Juan 7:37 - Dios Iwene

³⁷ Ja̧danö, pjiesta mölebiyatjö 'dö̧ibaji̧ möle, jwiinö mikwawi̧ möle Jesúsma jamatö labinö yöawinobe: —Ojwiyo o̧ti̧ tjöbö ja̧dönö jwöta, Ötjökwö ichaduwi kwowaduwo, jö̧ba̧lö.

Juan 7:37 Referans Kwoze

Isaías 55:1

Baikwö yöa̧lobe Diosma: A̧ja̧kwaduwi, okobe deinö o̧ti̧ tjöbadöma, chö̧jobekwö kwichaduwo, ojwiyo jȩmibe. Ja̧danö ökwödö balada jwibadöma, ichö kwakwawa emö kwukwaduwo. Ichaduwi, ubasobu o̧'do̧bubi, lechebi kwemaduwo, balada midökönö, mikwa jwiinö ichö kwemaduwo.

Juan 4:14

Jo̧kwaijayonö ötjö chiyobu owo̧ma yemidanöma ojwiyo owoböma o̧ti̧lö̧jökökwe, jo̧ba o̧'wo̧ luwo̧ okwanö ojwese'dodanö okwobetjö̧, ba̧kwȩlö̧jatebö ja̧kwawa okwe'dodanö— yöawinobe Jesúsma.

Juan 6:35

Jejenö atjebökwe: —Ötjödasa ba̧kwȩlö̧jatebö ja̧kwawa iyi̧ kwakwawama— yöawinobe—. Ötjönö ichibö ösödadöma a̧wi̧chi̧ tjöböbi la'akatjöda tjuju̧kwökakwedö. Ja̧danö, ojwiyo o̧ti̧ tjöböbi la'akatjöda tjuju̧kwökakwedö. Ja̧ a̧wi̧chi̧ tjöbö, ojwiyo o̧ti̧ tjöbö tjuju̧kwökakwedö, jö̧ba̧löma, tjo̧'wo̧ luwo̧ jawa wanekwachobe— yöawinobe Jesúsma.

Isaías 12:3

Ojwese'do otiwe'dotjö owö kwo̧'woduwi ösöwachibi̧danö, kwö̧jibaduwinö pjabato̧kwö dötewinö ja̧nö kwo̧'woduwi ösöwachibanö kwö̧jaduwakwedöja.

Apocalipsis 22:17

Ikenama Dios O̧'wo̧ Luwo̧ma, Obeja Itji̧danö Jo̧ ilekwo baibanö emakwujukwö Jesúsnö jwötjobe cha̧ja̧kwijatö, Baikwö ichi, jö̧ba̧lö. Ja̧danö, jojodönöbi jwöobe cha̧ja̧kwijatö, Ökwödöbi bi'ye yöawi̧ a̧ja̧kwadöma, Jesúsnö jwöbaduwi, Ichi, jö̧ba̧lö. Jejenö cha̧ja̧kwijatö. Ja̧danö, Dios O̧'wo̧ Luwo̧ma yöawijatö: —Bakwo̧ ojwiyo o̧tinö jo̧nö ojwiyo iyo̧sa, mikwa jwiinö, ba̧kwȩlö̧jatebö ja̧kwawa ojwiyoma— yöawijatö, Dios O̧'wo̧ Luwo̧ma.

Isaías 44:3

Jau chömöledö, kwiteboduwi niji kököijayonö, ojwiyo sa̧takwo̧sa, ja̧danö niji kököelö ö'wejenö ojwebiya lamatobö wetakwo̧sa. Ja̧danö ötjöda cho̧'wo luwo̧nö wetakwo̧sa, ökwödö kwitji̧mu tupadanö jojodönö pjaatakwo̧ baibanö, ja̧danö jwiinö otiwanö pjatatakwo̧sa kwitji̧muduwi tupadanö jojodönö.

