Lucas 6:21 - Dios Iwene

²¹ Ökwödötjö a̧wi̧chi̧ lö̧jawö̧ma isabenö tjo̧'wo̧ ösöwanö tjö̧jakwedö, tjomeawachibanö tjujuna̧lakobetjö̧. Ökwödötjö o̧'wo̧ tjo̧achö budekwadöma isabenö tjo̧'wo̧ ösöwanö tjö̧jakwedö, isabenö tupakwö jwiinö tjo̧'wo̧ ösöwachibanö tjö̧jakobetjö̧.

Lucas 6:21 Referans Kwoze

Juan 6:35

Jejenö atjebökwe: —Ötjödasa ba̧kwȩlö̧jatebö ja̧kwawa iyi̧ kwakwawama— yöawinobe—. Ötjönö ichibö ösödadöma a̧wi̧chi̧ tjöböbi la'akatjöda tjuju̧kwökakwedö. Ja̧danö, ojwiyo o̧ti̧ tjöböbi la'akatjöda tjuju̧kwökakwedö. Ja̧ a̧wi̧chi̧ tjöbö, ojwiyo o̧ti̧ tjöbö tjuju̧kwökakwedö, jö̧ba̧löma, tjo̧'wo̧ luwo̧ jawa wanekwachobe— yöawinobe Jesúsma.

Mateo 5:6

Jwaikwöda sulabe jwii̧ Dios ösödi̧ jawa isakwadöma, isabenö tjo̧'wo̧ ösöwanö tjö̧jakwedö, Dios öba a'otjö sulabe jwibadö tjö̧jakobetjö̧.

Santiago 1:12

Chö̧ja̧wo̧dö, wene baledena tjo̧'wo̧ 'dibachibö, jwaikwöda, Diosnö tjo̧'wo̧ wana̧lö 'ya̧döma, Dios pjaatawö̧. Ja̧danö, jwaikwöda tji̧'yi̧ma tji̧sekwobe, Diosnöda do̧'wo̧ wana̧lö ja̧dösa, jö̧ba̧lö. Ja̧danö chö̧ja̧wo̧dö, jobadöma Dios yöbawö ujunina tjemakwedö, ba̧kwȩlö̧jatebö ja̧kwawama. Jau chö̧ja̧wo̧dö, Diosma yöbawö ujuninobe, Ötjönö ösödadönö ba̧kwȩlöjatebo ja̧kwawa chiyakwo̧sa, jö̧ba̧lö.

Lucas 1:53

A̧wi̧chi̧ tjö̧badönöma tjomeawinö tjukwobö otiwa jawa iyajabe, jo̧kwaijayonö nöinö juna̧ladönö jwibadö batjibanö a'dewö loajabe.

Mateo 5:4

Tjo̧'wo̧ tjo̧achö budekwadöma isabenö tjo̧'wo̧ ösöwanö tjö̧jakwedö, tjo̧'wo̧ tjo̧achajabetjö tjo̧'wo̧ ösöwachibanö tjö̧jakobetjö̧.

Apocalipsis 7:16

Jobadö, inia tjötji̧ baledinawö̧ma, belöma a̧wi̧chi̧ tjöbö tjuju̧kwinajayonö, tjo̧wi̧, babema a̧wi̧chi̧ tjöböma jö̧ködö. Ja̧danö, belöma ojwiyo o̧tinö tjuju̧kwinajayonö, tjo̧wi̧, babema ojwiyoma o̧ti̧ tjöböködö. Ja̧danö, belöma ja̧wo̧bi tubinö dejatö, tji̧sȩdo̧ma ubö tjuju̧kwinajayonö tjo̧wi̧, babema ubökönö tjuju̧kwobe, ja̧wo̧ jweinö ö̧jenabi.

