Juan 8:37 - Dios Iwene

³⁷ Ina yöawinobe: —Chöwaisa. Ökwödöma Abrahamtjö tupadanö jojodöja. Ja̧danö, Abrahamtjö tupadanö jojodököbaduwijayonö ötjönö kwabö loköbaduwotö jö̧ba̧lö kwisakwaduwobe. Ötjö yötawi̧ a̧ja̧kwö kwo̧'wo̧ luwo̧nö kwöpöjödaduwobetjö̧ kwabö loköbaduwobö jö̧ka̧laduwobe.

Juan 8:37 Referans Kwoze

1 Corintios 2:14

Jau chömöledö, Dios O̧'wo̧ Luwo̧nö juna̧löködöma Dios O̧'wo̧ Luwo̧ iyi̧ma emöködö, tjedemi mikwa jwii̧ jawa jö̧ba̧lö. Jau chömöledö, jobadöma Dios O̧'wo̧ Luwo̧ iyi̧ tjedenama, inesö mikwawi̧ma wajwibadö, ja̧ jawa mikwawi̧ma Dios O̧'wo̧ Luwo̧ öba̧ja̧dawö̧tjokobetjö̧.

Romanos 9:7

Kwöwaisaduwa chömöledö, Abraham i̧tji̧muma, sule bakwo̧nöda itji̧kwinokobe Abrahamma, ¿jö̧tö? Jau chömöledö, Abrahamma Isaacnöbi, ju'wedönöbi itji̧kwinobe, ja̧danö jobadö okobe deinö tji̧tji̧munöbi tjitji̧kwinobe. Jo̧kwaijayonö, okobe deinö jobadönö yöa̧linokobe Diosma, Abraham i̧tji̧mu tupadanö jojodö jö̧ba̧löma. Okobe deinö Abrahamtjö 'yatjebinajayonö, jobadötjö sule ju'wedönöda Abraham i̧tji̧mu tupadanö jojodö jö̧ba̧lö yöa̧linobe Diosma, Isaac i̧tji̧mu tupadanö jojodönöda. Baikwö laebobe Dios iwene, Abraham i̧tji̧mu jawama: Ökwötjö tupadanö jojodöma, ajayinö yöbawö junö yötawinawö̧ma, Isaactjö 'yatjebakwedö, jö̧ba̧lö laebobe, Dios Abrahamnö yöawinama.

Juan 7:1

Jemi ikenama Jesús Galilea niji comunidadesda, ju'wi comunidadbi, ju'wi comunidadbi 'ya̧nö kweachinobe. Ja̧danö, Judea nijibe kwebachö i̧'yinokobe, jobe ju̧kwadö judío jojodötjö la'aka luwedöma jo̧banö kwabö lotjobö tjomukwatobetjö̧.

Juan 8:59

Jejenö yöawiawö̧ jwiinö tjölabinobe judío jojodöma Jesúsnöma. Jwiinö tjölabobetjö̧ inawiya emibö tjikwawo jö̧tja̧lijayonö, Jesúsma ju̧kwawibö laebinobe Dios ejutjöma.

Hechos 13:26

Ina yöbawijetö: —Chömöledö, Abrahamtjö tupadanö jojodöbi, ju'wedö Diosnö yebabinö ösödadöbi a̧ja̧kwaduwitjö. Diosma yöbawijetö iteda otiwa jawa wene, ji̧kwa wenema ökwödönö, Israel jojodönö.

Juan 8:43

Ina yöawinobe: —Ökwödöma ötjö yötawi̧ a̧ja̧kwö jwiinö kwöpöjödaduwobetjö̧ kwöwaisachibaduwokobe.

Juan 11:53

Ja̧danö, ja̧ möletjö tupakwö judío jojodö la'aka luwedöma Jesúsnö kwabö lotjakwa̧ma omukwata̧lö yötja̧lakwawinobe.

Juan 7:19

A̧ja̧kwaduwitjö. Damötjö Moisésma Dios wei̧ wȩyudijetö. Ja̧ iwȩyudinama ökwödö judío jojodö dö̧jobö weawa, Biya̧da ja̧bö dö̧jobö jo̧be, jö̧ba̧lö. Jo̧kwaijayonö ökwödöma jejenö okobe jwiinö ja̧bö kwö̧jaduwoböma waiya. Waekwobe. Okobe jwiinö Dios wei̧ Moisés iwȩyudinama ja̧dokobe. Jo̧kwaobetjö̧ ¿tajawedö kwabö loköbaduwobö jö̧ka̧laduwa ötjönöma, Itema Moisés weina ja̧bö̧kö̧, jö̧ba̧lö?— yöawinobe Jesúsma judío jojodönöma.

Juan 10:31

Jejenö yöawawö̧ judío jojodöma jwiinö tjölabinobe. Inawiya tjeminobe Jesúsnö tjikwawobö, ö'wöchinö baibanö.

