1 Pedro 3:22 - Xochapa Mixteco

²² Ta nda̱a ra kuaꞌan ra nuu ndivi, índuꞌu ra ñaꞌñu kuáꞌá Ndioxi. Ta mií ra ku ra xáꞌnda chiñu nuu na tatun Ndioxi, saa xáꞌnda chiñu ra nuu ndiꞌi ndee ya íyo nuu ndivi tin ya íyo nuu ñuꞌú yóꞌó.

1 Pedro 3:22 Referans Kwoze

HEBREOS 9:24

Saa chi veꞌe ñuꞌu nuu ndee ni I̱í ndi̱kiꞌvi Jesucristo, ta süvi na ñuu ivi yóꞌó ku na ndi̱sikuaꞌa ya. Chi ya si̱kuaꞌa na ivi yóꞌó, ta tá káa copia mií veꞌe ñuꞌu ya ndee ni vaꞌa íyo mií nuu ndivi saa káa ya si̱kuaꞌa na. Ta ikán ku nuu ndi̱kiꞌvi Jesucristo ini veꞌe ñuꞌu ya ndee ni vaꞌa ikán, káꞌan ndaꞌvi ra xaꞌa yo xiꞌin Ndioxi, ya ná xaa kaꞌnu ini ra xaꞌa yo.

HEBREOS 12:2

Ta iindaa mituꞌun xaꞌa Tata yo Jesucristo kua ná kundiꞌi ni ini yo, saa chi mií ra ku ra sínaꞌa yoo ndá kuꞌva kua kundaa ni ini yo kuni yo Ndioxi, saa tu iindaa mituꞌun mií ra ku ra chíndee yoo, ndása vaꞌa ra kuꞌva ndáa ni ini yo xíni yo Ndioxi. Ta saa ndi̱xaꞌa ndee ndiꞌi ini ra ndoꞌo ni ra nuu cruzin, ta köo ndi̱kiꞌin ra kuenta xaꞌa ya kúkaꞌan nuu ra, chi kúndaa ini ra tá si̱ndiꞌi ndo̱ꞌo ra saa ta kusini ni ra. Ta vitin ndi̱kunduꞌu ra ñaꞌñu kuáꞌá Ndioxi xáꞌnda chiñu ra xiꞌin Ndioxi.

HEBREOS 10:12

Sundi Jesucristo ta iin ichí va i̱kan ra saa, iin ichí va ndi̱taxi ra mií ra xaꞌa kuachi yo, ta ya i̱kan ra saa ta köo xíniñuꞌu ra ikán tuku ra saa. Tá sindiꞌi i̱kan ra saa ta ndi̱kunduꞌu ra ñaꞌñu kuáꞌá Ndioxi xáꞌnda chiñu ra xiꞌin Ndioxi.

San Marcos 16:19

Tá sindiꞌi Tata yo Jesús ndi̱kaꞌan ra xiꞌin nda, saa ndi̱ko koo ra kuaꞌan ra nuu ndivi i̱kan Ndioxi, ta ndi̱kunduꞌu ra ñaꞌñu kuáꞌá Ndioxi.

HEBREOS 8:1

Ta ya káꞌan i xiꞌin ndo yóꞌó kua ndee ni ndee xíniñuꞌu ndo kundaa ini ndo: Jesucristo ku ra ku sutu chee, kaꞌnu ni ra nuu yo, ta nda̱a ra ndi̱kunduꞌu ra ñaꞌñu kuáꞌá Ndioxi nuu íyo tai kaꞌnu itun toꞌo xáꞌnda chiñu ra xiꞌin Ndioxi.

HEBREOS 6:20

Chi Jesús ta xa ndi̱kiꞌvi ra, yakan vaꞌa ku̱chiñu ra xu̱na ra ichí nuu yo ya kuchiñu yo kiꞌvi yo koo yo xiꞌin Ndioxi. Ta nda iin ichí ndïꞌi xaꞌa chiñu kúu mií ra, ndiꞌi saa ichí kuu mií ra sutu, ra chee ni nuu yo, tá kuꞌva ndi̱xiyo sutu ra Melquisedec, saa íyo ra.

