Lucas 20:13 - Dios Iwene

¹³ Jejenö ja̧tjiökwe, batjo luwo̧ma omukwatö yöa̧linobe itedada: ¿Dakwö ja̧takwajö? Aaa, chitji̧ chösödökwenö wetocha, ja̧danö ötjöda chitji̧obetjö̧, batjo otidadöma isabenö jo̧banö otiwanö tjomukwatakobe, ja̧danö jo̧banö otiwanö omukwatö tjimido jö̧tja̧li̧danö tjumusidi̧ jo̧banö tjimidakwedö, jö̧ba̧lö.

Lucas 20:13 Referans Kwoze

Mateo 3:17

Ja̧danö, mölejȩbetjö Dios iwene ökwöinobe, baikwö ökwöi̧ma: —Bitema ötjöda chösödökwe chitji̧. Cho̧'wo̧ ösöwanö chedökwe bitema— jö̧ba̧lö ökwöinobe.

Gálatas 4:4

Jo̧kwaijayonö, Dios badedö ujunina möle badekwachenama, Diosma iteda Itji̧nö weinobe. Jo̧bama jojosuju jitji̧ baibanö ichinobe, ja̧danö jo̧babi Moisés iwȩyudinadanö ja̧o jö̧a̧linobe.

Romanos 8:3

Jau chömöledö, Dios weina, jojodö baikwö ja̧bö tjö̧jo jö̧ba̧lö iwȩyudinobe Moisésma. Jo̧kwaijayonö, ja̧ iwȩyudinama ökwödönö pjaatoböma jwiinobe. Sulabe dujuna̧linobetjö̧, ökwödönö pjaatoböma jwiinobe. Jo̧kwaijayonö, Moisés iwȩyudina ökwödönö pjaatinököjayonö, Diosda ökwödönö pjaatinobe. Diosma iteda itji̧nö weinobe, jojo baibanö, sulabe juna̧ladödanö ichejekwo̧ baibanö. Jo̧bama ökwödödanö ichejekwinajayonö, sulabe jwibina jo̧bama. Ja̧danö Diosma jo̧banöda weinobe, sulabe dujuna̧li̧tjö dö̧jibobö. Ja̧danö, midawö woinobe, ökwödö sulabe dujuna̧li söbebö loobö.

Juan 1:34

Jejenö ötjöma, Dios yöawinadanö baibobe edö chöwaisachibijatö, Aaa itema Dios weinökwe, jö̧ba̧lö. Jo̧kwaobetjö̧ jweinö yötawaduwakwö, ite icho̧ma Dios Itji̧— yöawinobe Juanma.

Lucas 9:35

Ja̧danö ojwio'wotjö Dios iwene ökwöinobe: —Bitema ötjöda Chitji̧, ötjöda omudawö chujunökwema. Jo̧ba yöawi̧ a̧ja̧kwaduwi— jö̧ba̧lö.

Mateo 17:5

Pedro ina jejenö yöa̧lonö, ojwiyo'wo dewinö dejata'wo jobadö tjöwamenö öwawachinobe, ja̧danö ja'wotjö̧ iwene ökwöinobe baikwö ökwöi̧ma: —Bitema ötjöda chösödökwe chitji̧, cho̧'wo̧ ösöwanö chedobe jo̧banö. Jo̧banö kwa̧ja̧kwaduwo— jö̧ba̧lö iwene ökwöinobe.

Isaías 5:4

Kwedaduwemi, ajayinö chotidinatjö bajalekwönönö chöbatjo chotidobö ji̧naji̧? Ja̧maökö, okobe jwiinö chotido jö̧ta̧lina jawa otiwanö chotidijatö, jö̧tö? Ja̧danö, jobekwö otiwanö chotidinobetjö̧, uba waji̧ otiwi̧ wa̧jobö ji̧nobe, jö̧tö? Jo̧kwajabetjö̧ baikwö abebö cha̧ja̧kwaduwakwö: Uba waji̧ otiwi̧ wa̧jobö chiteada̧lemi, tajawedö sule suli̧ tebo jawa wa̧ji̧da pokwinada? Jobekwö suli̧ jawada pokwobö jwiinobe, jö̧tö?

Lucas 18:2

—Chömöledö, baikwö wanedö yötawa: Ju'wi comunidadnö bakwo̧ lȩekwa luwo̧ ö̧jinobe. Jo̧bama sulabenö otidinobe. Lȩekwa yöawena, Diosnö yebabinö, Aaa, Dios wei̧danö lȩekwa yötawo jö̧ba̧löma omukwatinokobe, ja̧danö ju'wibi lȩekwa luwo̧ ö̧jijayonö, jojodönö pjaatoböma omukwatinokobe.

Lucas 18:4

Lekwe möle jejenö jichiba̧lijayonö, lȩekwa luwo̧ma pjaatobö öpöjödinobe ajayinöma. Jo̧kwaijayonö kabatökönö jichiba̧liökwe, bajalianö omukwatö yöa̧linobe itedada: Diosnö yebabinö chomukwatököjayonö, ja̧danö jojodönö pjatatobö chomukwatököjayonö,

Lucas 20:12

Jemi ikenama jelo̧nöbi weinobe, wa̧medukwa baibanö, jo̧kwaijayonö jo̧banö inia tjöbö usula emawinö kwakwabö, jo̧banöbi a'dewö lotjinobe.

Lucas 20:14

Jejenö omukwatö, itji̧nö weinobe, jo̧kwaijayonö, batjo luwo̧ itji̧nö tjedenama, batjo otidadöma yötja̧lakwawinobe idödada: Bitema iteda abe'do woaja̧ okobe, abe'do otidaja̧ omudajibakwo̧, jo̧kwajabetjö̧ bitenö kwabö loditjö̧ma, biyu öbatjoajayuma ökwödöda döbatjo baibakobe, jö̧ba̧lö omukwatakwawö yötja̧lakwawinobe.