndioxi ta xaa kaꞌnu na ra ―káchi Jesús xiꞌin na.

1 Pedro 2:12

Vívií koo ndo tañu naꞌa, na köo xíni Ndioxi, chi án sana kaꞌan na xaꞌa ndo ya köo vaꞌa íkan ndo, kachi na. Ta saa tá ná kuni na ya vaꞌa ní íyo ndo ta saa xaa kaꞌnu na Ndioxi tá kivi ná kixi ra xaa nani ra kuachi xiꞌin na ñuu ivi.

HEBREOS 13:21

Xaꞌa ya ikán kua káꞌan ni i xiꞌin ra ya ná chindee taꞌan ni ra xiꞌin ndo ya kuchiñu ndo xaa súvi ndo ndiꞌi ya vaꞌa kúni mií ra. Ta saa xáku ndaꞌvi ni i nuu ra ya ná chindee ra ndeꞌe ikan nde ndisaa ya kúni mií ra tixin Tata yo Jesucristo. Saa ná kunuu sukun ni ya toꞌo Tata yo Jesucristo ndiꞌi saa ichí, ndiꞌi saa kivi. Saa ná koo ya.

HEBREOS 13:2

Ta ndïndoso ini ndo ya ndikuiso vií ndo naꞌa, na xáa veꞌe ndo. Chi saa ndo̱ꞌo sava naꞌa xinaꞌa xiꞌin naꞌa, na ndi̱xaa veꞌe na, ta köo ndi̱kundaa ini na ya ndi̱kuiso na tatun Ndioxi veꞌe na.

HEBREOS 10:24

Ta saa ná nduku ka yo ndá kuꞌva kuniꞌi taꞌan yo ya kuꞌvi ni ini yo kuni taꞌan yo, ta ná ikan yo ndisaa ya vaꞌa xiꞌin taꞌan yo.

Tito 3:14

Saa nda ñani yo xiꞌin ná kuꞌva yo, ná sikuaꞌá na ikan ni na ya vaꞌa, ta ná chindee taꞌan ná xiꞌin naꞌa, na kúmani ñaꞌa nuu. Ta saa kua nduu na naꞌa, na ndáa yaꞌvi ni, na xáa chiñu ni.

Tito 2:14

Chi ndi̱taxi ra mií ra ndi̱xiꞌi ra xaꞌa yo, ya yóꞌó ku yaꞌvi cha̱ꞌvi ra xaꞌa yo nuu si̱kaku ra yoo ndaꞌa ndee ya väꞌa i̱kan yo, ta nda̱sa vaꞌa ra yoo ndu̱u yo na ñuu mií ra, ya kuchiñu yo ikan yo ya vaꞌa nuu ra.

San Lucas 7:38

Ndi̱xaa yá ndi̱kunduꞌu koo yá sata Jesús, saa xa̱á yá xáku ni yá, ta kóyo ni tikuii nuu yá xaꞌa ra. Sindiꞌi ta ndi̱yakun yá xaꞌa ra xiꞌin ixi xiní yá, ñaa si̱ichi yá ya ta xa̱á yá chútu yá xaꞌa ra. Saa tá si̱ndiꞌi yá ta ki̱ꞌin yá nduta tami xaꞌan ikán si̱kuchi yá xaꞌa ra.

3 Juan 1:12

Ta ra Demetrio ta vaꞌa ni va ínuu tuꞌun ra nuu naꞌa, ínuu vaꞌa ni tuꞌun ra saa chi tá kuꞌva káꞌan tuꞌun Ndioxi, saa íyo ra. Ta saa tu ndeꞌe va, xíni nde ya ndixa kua káꞌan na xaꞌa ra, ta ni mií un xíni un ya ndaa kua káꞌan nde xaꞌa ra.

1 Pedro 4:9

Ta kusini ni ndo ndikuiso vií ndo na ñani yo na xáa uvi ndaa kivi veꞌe ndo, ta käꞌan kuachi ndo xaꞌa ya íkan ndo saa xiꞌin na.

2 Timoteo 3:15

Ta nda tá loꞌo ví un xa xíni un tuꞌun Ndioxi ya ta̱a na xinaꞌa, ta ya ikán kua kuchiñu xaa ndíchi ni yóꞌo̱. Ta ya ndíchi vaxi nuu Ndioxi kua kuniꞌi yóꞌo̱ kuꞌun un ichí nuu kaku un xaꞌa ya ndáa ni ini un xíni un Tata yo Jesucristo.

2 Timoteo 2:21

Tá tu ná küni soꞌo un ya sínaꞌa nda vata ikán, saa kua vaꞌa koo un tá kuꞌva íyo ndaꞌa chiñu, ya vaꞌa ni xíniñuꞌu na nuu viko ya íyo veꞌe kaꞌnu ikán. Ta kuꞌva saa ná nduvaꞌa nima yo nuu Ndioxi, ná ndu i̱í yo nuu ra tá kuꞌva kúni mií ra. Ta saa kua vaꞌa kuniñuꞌu ra yoo xaꞌa ndá ka chiñu ya kúni mií ra kuniñuꞌu ra yoo.

2 Timoteo 1:5

Ndíkaꞌán ini i xaꞌa un ya ndee ni ndinuꞌu ini un ndáa ini un xíni un Tata yo Jesucristo. Ta xiꞌna nána chee un yá Loida ku yá ndee ni xi̱ndaa ini xíni ra, saa tu nána un yá Eunice va, ta saa tu yóꞌo̱ va.

