Proverbios 11:19 - Dios Iwene

¹⁹ Ja̧danö, ju'wibi yötawa: Bakwo̧, isabenö ötjöma Dios wei̧da a̧ja̧kwö chö̧jo, jö̧ba̧lo̧ma o̧'wo̧ ösöwanö lekwe ö̧jakwo̧. Jobekwö ö̧jokobe suli̧ jawada isakwo̧ma. Suli̧ jawada isakwo̧ma debö i̧'yakwo̧.

Proverbios 11:19 Referans Kwoze

Proverbios 10:16

Ja̧danö, ju'wibi yötawa, wanedö: Dios wei̧ a̧ja̧kwadöma idöda midö tjȩmi̧danö, otiwanö ja̧kwawa tjȩmakwedö. Jobekwö tjȩmokobe sulabenö omukwatadöma. Sulabenö omukwatadöma idöda midö tjȩmidanö suli̧da tjȩmakwedö. Yemidanö yemidanöbi ba̧kwȩlö̧jatebö sulabenöda ja̧bö tjö̧jakwedö.

Proverbios 19:23

Ja̧danö, ju'wibi yötawa: Isabenö Jo̧nö yebabinö omukwatadöma lekwe tjö̧jakwedö. Jobadöma tjo̧'wo̧ ösöwanö, yebabökönö tjabakwedö, yö̧te baledibanö, suli̧ jawa baledökönö, Isabenö Jo̧nö yebabinö tjo̧mukwatobetjö̧.

Proverbios 12:28

Ja̧danö, ju'wibi yötawa: Dios wei̧ a̧ja̧kwö ju̧kwadöma ja̧kwawa mananö 'ya̧jadö, lekwe tjö̧jakwedö. Ja̧danö, jobadö ja̧kwawa mananö 'ya̧jadöma, ina möayedö tjö̧jayi̧ debö 'yö̧ködö.

Proverbios 8:36

Jo̧kwaijayonö jelobekwö omukwatö 'yo̧ma, ötjönö öpöjödö itedada söbekwö loakwo̧. Isabenö, ötjönö öpöjödo̧ma woawa ösödöda jo̧— jobekwö yöbawuju isudada jweinö omukwatö ja̧kwawa wanekwachujuma.

1 Juan 3:10

Jejenö ja̧nö, öwawinö i̧sekwobe, Ötjöma Dios öibökwesa, Dioskwö dötewinö chi̧'yinö, jö̧ba̧lö. Jo̧kwaijayonö suli̧ jawa ja̧bö 'yo̧ma ju'wi i̧sekwobe, Ötjöma Awetja öibökwesa, jö̧ba̧lö. Ja̧danö chö̧ja̧wo̧dö, yötawaduwakwö. Cristotjö ö̧ja̧wo̧dönö ösödökönö jo̧ma i̧sekwobe, Ötjöma Awetjakwö dötewinö chi̧'yinö öibökwesa, jö̧ba̧lö. Jo̧ba ö̧ja̧wo̧dönö öpöjödo̧ma Diosma öibökökwe. Chö̧ja̧wo̧dö isabenö, bakwo̧ ö̧ji̧ma i̧sekwobe, Dios öibökwesakö̧, Awetja öibökwesakö̧, jö̧ba̧lö.

1 Juan 3:7

Chi̧tji̧mu, yötawaduwakwö. Isabenö bakwo̧ Dios wei̧ a̧ja̧kwö jo̧ma, sulabenö ja̧bökönö jo̧. Jo̧bama Cristo sulabenö ja̧bökönö ö̧jinadanö sulabenö ja̧bökönö jo̧. Jo̧kwaijayonö ju'wedö jelobekwö omukwatö yötjawobe. Jobadöma ökwödönö sulabenö ja̧köbaduwobö ötjibotö jö̧ba̧lö yötjawobe. Chö̧ja̧wo̧dö, jobadö yötjawi̧ma kwa̧ja̧kwaduwoko. Jobadö jelobekwö omukwatö yötjawi̧ a̧ja̧kwökönö otiwanö ja̧bö kwi̧'yaduwo chö̧ja̧wo̧dö.

Romanos 6:23

Jau chömöledö, sulabenö ja̧di̧ mikwawi̧ma wobaleda. Jo̧kwaijayonö, Dios mikwa jwiinö otiwa jawa iyi̧ mikwawi̧ma ja̧kwawa jawada chömöledö. Dios mikwa jwiinö otiwa jawa iyi̧ mikwawi̧ma, ba̧kwȩlö̧jatebö ja̧kwawa Duluwo̧ Cristo Jesúskwö chömöledö.

