1 Pedro 1:7 - Xochapa Mixteco

⁷ Chi ndiꞌi tindoꞌo ya vaxi nuu ndo, ta tá kuꞌva xíto ndoso na kàà ya oro xiꞌin ñu̱ꞌu̱ iꞌni ni, ya ná nduyéꞌe̱ luvi ya nduu latun ni ka ya. Ta kuꞌva saa íyo ya ndáa ni ini ndo Ndioxi, chi ya ikán kua ndáa yaꞌvi ni ka nuu oro ya ndíꞌi xaꞌa, yakan tá ndóꞌo̱ ndo saa, ta ndïkava ini ndo, chi tá ná ndiko koo Tata yo Jesucristo kixi ra ta vaꞌa ni kaꞌan ra xaꞌa ndo, chinuu vaꞌa ni ra tuꞌun ndo.

1 Pedro 1:7 Referans Kwoze

Santiago 1:12

Vaꞌa ni kée naꞌa, na kúndee ini xiꞌin tindoꞌo vaxi nuu na, saa chi Ndioxi ta taxi ra kutaku na xiꞌin ra ndiꞌi saa kúu kivi. Tá íyo ya ndi̱kaꞌan ra xiꞌin naꞌa, na kúꞌvi ni ini ra xíni ra, saa koo ya ikan ra xiꞌin na, niꞌi na ichí kutaku na xiꞌin ra.

1 Pedro 4:12

Ñani yo, ndïkanda ni ini ndo tá ndee ni vaxi tindoꞌo xíto ndoso ya ndóꞌo̱ xaꞌa ya ndíkun ndo Tata yo Jesucristo, ta ndïkani tu ini ndo ndisaa ndóꞌo̱ ku ndo ndee ni ndóꞌo, túvi ndo.

ROMANOS 2:7

Ndiꞌi naꞌa, na i̱kan ya vaꞌa, ta saa ikan Ndioxi xiꞌin na. Na ikán ku naꞌa, na köo ndi̱xikuiin ikan ya vaꞌa. Saa chi ku̱ni na xaa kaꞌnu na ra, saa taxi na ya toꞌo chee ni ndaꞌa ra. Ta na ikán ku na niꞌi ichí koo na xiꞌin ra ndiꞌi saa kivi.

1 Corintios 3:13

Sundi tá ná tindaa kivi ya ndiꞌi xaꞌa ñuu ivi yóꞌó, ta saa kua ndituvi teꞌe ndiꞌi ya xaꞌa chiñu ya i̱kan iin iin naꞌa. Ta ndee ni koko ñu̱ꞌu̱, ta xiꞌin ya ikán kua kuchiñu koto ndoso Ndioxi chiñu iin iin na ndá kuꞌva vaꞌa xa̱a chiñu na.

Judas 1:24

Ná xaa kaꞌnu ni yo Ndioxi chi ndee ni ndee kúu mií ra ya chindee ra yoo ya ná sïndikoo yo ichí ra ya ndaa kándixa yo. Ta vaxi kivi kundita yo nuu ra nuu íyo ndiꞌi ya kaꞌnu luvi ni. Saa ndasa vaꞌa ra yoo nduu yo naꞌa, na köo ka kuachi kúu mií nuu ra, ta yáꞌa ni kusini yo kivi ikán.

2 Pedro 1:4

Tixin ya yóꞌó kua ndi̱niꞌi yo ya luvi ni, ya yáꞌa ni chee ndi̱kaꞌan ra taxi ra ndaꞌa yo, nuu xinu yo koo yo tá kuꞌva káa mií ra, i̱í ni ra. Saa kua kuchiñu yo kunu yo nuu kaku yo nuu ndiꞌi ya väꞌa íyo ñuu ivi yóꞌó, chi ndisaa ya väꞌa kútoo ni mií ikin kuñu na kua íkan na.

1 Pedro 2:4

Vaꞌa kuyati ndo nuu Tata yo Jesucristo ra káa tá káa yu̱ú ya táku, ya ku̱ndasi nda síkuaꞌa veꞌe, sundi Ndioxi ta ndi̱kaxin ñaꞌa ra, chi ya ikán ka kua ndee ni ndáa yaꞌvi nuu ra, ta yáꞌa ni yaꞌvi ya.

