Proverbios 16:16 - Dios Iwene

¹⁶ Ja̧danö, ju'wibi yötawa: Chömöledö döwaisa, oroma nöinö mikwawi̧ jawa ¿jö̧tö̧? Isabenö yötawa: Oro mikwawi̧tjö bajalekwönönö mikwawobe jweinö omukwatö kwö̧jaduwi̧ma. Ja̧danö, döwaisa, platabi nöinö mikwawi̧ jawa ¿jö̧tö̧? Isabenö yötawa: Kwöwaisaduwi̧ma di̧ya sulojobö jö̧ba̧lö, di̧ya otiwojobö jö̧ba̧lö jwiinö mikwawobe, plata mikwawi̧tjö̧ bajalekwönönö.

Proverbios 16:16 Referans Kwoze

Mateo 16:26

Jau chömöledö, bakwo̧ okobe jwiinö böjȩ jawa juna̧lo̧ woitjö̧ma, ¿okobe jwiinö böjȩ jawa ujuna̧li̧ma jo̧banö pjaatenaji̧? Pjaatokobe, ¿jö̧tö? Jau chömöledö, okobe jwiinö ujuna̧li̧ iyitjö̧böbi, yemidanö ja̧kwawa emobö jwiena.

Proverbios 8:19

Ju'wibi yöbawuju: Ötjö jojodönö pjabatö chiyi̧ jawama jwiinö mikwawobe. Oro bakwai̧ ji̧tjö bajalekwönönö mikwawobe, ja̧danö plata bakwai̧ ji̧tjö bajalekwönönö mikwawobe ötjö jojodönö pjabatö chiyi̧ jawama.

Proverbios 4:7

Ja̧danö, ju'wi jawabi jwebebö yöawijatö chabe'doma ötjönö baikwö: —Chitji̧ okobe jwiinö kwöwaisi̧tjö̧ bajalekwönönö mikwawobe jweinö omukwatö kwö̧jobö kwöwaisi̧ma. Jo̧kwaobetjö̧ yötawakwö: Jweinö omukwatö kwö̧jobö yötawi̧ma do̧batö kwöwaisachibobö jo̧be chitji̧. Ja̧danö, ju'wibi okobe jwiinö kwöwaisi̧tjö̧ bajalekwönönö mikwawobe chitji̧. Ötjö yötawi̧, di̧ya sulojobö jö̧ba̧lö, di̧ya otiwojobö jö̧ba̧lö yötawi̧ma do̧batö kwöwaisachibobö jo̧be chitji̧. Nöinö kwöwaisena chitji̧ ju'wi jawabi ju'wi jawa. Ja̧ kwöwaisitjö bajalekwönönö pjaatakobe, di̧ya sulojobö jö̧ba̧lö, di̧ya otiwojobö jö̧ba̧lö kwöwaisi̧ma— jobekwö yöawijatö chabe'doma ötjönöma.

Lucas 12:21

Jejenö wanedö yöbawajo̧ Jesúsma yöawinobe: —Jo̧badanö tjichejekwobe Diosnö omukwatökönö, idöda tjujuna̧lotö jö̧ba̧lö böjȩ jawa ko̧ko̧da̧lö isakwadöma. Jobadöma, Aaa, otiwanö juna̧ladösa, jö̧ba̧lö tjomukwatijayonö Dios öba a'otjö isabenö jwibadöda tjö̧jobe— jö̧ba̧lö yöawinobe Jesúsma.

Proverbios 3:14

Jao chitji̧, jweinö omukwatö ja̧kwawama jwiinö mikwawobe. Plata, oro mikwawi̧tjö̧ bajalekwönönö mikwawobe jweinö omukwatö kwö̧ji̧ma. Isabenö, plata, oro kwiyi̧tjö̧ma balada nöinö kwemena, nöinö mikwawobetjö̧, ¿jö̧tö̧? Jo̧kwaijayonö, ökwö jweinö omukwatö kwö̧ji̧ma plata, oro mikwawi̧tjö̧ bajalekwönönö mikwawobe.

Proverbios 4:5

Ja̧danö chitji̧, ötjö jwebebö yötawi̧ma kwo̧'wo̧ jwikiboko, ja̧danö, kakatiboko. Ja̧danö, jweinö omukwatö kwö̧jobö yötawi̧ma do̧batö kwöwaisachibo chitji̧. Ja̧danö, di̧ya sulojobö jö̧ba̧lö, di̧ya otiwojobö jö̧ba̧lö yötawi̧ma do̧batö kwöwaisachibo chitji̧— jobekwö yöawijatö ötjö chabe'doma ötjönöma.

Proverbios 3:13

Ja̧danö, ju'wibi yötawakwö chitji̧, wanedö: Bakwo̧ma jweinö omukwatö ja̧kwawama ¿di̧yajö? jö̧ba̧lö, öwaisachibobö isakwobe. Isakwemi badekwajo̧ma jweinö omukwatö ö̧jobetjö̧ o̧'wo̧ ösöwanö jo̧. Ja̧danö, jo̧ba jweinö omukwatö jo̧ma, ju'wi jawabi ju'wi jawa omukwatö, di̧ya sulojobö jö̧ba̧lö, di̧ya otiwojobö jö̧ba̧lö waisachibo̧. Jobekwö öwaisobetjö̧ o̧'wo̧ ösöwanö jo̧.