Hechos 10:35

Bakwo̧, jelobe jo̧bi jelobe jo̧bi, Diosnö yebabinö omukwato̧nö Diosma otiwanö edobe—yöbawijetö—.

Proverbios 11:4

Ja̧danö, ju'wibi yötawa: Isabenö, bakwo̧ nöinö balada ujuna̧li̧ma ja'yubebi pjaatokobe Dios lȩebi̧ mölȩ ichenama, Dios jo̧banö lȩebi̧tjö ö̧jibobö. Dios jo̧banö lȩebakwo̧. Jo̧kwaijayonö Dios wei̧ a̧ja̧kwö jo̧ma, Dios lȩebökakwo̧, ja̧danö wobaletjö ö̧jibakwo̧.

Santiago 1:15

Ja̧danö, bakwo̧, jejenö sulabenö ösödi̧da omukwata̧lö ö̧jitjö̧ma sulabenö omukwata̧li̧danö ja̧bö ö̧jena. Jemi ikenama yemidanö, yemidanöbi jejenö sulabenö ja̧böda jo̧ma, sulabenö omukwati̧ öbalewachökötjö̧ma Diostjö 'da̧bachiböda jo̧, o̧'wo̧ luwo̧nö ö'wö babibo̧da.

Proverbios 21:16

Ja̧danö, ju'wibi yötawa: Bakwo̧ ajayinöma otiwanö omukwatö ji̧nama, otiwanö omukwati̧ kabatibö jelobekwö sulabenö omukwatitjö̧ma wobinadö tjö̧jobe ichibakwo̧.

Deuteronomio 16:20

Jo̧kwajabetjö̧ lȩekwa luwedö kwö̧jaduwenama, bakwainö jwei̧ jawada kwisakwaduwo, jweinö lȩekwa yökawaduwo jö̧ka̧laduwi̧danö jweinö yökawaduwakobetjö̧. Jejenö Dios wei̧danö lȩekwa yökawaduwo chömöledö, jejenö lȩekwa yökawaduwiökwe kwuluwo̧duwi Isabenö Jo Dios ökwödönö iyakwemi nijibe tekachaduwobö pjaatakobetjö̧, ja̧danö iyemi nijinö kwiteboduwi baibanö otiwanö kwö̧jaduwakobetjö̧, —jö̧ba̧lö yöawinobe Moisesma.

2 Reyes 1:4

Jobekwö sulabenö abebö kwi̧'yaduwiökwe, baikwö yöawobe Isabenö Jo̧ma, kwuluwo̧duwi Ocoziasnö: -Ökwöma kwö̧bapjo camapjotjö kwa̧la̧ibökakwo̧ja, isabenö a̧la̧ibökönö, ö'wö bakibakwo̧ja, –jö̧ba̧lö yökawo Ocozias ömöayedönö, —jö̧ba̧lö weinobe angelma. Ja̧danö weökwe, a̧la̧ibö i̧'yinobe Eliasma, ja̧danö weaja̧danö yöawinobe Ocozias ömöayedönö.

2 Reyes 1:16

La'aka luwo̧ Ocozias öba a'o ichibajo̧, jo̧banö yöawinobe Eliasma: —Baikwö yöawobe Isabenö Jo̧ma ökwönö: –Ocozias, ökwöma kwömöayedönö weköbatö, Ecron jojodö tjösödökwe Baal Zebub ötjabökwenö abebö tja̧ja̧kwobö, jö̧tö? Tajawedö jobekwö weköbaja̧da? Kwedemi bemi israel nijitjö, Dios deobetjö̧, ju'wedö tjitebo jojodö tjösödökwenöda abebö kwa̧ja̧kwobö jo̧beji̧? Ötjönöda abebö kwa̧ja̧kwo jö̧ka̧lajabe. Jo̧kwajabetjö̧ baledakwa̧ baikwö yötawakwö, kwö̧bapjo kamapjotjö a̧la̧ibökönö, isabenö ö'wö bakibakwo̧ja, –jö̧ba̧lö yöawobe Isabenö Jo̧ma, —Ocoziasnö yöawinobe Eliasma.

Proverbios 21:21

Ja̧danö, ju'wibi yötawa, wanedö: Bakwo̧ma Dios wei̧ a̧ja̧kwobö isakwobe, ja̧danö jojodönö lȩ lö̧jinö edö pjaatobö isakwobe. Isabenö, jo̧ba omukwati̧danö omukwatö jo̧ma lekwe öja̧kwo̧, otiwanö. Ja̧danö, Dios wei̧ a̧ja̧kwobö ö̧jakwo̧. Ja̧danö, jojodöma jo̧banö otiwanö edinö tjöwaisachibakwedö, otiwanö omukwatö jo̧, jö̧ba̧lö.