San Mateo 25:21

Saa ndi̱kaꞌan xitoꞌo ra káchi ra saa: “Vaꞌa ni i̱kan un, vaꞌa ni moso kuu mií un, vaꞌa ni kundaa ini i kuni i yóꞌo̱. Sikuiso chiñu i yóꞌo̱ nuu kuaꞌa ni ka ñaꞌa i, saa chi vaꞌa ni xa̱a súvi un chiñu loꞌo yóꞌó. Ta vitin naꞌa kiꞌvi un veꞌe i, ta kusini ni un xiꞌin i”, káchi patrón ra xiꞌin ra.

El Apocalipsis 3:10

Xaꞌa ya ndee ni vaꞌa ndi̱xaꞌa ndee ini ndo xa̱a súvi ndo tuꞌun i, ta saa tu yeꞌe va, kundaa ni i ndóꞌo̱ tá kivi ná kixi tindoꞌo ya ndee ni ndee koto ndoso ya ndiꞌi na ndóo ñuu ivi yóꞌó.

El Apocalipsis 2:10

Ta ndóꞌo̱ ku ïꞌvi ndo nuu tindoꞌo ya uꞌvi ni vaxi nuu ndo. Saa chi íyo naꞌa, na kúni xaa súvi ya kúni kiti nǎꞌa án kiti Timiaꞌa, kiti Satanás. Tiin na sava ndóꞌo̱ taan na veꞌe kàà, nuu koto ndoso na ndóꞌo̱ án ya ndixa kua kándixa ndo yeꞌe. Ta ndoꞌo ni ndo uxi kivi. Ta káꞌan ni i xiꞌin ndo ya ná síndikoo ndo ichí i, ndinuꞌu ni ini ndo kandixa ndo yeꞌe, nda kivi tá ná kuvi ndo. Saa ndikiꞌin ndo ya vaꞌa taxi i ndaꞌa ndo nuu kutaku ndo xiꞌin i ndiꞌi saa kivi ya vaxi.

El Apocalipsis 1:7

Vaxi kivi ta ndiko koo Tata yo Jesucristo ñuu ivi yóꞌó, kixi ra tañu vi̱kó. Ndiꞌi saa naꞌa kuni xiꞌin nuu na ra kixi ra. Nda naꞌa, na tu̱vi itun íyo kàà xi̱ín nuu, na xa̱a ndu̱vaꞌa ni xiꞌin ra, si̱tikueꞌe ni na ra, ta nda na ikán kuni kixi ra. Ta naꞌa, na ndóo ndiꞌi ni kúu ñaꞌñu ñuu ivi, na köo ndi̱xiin kandixa ñaꞌa, nda na ikán kusuchi ni ini, kuaku ni na tá ná kuni na ra. Saa ná koo.

1 Corintios 4:5

Xaꞌa ya ñaa kua káꞌan i xiꞌin ndo, táxi i nuu ndo. Käꞌan kama ni ndo xaꞌa naꞌa ya xaa nani ndo kuachi xiꞌin na. Kundatun ndo nda ná xinu mií tiempo ya ndiko koo Tata yo Jesucristo, chi mií ra ku ra sindiyeꞌe ndiꞌi saa kúu. Ta saa kua ndituvi ndiꞌi ñaꞌa ya íyo sěꞌe vitin. Ta saa kua ndituvi nda ñaꞌa ya íyo sěꞌe nima naꞌa, ndá kuꞌva ku ya ndíkani ini na. Ta suvi mií tiempo ikán kua xaa kaꞌnu Ndioxi naꞌa, tá kuꞌva íyo ya i̱kan na, saa koo ya ikan ra xiꞌin na.

Los Hechos 8:20

Saa ndi̱kuiin ra Pedro káꞌan ra xiꞌin ra: ―Vaꞌa ná sindiꞌi xaꞌa Ndioxi yóꞌo̱ xiꞌin xuꞌun un, chi ndíkani ini un sata un Tachi I̱í Ndioxi.

