1 Corintios 4:7 - Xochapa Mixteco

⁷ Ta ¿ndachu ndíkani ini ndo, vaꞌa ni ka mií ndo nuu inka naꞌa, túvi ndo? Ndiꞌi ñaꞌa ya kúu mií ndo ta Ndioxi ku ra ta̱xi ya ndaꞌa ndo. Süvi mií ndo ndínduku ya yakan kütai ni ini ndo xiꞌin ya.

1 Corintios 4:7 Referans Kwoze

San Juan 3:27

Ta saa ndi̱kuiin ra Juan káchi ra saa: ―Nda iin ñaꞌa küvi ikan naꞌa tá tu süvi Ndioxi ku ra táxi ndee ndaꞌa na.

1 Pedro 4:10

Saa chi Iva yo Ndioxi ta xa kuaꞌa ni va ya vaꞌa, ya xínituni ke̱e nuu ndivi ta̱xi ra ndaꞌa iin iin ndo, ya kuniñuꞌu ndo ya ikan ndo ya vaꞌa xiꞌin taꞌan ndo. Saa kua kuchiñu ndo ikan ndo kuaꞌa ni ya vaꞌa xaꞌa ya kúꞌvi ni ini Ndioxi xíni ra ndóꞌo̱.

Santiago 1:17

Chi ndiꞌi ñaꞌa ya vaꞌa xiꞌin ya ndaa níꞌi yo, ta chí ni̱nù vaxi ndiꞌi ya, nuu mií Iva yo ra si̱kuaꞌa kiti kimi xiꞌin ndiꞌi ñaꞌa ya íyo nuu ndivi ni̱nù nuu íyo ra, nuu yéꞌe̱ ndiꞌi saa kivi, ta köo ndínama nuu íyo ra, ni köo kúnaá, ta nuu mií ra kua vaxi ndiꞌi ya.

ROMANOS 12:6

Ta xaꞌa ya kúꞌvi ni ini Ndioxi xíni ra yoo, ta xa síin xa síin si̱niꞌi taꞌvi ra iin iin yo, ta̱xi ra ya vaꞌa xínituni yo, ya ke̱e nuu ndivi ndaꞌa yo. Tá tu ndi̱niꞌi sava yo ya kaꞌan ndoso yo ndá ka tuꞌun ya vaxi nuu Ndioxi xiꞌin naꞌa, ta vaꞌa saa ná koo ya kaꞌan yo xiꞌin na, tá kuꞌva ndáa ni ini yo Ndioxi.

San Juan 1:16

Ta xaꞌa ya chútu ni ya vaꞌa ini ra ikán, ta nda yoo ndi̱niꞌi ya vaꞌa xiꞌin ra. Ndakua ndíkun taꞌan ya táxi ra ndaꞌa yo.

San Lucas 19:13

Tá xa ku̱yati kee ra kuꞌun ra ta ka̱na ra uxi nda xáa chiñu xiꞌin ra. Ta̱xi ra iin xuꞌun nani mina ndaꞌa iin iin nda ta kuaꞌa ni ndáka ya. Ñaa ndi̱kaꞌan ra xiꞌin nda, káchi ra saa: “Ná ndoo xuꞌun yóꞌó xiꞌin ndo ikan ndo lucha xiꞌin ya, ná ndiko koo i saa ndikiꞌin i ya ndaꞌa ndo”, káchi ra xiꞌin nda.

1 Corintios 15:10

Ta xaꞌa ya vaꞌa ni Ndioxi xiꞌin i kua kúu i apóstol tá kuꞌva íyo i vitin, saa ni xaꞌa ya vaꞌa ni ra xiꞌin i kua chíndee ra yeꞌe vaꞌa xáa súvi i chiñu nuu ra. Ta yeꞌe, ndee ni ka xáa chiñu i nuu tá kúu ndiꞌi nda taꞌan i, nda xáa chiñu nuu ra. Ta süvi xiꞌin ndee mií i kua xáa chiñu i, chi mií Ndioxi va ku ra chíndee taꞌan xiꞌin i xáa súvi i ya xaꞌa ya kúndaꞌvi ni ini ra xíni ra yeꞌe.

1 Corintios 7:7

Ya vaꞌa ni va kua ná kindoo kuâán ndiꞌi ndóꞌo̱ nda taa, ná tïndaꞌa ndo, tá kuꞌva káa yeꞌe, íyo kuâán i. Sundi süvi ndiꞌi yo ndi̱niꞌi taꞌvi kindoo kuâán yo. Süvi iin káchi íyo ndiꞌi yo.

ROMANOS 12:3

Xaꞌa ya vaꞌa ni Ndioxi ta si̱niꞌi uun ra nuu i káꞌan i xiꞌin ndo, yakan xíkan ni i ya mani nuu ndo ndïkani ini ndo ya vaꞌa ni ka mií ndo nuu inka naꞌa. Vaꞌa ka kiꞌin ni ndo kuenta ndá kuꞌva ndíkani ini ndo xaꞌa mií ndo. Ta ndáꞌvi, ndáꞌvi ndikani ini ndo, ikan ndo tá kuꞌva íyo ya vaꞌa ta̱xi Ndioxi ndaꞌa iin iin ndo ya kándixa ndo ra.

ROMANOS 1:5

Ta xaꞌa mií ra kua ta̱xi Ndioxi ya toꞌo chee ni ndaꞌa i kúu i apóstol, yakan ti̱ꞌvi ra yeꞌe ya chindee taꞌan i xiꞌin ndiꞌi ni kúu naꞌa, na ndóo ndiꞌi ni kúu ñuu ivi, na köo kúu judío ya kandixa na ra, saa xaa toꞌo na ra.

1 Corintios 5:6

Ta kütai ni ini ndo xiꞌin ya väꞌa íkan ra ñaa. Xa xíni ndo unkua káꞌan tuꞌun ndíchi ya káꞌan soꞌva: “Loꞌo paꞌa tíin uxan iya kuakee xiꞌin uxan xita vaꞌa ta ndee ni sínañu ñaꞌa ya”, káchi ya.

1 Corintios 3:5

Ndikani vaꞌa ini ndo, ¿án chee ni yeꞌe, Pablo, túvi ndo? ¿Án ra Apolos ku ra chee ni túvi ndo? Süvi saa íyo ya. Moso va ku nde xáa chiñu nde nuu Ndioxi, ta chíndee nde ndóꞌo̱ ya ná kandixa ni ndo Ndioxi va. Íkan iin iin nde chiñu ya ta̱xi Ndioxi ndaꞌa va nde.