1 Timoteo 5:25

Saa tu chiñu vaꞌa íkan sava na, kama ni va kúndaa ini yo xiꞌin ya íkan na. Ta sava tuku na ta naꞌá ni va saa kúndaa ini yo xaꞌa ya vaꞌa íkan na, ni saa va, ta nda iin ñaꞌa kïndoo sěꞌe, chi ndituvi ndiꞌi ya íkan na.

1 Timoteo 2:10

Ta ya ndee ni xíniñuꞌu ná ikan ná ku ñaꞌa ya vaꞌa ni, xaꞌa ya xáa toꞌo ni ná Ndioxi.

Colosenses 1:10

Ta saa kua vaꞌa kuchiñu ndo ikan ndo tá kuꞌva kúni mií Tata yo Jesucristo, chi saa kua xaa kaꞌnu ni ndo ra xiꞌin ndiꞌi ni kúu ñaꞌa vaꞌa íkan ndo nuu ra, koo ndo tá kuꞌva íyo naꞌa, na ndíkun Tata yo Jesucristo. Ta saa kua vaꞌa kuaꞌnu ka ndo xiꞌin ya ndíchi xaꞌa mií ra.

Efesios 2:10

Chi mií Ndioxi ku ra si̱kuaꞌa yoo. Tixin Jesucristo kua i̱kan ra saa xiꞌin yo ya ná ikan yo ya vaꞌa, ya xa chi̱tuni mií ra ikan ra xiꞌin yo. Ta saa kuchiñu yo xaa súvi yo ndiꞌi ya.

Los Hechos 22:12

’Ta íyo iin ra náni Ananías mi ñuu ikán, ta xáa súvi ni ra ikán ya káꞌan ley Ndioxi ta̱a ra Moisés. Saa vaꞌa ni káꞌan ndiꞌi mií na judío taꞌan yo ndóo ñuu ikán xaꞌa ra.

Los Hechos 10:22

Saa ndi̱kuiin nda káꞌan nda: ―Ra Cornelio, ra xáꞌnda chiñu nuu iin ciento nda lapa ñuu Roma ku ra ti̱ꞌvi ndeꞌe vaxi nde nuu un. Vaꞌa ni taa ku mií ra ikán, káñuꞌu ni ra Ndioxi ta ndiꞌi na judío vaꞌa ni káꞌan na xaꞌa ra. Ta ndi̱tuvi iin tatun ya i̱í nuu ra ndi̱kaꞌan ya xiꞌin ra ya ná tiꞌvi ra ndeꞌe kixi nde nuu un kaꞌan nde xiꞌin un kuꞌun un veꞌe ra ndituꞌun un xiꞌin ra ta kuni soꞌo ra tuꞌun ya kaꞌan un xiꞌin ra ―káchi nda ikán xiꞌin ra Pedro.

Los Hechos 9:39

Saa ke̱e nda ikán ndi̱xaꞌan nda nuu ra Pedro ta ndi̱kiꞌin ra kuaꞌan ra xiꞌin nda. Ndi̱xaa nda xiꞌin ra veꞌe yá, nda̱a nda xiꞌin ra piso ni̱nù nuu índuꞌu ikin kuñu yá. Ta iin ndi̱katin ná ndi̱ndoo ndaa xáku ni ná xaꞌa yá. Sínaꞌa ná toto ya si̱kuaꞌa yá ta̱xi yá ndaꞌa ná, tá täꞌan kuvi yá.

Los Hechos 6:3

Yakan kua vaꞌa ka ndikaxin mií ndo uxa ta̱a, nda ndaa ini, nda íyo Tachi I̱í Ndioxi xiꞌin. Ta nda ñaa taxi ndo chiñu ndaꞌa ná kundiso chiñu nda nditaꞌvi nda ñaꞌa kuxi na taꞌan yo.

1 Timoteo 5:16

Tá ndá nda ñani yo án ndá ná kuꞌva yo íyo ná kuâán ndi̱xiꞌi ndaa nuu, ta vaꞌa ná chindee taꞌan mií na veꞌe ná xiꞌin ná, ta saa kündiꞌi ka ini na veꞌe ñuꞌu ya chindee taꞌan na xiꞌin ná, saa kuchiñu na chindee taꞌan na xiꞌin ná ndixa xíniñuꞌu chindee taꞌan na xiꞌin.

1 Timoteo 3:7

Ta vaꞌa ná ikan nda nina ya vaꞌa, ta nda naꞌa, na köo xíni tuꞌun Ndioxi ta kaꞌan vaꞌa na xaꞌa nda. Tá tu íkan nda saa ta ndíkasi nda yuꞌu naꞌa ya köo ya niꞌí na kaꞌan na xaꞌa nda, ta ni kiti nǎꞌa küchiñu ri sikoyo ri nda nuu kuachi.

1 Timoteo 3:2

Chi ndiꞌi ñani yo, nda kúni ikán taꞌan chiñu yóꞌó ta xíniñuꞌu ndâku ni ná koo ini nda, ya ná köo naꞌa kaꞌan xaꞌa nda, ta iindaa ná koo yá síꞌi nda, ta ná kuñuꞌu káxin teꞌe ini nda, ndíchi ná koo xi̱ní nda, ta i̱í ná koo ini nda, ta ná koo ndúvi nda ndikuiso nda naꞌa, na xáa veꞌe nda, saa ná koo ndúvi nda ya vaꞌa ni sinaꞌa nda tuꞌun Ndioxi.

San Mateo 25:17

Saa i̱kan tu inka ra uvi ikán va xiꞌin ya, xa̱a chiñu ra xiꞌin uvi saa ya, ta ndi̱niꞌi ra inka uvi siki ya.