Juan 15:6 - Dios Iwene

⁶ Ja̧danö, ötjökwö dötewinö jö̧ködöma ubasa'ba opjiya 'döbebö loawa opjiya kököachibi̧, emibö ökwölanö ubinö juwawakwa̧ opjiyadanö ja̧dö— yöawinobe Jesúsma öba̧ja̧di̧ waisachadönöma.

Juan 15:6 Referans Kwoze

Mateo 7:19

Jau chömöledö, sulabenö yöbawadöbi ja̧danö. Towinö wa̧ji̧ jawa edö kwöwaisaduwi̧danö, jobadö ja̧tji̧ edö kwöwaisaduwakobe jobadönö, otiwanö yöbawadö tjö̧jojobö, sulabenö yöbawadö tjö̧jojobö jö̧ba̧lö. Ja̧danö, sulabenö yöbawadönö isabenö lȩekwa ja̧kobe, baikwö wanedö yötawa: Okobe jwiinö suli̧ jawa wa̧ji̧owibiyama, jubö lobö tjujuwakwa̧owibiya— jö̧ba̧lö wanedö yöawinobe Jesúsma.

Juan 15:2

Ja̧danö, Chabe'doma ötjötjö wa̧jökemima 'dölö lobo̧. Jo̧kwaijayonö wa̧jemima ochobiya otiwanö wa̧jobö, ja'öda 'wibebö lobö otido̧, jwiinö otiwanö wa̧jobö. Ja̧danö, 'wibebö lobö otidobetjö̧ ajayinö wa̧jemitjö o̧penönö otiwanö wa̧jakobe.

Mateo 13:41

ötjö jojo baibanö jeminökwema chömöayedö ángelesdönö wetocha. Ja̧danö, jobadöma yöbawö wetena jojodötjö okobe deinö jojodö sulabenö ja̧tjobö ja̧badönöbi, okobe deinö ju'wedö sulabenö ja̧badönöbi ko̧ko̧dö,

Mateo 3:10

Dios lȩebakwa̧ma isabenö yöneawachibobe, baikwö wanedö yötawa: Sulabenö tjomukwati̧ kabatibö balewachöködöma, towi wa̧jokowidanö ichejekwadö, ja̧danö Dios lȩebakwa̧'a o̧to̧mö'ama, juluwanö wa̧jokowi la'aka jubö loakwa̧'a jo̧be. Ja̧danö, okobe jwiinö wa̧jokowibiyama, Diosma jubö lobö ökwölanö ujuwakobe— jö̧ba̧lö wanedö yöawinobe Juanma.

2 Pedro 2:20

Ja̧danö chömöledö, ju'wibi yötawaduwakwö, Isabenö Dios jobadönö lȩebobö jo̧be, jö̧ba̧lö. Jau chömöledö, jobadöma Duluwo̧ dö̧jibinö pjabato̧ Jesucristonö waisachibö, böjȩ jawa suli̧ waedakwawa ji̧tjö tjö̧jibinobe ichejekwa, jo̧kwaijayonö öpöjödö tjebachajö ajayinö sulabenö ja̧tjina ja̧tjobe, ja̧danö sulabenö tjösödi̧ma jobadönö juluwobe. Ja̧danö chömöledö, ajayinö sulabenö ja̧bö tjö̧jitjö o̧penönö sulabenö ja̧badö batjibobe.

Hebreos 10:27

Chömöledö, bakwo̧ Jesúsnö kabatibajo̧ sulabenö ja̧ena, ja̧ sulabenö ja̧i̧ma Diosma söbebö lookobe. Jo̧bama ju'wi möle Dios öba a'ö ja̧nö Dios labinö lȩbebö yöawi̧ a̧ja̧kwakwo̧, yelösöda. ¡Ayö! Diosma jwiinö ölabikobe jo̧banö, Jesúsnö kabatibö sulabenö ja̧bö jo̧nöma. Jo̧banö i̧sebakobe iteda jwiinö ölabi̧, ökwöla jwiinö tubi̧danö ölabi̧ma. Ja̧ Dios jwiinö ölabi̧ma jo̧ba öpöjojodönö juwö loakwola tubi̧danö ölabi̧. Chömöledö Dios jwiinö ölabi̧ma ¿ökwödönö i̧sekwobö dösödiji̧? Döpöjöda. Labobe yelösöda. Jo̧kwaobetjö̧ jweinö omukwatö Jesúsnö ösödö kwi̧'yaduwo, jo̧banö kabatibökönö.