Juan 4:10

Jejenö abebö ja̧ja̧kwökwe: —Ökwöma ötjönö akebobö jo̧be, ojwiyo chiyoböma— jö̧a̧linobe Jesúsma—. Diosma jwiinö otiwi̧ jawa iyobö jö̧ba̧lo̧. Ja̧ Dios iyi̧ma kwöwaisitjö̧ma, ja̧danö, ötjönöbi kwöwaisitjö̧ma, ötjönöda akebo jö̧ka̧lajena, Ojwiyo chowo iyitjö, jö̧ba̧lö— Jesús yöawinobe jobujunö—. Jejenö ötjönö akebajatjö̧ma ba̧kwȩlö̧jatebö ja̧kwawa ojwiyoma chiyochajena— yöawinobe Jesúsma Samaria jojosujunöma.

Apocalipsis 21:6

Tjo̧wi̧ta, okobe jwiinö 'dö̧ibajabe. Ötjödasa la'akatjöda ji̧nama. Ja̧danö, ötjödasa 'dö̧bibajö̧kö̧ma. Ötjöma ojwiyo o̧ti̧lö̧jökwenöma ojwiyo iyo̧sa, mikwa jwiinö, ba̧kwȩlö̧jatebö ja̧kwawa ojwiyoda.

Apocalipsis 22:1

Ikenama ángelma ötjönö ojwe i̧sebijatö. Jödötjö ojwiyoma, ba̧kwȩlö̧jatebö ja̧kwawa ojwiyo. Chedemi jödöma Dios ö̧belö, Obeja Itji̧danö Jo̧ ö̧belö labebö isuwödö. Yelösöda salödö, isa̧yu̧ jwiinö salöayu̧danö.

1 Corintios 12:13

Bakwo̧da, Dios O̧'wo̧ Luwo̧da okobe deinö bakwa'o Cristo iteba'o badibanö ujuninobe ökwödönöma chömöledö, judío jojodönöbi, judío jojodöböködönöbi, tjömöayedö batjibanö midö tjeminawö̧nöbi, tjömöayedöböködönöbi. Ja̧danö bakwo̧da, Dios O̧'wo̧ Luwo̧da okobe deinö do̧'wo̧ luwo̧nö tebachibö jamatinama chömöledö.

Juan 6:55

Ja̧danö, chiteba'oma isabenö kwakwawaobetjö̧ kwadöma ba̧kwȩlö̧jatebö ja̧kwawa tjujuna̧lakwedö. Ja̧danö, chökwösobuma isabenö owawobuobetjö̧, owadöma ba̧kwȩlö̧jatebö ja̧kwawa tjujuna̧lakwedö.

Mateo 11:28

Tupakwö yöawinobe Jesúsma, jojodönö: —Okobe deinö ökwödö me'dawachibadö, nöinö ömöki̧ jawa kwe'ewaduwajabetjö̧ me'dawachibadöma, chö̧jobekwö ichaduwi, ja̧danö kwö̧'wachaduwobö ja̧takwo̧sa.

1 Corintios 10:21

Jau chömöledö, baikwö wanedö yötawa: Ökwödö Duluwo̧ midawö woina omukwatö owadöma, sulabedö ángelesdönöbi ösödö kwowaduwoböma jwiobe chömöledö. Ja̧danö, ökwödö Duluwo̧ midawö woina omukwatö kwadöma, sulabedö ángelesdönöbi ösödö kwukwaduwoböma jwiobe chömöledö.

1 Corintios 10:4

Ja̧danö, okobe deinö bakobe Dios iyina ojwiyo tjowinobe, ¿jö̧tö? Jau chömöledö, okobe deinö inawatjö tjowinobe, ja̧danö jawa jobadökwö kweachinawama, Cristodainobe chömöledö.

Isaías 58:1

Baikwö yöawinobe Diosma: Labinö jwököbo tjo̧'omanö jwöbökönö, isabenö labinö jwököbo, trompeta labinö ökwöi̧danö, labinö jwöbeba̧lö yökawo ötjöda chömöledö Jacob itji̧mu tupadanö jojodönö, —Ökwödö ja̧bö kwö̧jaduwi̧ma sulabenö ja̧bö ju̧kwadöja, —jö̧ba̧lö.