Colosenses 3:1

Ta ndóꞌo̱, ta xa ndi̱taku ndo xiꞌin Jesucristo tá ndi̱xiꞌi ra, yakan vitin ta xíniñuꞌu ndo nduku ndo ya vaꞌa, ya ndáa yaꞌvi ni, ya íyo nuu ndivi nuu índuꞌu ra nuu tai toꞌo ñaꞌñu kuáꞌá Ndioxi.

ROMANOS 8:38

Xíni teꞌe i, ya ndixa kua köo nda iin naꞌa, ni köo nda iin ndee ya kuchiñu xaa xíka yo nuu ya kúꞌvi ni ini Ndioxi xíni ra yoo. Ni ndee ya xáꞌni yoo, ni ya táku yo, ni ndee ya kúu mií na tatun Ndioxi, ni ndee kiti nǎꞌa, nda iin ndee yóꞌó küchiñu ya xaa xíka ya yoo nuu ya kúꞌvi ni ini Ndioxi xíni ra yoo, ni ya uꞌvi ni íyo nuu yo vitin, ni ya uꞌvi ni vaxi nuu yo,

ROMANOS 8:34

Ta ¿án ndá naꞌa káꞌan xaꞌa yo kuvi yo xaꞌa kuachi yo? Nda iin naꞌa küchiñu ikan saa xiꞌin yo, chi Jesucristo ku ra xa ndi̱xiꞌi xaꞌa kuachi yo, ta ndi̱taku ra, ta vitin íyo ra ñaꞌñu kuáꞌá Ndioxi, ta íyo ra xáku ndaꞌvi ra xaꞌa yo.

San Mateo 22:44

Ndioxi ndi̱kaꞌan ra xiꞌin ra chee nuu i, káchi ra saa: “Koo un xiꞌin i ñaꞌñu kuáꞌá i nuu tai toꞌo kaꞌnda chiñu un, yóꞌó koo un xiꞌin i ndakua ná sindiꞌi xaꞌa ndiꞌi i na xïin kuni yóꞌo̱”, káchi Ndioxi nuu ta̱a ra David xinaꞌa.

HEBREOS 1:3

Ta ya luvi ni yéꞌe̱ kúu mií Seꞌe Ndioxi kua yéꞌe̱ mií Ndioxi. Tá káa níi mií Ndioxi saa káa níi mií Jesucristo, saa ta̱xi Ndioxi ichí ndaꞌa ra ya ndíso chiñu ra xiꞌin ndiꞌi ñaꞌa ya íyo ñuu ivi yóꞌó. Ta xiꞌin tuꞌun ra ya ndee ni ndee kua xáa chiñu ndiꞌi ya nda vitin. Saa ndi̱kata ra kuachi yo xiꞌin ndee mií ra, ta sindiꞌi nda̱a ra nuu ndivi ndi̱kunduꞌu ra ñaꞌñu kuáꞌá Ndioxi nuu tai toꞌo, xáꞌnda chiñu ra xiꞌin ra.

1 Corintios 15:24

Tá si̱ndiꞌi si̱taku ra naꞌa ikán, saa sindiꞌi xaꞌa ra ndiꞌi ndee ya xáꞌnda chiñu nuu na ñuu ivi yóꞌó, xiꞌin ndiꞌi ndee ya kúu mií na kúnaꞌnu xáꞌnda chiñu, xiꞌin ndiꞌi ñaꞌa ya xáꞌnda chiñu nuu ndivi. Saa nditaxi ra ichí ya kúu mií ra ndaꞌa Iva yo Ndioxi.

