Proverbios 11:18 - Dios Iwene

¹⁸ Ja̧danö, ju'wibi yötawa: Sulabenö ja̧bo̧ma balada nöinö ujuna̧lobetjö̧, ötjöma ba̧kwȩlö̧jatebö otiwanö chö̧ja̧kwo̧sa, jö̧ba̧lö omukwato̧. Jobekwö omukwatijayonö jweinö omukwatokobe, u̧kwa baladama ba̧kwȩlö̧jatebö ujuna̧lö̧kakwo̧obetjö̧, 'dö̧ibakwa̧ jawa. Jo̧kwaijayonö Dios wei̧ a̧ja̧kwo̧ma jo̧ba otiwanö ö̧ji̧ mikwa baibanö Isabenö Jo̧ma jo̧banö ba̧kwȩlö̧jatebö otiwanö iyakwo̧. Ja̧danö, Isabenö Jo̧ iyi̧ma 'dö̧ibajökönö jawa.

Proverbios 11:18 Referans Kwoze

Santiago 3:18

Chö̧ja̧wo̧dö, Dios öibawö̧ waisanö omukwatadöma tjömöledönö dösölö̧jinö pjabatö, wene jwiinö isakwö ja̧dö. Jejenö ja̧nö tjisakwobetjö̧, wene jwiinö tjö̧jobö, tjömöledöbi wene jwiinö tjö̧jobö tjisakwobe. Wanedö yötawaduwakwö: Dösölö̧jinö omukwatö pjabatadöma batjo junawadanö tjujunobe. Tjujuni̧ önebiama idöda dösölö̧jinö tjomukwati̧, ja̧danö, tjömöledönö otiwanö omukwatö pjatjati̧ma. Ja̧ dösölö̧jinö tjomukwati̧ma, ja̧danö tjömöledönö pjatjati̧ma junawa tjujuni̧danö tjujunobe tjömöledökwö otiwanö tjö̧ji̧ma. Ikenama ja̧ tjujuni̧ma otiwanö pokwobe ju'wedö tjömöledö tjomajade okwa, otiwanö wene jwiinö omukwatö tjö̧jobö. Isabenö chö̧ja̧wo̧dö, otiwanö dösölö̧jinö omukwatö ju̧kwadöma ju'wedönöbi otiwanö wene jwiinö tjö̧jobö pjabatadö.

Proverbios 22:8

Ja̧danö, ju'wibi yötawa, wanedö: Bakwo̧ öbatjonö sulejewa ujunitjö̧ma sulejewada pokwena ¿jö̧tö̧? Ja̧ ji̧danö bakwo̧ jojodönö sulabenöda ja̧itjö̧ma weneda baledena jo̧banöma, nöinö. Ja̧danö, jo̧bama itedada wene jwöebakwo̧, jojodönö sulabenö ja̧obetjö̧. Jobekwö wene nöinö baledökwema usula emawobetjö̧ jojodönö sulabenö ja̧i̧ma bajaliyanöma kaatibakobe.

Proverbios 1:18

Isabenö yötawa: Ökwönö öibotö jö̧ba̧lö ichadö, sulabenö ja̧tjobö omukwatadöma pjiyuwa ediakwawö kö̧bajo̧danöböködö. Wajwibadö, idöda debö tji̧'yakwa̧ma. Jobadöma jelo̧nöda kwabö lotjobö tjo̧mukwatijayonö idödada debö tji̧'yakwedö.

Proverbios 5:22

Ju'wibi yötawakwö chitji̧, wanedö: Bakwo̧ ö̧jobe ba̧kwȩlö̧jatebö sulabenö omukwatö ja̧baibo̧ma. Ja̧danö, jo̧ba sulabenö ja̧inama jo̧banö do̧tja̧li̧danö do̧a̧lobe jo̧banöma. Ja̧danö, a̧la̧chi'bonö tjunu'yajökwedanö bo̧, ejachibö dilachibökönö, sulabenö ja̧inobetjö̧.

Efesios 4:22

Chömöledö, ajayinöma kwomajadeduwinö ju'wida ba̧kwȩlö̧jatebö omukwatö ju̧kwiaköbinaduwobe. Ja̧danö, sulabenö ja̧köbaduwoböda jelobe omukwatinadöja, Aaa, sulabenö ja̧titjö̧ma otiwena, jö̧ba̧löda. Chömöledö, ja̧ kwomukwatinaduwama omönada kwomukwatinaduwobe. Babema ja̧ ajayinö kwomukwatinaduwama kabatakwawaduwi, balekwa, otiwi̧, 'yayi̧ jawa omukwatakwawa omukwatö.

Juan 4:36

Ina yöawinobe: —Ja̧danö, bakwo̧, jojodönö Dioskwö tjichibobö öbibo̧ma, batjo junawa 'döbö emo̧danö jo̧, ida̧ökö yȩi̧ wa̧ji̧ 'döbö emo̧danö. Ja̧danö, jo̧ba batjo junawa emo̧ma, emaja̧ iyawö̧ma tjimidobe ¿jö̧tö? Ja̧ tjimidi̧danö, Diosma iteda otiwi̧ jawa iyakobe jojodönö öbibo̧nö, jo̧bakwö tjichibobö öbibo̧nöma. Jobadö öibawö̧ma, ba̧kwȩlö̧jatebö ja̧kwawa tjemakwedö, Dioskwö ichibö. Ja̧danö, ba̧kwȩlö̧jatebö ja̧kwawa tjemiökwe, jobadönö öbibo̧ma o̧'wo̧ ösöwanö ö̧jakwo̧. Ja̧danö, ajayinö Dios iwene yöbawinabi o̧'wo̧ ösöwanö ö̧jakwo̧. Jo̧bama ajayinö önebiya ujuninadanö ajayinö yöawinobe— jejenö yöawinobe—.

Éxodo 1:20

Jejenö Diosnö yebabinö omukwatö tjemunö kwabö lotjokobetjö̧ Diosma otiwanö pjabatijetö jobadönöma, idöda tji̧tji̧munö iyö. Ja̧danö jobadöma Diosnö yebabinö omukwatö, inesö la'aka luwo̧ wei̧ tja̧ja̧kwokobetjö̧ Israel jojodöma ba̧jekwachijadötö, jwiinö juluwadö batjibanö.

Proverbios 10:16

Ja̧danö, ju'wibi yötawa, wanedö: Dios wei̧ a̧ja̧kwadöma idöda midö tjȩmi̧danö, otiwanö ja̧kwawa tjȩmakwedö. Jobekwö tjȩmokobe sulabenö omukwatadöma. Sulabenö omukwatadöma idöda midö tjȩmidanö suli̧da tjȩmakwedö. Yemidanö yemidanöbi ba̧kwȩlö̧jatebö sulabenöda ja̧bö tjö̧jakwedö.