Proverbios 30:17 - Dios Iwene

¹⁷ Ja̧danö, ju'wibi yötawa: Abe'donö obo̧ma, ja̧danö ojo'do weji̧ a̧ja̧kwö̧kö̧ma jwiinö sulabenö omukwato̧. Jo̧bama debö i̧'yobö jo̧be, ja̧danö wobajo̧nö yȩbadö pji̧yu̧ öbajalenö dodotjobö jo̧be, ja̧danö okobe jwiinö itebiyabi bo̧lö̧ tjukwökwe, sulabenö abe'donö obö, ojo'do weji̧ a̧ja̧kwökönö ö̧jobetjö̧.

Proverbios 30:17 Referans Kwoze

Proverbios 23:22

Jemi ikena jweinö omukwatadö yötjawinama baikwö laebobe, bakwo̧ itji̧nö yöawina: Chitji̧ ötjödasa ökwö inesö kwabe'doma. Ötjödasa kwöbötjachibobö iyinama. Jo̧kwaobetjö̧, ötjö yötawi̧ ö'wöyawakwawönö omukwatö a̧ja̧kwi chitji̧. Ja̧danö, wetakwö: Kwojo'donö otiwanö kwite'ada̧lo ida̧ökö pöo jwöjachenama.

Proverbios 30:11

Ja̧danö, ju'wibi yöawinobe Agurma, ö'wejemu jawa, jojodö sulabenö omukwatö tjö̧ji̧ jawama: Jojodötjö ju'wedöma tjabe'donöbi, tjojo'donöbi tjo̧'wo̧ sulinö edö yöba̧ladö.

Proverbios 20:20

Ja̧danö, ju'wibi yötawa: Isabenö, tjȩmu̧ma abe'donöbi ojo'dönöbi o̧'wo̧ sulinö edö, mikwawöködö jö̧ba̧lö yötja̧loböma jwiyobe. Ja̧danö, bakwo̧ iteda abe'donö, ojo'donö o̧'wo̧ sulinö editjö̧ma isabenö debö i̧'yakwo̧. Wanedö yötawa: Jo̧bama dȩju̧wa̧'yu tiibi̧danö ö̧ji̧ma tiibökwe, tjabe'donö, tjojo'donö mikwawöködö jö̧ba̧lö tjo̧'wo̧ sulinö edobetjö̧.

2 Samuel 21:10

Jejenö ji̧tji̧munö mö nönö lotjioko, Aya itjiju Rizpama tuda'wo jawa sabana'wo emö, jobe yöne inawa nöawanö pjabebö jödinobe, jobe ji̧tji̧mu tjiteba'iju jiteada̧lobö. Ja̧danö ajayinö batjo̧ wa̧ji̧ emajitena möle jenanö jamatö, bajalianö ojwiyo o̧benanö baibanö tjöbeba̧löjönö jiteada̧linobe, möle pji̧yu̧ tjiteba'iju tjukwapji jö̧ba̧lö, ja̧danö yöte tebonö ju̧kwadö tjukwapji jö̧ba̧lö.

1 Samuel 17:44

Ja̧danö Goliatma Davidnö jwöinobe, —Baikwö chö̧jobekwö ichi, ja̧danö ökwönö kwabö lobö, kwiteba'o pji̧yu̧ tjukwobö chiyocha, ja̧danö tebonö ju̧kwadö kwiteba'o tjukwobö kwabö lobö chiyocha, —jö̧ba̧lö.

Deuteronomio 28:26

Debö kwi̧'yaduwenama, kwiteba'oduwima, pji̧yu̧ tju̧kwa baibakwa'o, ja̧danö tebonö ju̧kwadö tju̧kwa baibakwa'o, ja̧danö kwiteba'oduwi wainö tjukwakwedö, bakwo̧bi a'dewö loakwo̧ deakobetjö̧.

Proverbios 15:20

Ju'wibi yötawa: Tjemuma jweinö omukwatö ö̧jitjö̧ma abe'dobi ojo'dobi tjo̧'wo̧ ösöwanö tjö̧jena, ditji̧ma jweinö omukwatö jo̧, jö̧ba̧lö. Isabenö, jo̧ba tjȩmuma otiwanö omukwatö jo̧. Jo̧kwaijayonö tjȩmu jweinö omukwatö̧kö̧ma sulabenö omukwato̧. Jo̧bama ojodönö o̧'wo̧ sulinö edo̧, chöpöjödoko jö̧ba̧lö.

Proverbios 30:18

Ja̧danö, ju'wibi yötawa, chöbajale jalaka baibanö jawa chedima. Chöbajale jalaka baibanö jawa chedi̧ma, ö'wejemu jawa jo̧be. Ja̧danö, ja̧ chedi̧ma jwiinö chösödijayonö dakwöjö waiya, jö̧ba̧lö, chöwaisachiboböma do̧tatibokobe. Baikwö laebobe: