1 Timoteo 1:13 - Xochapa Mixteco

¹³ Chi yachi ta ndi̱kaꞌan ndikuu ni va i xaꞌa Tata yo Jesucristo, saa xa̱a ndu̱vaꞌa ni i xiꞌin na ndíkun sata ra, ta ndi̱kaꞌan kini ni i xaꞌa ra. Vani saa i̱kan i ta ku̱ndaꞌvi ni ini ra xi̱ni ra yeꞌe, saa chi yeꞌe köo ndi̱kundaa ini va ku i, yeꞌe naá nuu va ndi̱xiyo i, yakan i̱kan i saa.

1 Timoteo 1:13 Referans Kwoze

Los Hechos 8:3

Saa xa̱á ra Saulo xíka ra kánitaꞌan ra xiꞌin na ndíkun Jesús, kuakiꞌvi ra ini veꞌe na, tá veꞌe, tá veꞌe kuakiꞌvi ra táva ra na, taa ku nda ñaꞌa ku ná, iin ñúu ndai ra na kuaꞌan xiꞌin ra veꞌe kàà.

1 Pedro 2:10

Chi xa xíni mií ndo tá yachi ta ndaꞌvi ni ndi̱xiyo ndo, tá íyo ndo ndi̱xika ndaꞌvi saa ndi̱xiyo ndo, ta vitin ndi̱kuiso vií Ndioxi ndóꞌo̱ ndu̱u ndo na ñuu mií ra. Chi yachi ta ni köo ndïkuvi kundaꞌvi ini ra kuni ra ndóꞌo̱, ta vitin ta ndiniꞌi taꞌvi ndo nuu ra kúndaꞌvi ni ini ra xíni ra ndóꞌo̱.

Los Hechos 9:13

Saa ndi̱kuiin ra Ananiás ikán káꞌan ra xiꞌin Jesús, káchi ra saa: ―Tata, xa kuaꞌa ni naꞌa ndítuꞌun xaꞌa ra Saulo ya xáa nduvaꞌa ni ra xiꞌin na taꞌan i na ndíkun yóꞌo̱, na ndóo ñuu Jerusalén.

HEBREOS 4:16

Yakan vaꞌa ná kuyati yo nuu ra tá ndóꞌni yo nuu tindoꞌo ta ná ku ïꞌvi yo kuyati yo nuu ra, chi ndee ni vaꞌa ra, kúndaꞌvi ni ini ra xíni ra yoo, yakan kúꞌvi ni ini ra xíni ra yoo, ta saa chindee ra yoo tá ñúꞌu yo nuu tindoꞌo, ta ná kuyati yo nuu íyo ra xáꞌnda chiñu ra.

Los Hechos 3:17

Saa xa̱á káꞌan ka ra xiꞌin na, káchi ra saa: ―Na taꞌan yo, ya ndaa kua xa̱ꞌni ndo Jesús, xaꞌa ya naá nuu va ndo kua i̱kan ndo saa, ta saa i̱kan tu na chiñu kúu mií chiñu nuu va ndo.

San Lucas 23:34

Saa ndi̱kaꞌan Jesús xiꞌin Ndioxi, káchi ra saa: ―Tata Iva yo, xaa kaꞌnu ini un xaꞌa na chi köo kúndaa ini na unkua íkan na ―káchi ra. Ñaa chi̱kaa nda lapa suerte sata tikoto ra, ya kuni nda ndá ñaꞌñu kua ndikiꞌin iin iin nda.

1 Timoteo 1:16

Xaꞌa ya ikán kua ku̱ndaꞌvi ni ini Tata yo Jesucristo xi̱ni ra yeꞌe. I̱kan ra saa xiꞌin i ya kúni ra ná kuni naꞌa ya ndee ni kaꞌnu ini ra xiꞌin na ndee ni ndee kuachi kúu mií nuu ra. Ta kúni ra ná kuni na ya ndo̱ꞌo i, ta saa kuchiñu na kandixa na ra, ta saa niꞌi na kutaku na xiꞌin ra ndiꞌi saa kivi ya vaxi.