San Juan 12:26

Tá ndá ndóꞌo̱ kúni xaa chiñu nuu i, ta vaꞌa kundikun ndo yeꞌe. Chi nuu koo i ta ikán koo tu ndóꞌo̱ va xiꞌin i. Tá ndá ndo xáa chiñu nuu i, ta xaa kaꞌnu Iva i Ndioxi ndóꞌo̱ ―káchi Jesús xiꞌin na.

San Juan 5:44

Köo xíin ndo kandixa ndo yeꞌe, saa chi kútoo ni ndo kaꞌan vaꞌa ndo xaꞌa taꞌan ndo, ta köo ndúku ndo ya kaꞌan vaꞌa Ndioxi xaꞌa ndo ―káchi ra xiꞌin nda.

San Lucas 12:33

Xiko ndo ñaꞌa kúu mií ndo, saa taxi ndo xuꞌun ndaꞌa na ndaꞌvi. Kundiꞌi ini ndo chivaꞌa ndo ñaꞌa ndo ini ñaꞌa ya köo ndíꞌi xaꞌa íyo nuu ndivi ni na kuiꞌna küchiñu sikuiꞌna ya, ni tikixin küchiñu ri sindiꞌi xaꞌa ri ya.

San Mateo 25:23

Saa ndi̱kaꞌan ra xitoꞌo ra, káchi ra saa: “Vaꞌa ni xa̱a súvi un chiñu, vaꞌa ni moso ku mií un. Vaꞌa ni kundaa ini i kuni i yóꞌo̱. Sikuiso chiñu i yóꞌo̱ xiꞌin kuaꞌa ni ka chiñu i, chi vaꞌa ni xa̱a súvi un chiñu loꞌo yóꞌó. Ta vitin naꞌa kiꞌvi un veꞌe i, nuu kusini ni un xiꞌin i”, káchi xitoꞌo ra xiꞌin ra.

San Mateo 19:28

Saa ndi̱kaꞌan Jesús xiꞌin nda, káchi ra: ―Ya ndaa káꞌan i xiꞌin ndo, tá ná tindaa kivi ya nduxaa ñuu ivi yóꞌó, ta yeꞌe, Taa ra xa̱a ñuu ivi yóꞌó, ta koo i nuu tai toꞌo, itun luvi ni, ikán koo i kaꞌnda chiñu i. Ta ndóꞌo̱ ndíkun yeꞌe, uxi uvi saa ndo koo nuu iin iin tai toꞌo xaa nani ndo kuachi xiꞌin uxi uvi saa tiꞌvi na Israel.

El Apocalipsis 3:18

Yakan yeꞌe, ta káꞌan i xiꞌin ndo, vaꞌa sata ndo oro ya ndinuꞌu nuu i, oro ya xáꞌmi na xiꞌin ñu̱ꞌu̱ xíxi, ya ndúu ya oro nina. Taꞌan ya ikán kua íyo nuu i. Sata ndo ya nuu i, saa nduu ndo naꞌa, na ndixa ni kuika. Tá tu köo kúni ndo kukaꞌan ni nuu ndo xaꞌa ya chála ndo, ta sata ndo toto yaa ni nuu i kundixi ndo. Saa sata tu ndo tatan nuu i, kee nduchi nuu ndo ya ná ndikoto vaꞌa ndo.

2 Pedro 1:1

Yeꞌe, Simón Pedro ra xáa chiñu nuu Tata yo Jesucristo ku i táa tutu ya tíꞌvi i xaa ndaꞌa ndóꞌo̱ ñani yo, na xa iin káchi luvi ni kándixa ra tá kuꞌva kándixa mií nde ra. Saa chi mií Tata yo Jesucristo ra síkaku yoo, ra kúu Iva yo Ndioxi ku iin taa ra ndee ni ndaa ini.

1 Pedro 2:7

Ndiꞌi ndóꞌo̱ kándixa ni Jesucristo ta nda tá káa yu̱ú ya ndee ni ndáa yaꞌvi saa káa ra nuu ndo, ta nuu naꞌa, na köo xíin kandixa ra, ta ni köo ndáa yaꞌvi ra nuu na, ta saa xáa ndúvi na tuꞌun Ndioxi ya káchi saa: Yu̱ú ya ku̱ndasi nda síkuaꞌa veꞌe. Ya ikán kua ndu̱u yu̱ú núnu̱ú ya ndee ni vaꞌa ndíkaa xaꞌa veꞌe, káchi tuꞌun Ndioxi.

