Proverbios 4:25 - Dios Iwene

²⁵ Ja̧danö, ju'wibi yötawakwö chitji̧, wanedö: Ökwö kwö̧ji̧ma mananö kwi̧'yi̧danö ji̧. Kwi̧’yenama jweinöda eda̧lö kwi̧’yo chitji̧. Pjeakwöma kwedoko, jweinöda eda̧lö kwi̧’yo.

Proverbios 4:25 Referans Kwoze

Mateo 6:22

Tupakwö yöawinobe Jesúsma: —Chömöledö, wanedö yötawa, kwöbajaleduwima, kwiteba'o jawatjö dejewa'yu̧danö ichejekwa. Baikwö labebö lobö yötawa chömöledö: Kwöbajaleduwinö otiwanö kwedaduwitjö̧ma, okobe jwiinö kwiteba'oduwi dewinö jo̧bedanö ichejekwa,

Diosnö ösödo̧ Job mikwo̧ usula emawina jawa 31:1

Tupakwö yöa̧linobe Jobma: —Isabenö Dios wei̧ a̧ja̧kwö jo̧sa, baikwö wanedö yöta̧la: Ötjökwö, chöbajalekwö sulabenö edökönö chö̧jakwa̧ yöbawö chujunijatö, –La'akatjöda chilekwobökuju möayujunö chedökakwo̧sa, Aaa, isunö chö̧jowe, jö̧ba̧löma. Dios lȩebapji jö̧ba̧lö, la'akatjöda chilekwobököjunö ösödi̧nö chedökakwo̧sa, –jö̧ba̧lö jobekwö yöbawö chujunijatö ötjödada.

Proverbios 23:33

Ja̧danö, ju'wibi yötawa, 'dukwachökwenöma: Isabenö, 'dukwachökwema tjöeba̧lokobe edo̧ ju'wi jawabi ju'wi jawa jwiijayonö. Ja̧danö omukwatöbi omukwatö̧kö̧, jweinö yöba̧lö̧bi yöba̧lö̧kö̧.

Proverbios 23:5

Isabenö yötawa: Ja̧ baladama juluwanö 'dö̧ibaji̧ jawa. Wanedö yötawakwö: Kwu̧kwa̧ baladama, pjiyuwa köa̧li̧danö o̧wa̧ja̧pa̧ juluwanö pokwibö jelobekwö köa̧li̧. Jao, juluwanö 'dö̧ibaji jawa. Ja̧danö, kwujuna̧li̧ baladadama juluwanö 'dö̧ibaji̧ jawaobetjö̧ kwemobö ö'wachökönö kwotidoko.

Proverbios 4:24

Ja̧danö, ju'wibi yötawakwö chitji̧: Yöka̧lenama ö'öbönö yöka̧loko jojodönö, jelobekwö tjo̧mukwatobö. Ja̧danö, omöna yöka̧lobö kwomukwatoko. Jweinöda yöka̧lo.

Proverbios 4:26

Ja̧danö, kwi̧'yenama ö'wiyawakwawönö omukwatö kwi̧'yobö jo̧be. Jobekwö ö'wiyawakwawönö kwomukwatitjö̧ma jweinöda eda̧lö kwi̧'yena.

Proverbios 15:21

Ja̧danö, ju'wibi yötawa: Bakwo̧, jweinö omukwatö̧kö̧ma iteda ba̧kwȩlö̧jatebö omukwatökönö ö̧ji̧ma jwiinö ösödobe, otiwa, omukwatökönö chö̧ji̧ma chösöda, jö̧ba̧lö. Jo̧kwaijayonö otiwanö omukwato̧ma otiwanö omukwatö ö̧jobetjö̧ otiwanö jwaikwöda 'yo̧.

Proverbios 21:29

Ja̧danö, ju'wibi yötawa: Sulabenö omukwato̧ma ju'wi jawabi ju'wi jawa chöwaisa, jö̧ba̧lö yöa̧lijayonö wajwibo̧. Wajwiijayonö omöna yöa̧lobe, chöwaisa jö̧ba̧lö. Wajwibo̧. Jobekwö omukwatokobe otiwanö omukwatö jweinö yöba̧lo̧ma. Jo̧bama ajayinö ö'wiyawakwawönö omukwatobe, baledakwa̧ öwaisakobetjö̧.