Juan 16:7 - Dios Iwene

⁷ Isabenö yötawa, ökwödönö otiwanö baibakobetjö̧ chȩwa̧jocha. Chȩwa̧jökötjö̧ma Pjaatakwo̧ma ichökena. Jo̧kwaijayonö chȩwa̧jitjö̧ma jo̧bama ichobö wetena— yöawinobe Jesúsma öba̧ja̧di̧ waisachadönöma.

Juan 16:7 Referans Kwoze

Juan 14:26

Ja̧danö, chȩwa̧jabe okobema Dabe'do Dios, ötjö Chabe'doma ökwödönö weakobe jelo̧nö, ötjönö balekwo̧nö, Pjabato̧nöma. Jo̧bama Dios O̧'wo̧ Luwo̧. Ökwödönö okobe jwiinö öba̧ja̧da̧lakwo̧. Jo̧bama ötjö chöba̧ja̧dinabi kwomukwataduwobö pjaatakwo̧— yöawinobe Jesúsma—.

Juan 15:26

Jesúsma ina yöawinobe öba̧ja̧di̧ waisachadönö: —Ötjöma Pjabato̧nö wetakwo̧sa, Dios O̧'wo̧ Luwo̧nöma, ökwö kwö̧jaduwobekwö —yöawinobe—. Jo̧bama jweinöda yöbawo̧. Baikwö ichö ötjönö yöawakobe ökwödönöma.

Romanos 8:28

Jau chömöledö, Diosma isabenö ökwödönö pjabato̧. Jo̧bada ökwödönö jwöinobe, iteda ömöledö badibobö. Ja̧danö, jemi tupakwöbi iteda jwöinawö̧nö pjabato̧ chömöledö. Ina böjȩnö ja̧nö, döpöjödi̧ jawa baledobe, ¿jö̧tö? Ja̧danö, sulabe jawa baledobe ökwödönöma, usula demawinö, ¿jö̧tö? Jo̧kwaijayonö, döpöjödi̧ jawa baledijayonö, ja̧danö sulabe jawa ökwödönö baledijayonö, okobe jwiinö ja̧ jawa balewö lobo̧ Diosma, ökwödönö pjaati̧ jawa baibanö. Jau chömöledö, ökwödö Diosnö ösödadöma, jo̧bada jwöinawö̧sa, iteda ömöledö badibobö. Ja̧danö, iteda ösödi̧danöda jwöinobe ökwödönöma chömöledö.

Hechos 2:33

Jo̧banöma mölejȩbe kaekwajinö ja̧bijetö Diosma, iteda öwaisobekwöchobe öbamatobö, la'aka inesö ö̧bena. Ikenama Diosma iyijetö iteda O̧'wo̧ Luwo̧nö Jesúsnöma, isabenö yöawinadanö. Jemi tupakwöma Jesúsma iyijetö Dios O̧'wo̧ Luwo̧nö ökwödönöma. Bena ju'wedö tjiwene wajwidijayonö yödawobe kwedaja̧duwabi, kwa̧ja̧kwaja̧duwabi Dios O̧'wo̧ Luwo̧, Jesús ökwödönö weajökwe ja̧aja̧— yöbawijetö Pedroma—.

Juan 7:39

Jejenö yöbawö Jesúsma Dios O̧'wo̧ Luwo̧nö yöawinobe, itenö ösödadö tjo̧'wo̧ luwo̧nö tebachibö öjamatakwo̧nöda. Ja̧danö, ina Dios O̧'wo̧ Luwo̧ma deinobe. Diosma, jobadö tjo̧'wo̧ luwo̧nö tebachibö öjamatobö ina weinokobe. Ina, jejenö weinokobe Diosma, Jesús kabekwachajö mölejȩbekwö ȩwa̧ji̧ ina badekwachokobetjö̧.

Lucas 24:49

Ja̧danö chömöledö, Chabe'do yöbawö ujuninadanö Dios O̧'wo̧ Luwo̧nö ökwödönö tebachibö öjamatobö wetakobe. Jo̧kwajabetjö̧ jo̧banö wetenanö kabatö, Jerusalénnö ja̧nö Dios O̧'wo̧ Luwo̧ ichakwa̧ te'ada̧lö kwö̧jaduwo. Ja̧danö, Dios O̧'wo̧ Luwo̧ ökwödönö tebachibö öjamataja̧ ikena, Dios ujulu kwujuna̧laduwakwedöja, otiwanö kwedinaduwa jawa böjȩ bakwameachibanö yökawaduwakobetjö̧— jö̧ba̧lö yöawinobe Jesúsma.

