1 Corintios 9:26 - Xochapa Mixteco

²⁶ Yakan yeꞌe, ta tá káa ra xínu ni án tá káa ra ndee ni káni taꞌan nuu kéꞌe taꞌan na kúun na ikin nuu taꞌan na, saa káa i, ndee ni va ndíꞌi ini i xáa súvi i chiñu Ndioxi ta köo xínu kíꞌvi i, ni köo káni taꞌan i tá kuꞌva íkan naꞌa, na kúun ikin nuu tachi kuiti.

1 Corintios 9:26 Referans Kwoze

2 Pedro 1:10

Yakan ndóꞌo̱, ta xíniñuꞌu ndo tuun ni kundikun ndo ichí Tata yo Jesucristo nuu ndínaꞌa ndo mií ndo, ya ka̱na ra ndóꞌo̱ saa ndi̱kaxin ra ndóꞌo̱ ya kundikun ndo ra. Tá ná ikan ndo saa ta nda iin kivi köyo ndo nuu kuachi ya ikan ndo ya väꞌa.

2 Timoteo 2:5

Ta saa tu íyo iin taa ra kuaꞌan ku̱nu, ra kéꞌe taꞌan xiꞌin inka ra, ta xíniñuꞌu ra ikán xaa súvi ra ndiꞌi chiñu ya táꞌnda nuu ndiꞌi naꞌa, na xínu, saa vaꞌa kuchiñu ra xinu koo ra niꞌi ra ñaꞌa ya taxi na ndaꞌa ra.

Filipenses 1:21

Chi tá tu táku i, ta xaꞌa ya xaa súvi i chiñu nuu mií Cristo kua táku i, án tá yeꞌe ndi̱xiꞌi ku i, ta vaꞌa ni ka kée va i.

Colosenses 1:29

Xaꞌa ya yóꞌó kua chíkaa ni i ndee xiꞌin chiñu ya íkan i nuu Tata yo Jesucristo, chi mií ra ku ra táxi ni ndee ndaꞌa i xáa chiñu ni i nuu ra xiꞌin ndee ra ya ndee ni íyo xiꞌin i.

San Lucas 13:24

―Xaꞌa ni ndo ndee ya kiꞌvi ndo yéꞌé ya táñú ni ya kuaꞌan nuu íyo Ndioxi, chi kuaꞌa ni naꞌa kúni kiꞌvi ta küchiñu na kiꞌvi na.

2 Timoteo 1:12

Xaꞌa ya káꞌan ndoso i tuꞌun vaꞌa xaꞌa ra kua ndóꞌo ni i vitin. Sundi köo kúkaꞌán nuu i xaꞌa ya ndóꞌo i. Chi yeꞌe, ta xa kúndaa teꞌe ini i unku ra ndáa ni ini i xíni i, ta ndee ni ndee kúu mií ra ya chindee ra yeꞌe ya xaa súvi i ndiꞌi chiñu ya ta̱xi ra ndaꞌa i xaa súvi i.

Efesios 6:12

Ta süvi xiꞌin na taꞌan mií yo kua kánitaꞌan yo, chi xiꞌin tachi nduvaꞌa ya ndee ni naꞌnu tin ndiꞌi ni kúu ya kúu mií chiñu xáꞌnda chiñu ndiꞌi ñaꞌñu xiꞌin ka inka nuu ndiꞌi ndee kiti nǎꞌa ya íyo nuu naá ñuu ivi yóꞌó tin xiꞌin ya íyo nìnu nuu sukun ni ñuu ivi yóꞌó kua kánitaꞌan yo.

1 Pedro 5:1

Ta xáku ndaꞌvi ni i nuu nda ñani yo, nda xikuaꞌa nda ñúꞌu xiꞌin ndo, nda ndóso nuu na ñani yo na veꞌe ñuꞌu, nda xikuaꞌa taꞌan yeꞌe. Chi yeꞌe ta ndíkuiin i xaꞌa Tata yo Jesucristo ya ndee ni ndi̱xuꞌvi ra xaꞌa yo. Ta kivi tá ná ndiko koo ra ta saa kuni yo ya yéꞌe̱ luvi ni xiꞌin ndee chee ni kúu mií ra, ya ndituvi kuni yo.

