Proverbios 24:28 - Dios Iwene

²⁸ Ju'wibi yötawakwö chitji̧: Kwömöledöso̧kwö wene kwujuna̧lena nöi̧ jawa wene jwiitjö̧ma yöbawö kwi̧'yoko lȩekwa yöbawo̧ ö̧jobekwö. Ja̧danö, ju'wibi yötawa: Ju'wedönö kwömöledöso̧nöma omöna yökawoko jelobekwö tjo̧mukwatapji jö̧ba̧lö.

Proverbios 24:28 Referans Kwoze

Efesios 4:25

Jo̧kwaobetjö̧, Dios isabenö omukwati̧danö omukwatö kwö̧jaduwobetjö̧, sulabenö omukwatö, omöna yöba̧löma kwö̧jaduwa chömöledö. Ökwödöma bakwo̧nökwena omönama yöka̧laduwoko kwö̧jaduwemi ju̧kwadönöma. Jobadönö, Jesúsnö ösödadönö, jweinö yöka̧laduwo, ökwödöma bakwainö Jesús iteba'obedö dö̧jobetjö̧.

Proverbios 25:18

Ja̧danö, ju'wibi yötawa: Bakwo̧ lȩekwa yöbawo̧nö ömöledöso̧nöma omöna yöawena jwiinö sulobe. Wanedö yötawa: Jo̧ba omöna yöawi̧ma ömöledöso̧nö kwakwatji̧danö ji̧, i̧sö̧'a̧ nö'a̧nö kwakwatji̧danö. Ja̧danö, kwölöte'onö dȩi̧danö, ja̧danö na̧yu̧nu̧ 'böi̧danö ji̧, ömöledöso̧nö omöna yöawi̧ma, lȩekwa yöbawo̧nö. Jwiinö inia tjöi̧danö niobe.

Apocalipsis 22:15

Jo̧kwaijayonö ju'wedöma tetjachökakwedö. Jobadöma 'yayi̧ Jerusalén comunidad ö'öböda tjuju̧kwakwedö, sulabedöma. Jobadöma mea bobadöbi, tji̧lȩkwa̧muböködökwö sulabenö ja̧döbi, jojodönö kwabawö lobadöbi, jojodö tjotidina tjo̧'wo̧ jawa tjo̧'wo̧ wana̧ladöbi, omöna yöba̧lö ja̧döbi. Jobadöma tetjachökakwedö— jö̧a̧lijatö Jesúsma.

Apocalipsis 21:8

Jo̧kwaijayonö jejenömaökö ju'wedönöma. Yebabinö, ¡Ayö! Diosnö chösöditjö̧ma inia tjötinö baledena, jö̧ba̧lö, yebabo̧danö yebabinadönöma otiwi̧ma chiyökakwo̧sa. Ja̧danö, Diosnö kabatibinadönöbi, ja̧danö, sulabedökwö pjabacha̧linadönöbi otiwa jawama chiyökakwo̧sa. Jobadönö ökwöla nöola okwa lotakwo̧sa. Ja̧danö, tji̧lȩkwa̧muböködökwö sulabenö ja̧binadönöbi, ja̧danö, jojodönö kwabö lobinadönöbi, ja̧danö, mea bobinadönöbi, ja̧danö, ju'wedö tjo̧'wo̧ tjöwana̧lobö tjotidinökwenö tjo̧'wo̧ wana̧linadönöbi, ja̧danö, bakwelajatebö omöna yöba̧linadönöbi, jobadönöma ökwöla nöola okwa lotakwo̧sa. Jobema jwiinö tubinö ubobe, azufre mikwi̧ tubi̧ma. Joola okwa lotji̧ma, 'dö̧ibaji̧ woawa mikwemi, jö̧ba̧lö weijatö Diosma ötjönöma, chiwȩyudobö.

Colosenses 3:9

Ja̧danö kwömöledöduwinöma omöna yöka̧lakwawaduwoko. Jau chömöledö, wanedö yötawa: Kamijido̧ yo̧tjekwi̧danö ökwödöma ida̧ökö sulabenö kwösödinaduwabi, sulabenö ösödö ja̧köbinaduwabi kabatibö yo̧kekwinaduwobe ichejekwa,

Juan 15:25

Ja̧danö, jobadöma damötjö Dios wei̧ wȩyudadö tjiwȩyudinadanöbedö. Baikwö laebobe Dios iwenetjö: Jojodöma, ötjönö tjöpöjödoböma jwiijayonö, tjöpöjödinobe, jö̧ba̧lö, tjiwȩyudinobe damötjöma. Ja̧danö ja̧ tjiwȩyudinadanö badekwachinö tjöpöjödobe ötjönöma, jö̧ba̧lö laebobe Dios iwenetjö— yöawinobe Jesúsma, Dios wei̧ wȩyudadö tjiwȩyudinama.

Mateo 27:23

Yötja̧lökwe, Pilatoma abebö a̧ja̧kwinobe: —¿Tajawedö jo̧banö towisa'onö bȩtjobö? ¿Taji sulabenö ja̧aja̧da?— jö̧ba̧lö. Jo̧kwaijayonö atadökönö ajayitjö bajalekwönönö labinö jwötjeba̧linobe: —Towisa'onö bȩbinö— jö̧ba̧lö jwötjeba̧linobe.