Lucas 6:25

Ja̧danö, ökwödötjö babe tjomeawinö kwajadöma, ayö, isabenö o̧'wo̧ tjo̧achö tjö̧jakwedö, isabenö a̧wi̧chi̧ lö̧jawö̧ tjö̧jakobetjö̧. Ja̧danö, ökwödötjö babe tjo̧'wo̧ ösöwanö obadöma, Ayö, isabenö o̧'wo̧ tjo̧achö tjö̧jakwedö, isabenö o̧'wo̧ tjo̧achö tjubudekwakobetjö̧.

1 Corintios 4:11

Chömöledö, ökwödö Jesús webawedöma babebi ina a̧wi̧chi̧ tjöbö dö̧jobe, ja̧danö o̧ti̧tjö tjöbö usula demawobe. Ja̧danö, kamijido̧ sulabado̧ kȩachado̧ 'dubawadö dö̧jobe, ja̧danö jojodö kwakwatjawö̧ dö̧jobe usula emawö. Ja̧danö, jelobebi, jelobebi kwebachö dö̧jobe,

Juan 4:10

Jejenö abebö ja̧ja̧kwökwe: —Ökwöma ötjönö akebobö jo̧be, ojwiyo chiyoböma— jö̧a̧linobe Jesúsma—. Diosma jwiinö otiwi̧ jawa iyobö jö̧ba̧lo̧. Ja̧ Dios iyi̧ma kwöwaisitjö̧ma, ja̧danö, ötjönöbi kwöwaisitjö̧ma, ötjönöda akebo jö̧ka̧lajena, Ojwiyo chowo iyitjö, jö̧ba̧lö— Jesús yöawinobe jobujunö—. Jejenö ötjönö akebajatjö̧ma ba̧kwȩlö̧jatebö ja̧kwawa ojwiyoma chiyochajena— yöawinobe Jesúsma Samaria jojosujunöma.

Isaías 30:19

Yadakwö isabenö Sion mösa'onö tjö̧jakwedö jojodöma, ja̧danö Jerusalennö ju̧kwadöma budekwö katjatibakwedö. Kwo'woduwi tjo̧bekwö pjaatobö jwökeba̧laduwiökwe, a̧ja̧kwakwo̧ Diosma, jadanö a̧ja̧kwajo̧, isabenö lȩlöjinö edö pjaatakwo̧. Jau, a̧ja̧kwenama, isabenö juluwanö atadö pjaatakwo̧.

Génesis 21:6

Ja̧danö, Sarama jö̧ba̧lijotö: —Diosma pjaatajabe ötjönöma cho̧'wo̧ ösöwanö otobö. Ja̧danö, okobe deinö ya̧döma chitji̧nö chemaja̧ yötjawi̧ a̧ja̧kwö tjo̧'wo̧ ösöwanö otjakobe, otiwanö jemajabe, jö̧ba̧lö.

Génesis 17:17

Ikenama Abrahamma u̧yu̧kijunö bamatö öba bȩbachibijetö nijakwö uunö. Dios yöawaja̧ omukwatö, itedada omajadenö obijetö ¿Isabenö bakwo̧ma, cien a̧yo bo̧ma, itji̧nö 'yaebenaji̧? ¿Isabenö Sarama noventanö a̧yo bujuma jitji̧nö jemakwa̧ji̧? jö̧ba̧lö.

Apocalipsis 21:3

Ja̧danö, labinö ökwöi̧ iwene cha̧ja̧kwijatö, Dios ö̧belöma, baikwö: —A̧ja̧kwaduwitjö. Babema Dios iteda ömöledökwö ö̧jakwa̧ma, tjo̧wi̧ badekwacha. Ja̧danö, Diosma, jobadökwö ja̧nö, Bidöma ötjö chömöledö, jö̧ba̧lö, badekwacha.

