Proverbios 15:28 - Dios Iwene

²⁸ Ja̧danö, ju'wibi yötawa: Dios wei̧ a̧ja̧kwö jo̧ma jelo̧nö atadakwa̧ abönö ö'wiyawakwawönö omukwato̧. Juluwanö, omukwatökönö atadokobe. Jobekwö omukwatokobe sulabenö omukwatö jo̧ma. Jo̧bama juluwanö, omukwatökönö yöba̧lo̧. Isabenö, jo̧ba yöa̧li̧tjö suli̧da laebobe.

Proverbios 15:28 Referans Kwoze

Proverbios 29:11

Ja̧danö, ju'wibi yötawa: Jweinö omukwatö̧kö̧ma juluwanö dameakwo̧, ödameakwi̧ma tjöbeba̧lökönö. Jo̧kwaijayonö, jweinö omukwato̧ma ödameakwi̧ma tjöbeba̧lö i̧sekwö̧kö̧, ödameakwi̧ o̧'wo̧ söawachenanö kabatö.

Proverbios 15:2

Ja̧danö, ju'wibi yötawa: Jweinö omukwato̧ yöawi̧ma isabenö mikwawobe. Jo̧bama yöawena, yöawi̧ a̧ja̧kwo̧ma jwiinö ösödobe, jweinö yöbawo̧, yöawi̧tjö chöwaisachibobö jo̧be, jö̧ba̧lö. Jobekwö mikwawokobe jweinö omukwatö̧kö̧ yöawi̧ma. Jweinö omukwatö̧kö̧ yöawi̧tjö tjöwaisachiboböma jwiobe, mikwawökö ji̧ jawada yöawobetjö̧.

Mateo 12:34

Ökwödö a̧ko̧'dö̧danöbedöbi ja̧danö, ökwödöma sulabedököbaduwobetjö̧, otiwa jawa yöka̧laduwobö jwibadöja, kwomajadeduwinö kwomukwataduwi̧ma, kwaaduwitjö laebobetjö̧.

Proverbios 29:20

Ja̧danö, ju'wibi yötawa: Waisanö omukwatö̧kö̧nöma Dios pjaatoböma jobe, 'diokobe. Jo̧kwaijayonö Dios pjaatoböma jwiyobe jelo̧nö, juluwanö omukwatökönö yöba̧lo̧nö. Jo̧banö, juluwanö omukwatökönö yöba̧lo̧nö Dios pjaatoböma jwiinö 'diobe. Isabenö, 'diobe juluwanö omukwatökönö yöba̧lo̧nö pjaati̧ma, waisanö omukwatö̧kö̧nö pjaatitjö̧ bajalekwönönö 'diobe.

Proverbios 16:23

Ja̧danö, ju'wibi yötawa: Jweinö omukwatö jo̧ma yöa̧lakwa̧ abönö o̧'wo̧nö omukwatö juno̧. Jobekwö omukwatö yöawobetjö̧ jo̧ba yöawi̧ a̧ja̧kwö tjösödobe jojodöma, jweinö yöbawo̧, da̧ja̧kwobö jo̧be, jö̧ba̧lö.

Proverbios 13:16

Ja̧danö, ju'wibi yötawa: Otiwanö omukwato̧ma ja̧akwa̧ abönö ö'wiyawakwawönö omukwato̧. Jobekwö omukwatö ö̧jokobe jweinö omukwatö̧kö̧ma. Jweinö omukwatö̧kö̧ma iteda okobe jwiinö ö̧ji̧ma öwawinö i̧sekwobe jweinö omukwatö̧kö̧sa jö̧ba̧lö.

Proverbios 10:19

Ja̧danö, ju'wibi yötawa, wanedö: Bakwo̧, nöinö yöba̧lo̧ma, iteda yöa̧li̧tjö sulabe jawa laebena, nöinö yöa̧lobetjö̧. Isabenö yötawa: Jweinö omukwatö jo̧ma nöinöma yöba̧lö̧kö̧.

2 Pedro 2:18

Ja̧danö ju'wibi yötawa jobadö tjo̧'wo̧ jwibadö sulabenö yöbawadönö chömöledö. Jobadöma labinö waisadösa yöba̧lö, iya̧nö Dios iwene a̧ja̧kwö sulabenö ja̧bö ja̧kwawatjö ji̧bajadönö yötjawobe, böjȩ jojodö sulabenö tjösödi̧ma otiwa jö̧ba̧lö, ja̧danö jobadönö ötjibobedanö ichejekwa, 'daliwanö tjö̧libobö. Jejenö sulabenö ötjibobe jojodönö chömöledö, jo̧kwajabetjö̧ Diosma isabenö jobadönö lȩebakobe.

Proverbios 10:32

Ja̧danö, ju'wibi yötawa: Dios wei̧ a̧ja̧kwö ju̧kwadöma pjabatö yötjawobö waisadö. Jobekwö yötjawokobe sulabenö omukwatadöma. Jobadö sulabenö omukwatadöma sulabenö, omönada yöba̧ladö, ba̧kwȩlö̧jatebö.