Mateo 10:14 - Dios Iwene

¹⁴ Jau chömöledö, jelejunö ju̧kwadöbi, ju'wi comunidad jojodöbi kwichaduwobö tjöpöjöditjö̧ma, ja̧danö yökawaduwi̧ tja̧ja̧kwobö tjöpöjöditjö̧ma, jobe nijiso̧pja kwömasapatjö kwupjusawaduwo, bemi jojodönö pjadatobö jö̧da̧lijayonö, sulabenö öpöjödadö, jö̧ba̧lö.

Mateo 10:14 Referans Kwoze

Hechos 18:6

Jo̧kwaijayonö judío jojodöma öpöjödijadötö. Pablo yöawi̧ a̧ja̧kwö, labinö atada̧lö öpöjödijadötö, Bitema jweinö yöba̧lö̧kö̧, jö̧ba̧lö. Jejenö tjöpöjödiökwe Pabloma, jobadönö edö, u̧kwa kamijido̧ pjusawijetö. Pjusawajo̧ jö̧ba̧lijetö jobadönöma: —Ökwödöma a̧ja̧kwö kwöpöjödaduwobetjö̧ ina Diostjö 'da̧bachibö ju̧kwadöja. Ja̧danö, ötjöda jawamaökö, ökwödöda jawaduwida, a̧ja̧kwö kwöpöjödaduwobetjö̧. Tjo̧wi̧ katatakwawaduwakwö. Judío jojodöböködönöda yötawakobe— jö̧ba̧lijetö Pabloma.

Hechos 13:51

Ja̧danö, a'dewö lotjajawö̧ Pablo, Bernabé tju̧kwa sapatu pjusawijadötö, letiya. Ja̧ tjupjusawi̧ma i̧sebijadötö, Tjo̧wi̧, bidöma Dios iwene tja̧ja̧kwijayonö jwiinö tjöpöjödobe, jö̧ba̧lö. Ikenama jobetjö labebö Pablo, Bernabé Iconiobe 'yi̧jadötö.

Lucas 9:5

Ja̧danö comunidad jojodö ökwödönö tjöpöjöditjö̧ma, ja̧ tjöpöjödi̧ i̧sebö nijiso̧pja̧ kwömasapatjö kwupjusawaduwo, jelö labeböma, isabenö bemi jojodönö pjadatobö jö̧da̧lijayonö, sulabenö öpöjödadö jö̧ba̧lö—.

Marcos 6:11

Jo̧kwaijayonö comunidadbe kwichibaduwena jobe ju̧kwadöma ökwödönö teatakwawabi a̧ja̧kwakwawabi tjöpöjöditjö̧ma, kwömasapaduwitjö kwupjusawaduwo, letiya. Ja̧ kwupjusawaduwi̧ma jobadönö i̧sebakobe, Ökwödöma Dios iwene kwa̧ja̧kwaduwobö kwöpöjödaduwitjö̧ma tjo̧wi̧ta, ökwödönöma kadatiba, jö̧ba̧lö— webijetö Jesúsma iteda öba̧ja̧di̧ waisachadönö jelobe tji̧'yakwa̧ abönö.

1 Tesalonicenses 4:8

Jo̧kwajabetjö̧ biya̧ yötawaja̧ öpöjödo̧ma, jojo yöawi̧ma öpöjödö̧kö̧, Dios yöawi̧da öpöjödo̧. Jau chömöledö, Diosma iteda O̧'wo̧ Luwo̧nö ökwödönö iyo̧, ja̧danö jo̧ba yöawi̧da öpöjödobe yötawaja̧ öpöjödo̧ma.

Juan 13:20

Isabenö yötawa. Jojodö ötjö wetawö̧nö otiwanö tjösödenama bakwainö, ötjönöbi tjösödobe. Ja̧danö, ötjönö ösödadöma, bakwainö ötjönö webinanöbi ösödadö— yöawinobe Jesúsma iteda öba̧ja̧di̧ waisachadönöma.

Marcos 9:37

—Edaduwi. Bakwo̧, tjemunö ösödo̧, bitejayo̧danö tjemunö ösödo̧ma, ja̧danö, ötjönöbi ösödo̧. Ja̧danö, jejenö ötjönö ösödo̧ma ötjönö la'aka webinanöbi ösödo̧— jö̧ba̧lijetö Jesúsma öba̧ja̧di̧ waisachadönö.

Mateo 18:5

Tupakwö yöawinobe Jesúsma: —Chömöledö, okobe deinö bite tjemudanöbedönö bidöma Jesús ömöledö jö̧ba̧lö tjichobe ösödadöma, isabenö ötjö chichobe ösödadö.

Lucas 9:48

iteda öba̧ja̧di̧ waisachadönö yöawinobe: —Chömöledö, okobe deinö bite tjemunö, Jesús ömöledöso̧ jö̧ba̧lö ichobe ösödadöma, isabenö ötjö chichobebi ösödadö, ja̧danö okobe deinö ötjö chichobe ösödadöma ötjönö webo̧ Diosnö ösödadö. Jau chömöledö, böjȩ jojodöma wamenö edö tjomukwatena, Aaa, bitema juluwo̧obetjö̧ ju'wedötjö bajalekwönönö mikwawo̧ jö̧ba̧lö, ja̧danö bitema juluwö̧kö̧obetjö̧ mikwawö̧kö̧ jö̧ba̧lö tjomukwatena, ¿jö̧tö? Jo̧kwaijayonö jejenöokobe ökwödönöma chömöledö. Ökwödötjö jelo̧nötjö nijakwönönö mikwawö̧kö̧ jö̧ba̧lö kwomukwataduwökwema, jo̧bada isabenö ökwödötjö inesö mikwawo̧ma. Jo̧kwajabetjö̧ ökwödötjö isabenö mikwawadöma bite tjemudanöbedöda— jö̧ba̧lö yöawinobe Jesúsma.

Mateo 10:13

Ja̧danö, jeju ju̧kwadö isabenö otiwadö tjö̧jitjö̧ma, Dios jejunö ju̧kwadönö pjaato jö̧ba̧lö, jobe ja̧duwi. Jo̧kwaijayonö sulabedö tjö̧jitjö̧ma, jejutjö lakebaduwo, Dios jejunö ju̧kwadönö pjaatoko jö̧ba̧lö.