Filipenses 3:6

Ta xaꞌa ya xa̱a súvi ni i ndiꞌi ichí ya si̱ndoo xii yo xinaꞌa ñuu i, yakan kua ndi̱xika i xa̱a nduvaꞌa ni i xiꞌin na ndíkun Jesucristo, chi süvi na vaꞌa ku na káꞌán i. Nda iin naꞌa ta köo ya ndi̱niꞌi na kaꞌan na xaꞌa i, chi ndaa ni ndi̱xiyo ini i, xaꞌa ya xa̱a súvi ni i ley Ndioxi.

Gálatas 1:13

Ta xa kúndaa ini mií ndo xaꞌa i ndá kuꞌva ndi̱xiyo i yachi, xa̱a súvi ni i costumbre mií nde judío. Xa xi̱ni soꞌo ndo xaꞌa i ya ndee ni xi̱ndikun i na veꞌe ñuꞌu xaꞌa ya kándixa na Jesucristo, ta ndee ni ku̱ni i sindiꞌi xaꞌa i na.

1 Corintios 15:9

Chi yeꞌe, ta ra ni̱nu̱ ni kuu i nuu ndiꞌi nda taꞌan i, ni köo ichí i kaꞌan naꞌa xiꞌin i apóstol, saa chi ra xa̱a ndu̱vaꞌa ni xiꞌin naꞌa, na kúu veꞌe ñuꞌu Ndioxi, ndi̱xiyo i.

1 Corintios 7:25

Ta xaꞌa nda kuâán xiꞌin ná kuâán taki ná täꞌan tindaꞌa, ta köo ñaꞌa ndíxaꞌnda chiñu Tata yo nuu i xaꞌa na. Sundi vaꞌa va kaꞌan i xiꞌin ndo ndá kuꞌva ku ya ndíkani ini i, saa chi ta̱xi Tata yo ya xínituni i ndaꞌa i xaꞌa ya kúndaꞌvi ni ini ra xíni ra yeꞌe.

Los Hechos 22:4

Chi̱kaa ni ini i sindiꞌi xaꞌa ndiꞌi i na ndíkun Jesús. Ta xaꞌa ya ikán kua, xa̱á i xáa ndikuu i xiꞌin na. Kuaꞌan i iin iin ñuu tíin i na: taa ku nda ñaꞌa ku ná, ndiꞌi na tíin i kuaꞌan xiꞌin i veꞌe kàà. Ndakua íyo ini i kaꞌni i na, ya ná ndiꞌi xaꞌa na.

Los Hechos 9:5

Saa ndi̱kuiin ra káꞌan ra, saa: ―¿Unku yóꞌo̱, Tata? ―káchi ra. Ñaa ndi̱kuiin ra káꞌan ra: ―Yeꞌe ku Jesús, ra xáa nduvaꞌa un xiꞌin, ¿ta ndachu sítixuꞌvi un mií un? ta íkan un tá íkan sindiki ri kéta xaꞌa itun káni na ri ―káchi ra xiꞌin ra Saulo.

Los Hechos 9:1

Ta ra Saulo xíka ra káꞌan ra ya sindiꞌi xaꞌa ndiꞌi ra na kándixa Tata yo Jesucristo. Iin kaꞌni yaa ra na, káchi ra. Xaꞌa ya ikán kua ke̱e ra ndi̱xaꞌan ra nuu sutu, ra ínuu nuu ndiꞌi nda sutu.

San Lucas 12:47

Ta ndixa ni sindoꞌo ñaꞌa xitoꞌo ra moso ikán ra, saa chi xa xíni ra ini xitoꞌo ra ta köo ndi̱xiyo nduvi ra ndikiꞌin ra xitoꞌo ra, xaꞌa ya i̱kan ra saa ta ndee ni sitixuꞌvi ñaꞌa xitoꞌo ra.