Kaʼa nda lwi dagala dagala mantsa: « Zləŋawa zləŋa ta Lazglafta ka zləzlva kuni, kabga sagha sa fitika tsay ni ta guma. Tsəlɓawa tsəlɓa ta tsəlɓu ŋa mndu ya ta magaftá luwa, nda haɗik, nda drəf, nda dzuɓayha, » kaʼa.
Ka həŋ mantsa: « Mantsa nzakwa ni! Nda ra Lazglafta mu ka zləzlvay, ka ghubay, nda ɗifil ma ghəŋa ni, nda ra ka rfay, ka vla glaku ŋa ni, da tsatsi mbraku, mbru mbra, ŋa kɗekedzeŋ tsatsi. *Amin! »
Ka həŋ nda lwi dagala dagala mantsa: « Tsa Zwaŋa Tuwak si dza lu ya kay ná, raŋra zlghafta ni ta ga Mgham, nda gadghəl, nda ɗifil, nda mbraku, nda zləzlvu, nda glaku, nda ghubu, » ka həŋ.
Ŋa Lazglafta turtukwa ni ya ta mbamafta nda ma *Yesu *Kristi Mghama mu ga mgham, nda mbraku, nda glaku, daga manda ghalya nda ya ndanana ha ŋa kɗekedzeŋ. *Amin.
Ŋa nzakwa ghuni ka gwal maga skwi tɗukwa nda mbrakwa Yesu Kristi. Na nghaŋta mnduha ta tsa ŋərma skwi ta mag kuni ya, ŋa zləzlvay taŋ ta Lazglafta, ŋa vlay taŋ ta glaku ŋa ni guli.
Zləzlvama Lazglafta ta ghəŋa ŋərma skwiha maga tsi nda ma mnduha ta zlghafta, nda ya nda ma *Yesu Kristi. Zləzlvama zləzlva ŋa kɗekedzeŋ! Mantsa ya katsi.
Gi ma va tsa fitik ya, ka gigɗavafta haɗik katakata ka hwanzaɓanapta faway turtuk ma dgatá tsa luwa ya ghwaŋ. Ka rwuta mnduha dəmbuʼ ndəfáŋ ma gigɗavafta tsa haɗik ya. Ka ksuta zləŋ katakata ta gwal ta pɗaku, ka zləzlvu həŋ ta Lazglafta ya ta nzaku ta luwa.