Juan 8:6

Ja̧danö, tjo̧'wo̧ sulinö edö jejenö abebö tja̧ja̧kwinobe Jesúsnö, Wainö yöawojobö, Moisés weinadanömaökö dedo, jö̧ba̧lö. Wainö yöawobö tjösödinobe, Bitema sulabenö, jelobekwö yöbawo̧, jö̧ba̧lö, jwötjeba̧lakobetjö̧. Jo̧kwaijayonö Jesúsma, atadökönö nijakwö bȩbachibö iwȩyudinobe nijinö, ötö'anö.

Juan 7:25

Jesús jejenö yöawi̧ a̧ja̧kwö, Jerusalénnö ju̧kwadötjö ju'wedöma jö̧tja̧linobe: —Bitema kwabö lotjobö jö̧tja̧lökwe ¿jö̧tö?— jö̧tja̧linobe—.

Juan 5:44

Ja̧danö, ökwödöma ¿dakwö kwöwaisachibaduwobö ötjönöma? Ju'wi jawa kwisakwaduwobe. Jojodö ökwödönö tjösödi̧da, pjatjati̧da kwisakwaduwobe. Dios jawa, bakwo̧da Dios jwiinö otiwi̧ jawama kwisakwaduwokobe— yöawinobe Jesúsma judío jojodö la'aka luwedönöma.

Mateo 13:15

tjomukwati̧ma omukwatöködö batjibinobetjö̧, ja̧danö tjölakiyu tumachajawö̧ batjibinobetjö̧, ja̧danö tjöbajale yi̧batadö batjibinobetjö̧. Jejenö baibinökötjö̧ma, otiwanö tjedo jö̧tja̧lena, ja̧danö otiwanö tja̧ja̧kwo jö̧tja̧lena, ja̧danö otiwanö tjomukwato jö̧tja̧lena, ja̧danö sulabenö tjomukwati̧ kabatibö, ötjönö tjösödena, jejenö tjösödi̧tjö jobadö tjö'wöchi̧ otidö lotakobetjö̧, jö̧ba̧lö laebobe Isaías iwȩyudinama.

Juan 8:33

Jejenö yöawiawö̧: —¿Dakwö yöka̧laja̧daja? Ökwödöma nu'yö di̧batö tjödinawö̧danö la'akatjöda jö̧ködösa. Ökwödöma Abrahamtjö tupadanö jojodösa. La'akatjöda dö̧jokobe jelo̧ wei̧da a̧ja̧kwöma. ¿Dakwö yökawobe, Ökwödö kwuluwo̧duwi wei̧tjö lakebaduwinö bakibaduwakwedöja, jö̧ba̧lö?— jö̧tja̧liökwe:

Mateo 3:9

Omukwatökönaduwi, Aaa, Abraham i̧tji̧mu tupadanö jojodödobetjö̧, Dios lȩebököwö̧sa, jö̧ba̧lö. Abraham i̧tji̧mu tupadanö jojodö kwö̧jaduwi̧ma mikwawokobe, Dios lȩebi̧tjö kwö̧jibaduwoböma. Diosma isabenö Abraham i̧tji̧mu tupadanö jojodönö pjaatakobe, jo̧kwaijayonö ösöditjö̧ma, biwa inawiyatjö Abraham i̧tji̧mu tupadanö jojodönö otidena, jobadönö pjaatobö.

Juan 8:56

Kwa'dömine Abrahamma jwiinö o̧'wo̧ ösöwanö ji̧jetö ötjö böjȩkwö chichakwa̧ omukwatö. Ja̧danö, jwiinö o̧'wo̧ ösöwanö ji̧jetö ja̧ möle ötjönö edakwa̧ omukwatö— yöawinobe Jesúsma.

1 Juan 2:14

Ja̧danö böjanö yötawa ökwödö kwo̧'wo̧ luwo̧duwi okwanö da̧peachadönö, Isabenö ökwödöma Jesús, la'akatjöda ji̧nanö waisadöja, jö̧ba̧lö. Ja̧danö, böjanö yötawa ökwödö möayedö tjujuluwi̧danö kwo̧'wo̧ luwo̧duwi okwanö juluwadönö, Juluwadöja, jö̧ba̧lö. Ja̧danö yötawa, Dios yöawi̧ kwo̧'wo̧ luwo̧duwi okwanö ösödö 'ya̧döja, jö̧ba̧lö, böjanö wȩyudö. Ja̧danö, ökwödö juluwadönö yötawa, Sulabo̧ Awetjanö juluwinadöja, jö̧ba̧lö. Jau chi̧tji̧mu, ökwödönö yöbawö pjabatö chiwȩyuda böjama, tupakwö kwujuluwachibaduwobö.