1 Corintios 9:1 - Xochapa Mixteco

¹ ¿Án köo xíni ndo ya kúu i ra ka̱na Tata yo Jesucristo xáa chiñu i nuu ra? Ta íyo ichí i ikan i tá kuꞌva íkan inka nda xáa chiñu nuu ra. Chi yeꞌe ta xi̱ni xiꞌin nuu i ra. Ta ndóꞌo̱ ku ndo íin tá íin chiñu vaꞌa ni íkan i xáa chiñu i, chi tá ndi̱tuꞌun i tuꞌun vaꞌa xaꞌa Tata yo Jesucristo xiꞌin ndo kua ka̱ndixa ndo ra.

1 Corintios 9:1 Referans Kwoze

Los Hechos 9:17

Saa ke̱e ndixa ra ikán kuaꞌan ra veꞌe nuu íyo ra Saulo. Ndi̱xaa ra chi̱nuu ndaꞌa ra xiní ra, ta ndi̱kaꞌan ra xiꞌin ra, káchi ra saa: ―Ñani Saulo, Tata yo Jesús, ra ndi̱tuvi nuu un tá vaxi un ichí, ra ikán ku ra ti̱ꞌvi yeꞌe vaxi i kaꞌan i xiꞌin un ya ná ndikuna tuku nuu un, ta ndikiꞌin un Tachi I̱í Ndioxi koo ya xiꞌin un ―káchi ra Ananías xiꞌin ra Saulo.

1 Timoteo 2:7

Ta xaꞌa ya ikán kua ta̱xi ra chiñu ndaꞌa i kaka i kaꞌan ndoso i tuꞌun ra ya ndaa xiꞌin naꞌa. Saa ta̱xi ra chiñu ndaꞌa i kúu i apóstol ra xáa chiñu nuu Tata yo Jesucristo, ta xa̱ꞌnda ra chiñu nuu i ya sinaꞌa i naꞌa, na köo kúu judío. Ta ya káꞌan i xiꞌin ndo ta ya ndaa ni kua, köo síndaꞌvi i ndóꞌo̱.

1 Corintios 3:6

Yeꞌe ra, tá íkan iin ra chíꞌi, saa i̱kan i xiꞌin ndo, chi̱ꞌi i tuꞌun Ndioxi nima ndo. Ta ra Apolos ku ra káa, tá káa ra kóso tuꞌun Ndioxi nima ndo. Sundi mií Ndioxi ku ra táxi xáꞌnu ya.

Los Hechos 23:11

Saa tá ku̱ñuu ta ndi̱tuvi Tata yo Jesús nuu ra Pablo, káꞌan ra xiꞌin ra, káchi ra saa: ―Xaꞌa un ndee yóꞌo̱ Pablo, ku ïꞌvi un saa chi tá kuꞌva ndíkuiin un káꞌan un xaꞌa i ñuu Jerusalén yóꞌo̱, saa ndikuiin tu un kaꞌan un xaꞌa i ñuu Roma va ―káchi Tata yo Jesús xiꞌin ra.

Los Hechos 9:3

Ta saa ke̱e ra kuaꞌan ra. Tá xa kuaꞌan kúyati ra xaa ra ñuu Damasco, ta iin ku̱u soꞌva ke̱ta iin ñu̱ꞌu̱ nuu ndivi ta iin ndi̱yeꞌe taxan ni. Ñaa ndi̱kava nduu ndiꞌi ya sata ra.

1 Corintios 9:19

Vani xa kúu mií i ichí ikan i ndiꞌi ñaꞌa ya kúni mií i, sundi tá káa ra sa̱ta na xáa chiñu nuu ndiꞌi na, saa nda̱sa i mií i, xaꞌa ya kúni i ná kuchiñu i chindee taꞌan i xiꞌin kuaꞌa ni ka naꞌa ya ná kandixa na Tata yo Jesucristo.