1 Pedro 1:5

Xaꞌa ya ndáa ni ini ndo Ndioxi kua kundaa ra ndóꞌo̱ xiꞌin ndee ra, chi saa chi̱tuni ra sikaku ra ndóꞌo̱ iin saa nda ná tindaa kivi sindiꞌi.

ROMANOS 2:29

Naꞌa na ndixa kúu judío ku naꞌa, na ndixa kándixa Ndioxi. Ta kúu mií na tuni Ndioxi ya ndixa ndaa kua kúu na, naꞌa na ndâku nima nuu ra. Chi mií Tachi I̱í Ndioxi kua ndi̱nama nima na yakan ndi̱kuiso vaꞌa ra na nuu mií ra. Ta süvi na ñuu ivi yóꞌó ku na ndíxaa saa, süvi mií na ku na ndíkuiso vaꞌa ñaꞌa, chi mií Ndioxi ku ra i̱kan saa xiꞌin na. Ndi̱kuiso vaꞌa ra na nuu ra.

San Lucas 17:30

Tá ku̱u tiempo ikán, köo ndi̱xika ini na ndiꞌi xaꞌa na, ta ndi̱ꞌi xaꞌa na. Saa kuu ñuu ivi yóꞌó kivi ná ndiko koo yeꞌe, Taa ra xa̱a ñuu ivi yóꞌó.

ROMANOS 2:10

Sundi xaa kaꞌnu Ndioxi ndiꞌi naꞌa, na íkan ya vaꞌa, saa taxi ra ya toꞌo ndaꞌa na, ta taxi ra ya koo vaꞌa ni ini na. Xiꞌna na judío ikan ra ya vaꞌa xiꞌin, ta sindiꞌi saa ikan ra ya vaꞌa xiꞌin naꞌa, na köo kúu judío.

ROMANOS 8:19

Ta vitin ndiꞌi ñaꞌa si̱kuaꞌa Ndioxi ndátun ni ya, ta kúni ya ná tindaa kíi kivi ya sinaꞌa Ndioxi ya kúu yo seꞌe ra.

1 Pedro 1:13

Xaꞌa ya ikán kua koo ndúvi ndo vívií ndikani ini ndo, táku koo ini ndo, ndee ni ndaku koo ini ndo ya ndikiꞌin ndo ñaꞌa vaꞌa ya niꞌi ndo nuu Tata yo Jesucristo tá ná ndiko koo ra kixi ra.

1 Pedro 4:13

Tá ndóꞌo ndo saa ta kusini ni ndo, chi iin káchi ndóꞌo ndo tá kuꞌva ndo̱ꞌo mií Tata yo Jesucristo. Saa tá ná ndiko koo tuku ra kixi ra ta kuni ndo ndee ya chee luvi ni kúu mií ra, ta kusini ni ndo.

1 Pedro 5:1

Ta xáku ndaꞌvi ni i nuu nda ñani yo, nda xikuaꞌa nda ñúꞌu xiꞌin ndo, nda ndóso nuu na ñani yo na veꞌe ñuꞌu, nda xikuaꞌa taꞌan yeꞌe. Chi yeꞌe ta ndíkuiin i xaꞌa Tata yo Jesucristo ya ndee ni ndi̱xuꞌvi ra xaꞌa yo. Ta kivi tá ná ndiko koo ra ta saa kuni yo ya yéꞌe̱ luvi ni xiꞌin ndee chee ni kúu mií ra, ya ndituvi kuni yo.

2 Pedro 3:14

Xaꞌa ya ñaa kua, nani ndátun yo kuu saa, ñani mani, ta yáꞌa ni vi kuenta koo ndo xiꞌin mií ndo, täxi ndo kuyakua ndo xiꞌin kuachi, vií ni koo ndo xiꞌin Ndioxi.