Efesios 5:18

Ja̧danö, ju'wibi yöbawö wetaduwakwö chömöledö. 'Dukwachinöma kwowa̧laduwa. Owa̧lo̧ma o̧'wo̧ luwo̧nö omukwatökönö ju'wida sulabenö ja̧bö jo̧, okobe jwiinö ö̧ji̧ma. Wanedö yötawa chömöledö: Nio ojwiyo 'dukwachinö kwowa̧laduwa, ja̧da tupakwö kwuluwo̧duwi baibanö 'ya̧nöma. Dios O̧'wo̧ Luwo̧da ökwödö kwuluwo̧duwima, nio ojwiyo owa̧lakwawamaökö. Jo̧kwaobetjö̧ jo̧bada öba̧ja̧da̧lonö ja̧bö ju̧kwaduwi chömöledö.

1 Corintios 11:25

Ja̧danö, tjukwaja̧ ikena, dȩja̧'do̧ emibö, jobadönö wanedö yöawinobe: Bi'do̧sobutjö Diosma 'yayi̧ wene isabenö ja̧akwa̧ wene yöawobe, chökwösobu ebawakobetjö̧ Dios ja̧akwa̧ wenema. Ba̧kwȩlö̧jatebö biya̧ ökwödönö chi̧sebaja̧danö kwowaduwenama, ötjönö omukwatö kwowaduwo jö̧ba̧lö yöawinobe.

Juan 14:6

—Ötjödasa Dios ö̧jobekwö 'ya̧kwawa manama— yöawinobe Jesúsma—. Ja̧danö, ötjödasa jweinö yöbawo̧ma jweinö jo̧chobetjö̧. Ja̧danö, ötjödasa ba̧kwȩlö̧jatebö ja̧kwawa iyo̧ma. Ja̧danö, ötjöma Dios ö̧jobekwö 'ya̧kwawa manachobetjö̧, ötjönöda 'yo̧ma Dabe'do Dios ö̧jobekwö ichibakwo̧.

Juan 6:37

Ja̧danö, yötawaduwakwö. Chabe'do Dios ötjönö iyawö̧ jojodöma ötjökwö tjichibakwedö. Ja̧danö, ötjökwö ichibo̧nöma a'dewakwawö̧kö̧sa.

Juan 5:40

Jo̧kwaijayonö ötjönö edö kwöwaisachibaduwokobe, Jo̧bada, jö̧ba̧lö. Kwichibaduwokobe ötjökwö, ba̧kwȩlö̧jatebö ja̧kwawa kwujuna̧laduwoböma— yöawinobe Jesúsma judío la'aka luwedönöma.

Juan 1:23

—Ötjöma jojodö deobetjö jwöbeba̧lo̧sa, Duluwo̧ma juluwanö ichakwo̧. Jo̧ba ichakwa̧ma mana dotidaduwo jweinö ichakobetjö̧, jö̧ba̧lö. Jejenö yöbawö, Dios yöawi̧ yöbawo̧ Isaías yöawinadanö yöbawo̧sa— yöawinobe Juan Ojwenö Bu̧dato̧ma.

Isaías 55:3

Teada̧lönö a̧ja̧kwalö, chöjobekwö kwichaduwo chömöledö. Otiwanö kwa̧ja̧kwaduwo, tupakwö 'yaka̧laduwakobetjö̧. Jau, ötjönö kwa̧ja̧kwaduwitjö̧ma, ökwödökwö bakobe dösölö̧jinö dö̧jakwa̧ jawa yöbawö chujunocha, 'dö̧ibajökö ji̧ yöbawö junawama. Jau, damötjö Davidnö yöbawö chujunijatö, jwaikwöda 'dö̧bibajökönö jo̧banö ösödö chö̧jakwa̧ma, ja̧danö ökwödönöbi Davidnö yöbawö chujuninadanö yöbawö chujunena.

Isaías 40:6

Bakwo̧ iwene ökwöobe cha̧ja̧kwobe, —Jwöbeba̧li̧, —jö̧ba̧lö. A̧ja̧kwö abebö cha̧ja̧kwobe, —Taji jawa jwöteba̧lakwa̧da? —jö̧ba̧lö. Atebökwe, —Bö̧jȩ jojodöma meje'yedanö ichejekwadö, ja̧danö tjotiwi̧ma, mejetjö pokwi̧ o̧bubiyadanö ichejekwadö.