2 Timoteo 1:11

Ta ka̱na Ndioxi yeꞌe ya kaꞌan ndoso i tuꞌun vaꞌa xaꞌa ra, saa kaka i xaa chiñu i nuu ra, ta̱xi ra chiñu ndaꞌa i ya sinaꞌa i naꞌa, na köo kúu judío.

Gálatas 5:1

Na taꞌan yo, xaꞌa ya sa̱ña Jesucristo yoo yakan vaꞌa íyo ndíka yo. Kuenta ni koo ndo, tuun ni kundikun ndo ichí nuu íyo ndíka ndo, ta täxi ndo nduu tuku ndo naꞌa, na íin tá íin naꞌa, na sa̱ta na xáa chiñu nuu na xiꞌin ya nduxa.

2 Corintios 6:1

Ndóꞌo̱ xiꞌin ndeꞌe, ta iin káchi xáa chiñu yo nuu Ndioxi, yakan xíkan ni nde ya mani nuu ndo ya ná kundàà vií ni ndo ya vaꞌa ndi̱niꞌi ndo nuu Tata yo.

ROMANOS 1:1

Ndioxi ná koo xiꞌin ndo, na taꞌan yo, na ndóo ñuu Roma. Yeꞌe ku ra Pablo, ra xáa chiñu nuu Jesucristo, ra ka̱na Ndioxi ku i, ta ta̱xi ra chiñu ndaꞌa i ya kúu i apóstol, saa ti̱ꞌvi ra yeꞌe ya kaꞌan ndoso i tuꞌun vaꞌa xaꞌa Jesucristo xiꞌin naꞌa. Táa i tutu yóꞌó xaa ya ndaꞌa ndo.

Gálatas 1:1

Yeꞌe, Pablo, ra xíka chiñu nuu Tata yo Jesucristo ku i táa tutu yóꞌó, xaa ya nuu ndo. Ta süvi na ñuu ivi yóꞌó ku na ndi̱taxi chiñu ndaꞌa i kúu i apóstol, chi mií Tata yo Jesucristo xiꞌin mií Iva yo Ndioxi, ra si̱taku Tata yo Jesucristo ku ra ta̱xi chiñu ndaꞌa i xáa chiñu i nuu ra.

1 Tesalonicenses 2:6

Chi nda iin ichí köo ndi̱xaá naꞌnu nde mií nde nuu nda iin naꞌa, ni nuu ndóꞌo̱, ni nuu ndá ka inka naꞌa. Vani kúu mií nde ichí ya ikan ndo saa xiꞌin nde xaꞌa ya kúu nde nda xáa chiñu nuu Tata yo Jesucristo, ta köo ndi̱kan nde saa xiꞌin ndo.

2 Corintios 11:5

Ta saa chínuu vaꞌa ni nda tuꞌun nda ya ndee ni naꞌnu nda, káchi nda ndi̱xaa nda nuu ndo. Ta yeꞌe, ta nda loꞌo köo ni̱nu̱ kúni i nuu nda ñaa, ya káꞌan nda saa.

1 Corintios 1:1

Yeꞌe Pablo xiꞌin ra ñani yo ra Sóstenes, uvi saa nde táa tutu yóꞌó xaa ya nuu ndo. Ta yeꞌe kúu i apóstol, ra ka̱na Tata yo Jesucristo xáa chiñu nuu ra, chi xa saa chi̱tuni mií Ndioxi ikan ra xiꞌin i.

ROMANOS 11:13

Ta vitin káꞌan i xiꞌin ndóꞌo̱ köo kúu judío, ya ná kundaa ini ndo, yeꞌe ku ra apóstol, ra ti̱ꞌvi Ndioxi vaxi i kaꞌan ndoso i tuꞌun ra xiꞌin ndo, ta chiñu ndee ni ndee ku ya yóꞌó nuu i, ndáa yaꞌvi ni ya.

ROMANOS 1:5

Ta xaꞌa mií ra kua ta̱xi Ndioxi ya toꞌo chee ni ndaꞌa i kúu i apóstol, yakan ti̱ꞌvi ra yeꞌe ya chindee taꞌan i xiꞌin ndiꞌi ni kúu naꞌa, na ndóo ndiꞌi ni kúu ñuu ivi, na köo kúu judío ya kandixa na ra, saa xaa toꞌo na ra.

