Proverbios 12:28 - Dios Iwene

²⁸ Ja̧danö, ju'wibi yötawa: Dios wei̧ a̧ja̧kwö ju̧kwadöma ja̧kwawa mananö 'ya̧jadö, lekwe tjö̧jakwedö. Ja̧danö, jobadö ja̧kwawa mananö 'ya̧jadöma, ina möayedö tjö̧jayi̧ debö 'yö̧ködö.

Proverbios 12:28 Referans Kwoze

3 Juan 1:11

Gayo, chöjawo̧ chösödökwe, yötawakwö. Suli̧ jawa ja̧badö tjö̧ji̧danö kwö̧joko. Otiwi̧ jawa ja̧badö tjö̧ji̧danöda kwö̧jo. Otiwi̧ jawa ja̧bö ja̧döma tji̧sekwobe, Ökwödöma Dios i̧tji̧mu babibinadösa, jö̧ba̧lö. Jo̧kwaijayonö suli̧ jawa ja̧bö ja̧döma wainö tji̧sekwobe, Ökwödöma Diosnö wajwibadösa, jö̧ba̧lö. Gayo, otiwi̧ ja̧wa ja̧bö kwö̧jo, dö̧ja̧wo̧dönö pjabatö.

Romanos 5:21

Jau chömöledö, jojodö sulabenö ja̧tji̧ma isabenö juluwinobe, jojodö wotjawinö ja̧bö. Ja̧danö Dios mikwa jwiinö otiwa jawa iyi̧bi juluwi̧, jojodö ba̧kwȩlö̧jatebö tjö̧jakwedö batjibanö ja̧bö. Jau chömöledö, Duluwo̧ Jesucristoda midawö woinobetjö̧, Diosma, ökwödönö mikwa jwiinö otiwa jawa iyö, Chedemi bidöma suli̧ jwibadö, jö̧ba̧lö, ba̧kwȩlö̧jatebö ja̧kwawa iyobe ökwödönöma.

Proverbios 11:19

Ja̧danö, ju'wibi yötawa: Bakwo̧, isabenö ötjöma Dios wei̧da a̧ja̧kwö chö̧jo, jö̧ba̧lo̧ma o̧'wo̧ ösöwanö lekwe ö̧jakwo̧. Jobekwö ö̧jokobe suli̧ jawada isakwo̧ma. Suli̧ jawada isakwo̧ma debö i̧'yakwo̧.

1 Juan 3:7

Chi̧tji̧mu, yötawaduwakwö. Isabenö bakwo̧ Dios wei̧ a̧ja̧kwö jo̧ma, sulabenö ja̧bökönö jo̧. Jo̧bama Cristo sulabenö ja̧bökönö ö̧jinadanö sulabenö ja̧bökönö jo̧. Jo̧kwaijayonö ju'wedö jelobekwö omukwatö yötjawobe. Jobadöma ökwödönö sulabenö ja̧köbaduwobö ötjibotö jö̧ba̧lö yötjawobe. Chö̧ja̧wo̧dö, jobadö yötjawi̧ma kwa̧ja̧kwaduwoko. Jobadö jelobekwö omukwatö yötjawi̧ a̧ja̧kwökönö otiwanö ja̧bö kwi̧'yaduwo chö̧ja̧wo̧dö.

1 Juan 2:29

Chö̧ja̧wo̧dö kwöwaisaduwa, Cristoma jweinöda omukwato̧, jö̧ba̧lö. Jo̧kwaobetjö̧ Cristo jweinö omukwati̧danö jweinö omukwatö ja̧döma tji̧sekwobe, Ökwödöma Dios i̧tji̧musa, jö̧ba̧lö. Jau chö̧ja̧wo̧dö, Dios i̧tji̧muma Cristo jweinö omukwati̧danö jweinö omukwatö ja̧dö. Jo̧kwaobetjö̧ jejenö kwö̧jaduwo chö̧ja̧wo̧dö, Dios i̧tji̧mu tjö̧jobö ji̧ma, jweinö omukwatö, ja̧danö Cristokwö dötewinö 'ya̧nö. Jejenö kwö̧jaduwobetjö̧ taba jwiinö kwedaduwakwedöja Cristonö, yemidanö ichenama.

