Marcos 10:27 - Dios Iwene

²⁷ Jesúsma, jobadönö eda̧lö jö̧ba̧lijetö: —A̧ja̧kwaduwitjö. Jojodöma idöda tjujulunö Dioskwö tjichibobö jwiobe. Dios ujulunöda jo̧bakwö tjichibobö jo̧be. Diosda jojodö itekwö tjichibobö webo̧ma— jö̧ba̧lijetö Jesúsma.

Marcos 10:27 Referans Kwoze

Mateo 19:26

Atjebökwe, jobadönö edö Jesúsma atadinobe: —Jojodö tjujulunö tjö̧jiboböma jwiobe. Jo̧kwaijayonö okobe jwiinö ja̧obö juluwo̧ Diosma, ja̧danö Dios pjaatitjö̧ma ji̧kwa jo̧be— jö̧ba̧lö atadinobe Jesúsma.

Diosnö ösödo̧ Job mikwo̧ usula emawina jawa 42:2

—Chuluwo̧ Dios, chöwaisa, –Okobe jwiinö kwotidobö juluwo̧ja, –jö̧ba̧lö. Chöwaisa, –ju'wi jaye kwotidobö omudawö kwujunitjö̧ma, bakwo̧bi tjöeba̧lobö jwibo̧, –jö̧ba̧lö.

Lucas 1:37

Jau María, ¿dakwö chitji̧nö chemoböjö? jö̧ba̧lö wajwiköbijayonö, omukwatökönuwi, jejenö baibobö jwiena jö̧ba̧löma. Dios otidobö jwii̧ma, ¿ju'wi jayebi jȩnaji̧? Isabenö ju'wi jayebi jwiobe Dios otidobö jwii̧ma. Isabenö okobe jwiinö otidobö juluwo̧ Diosma. Jo̧kwajabetjö̧ metu'wo bakibobö jwiena jö̧ba̧lö ichejekwijayonö, isabenö Dios ujulunö metu'wo kwö̧jakwujuja— jö̧ba̧lö yöawinobe ángelma.

Lucas 18:27

Atjebökwe, Jesúsma atadinobe: —Jojodö tjujulunö tjö̧jiboböma jwiobe, jo̧kwaijayonö okobe jwiinö ja̧obö juluwo̧ Diosma. Ja̧danö jojodö tjujulunö ji̧kwa jwiijayonö Dios pjaatitjö̧ma ji̧kwa jo̧be— jö̧ba̧lö atadinobe Jesúsma.

Filipenses 3:21

Jo̧ba ichenama, diteba'o böjȩ jawasa'o balewachinö ja̧akobe chömöledö, iteda iteba'o otiwa'o juluwa'odanö ökwödöbi dujuna̧lakobetjö̧. Jau chömöledö, Duluwo̧ Jesucristoma okobe jwiinö juluwo̧, okobe deinöbi okobe jwiinöbi ujuluwo jö̧ba̧lö, ja̧danö ja̧ iteda ujulunö, döbalewachinö ja̧akwo̧.

2 Reyes 7:2

Yöa̧liökwe, israel la'aka luwo̧ yöne ömöayo̧ma obö atadinobe: —Yöka̧laja̧danö baledobö jwiena, la'akatjöda. Isabenö Jo̧ma mölejȩbetjö ventanasa'do otidajo̧, po̧bebö iyitjö̧bi, la'akatjöda yöka̧laja̧danö baledobö jwiena, omöna yöba̧lo̧ja, —jö̧ba̧lö atadinobe. Yöa̧lökwe, —Jobekwö baledakwa̧ma, ökwöda kwöbajalenö kwedakwo̧ja, jo̧kwaijayonö ja̧ tjiyakwa̧ jawatjö kwukwökakwo̧ja la'akatjöda, —jö̧ba̧lö yöa̧linobe Eliseoma.

Hebreos 7:25

Jo̧kwaobetjö̧ Jesúsda jojodö Dioskwö ichibö tjö̧jibinö pjabato̧, Jesúsma dö̧jibinö pjabato̧, jö̧ba̧ladönöma. Ja̧danö, jobadö tjö̧ji̧bi okobe jwiinö pjaatinobe Jesúsma, ja'yubebi ji̧bökönö. Ja̧danö, Jesúsma jo̧banö ösödadönöma ba̧kwȩlö̧jatebö tjö̧jibinö pjabato̧, Jesúsma ba̧kwȩlö̧jatebö Diosnö abebö jobadönö pjaatobö ö̧jobetjö̧.

2 Reyes 3:18

Ja̧ isȩbakwa̧ma, Isabenö Jo̧ edemi waiyökö, ja̧danö ja̧da i̧sȩbökakwo̧. Ju'wibi iteda ujulu i̧sȩbö pjaatakwo̧ Isabenö Jo̧ma, ökwödönö iyakobe, Moabitas jojodönö kwujuluwaduwobö.

Marcos 10:26

Jejenö jö̧a̧liawö̧ jobadöma, yemidanö, tupakwö 'ya̧nö Jesúsnö jö̧ba̧lijadötö: —¡Ayö! Balada juna̧lo̧ma Dioskwö ichiböbö jwiitjö̧ma ¿dakwö ja̧bö tjichibobö tjö̧jibo jö̧ba̧löma, jo̧kwadabedöma?— jö̧ba̧lijadötö.