Juan 7:28

Ja̧danö Jesús, Dios eju okwa ja̧nö, jojodö tjomukwati̧ waisö labinö yöawinobe: —Isabenö ¿ötjönö kwöwaisaduwiji̧? Ötjö chitebo kwöwaisaduwiji̧, ötjö chichinemima?— abebö a̧ja̧kwinobe—. Ötjö chomukwati̧da ja̧tobö chichinokobe baima. Ötjöma Dios, isabenö jo̧ weinökwesa. Chedemi ökwödöma jo̧banö wajwiköbaduwobe— yöawinobe—.

Isaías 40:2

Dösölö̧jinö yöka̧lo chömöledö Jerusalennö ju̧kwadönö, jobadönö jwöbö yökawo: —Ölakwabikwawö kwö̧jaduwi̧ma ida̧ökö 'dö̧ibajabe. Ja̧danö sulabenö ja̧bö kwö̧jinaduwijayonö, Isabenö Jo̧ma ida̧ökö dötölatajanö ökwödönö lȩebajabe, ja̧danö kwusuladuwima söbebö loajabe, jö̧ba̧lö yöawobe.

Proverbios 8:3

Ja̧danö, comunidad teachakwawena ö'öbö ja̧nö jojodönöma, a̧ja̧kwaduwi, jö̧ba̧lö, jwöbuju.

Mateo 3:3

Damötjö Dios yöawi̧ yöbawo̧ Isaías yöawinama jo̧ba Juannö badekwachinobe, baikwö laebi̧ma: Jojodö deobetjö bakwo̧ jwöeba̧lakobe, Duluwo̧ma juluwanö ichakwo̧. Jo̧ba ichakwa̧ma mana dotidaduwo, jweinö ichakobetjö̧, jö̧ba̧lö laebobe.

Proverbios 9:3

Jemi ikenama jweinö omukwatö ja̧kwawa wanekwachujuma jömöayedö ya̧dönö webuju jejutjö labebö comunidad tjöekwemi mö nöchachibö ja̧nö jojodönö jwötjobö, baikwö:

Proverbios 8:1

Baikwö laebobe Salomón wanedö yöawina jawa, jweinö omukwatö ja̧kwawanö wanekwachujuma jojodönö yöbawö jwöbuju, jö̧ba̧lö: Jweinö omukwatö ja̧kwawa wanekwachujuma jojodönö jwöbö yöbawuju a̧ja̧kwaduwitjö, jö̧ba̧lö. Jobuju, di̧ya sulojobö jö̧ba̧lö̧, di̧ya otiwojobö jö̧ba̧lö waisujuma jojodönö jwöbuju, yötawi̧ma a̧ja̧kwaduwitjö, jö̧ba̧lö.

Proverbios 1:20

Salomón wanedö yöawinobe: Isuju, jweinö omukwatö ja̧kwawa wanekwachujuma jojodönö jwebebö yöbawuju. Jobujuma a̧petube ja̧nö, jojodö ko̧ko̧kwö ju̧kwadönö jweinö omukwatö ja̧kwawa jawa yöbawö jwöbuju. Ötjö jwebebö yötawi̧ a̧ja̧kwaduwi, jö̧ba̧lö jwöbuju.

Proverbios 8:17

Ju'wibi yöbawuju: Ötjö, jweinö omukwatö ja̧kwawa wanekwachujuma ötjönö ösödadönö ösödujusa. Ja̧danö, ötjönö isakwadöma isabenö ötjönö tjöbadekwajakwedö.

Mateo 5:6

Jwaikwöda sulabe jwii̧ Dios ösödi̧ jawa isakwadöma, isabenö tjo̧'wo̧ ösöwanö tjö̧jakwedö, Dios öba a'otjö sulabe jwibadö tjö̧jakobetjö̧.

Juan 4:11

Jejenö yöawoko jobujuma jö̧ja̧linobe Jesúsnö: —¿Dakwö waköbobö, waawa'do jwiköbobema? Be'doma möe'do. Ojwiyoma nijibeda okwobe—jö̧ja̧linobe Jesúsnö—. Ja̧ yöka̧laja̧ ojwiyo, ba̧kwȩlö̧jatebö ja̧kwawa ojwiyoma ¿Delö waköbenada?