2 Corintios 12:10

Jo̧kwajabetjö̧, chujulu jwienabi, ja̧danö ötjönö sulabenö yötja̧lenabi, ja̧danö usula chemawenabi, ja̧danö ju'wedö usula chemawobö ja̧tjenabi, ja̧danö wene chöbaledenabi, cho̧'wo̧ ösöwanö chö̧jobe chömöledö, Cristonö chösödobetjö̧ biya̧ baledo̧sa jö̧ba̧lö. Jau chömöledö, ja̧ jawa cho̧'wo̧ ösöwanö chöbaledobe, jejenö ötjöda chujulu jwienama, isabenö ujulu chujuna̧lobetjö̧.

2 Corintios 11:27

Ja̧danö, nöinö usula emawö otidiachijatö, ja̧danö nöinö yö̧te abökönö ji̧achijatö, ja̧danö a̧wi̧chi̧tjöbi ojwiyotjöbi, o̧ti̧ tjöbö ji̧achijatö, ja̧danö nöinö kwakwawabi jwibö ji̧achijatö, ja̧danö chejubi jwibö, kamijido̧ otiwado̧bi jwibö, tiyuwobe ji̧achijatö chömöledö.

2 Corintios 6:10

ja̧danö do̧'wo̧ tjo̧achijayonö, do̧'wo̧ luwo̧ ösöwachibanö ja̧dösa. Jau chömöledö, böjȩ jawatjö usulasedösa, jo̧kwaijayonö ju'wedönö nöinö juna̧ladö batjibanö tjo̧'wo̧ luwo̧ jawa iyadösa, ja̧danö jwibadödanö dichejekwijayonö, isabenö mikwawi̧ jawa okobe jwiinö juna̧ladösa. Jau chömöledö, ju'wedö ökwödönö Dios ömöayedöböködö jö̧ba̧lö yötja̧lijayonö, ja̧bö dö̧ji̧ma öwaetjöda i̧sebobe Dios ömöayedö dö̧ji̧ma.

Juan 11:35

Ikenama Jesúsma ubudekwinobe.

Isaías 66:10

Jobekwö juluwanö jemobetjö̧, okobe deinö ökwödö Jerusalennö ösödadöma, jobujukwö kwo̧'woduwi ösöwanö kwö̧jaduwo. Okobe deinö ökwödö jobujunö ile nibebö ösödadöbi, jobujunö budekwadöbi, bakobe Jerusalenkwö kwo̧'woduwi ösöwachibanö kwö̧jaduwo.

Isaías 25:6

—Bi'o Jerusalen mösa'onö, Isabenö Jo̧ Okobe Jwiinö Juluwo̧ Diosma ba'ali ujunakobe, okobe deinö tjitebotenia jojodö tjukwobö. Inesö otiwi̧ ba'ali ujunakobe, söi̧ kwakwawabi tjukwobö, ja̧danö ubasobu o̧'dobu, jwiinö otiwi̧ lekwe möle tjo̧'omanö o̧'dibina ubasobu tjowobö. Jau, jwiinö tjösödi̧ 'wai̧ itebiyakwöbi, jwiinö otiwi̧ lekwe möle tjo̧'omanö o̧'dibina ubasobukwöbi ba'ali ujunakobe, tjitebo tenia jojodö tjukwobö.

Lucas 6:20

Jojodönö otidö lobajo̧, Jesúsma iteda öba̧ja̧di̧ waisachadönö edö yöawinobe, baikwö: —Ökwödötjö usula jojodöma isabenö tjo̧'wo̧ ösöwanö ja̧dö, Dios la'aka luwo̧ ö̧jenajojodötjobetjö̧.

Lucas 6:22

Ja̧danö, ötjönö jojo baibanö jeminökwenö kwösödaduwiawö̧ jojodö ökwödönö tjöpöjödena, ja̧danö ökwödönö 'da̧batö lotjena, ja̧danö ökwödönö otjena, ja̧danö sulabenö yötja̧lena. Jejenö baleditjö̧ma, isabenö kwo̧'wo̧ ösöwanö kwö̧jaduwakwedöja chömöledö, Diosma isabenö otiwanö ökwödönö iyakobetjö̧.