Hechos 10:34

Ikenama Pedroma yöbawijetö jobadönö: —Babema tjo̧wi̧ chöwaisachiba. Diosma okobe deinö, jelobe ju̧kwadönöbi jelobe ju̧kwadönöbi bakwaibedödanö bakwainö edo̧. Diosma Israel jojodönöbi ju'wedönöbi bakwainö ösödo̧.

Juan 14:28

Yötawaja̧, Tjo̧wi̧ chi̧'yakobe, jö̧ba̧lö, kwa̧ja̧kwaduwatö. Ja̧danö, kwa̧ja̧kwaduwatö, Yemidanö chichakwo̧sa, jö̧ba̧lö, yötawaja̧ma. Jejenö a̧ja̧kwö kwo̧'wo̧ tjo̧kekwibaduwatö. ¿Tajawedö kwo̧'wo̧ tjo̧kekwibaduwa? Ötjöma Chabe'do ö̧jobekwö chȩwa̧jakwo̧sa. Ötjönö ile nikebaduwitjö̧ma kwösödaduwena, Otiwanö ȩwa̧jakobe abe'do öjobekwö, jö̧ba̧lö. Yelösöda Chabe'doma ötjönötjö o̧penönö inesö jo̧. Ötjönö ile nikebaduwitjö̧ma kwösödaduwo jö̧ka̧laduwena chȩwa̧jakwa̧ omukwatö— yöawinobe—.

Juan 14:3

Jau, kwuju̧kwaduwakwa̧ omudawö chujunobö chi̧'yakobe yemidanö bai ichö, ökwödönö öbibö chitebobe chȩwa̧jobö, ökwödöma ötjö chö̧jobe kwö̧jaduwobö ba̧kwȩlö̧jatebö.

Lucas 9:27

Isabenö chujulu i̧sebö chichakobe 'dö̧ibaji̧ mölema chömöledö. Ja̧danö ju'wibi baikwö yötawaduwakwö: Ökwödö bena ja̧nö yötawi̧ a̧ja̧kwadötjö ju'wedö tjö̧jobe, wotjakwa̧ abönö ina yatja̧layi Dios la'aka luwo̧ ö̧jakwa̧ tjedakwedöma— jö̧ba̧lö yöawinobe Jesúsma.

Lucas 4:25

Ja̧danö, ötjö chujulu chi̧sebobö akebaduwi̧ma, baikwö yötawaduwakwö: Damötjö Elías ö̧jinena baledinadanö, ja̧danö Eliseo ö̧jinena baledinadanö ja̧kobe ökwödönö. Baikwö wanedö yötawa: Dios iwene yöbawo̧ Elías ö̧jina wene kwöwaisaduwa, wa̧pötakwa o̧biya ja'ö baledibanö Diosma mölejȩ utumatinobe, ojwiyo o̧bökönö, ¿jö̧tö? Jau, Israel niji bakwameachibanö jwiinö a̧wi̧chi̧ lö̧jinobe, ja̧danö Israel jojodötjö tji̧lȩkwa̧mu wobekwinadö ya̧döma ba̧jekwadö tjö̧jinobe usula emawö, ¿jö̧tö?

Juan 16:8

Ina yöawinobe: —Jo̧ba ichakwo̧ma Dios O̧'wo̧ Luwo̧. Jo̧bama böjȩnö ju̧kwadönö ichö jobadö tjo̧'wo̧ luwo̧nö öwaitjöda tjöwaisachibanö i̧sebakobe, Jojodöma sulabe juna̧ladö, jö̧ba̧lö. Ja̧danö, tjöwaisachibanö i̧sebakobe, Jojodöma Dios wei̧danö, jobadö suli̧ jwiinö tjuju̧kwobö wei̧danöma ju̧kwöködö, jö̧ba̧lö. Ja̧danö, jo̧ba ichakwo̧ma jojodö tjo̧'wo̧ luwo̧nö tjöwaisachibanö i̧sebakobe Dios lȩebakwa̧, Dios lȩebi̧tjö isabenö baledakobe sulabe juna̧ladönöma, jö̧ba̧lö.