Baɗ maghwaŋpəɗ hkəna fitik ma tila Adar maguta tsaya. Baɗ maghwaŋpəɗ fwaɗa fitik ka mbiʼi həŋ ta vgha. Baɗ tsaya ka magata həŋ ta skwa zay gagaʼ, ka rfu.
Ka tskavata la Yahuda ta nzakway ma Susaŋ kata hafa taŋ baɗ maghwaŋpəɗ hkəna fitik, nda ya baɗ maghwaŋpəɗ fwaɗa fitik ma tsa tila ya, ama ka mbiʼi həŋ ta vgha baɗ maghwaŋpəɗ hutafa fitik. Ka nzakw tsa fitik ya ka fitika skalu nda rfu.
Inda tsa skwiha ta maguta ya, ka vindaftá Murduhay, ka tsaghanaftá tsi ta ɗelewerha ta inda la Yahuda ma inda haɗikha ma dzva mgham Ahasverus, ŋa gwal ndusa ndusa nda gwal diʼiŋ diʼiŋ tani.
Mantsa tama, baɗ tsa fitikha ya zluʼapta la Yahuda ta vgha da ghumaha taŋ. Ma tsa tili ya mbəɗavafta ghuya ɗaŋwa taŋ ka rfu, ta mbəɗavaftá tawa taŋ ka skala rfu. Nda ra tama ka havay taŋ ta tsa skwiha ya, nda skala rfu, ka tsaghay taŋ ta mbəhu ŋa sani nda sani, ka vla mbəhu ŋa la ka pɗu guli.
ka mblatá la Yahuda ta fatá tsa skalu ya ka ŋa taŋ, ŋa zivirha taŋ, nda ya ŋa inda gwal dzaʼa nuta ka la Yahuda. Inda vaku, ta tsa fitik tsaf lu ya, ŋa skalay taŋ ta tsa skalu ka fitik his ya manda ya ta raku, ka magay manda va ya mnaf Murduhay.
Lagha i Asta, markwa mgham, makwa Avihayil, nda Murduhay mnda la Yahuda, ka vindaftá tsa mahisa ɗelewer ya ŋa fanaghatá mbraku kahwathwata ta ghəŋa tsa ɗelewer ta gwaɗa ta Purim ya.
Ma taŋtaŋa tili, tsaya tila Nisaŋ, ta maghwaŋpəɗ hisa vakwa mgham Ahasverus ta pala, ka vzə lu ta vindima ta hgə lu ka Pur ta kəma Haman. Ta kumay ta snaŋta ka ma wati fitik, nda ya ka ma wati tili rakwa magata ni ta tsa slna ni ya. Ka dɗaftá tsa vindima ya ta tila maghwaŋpəɗ his, tsaya tila Adar.