1 Timoteo 3:13 - Xochapa Mixteco

¹³ Tá tu vií chíndee taꞌan nda xiꞌin na ínuu nuu na veꞌe ñuꞌu, ta nda naꞌa ta xaa toꞌo ni na nda, saa nduu ndee ni ka ini nda ya ndáa ni ini nda xíni nda Tata yo Jesucristo.

1 Timoteo 3:13 Referans Kwoze

San Mateo 25:21

Saa ndi̱kaꞌan xitoꞌo ra káchi ra saa: “Vaꞌa ni i̱kan un, vaꞌa ni moso kuu mií un, vaꞌa ni kundaa ini i kuni i yóꞌo̱. Sikuiso chiñu i yóꞌo̱ nuu kuaꞌa ni ka ñaꞌa i, saa chi vaꞌa ni xa̱a súvi un chiñu loꞌo yóꞌó. Ta vitin naꞌa kiꞌvi un veꞌe i, ta kusini ni un xiꞌin i”, káchi patrón ra xiꞌin ra.

HEBREOS 6:10

Saa chi Ndioxi, ta vaꞌa ni ra, ndaa ni ini ra yakan ndïndoso ini ra xaꞌa chiñu ya íkan ndo, saa ndikaꞌán ini ra xaꞌa ndiꞌi ka ñaꞌa ya i̱kan ndo. Chi sínaꞌa ndo mií ndo ya kúꞌvi ni ini ndo xíni ndo ra, xaꞌa ya chíndee ndo naꞌa, na kándixa ñaꞌa. Ta nda vitin ta chíndee ka ndo na.

2 Timoteo 2:1

Ñani yo Timoteo, yóꞌo̱, ta nda tá íyo seꞌe mií i saa íyo un, yakan káꞌan i xiꞌin un chikaa ni un ndee chi kúꞌvi ni ini Ndioxi xíni ra yóꞌo̱ xaꞌa ya kúu un kuenta Tata yo Jesucristo.

1 Tesalonicenses 2:2

Saa chi xíni mií ndo tá täꞌan xaa nde ñuu ndo ta xiꞌna ñuu Filipos ndi̱yaꞌa nde, ta ikán ka̱ni ni na ndeꞌe, xa̱a ndu̱vaꞌa ni na xiꞌin nde. Saa tá ndi̱xaa nde ñuu ndo ta ndee ni sáa ini na ñuu ndo xíni na ndeꞌe, ta köo ndi̱ndiꞌvi nde nuu na, chi ndinuꞌu ni va ini nde ndi̱kaꞌan nde xiꞌin ndo xaꞌa tuꞌun vaꞌa ya ta̱xi Iva yo Ndioxi ndaꞌa nde.

Filipenses 1:14

Ta xaꞌa ya ndóꞌo i saa ndíkaa i veꞌe kàà yóꞌó kua chíndee taꞌan ya xiꞌin kuaꞌa ni na ñani yo ndúndee ka ini na, köo íꞌvi na kaꞌan ndoso na tuꞌun vaꞌa xaꞌa Tata yo Jesucristo.

1 Corintios 16:15

Ñani yo, xa kúndaa vaꞌa ini ndo xaꞌa na veꞌe ra ñani yo, ra Estéfanas, na ndóo chí estado Acaya. Na ikán ku na núnu̱ú xa̱á ndíkun Tata yo, ta xa̱á na xáa chiñu ni na chíndee taꞌan ni na xiꞌin ñani yo na ndíkun Tata yo Jesucristo.

Los Hechos 21:35

Saa tá ndi̱xaa ra nuu escalera ikán ta vaꞌa ka nda̱niꞌi ni̱nù nda lapa ra kuaꞌan ra xiꞌin nda chi ndíkun naꞌa kuaꞌan na sata ra kúni na kaꞌni na ra.

Los Hechos 6:15

Ñaa ndi̱koto na chiñu xiꞌin ndiꞌi ka na ndóo ikán, ndi̱koto na nuu ra Esteban. Tá káa nuu tatun Ndioxi saa ndu̱u nuu ra xi̱ni na.

Los Hechos 6:8

Ta ra Esteban kúu iin ta̱a, ra̱ ndee ni íyo ya vaꞌa xiꞌin saa ndee ni íyo ndee Ndioxi xiꞌin ra yakan vaꞌa i̱kan ni ra̱ yatuꞌun Ndioxi nuu na ñuu.

Los Hechos 6:5

Saa ndi̱xinu ini na ya ndi̱kaꞌan nda xiꞌin na, ta ndi̱kaxin na ra Esteban, ra ndáa ni ini xíni Ndioxi, ta íyo ni Tachi I̱í Ndioxi xiꞌin ra. Ñaa ndi̱kaxin na ra Felipe xiꞌin ra Prócoro xiꞌin ra Nicanor tin ra Timón inka ra Parmenas xiꞌin ra Nicolás. Ta ra Nicolás süvi ra judío ku ra, chí ñuu Antioquía ke̱e ra, ta yachi ka̱ndixa ra Ndioxi tá kuꞌva kándixa mií na judío. Sindiꞌi ikán xa̱á ra kándixa ra Jesucristo.

San Lucas 19:17

Saa ndi̱kuiin mií ra rey ikán káꞌan ra: “Vaꞌa ni i̱kan un. Vaꞌa ni moso ku un. Xaꞌa ya vaꞌa ni xa̱a chiñu un xiꞌin loꞌo ya ta̱xi i ndaꞌa un, ta vitin taxi i chiñu ndaꞌa un kundiso chiñu un xiꞌin uxi ñuu”, káchi ra xiꞌin ra.

San Mateo 20:28

Tá kuꞌva íkan yeꞌe Taa ra xa̱a ñuu ivi yóꞌó, chi yeꞌe ta köo vaxi i ya kaꞌnda i chiñu nuu naꞌa, sundi yeꞌe ta vaxi i ya koto vií i xiꞌin na saa xaa súvi i chiñu nuu na, ta saa kua kuchiñu na saña ndika na xaꞌa kuachi na ―káchi Jesús.

1 Timoteo 3:14

Ñani yo, Timoteo, kama ni va kúni i xaa i koto i yóꞌo̱, sundi xa tíꞌvi kuee i tutu yóꞌó xaa ya ndaꞌa un,