Proverbios 5:23 - Dios Iwene

²³ Jo̧bama debö i̧'yakwo̧ sulabenö ja̧obö ösödi̧ma kaatibokobetjö̧. Jelobekwö omukwatö debö i'ya̧kwo̧ jweinö omukwatökönö jwiinö sulabenö ja̧obetjö̧.

Proverbios 5:23 Referans Kwoze

Diosnö ösödo̧ Job mikwo̧ usula emawina jawa 36:12

Jo̧kwaijayonö tja̧ja̧kwobö tjöpöjöditjö̧ma, kwabö lotjawö̧ debö tji̧'yakwedö, yöa̧laja̧ okwa jawa do̧tjatokobetjö̧, debö tji̧'yakwedö.

Diosnö ösödo̧ Job mikwo̧ usula emawina jawa 4:21

Jau, sabana'wotjö otikweju juluwanö nijakwö bakobe mei̧danö, juluwanö debö 'ya̧dö bö̧jȩ jojodöma, waisanö omukwatakwawa ina tjöwaisachibapji, juluwanö debö 'ya̧dö bö̧jȩ jojodöma, –jö̧ba̧lö isapjonö kwebacho̧ yöa̧lobekwö cha̧ja̧kwijatö chi̧'wi̧dinö, —jö̧ba̧lö yöa̧linobe Elifazma, Jobnö.

Proverbios 14:32

Ja̧danö, ju'wibi yötawa: Dios wei̧ a̧ja̧kwö jo̧ma, otiwanö ja̧bö ö̧ji̧ma jo̧banö ite'ada̧li̧danö te'ada̧lobe labi̧ jawatjö ö̧jibinö. Jobekwö baledokobe sulabenö omukwato̧nöma. Sulabenö omukwato̧ ö̧ji̧ma itenöda nöinö wene jwöebakwa̧, wene ujuna̧li̧tjö̧ ö̧jibökönö.

Proverbios 10:21

Ja̧danö, ju'wibi yötawa, wanedö: Dios wei̧ a̧ja̧kwadö yötjawi̧ma jojodönö ba̧jȩkwadönö pjaatobe tjo̧'wo luwo̧ tjujuluwachibanö. Kwakwawa kwanö tjujuluwachibi̧danö tjo̧'wo̧ luwo̧ tjujuluwachibobe, Dios wei̧ a̧ja̧kwadö yötjawi̧ tja̧ja̧kwobetjö̧. Ja̧danö, ju'wibi yötawa: Jweinö omukwatöködöma omukwatökönö tjö̧jobetjö̧ debö tji̧'yakwedö.

Proverbios 14:14

Ja̧danö, ju'wibi yötawa: Bakwo̧ jweinö omukwatö ö̧jaja̧ kabatibö sulabenö omukwato̧ma Dios balekwa mikwa iyö lȩebakwo̧. Ja̧danö, ba̧kwȩlö̧jatebö otiwanö omukwatö ja̧bo̧ma Dios balekwa mikwa iyö pjaatakwo̧, o̧'wo̧ ösöwanö ö̧jobö.

Proverbios 1:31

Jobekwö, ötjö jwebebö yötawi̧ öpöjödö, sulabenö omukwatö kwö̧jaduwobetjö̧ yelösöda usula kwemawaduwakwedöja, sulabenö omukwatö kwö̧jaduwi̧ mikwa baibanö. Isabenö, ökwödö kwo̧'woduwi̧ okwa suli̧da su̧'bȩ ji̧danö kwana̧laduwobe, sulabenö kwomukwataduwi̧ma.

Proverbios 12:8

Ju'wibi yötawa: Jojodöma ö'wiyawakwawönö omukwato̧nö otiwanö tjedökwe, otiwanö omukwato̧, jö̧ba̧lö. Jobekwö tjedokobe jelobekwö sulabenö omukwato̧nö. Jo̧banö jwiinö tjöpöjödobe, sulabenö omukwato̧, jö̧ba̧lö.

Proverbios 21:16

Ja̧danö, ju'wibi yötawa: Bakwo̧ ajayinöma otiwanö omukwatö ji̧nama, otiwanö omukwati̧ kabatibö jelobekwö sulabenö omukwatitjö̧ma wobinadö tjö̧jobe ichibakwo̧.