Apocalipsis 20:15

Ja̧danö, jojodöma, ba̧kwȩlö̧jatebö ja̧kwawa juna̧ladö tjimi ba̧ja'ye okwa wȩyukwöködöma, joola, ökwöla ubola nöola okwa ba̧kwȩlö̧jatebö tjö̧jakwedö.

1 Juan 2:19

Ja̧danö, jobadö Cristo öpöjojodöma ajayi ökwödökwö ba̧nö Dios iwene a̧ja̧kwiabinadö. Jo̧kwaijayonö ökwödö Cristonö domukwati̧danö bakwainö omukwatöködö. Ja̧danö, jelobekwö tjomukwatobetjö̧ ökwödötjö 'da̧bachibö labebö kwebachadö. Chö̧ja̧wo̧dö ökwödödanö bakwainö Cristonö ösödö tjomukwatitjö̧ma ina ökwödökwö tjö̧jena. Jo̧kwaijayonö dö̧jelöma latjebinobetjö̧ döwaisachibijatö, Aaa, jobadöma isabenö ökwödödanö omukwatöködö Jesucristonöma, jö̧ba̧lö. Jesucristotjöma dö̧ja̧wo̧döböködö, jö̧ba̧lö, döwaisachibijatö.

Isaías 14:19

Jo̧kwaijayonö jobekwö baledökökweja ökwönöma, ökwönö o̧tjö̧könö, ikwö lotjökweja. Töwisötje mikwawökötje ikwö lotji̧danö ikwö lotjökweja, ja̧danö kwölöte'onö dȩdȩbö lotjawö̧kwö, laju okwa inawiya tjikwaju okwa ikwö lotjajabe, ja̧danö ja̧tö lotjinökwe iteba'o ichejekwo̧ja.

Diosnö ösödo̧ Job mikwo̧ usula emawina jawa 15:30

Isabenö tjöwaekwakwedö jobadö sulabedöma, la'akatjöda yȩa'wo okwatjö latjebökakwedö, baikwö wanedö yötawa: Towitjö yayinö ötjebiya pjewökachibobö jö̧a̧lenama, ökwöla juwö loakobe, ja̧danö 'yayi öjiya pjoawaja̧ma, jwa̧le'epjo e'ewö loakobe.

Mateo 27:5

Ikenama Judasma tjiyina balada jobe Dios eju okwa nijibe ikwö loinobe, ja̧danö jobetjö labebajo̧, nubawö ö'wö baibinobe.

Isaías 27:10

Jau, ditebotjö 'diinö tjöbebö dotidina comunidadma, jojodö deakobe. Tjejubiyabi deeju ja̧kobe, ja̧danö jojodö tjö̧jinemi pakayadö tjitji̧mu meje'ye tjukwakwedö, jobe bamatö towi öjiya tjukwakwedö, towi öjiyabi jwienanö baibanö.

Apocalipsis 21:8

Jo̧kwaijayonö jejenömaökö ju'wedönöma. Yebabinö, ¡Ayö! Diosnö chösöditjö̧ma inia tjötinö baledena, jö̧ba̧lö, yebabo̧danö yebabinadönöma otiwi̧ma chiyökakwo̧sa. Ja̧danö, Diosnö kabatibinadönöbi, ja̧danö, sulabedökwö pjabacha̧linadönöbi otiwa jawama chiyökakwo̧sa. Jobadönö ökwöla nöola okwa lotakwo̧sa. Ja̧danö, tji̧lȩkwa̧muböködökwö sulabenö ja̧binadönöbi, ja̧danö, jojodönö kwabö lobinadönöbi, ja̧danö, mea bobinadönöbi, ja̧danö, ju'wedö tjo̧'wo̧ tjöwana̧lobö tjotidinökwenö tjo̧'wo̧ wana̧linadönöbi, ja̧danö, bakwelajatebö omöna yöba̧linadönöbi, jobadönöma ökwöla nöola okwa lotakwo̧sa. Jobema jwiinö tubinö ubobe, azufre mikwi̧ tubi̧ma. Joola okwa lotji̧ma, 'dö̧ibaji̧ woawa mikwemi, jö̧ba̧lö weijatö Diosma ötjönöma, chiwȩyudobö.

2 Samuel 23:7

Ja̧danö jakajaye baledi̧danö baledakobe jobadö sulabedönö. Sȩaka juwö loakwo̧ma, 'dii jawatjö otikwa jawanö, palapinöö̧kö̧, otokwötenöö̧kö̧ sobö pukwebö, sȩaka ubinö juwö lobo̧, ja̧danö jejenö juwö loi̧danö, Diosma söbebö lobö lȩebakobe sulabedönö, —jö̧ba̧lö iwȩyudinobe Davidma, bajaleapo i̧wȩyudinama.