Los Hechos 3:21

Sundi vitin ta xíniñuꞌu Jesús koo ra nuu ndivi nda kivi ná xaa vií Ndioxi ñuu ivi yóꞌó. Nduxaa ya kindoo vaꞌa ndiꞌi ñaꞌa. Nduu ya tá ndi̱xiyo ya núnu̱ú tá täꞌan kiꞌvi kuachi ñuu ivi yóꞌó. Tá íyo ya ndi̱kaꞌan Ndioxi tixin ndiꞌi nda i̱í, nda ndi̱kaꞌan ndoso tuꞌun yuꞌu ra xinaꞌa, saa koo ya ikan ra.

Los Hechos 1:11

Saa xa̱á nda káꞌan nda, káchi nda saa: ―Ndóꞌo̱ na ñuu estado Galilea, ¿ndachu kua xíto ni ndo nuu ndivi ndíta ndo? Suvi Jesús, ra xi̱ni ndo nda̱a kuaꞌan nuu ndivi, suvi ra ñaa ku ra ndiko koo tuku, tá kuꞌva nda̱a ra kuaꞌan ra, saa kuu ndiko koo ra ―káchi nda ikán xiꞌin nda apóstol.

San Marcos 12:36

Ta suvi Tachi I̱í Ndioxi si̱kaꞌán ini xii sikua yo ra David ta̱a ra tuꞌun, káchi saa: Soꞌva káchi Iva i Ndioxi xiꞌin Tata i ra chee, káchi ra saa: “Naꞌa koo un ñaꞌñu kuáꞌá i nuu tai toꞌo yóꞌó. Yóꞌó koo un xiꞌin i ndakua ná sindiꞌi xaꞌa ndiꞌi i na sáa ini xíni yóꞌo̱, káchi Ndioxi, káchi ya ta̱a ra David xinaꞌa.

HEBREOS 1:13

Ndioxi ta nda iin ichí köo ndi̱kaꞌan ra saa xiꞌin nda iin na tatun ra, tá kuꞌva ndi̱kaꞌan ra xiꞌin Seꞌe ra: Naꞌa yóꞌó koo un xiꞌin i ñaꞌñu kuáꞌá i kaꞌnda chiñu un xiꞌin i, ndakua ná tindaa kivi sikoyo i naꞌa, na sáa ini xíni yóꞌo̱ tixin xaꞌa un, sindiꞌi xaꞌa ndiꞌi i na, káchi Ndioxi xiꞌin ra.

San Lucas 20:42

Ta suvi mií ra David ku ra ndi̱kaꞌan nuu tutu ya Salmo, káchi ra saa: Soꞌva káchi Ndioxi xiꞌin Tata i: Naꞌa koo un ñaꞌñu kuáꞌá i.

San Mateo 28:18

Saa ku̱yati Jesús nuu nda, ta ndi̱kaꞌan ra xiꞌin nda, káchi ra saa: ―Ndaꞌa yeꞌe ta̱xi Ndioxi ichí xaꞌa ndiꞌi ni kúu ñaꞌa ya íyo nuu ndivi tin ya íyo ñuu ivi yóꞌó.

HEBREOS 1:6

Tá kivi ti̱ꞌvi Ndioxi Seꞌe ra, ra núnu̱ú ki̱xi ra ñuu ivi yóꞌó ta ndi̱kaꞌan ra xaꞌa ra, káchi ra saa: Ndiꞌi tatun xáa chiñu nuu i ta ná xaa kaꞌnu na Seꞌe i, káchi ra.

HEBREOS 4:14

Jesús, ra kúu Seꞌe Ndioxi ku iin sutu ra ndee ni chee, ra ndee ni kaꞌnu nuu yo. Ta ra ikán ku ra nda̱a nuu ndivi, yakan tuun ni ná kandixa yo ra, ta ná xïkuiin yo ya ndáa ini yo ra.

San Juan 13:32

Tá tixin ra ikán kua ndúu kaꞌnu ni Ndioxi ta saa ndasa kaꞌnu ni tu Ndioxi ra íkan va, ta kama ni kuu saa.