Proverbios 21:28

Ja̧danö, ju'wibi yötawa: Bakwo̧, lȩekwa yöbawo̧nö iteda edina yöa̧lobö aebökwema omöna yöa̧litjö̧ma lȩekwa yöbawo̧ma jo̧banö kaatibena, yöba̧lökönuwi, omöna yöbawo̧ja, jö̧ba̧lö. Jobekwö baledokobe jweinö yöbawo̧nö. Abebö a̧ja̧kwökwema lȩekwa yöbawo̧nö iteda edina jweinö yöawitjö̧ma lȩekwa yöbawo̧ma ösödobe tupakwö yöba̧li̧, jö̧ba̧lö. Jweinö yöawobetjö̧ lȩekwa yöbawo̧ma jo̧ba yöawi̧ a̧ja̧kwö ösödo̧, jo̧banö yöawoböma kabatibökönö.

Proverbios 19:9

Ja̧danö, ju'wibi yötawa wanedö: Bakwo̧ lȩekwa yöbawo̧ öba a'o ja̧nö iteda edinatjö̧bi, a̧ja̧kwinatjö̧bi yöawobö wetjökwe. Isabenö yötawa: Jo̧bama lȩekwa yöbawo̧nö yöawena jweinö yöawobö jo̧be. Omöna yöbawo̧nö isabenö lȩtjebakwo̧. Yelösöda omöna yöbawo̧nöma lȩtjebakwa̧tjö ö̧jibobö jwiobe, ja̧danö döibajoböbi jwiobe.

Proverbios 19:5

Ja̧danö, ju'wibi yötawa, wanedö: Bakwo̧ lȩekwa yöbawo̧ öba a'o ja̧nö iteda edinatjö̧bi, a̧ja̧kwinatjö̧bi yöawobö wetjökwe. Isabenö yötawa: Bakwo̧ lȩekwa yöbawo̧nö yöawena jweinö yöawobö jo̧be. Omöna yöbawo̧nö isabenö lȩtjebakwo̧. Yelösöda omöna yöbawo̧nöma lȩtjebakwa̧tjö ö̧jibobö jwiobe, ja̧danö döibajoböbi jwiobe.

Proverbios 14:5

Ja̧danö, ju'wibi yötawa: Bakwo̧, lȩekwa yöbawo̧ öba a'o ja̧nö ba̧kwȩjatebö jweinöda yöawitjö̧ma a̧ja̧kwadöma tjöwaisachibena, bitenö yöawobö atjebena jweinöda yöbawo̧, jö̧ba̧lö. Jobekwö yöawokobe omöna yöbawo̧ma. Omöna yöbawo̧ma lȩekwa yöbawo̧ öba a'o ja̧nö omönada yöbawo̧.

Diosnö ösödo̧ Job mikwo̧ usula emawina jawa 2:3

Atadökwe, Isabenö Jo̧ma Awetjanö abebö a̧ja̧kwinobe: —Jobe bö̧jȩ kwebachö kwö̧jonö, chömöayo̧ Jobnö edö kwomukwataji̧? Bö̧jȩ ba̧kwemeachibanö ju̧kwadötjö, bakwo̧bi Jobdanöbo̧ma deobe, jö̧tö? Jau, Jobma isabenö otiwanö wene jwibo̧, Dios ösödi̧danö ja̧bö jo̧, ja̧danö Diosnö yebabinö ösödö, suli̧ jawa öpöjödö kabatibo̧, –Suli̧, Dios öpöjödi̧, –jö̧ba̧lö, jö̧tö? Ja̧danö, Job sulabenö ja̧inököjayonö, jo̧banö söbebö lotobö akebijatö, ja̧danö akebinadanö, jo̧banö söbebö lotijatö, jo̧kwaijayonö yayonö jwaikwöda otiwanö ja̧bö jo̧ Jobma, ötjönö ösödö. Öpöjödakwo̧ yöka̧linajayonö, jwaikwöda 'diinö janö, otiwanö ösödö jo̧ Jobma, jö̧tö? —jö̧ba̧lö abebö a̧ja̧kwinobe Awetjanö.

Éxodo 23:1

Ina Isabenö Jo̧ma Moisésnö webijetö, weawa wene ujunobö Israel jojodönö a̧ja̧kwö tjö̧jobö, baikwö: —Ju'wedönöma omöna yöka̧laduwoko. Wanedö yötawa: Bakwo̧, sulabenö ja̧bo̧nöma ötjibobe lȩekwa omukwatö junadö tjöbajale a'o tjujunobö. Ja̧danö, omukwatö junadöma ökwönö jo̧banöma yöka̧lobö aeba̧litjö̧ma jweinöda yöka̧lo. Omönama yöka̧loko jo̧banö pjakatobö, ja̧danö jo̧banöma lȩtjebokobö. Jweinöda yöka̧lo.

Éxodo 20:16

Ja̧danö ju'wibi wetaduwakwö: Kwömöledöso̧, wene juna̧lo̧ma omukwatö juno̧ luwo̧ öbajale a'otjö ja̧nö kwatadaduwobö aebitjö̧ma omöna yöka̧laduwoko.