Los Hechos 14:14

Ñaa tá xi̱ni nda ya kúni na xaa toꞌo ñaꞌa na, saa xa̱ꞌnda sáa ini nda tikoto nda. Ta saa chi̱nii nda kuaꞌan nda tañu na, ndáꞌi koꞌo nda, káchi nda saa:

Los Hechos 14:4

Ñaa ndi̱taꞌvi mií na ñuu ikán, sava na ki̱ꞌin sata na judío, na xïin kandixa Jesús ta sava na ki̱ꞌin sata ra Pablo xiꞌin ra Bernabé.

Los Hechos 13:2

Saa iin kivi ndi̱kitaꞌan ndiꞌi mií na ndíkun Jesús ndóo na xáa kaꞌnu na Ndioxi ta xíxi suꞌun na. Saa ndi̱kaꞌan Tachi I̱í Ndioxi xiꞌin na, káchi ya saa: ―Tava síin ndo ra Bernabé xiꞌin ra Saulo ya ikan nda chiñu ya ndi̱kaxin i nda ikan nda ―káchi ya xiꞌin na.

Los Hechos 9:15

Saa ndi̱kuiin Tata yo Jesús káꞌan ra: ―Kuáꞌan koto un ra, chi ra ikán ku ra ndi̱kaxin i kuꞌun ra ndituꞌun ra xaꞌa i xiꞌin naꞌa na köo kúu judío, saa ndituꞌun tu ra xiꞌin nda rey va. Saa kuꞌun tu ra ndituꞌun ra xaꞌa i xiꞌin na judío va.

Los Hechos 9:5

Saa ndi̱kuiin ra káꞌan ra, saa: ―¿Unku yóꞌo̱, Tata? ―káchi ra. Ñaa ndi̱kuiin ra káꞌan ra: ―Yeꞌe ku Jesús, ra xáa nduvaꞌa un xiꞌin, ¿ta ndachu sítixuꞌvi un mií un? ta íkan un tá íkan sindiki ri kéta xaꞌa itun káni na ri ―káchi ra xiꞌin ra Saulo.

1 Corintios 10:29

Süvi xaꞌa ndóꞌo̱ káꞌan i ya ndikani väꞌa ini ndo, xaꞌa naꞌa, na xíto ya íkan ndo saa kua káꞌan i. Chi na ikán ta án sana ndikani ini na ya köo xíniñuꞌu ndo ikan ndo saa. Chi yeꞌe, vani xa íyo ndíka i ya kuxi i ndiꞌi va ñaꞌa, sundi yeꞌe, ta xáꞌnu va ini i xaꞌa ya ndíkani ini na taꞌan yo, na vita ini.

1 Corintios 10:30

Tá tu táxi i tixaꞌvi ndaꞌa Ndioxi xaꞌa ñaꞌa xíxi i, ta ¿Ndachu kánaꞌa naꞌa xaꞌa i ya xíxi i ya? káchi na, káꞌan na.

1 Corintios 11:16

Tá ndá na kúni sikuaꞌa kuachi xaꞌa ya yóꞌó, ta xíniñuꞌu na kundaa ini na ya ñaa kua sínaꞌa i naꞌa ndiꞌi ni kúu veꞌe ñuꞌu, ta kuꞌva saa kua kándixa ndiꞌi va na.

2 Corintios 10:7

Ta ndóꞌo̱, ndisaa kuiti tá íin ñaꞌa ya xíto ndo íkan naꞌa, ta saa kua íyo ya íkan ndo xiꞌin na. Ta án ndá naꞌa ndíkani ini ya ndee ni vaꞌa ndíkun na Jesucristo túvi na, ta saa xíniñuꞌu na kundaa ini na, tá kuꞌva ndíkun na ra, kuꞌva saa ndíkun tu ndeꞌe va ra.