HEBREOS 4:1

Yakan yoo, ta ná kundiꞌi ni ini yo, kiꞌvi yo koo yo nuu ndikundee yo xiꞌin Ndioxi. Ta kuenta ni ná koo yo süvi ka vi ya ndoo sava yo chí sata, ta küchiñu yo kiꞌvi yo koo yo nuu ndikundee yo xiꞌin ra.

2 Corintios 5:8

Chi yoo ta xaꞌa ya ndáa ni ini yo xíni yo ra yakan kúni ni yo kana koo yo ini ikin kuñu yo ya kúu mií yo vitin, ta ndikiꞌin yo kuꞌun yo koo yo xiꞌin ra nuu íyo mií ra.

2 Corintios 5:1

Ta xa kúndaa vaꞌa ini yo chi ikin kuñu yo ya kúu mií yo ñuu ivi yóꞌó, ta tá íyo veꞌe manta ya ndíꞌi xaꞌa va saa íyo ya. Sundi tá ná ndiꞌi xaꞌa ya yóꞌó, ta xa íyo inka veꞌe ikin kuñu yo ya xa̱á si̱kuaꞌa Ndioxi nuu ndivi. Ta ya ikán ta köo ndíꞌi xaꞌa ya, ndiꞌi saa ichí koo ya chi süvi na ñuu ivi yóꞌó ku na ndi̱sikuaꞌa ya.

1 Corintios 14:9

Ta mií saa ndaa kua ndóꞌo tu ndóꞌo̱ va, tá tu ná kaꞌan ndo inka tuꞌun ya köo kúndaa ini ndo xiꞌin, ta nda iin naꞌa kündaa ini xiꞌin ya káꞌan ndo xiꞌin na nuu ndíkitaꞌan ndo veꞌe ñuꞌu. Tá íin na káꞌan mií va, saa íin ndo, tá ná ikan ndo saa.

San Mateo 11:12

Saa ndi̱kaꞌan tuku ra, káchi ra saa: ―Nda kivi xa̱á ra Juan káꞌan ndoso ra tuꞌun Ndioxi, iin saa nda kivi vitin íyo ni naꞌa káni taꞌan ya kúni na sindiꞌi xaꞌa na ichí nuu xáꞌnda chiñu Ndioxi, ni saa ndóꞌo ya, ta ndisaa naꞌa, na ndaku ni ini ku na kúchiñu kuakiꞌvi koo nuu xáꞌnda chiñu Ndioxi.

Gálatas 2:2

Ndi̱xaꞌan i ñuu Jerusalén, saa chi saa íyo ya si̱naꞌa Ndioxi nuu i ya xíniñuꞌu i kuꞌun i. Saa ndi̱kitaꞌan i xiꞌin ndisaa mií nda ñani yo, nda ínuu tuꞌun ndíso chiñu xiꞌin veꞌe ñuꞌu ñuu Jerusalén. Ta ndi̱tuꞌun i xiꞌin nda xaꞌa tuꞌun vaꞌa ya ndíkani i xaꞌa Tata yo Jesucristo nuu naꞌa, na köo kúu judío. Ndi̱tuꞌun teꞌe i xiꞌin nda ya ná kundaa ini nda ya köo ndi̱nama i tuꞌun ya ndítuꞌun i xiꞌin naꞌa xaꞌa Jesucristo, chi köo kúni i xaa chiñu uun i, tá tu köo íyo yuꞌu nda xiꞌin i xaꞌa chiñu íkan i.

2 Timoteo 4:7

Tá káa iin ra lapa, ra ndee ni vaꞌa xíka nuu kuachi, saa íyo i. Ta íyo tu i tá káa iin taa, ra ndee ni vaꞌa xínu va, chi ndee ni chi̱kaa ini i xa̱a súvi ni i chiñu nuu Tata yo Jesucristo, ta vitin xa si̱xinu ndiꞌi i chiñu i̱kan i nuu ra. Ta köo ndi̱sindoo i ichí ra, ndee ni ndáa ini i xíni i ra.

HEBREOS 12:1

Ta xa xíni yo yáꞌa ni kuaꞌa ku naꞌa, na xi̱ndaa ni ini xi̱ni Ndioxi. Ta saa ná ikan yoo tá kuꞌva i̱kan na ikán. Ta ná xaꞌa ni ka yo ndee xiꞌin mií yo, ndinuꞌu ni ini yo ná kaka yo ichí Iva yo Ndioxi, ta saa ná sindoo ndiꞌi yo ya sási nuu yo, xiꞌin ya väꞌa ya síkoyo yoo nuu kuachi.