Proverbios 10:16

Ja̧danö, ju'wibi yötawa, wanedö: Dios wei̧ a̧ja̧kwadöma idöda midö tjȩmi̧danö, otiwanö ja̧kwawa tjȩmakwedö. Jobekwö tjȩmokobe sulabenö omukwatadöma. Sulabenö omukwatadöma idöda midö tjȩmidanö suli̧da tjȩmakwedö. Yemidanö yemidanöbi ba̧kwȩlö̧jatebö sulabenöda ja̧bö tjö̧jakwedö.

Proverbios 8:35

Isabenö yötawaduwakwö: Ötjönö badekwajo̧ma lekwe mölȩ ö̧jakwo̧. Ja̧danö, ötjönö badekwajo̧nöma Isabenö Jo̧ma ösödö pjaatakwo̧.

Deuteronomio 30:15

—A̧ja̧kwaduwitjö chömöledö, babe möle kwöba a'oduwitjö yöbawö chi̧sȩbajabe, –Dios wei̧ kwa̧ja̧kwaduwitjö̧ma, ja̧kwawabi, nöinö kwiteaduwibi kwujuna̧laduwakwedöja, –jö̧ba̧lö. Ja̧danö –Dios wei̧ a̧ja̧kwökönö kwö̧jaduwitjö̧ma, woawabi, nöinö wenebi kwujuna̧laduwakwedöja, –jö̧ba̧lö yöbawö chi̧sȩbajabe. Di̧ya omudawö kwösödaduwakwojobö jö̧ba̧lö, jobekwö yöbawö chi̧sȩbajabe chömöledö.

Proverbios 9:11

Isabenö yötawa: Jweinö omukwatö kwö̧jaduwitjö̧ma lekwe kwö̧jaduwena.

Deuteronomio 32:46

Moisesma jobadönö yöawinobe: —Chömöledö, babe möle otiwanö yöbawö lȩtebaduwakwö, otiwanö omukwatö kwö̧jaduwo jö̧ba̧lö, ja̧danö yötawaja̧ jawa di̧inö do̧ba̧lö kwö̧jaduwo, kwo̧'wo jwikibaduwapji jö̧ba̧lö. Ja̧danö, kwi̧tji̧muduwinö yötawaja̧ jawa weköbaduwo, jobadöbi ba̧kwelöjatebö Dios wei̧ yötawaja̧danö ja̧bö tjö̧jakobetjö̧.

Deuteronomio 30:19

Mölejenö ju̧kwadö tjöba a'otjöbi, bö̧jenö ju̧kwadö tjöba a'otjöbi öwaetjöda öwawinö yöbawö chi̧sȩbajabe, ja̧kwawa jawa ichejebi̧ jawabi, woawa jawa ichejebi̧ jawabi, ja̧tjö di̧ya kwomudawaduwakwojobö jö̧ba̧lö. Jau chömöledö, mölejȩnö ju̧kwadöbi, bö̧jenö ju̧kwadöbi edö waisadö, isabenö jweinö baledakwa̧ jawa ökwödönö lȩbebö yötawajabe jö̧ba̧lö, ja̧danö kwujuluwaduwachibanö pjabatö yötawaduwakwö: Isabenö ja̧kwawa jawada kwomudawaduwo chömöledö, ökwödöbi kwitji̧mu tupadanö jojodöbi debö 'yö̧könö otiwanö kwö̧jaduwakobetjö̧.

Proverbios 10:2

Ja̧danö, ju'wibi jwebebö yötawa: Sulabenö ja̧badöma, sulabenö ja̧tjaja̧tjö̧ tji̧midi̧ baladama nöinö tju̧juna̧lijayonö isabenö ja̧ baladama pjaatokobe tjo̧'wo̧ luwo̧nö isabenö otiwanö tjö̧jobö. Jo̧kwaijayonö Dios wei̧ a̧ja̧kwadö otiwanö omukwatö tjö̧ji̧ma pjaatobe wobaletjöbi tjö̧jibinö.