Juan 12:19 - Dios Iwene

¹⁹ Ja̧danö, ba̧jekwadö Jesúsnö edö tjichiawö̧, fariseo jojodöma yelösöda tjöpöjödinobe. Öpöjödö jö̧tja̧linobe: —Edi, ba̧jekwadö tjösödobe ite Jesúsnö, ökömanö 'ya̧nö. ¿Dakwö ja̧dakwajö jo̧bakwö tji̧'yokobö? Ja̧doböma yelösöda jwiobe— jö̧tja̧linobe.

Juan 12:19 Referans Kwoze

Hechos 17:6

Jo̧kwaijayonö Pablo, Silas debijadötö. Detjiawö̧ Jasónnöbi, ju'wedö Jesúsnö ösödadönöbi do̧batibö tötöbö 'yi̧jadötö la'aka luwedö tjuju̧kwobekwö. Jobe ichibö la'aka luwedönö labinö yöba̧lijadötö: —Duluwedö, belö ömadöma du̧ju̧taja tjichijatö baima. Jobadöma bai tjichakwa̧ abönö jelobebi, jelobebi 'ya̧jadö jojodö tjölakwabikwawinö yöbawinadö. Babema jelobe sulabenö yötjawinadanö yöbawö tjichijatö bemi comunidadnö.

1 Juan 2:2

Jo̧ba Jesucristoma ökwödö diminö imidawinobe dusula dumusidi̧ma sulabenö ja̧di̧ Diosma söbebö loobö. Ja̧danö chö̧ja̧wo̧dö, ökwödönödamaökö. Okobe deinö böjȩnö ju̧kwadönöda pjabatö imidawinobe Jesúsma, okobe deinö suli̧ ja̧tji̧ma söbebö loobö. Chö̧ja̧wo̧dö, Jesucristoda ökwödönö pjabato̧, suli̧ ja̧denama, Diosnö abebö, ja̧ suli̧ ja̧di̧ma söbebö loobö.

Juan 17:21

Chabe'do, ökwönö ateba okobe deinö böjȩnö ju̧kwadö ötjönö ösödadöma bakwaibedödanö batjibobö, bakwainö omukwatö. Ötjökwö, ökwökwö bakwainö omukwatadösa. Ja̧danö, bakwaibedösa ökwödöma. Ötjöma ökwödanö bakwainö jo̧sa. Ja̧danö, ökwöma ötjödanö bakwainö jo̧ja. Ja̧danö, jobadöbi, bakwaibedödanö batjibobö pjakato. Jejenö bakwaibedödanö tjö̧jitjö̧ma böjȩ jojodö tjomukwatakobe, Isabenö Diosma weinobe Jesúsnö, jö̧ba̧lö— aebinobe—.

Juan 3:26

Ikenama Juan ömöayedö yöba̧lakwawajadöma tjuluwo̧ Juan Ojwenö Bu̧dato̧ ö̧jobekwö 'ya̧wibö jö̧tja̧linobe: —Ba̧ja̧dakwawa jojo, belö, Jordán ojwe ö'öbötjö ökwökwö ji̧na, ökwö yökawinökwema, Biteda, jö̧ba̧lö, jojodönö ojwenö ubu̧datobe. Ba̧jekwadö jo̧ba ö̧jobekwö 'ya̧nö atjebobe ojwenö ubu̧datobö— jö̧tja̧linobe Juan Ojwenö Bu̧dato̧ ömöayedöma.

Isaías 27:6

Chömöledö, yadakwö baledakwa̧ma baikwö wanedö yötawaduwakwö, israel jojodö otiwanö tjö̧ja̧kwa̧ma: Jacobnö wanekwachowi towima, bö'diya otiwanö yutinö ja̧kwowi, ja̧danö israel jojodönö wanekwachowi towima otiwanö bo̧akobe, ja̧danö öjiyama otiwanö pjoawakobe, ja̧danö waji̧ma otiwanö wa̧jakwowi, waji̧tjö bö̧jȩ su̧'be baibenanö baibanö.

Mateo 21:15

Jejenö inesö otiwa jawa ja̧iawö̧, tjemuma Jesúsnö ösödö jwötjeba̧linobe: —Bite David itji̧ tupadanö jojonö dösödaduwo— jö̧ba̧lö. Jo̧kwaijayonö, Diostjö jojodötjö ö'weje pjabatadö la'aka tjuluwedöbi, Moisés iwȩyudina ba̧ja̧dadöbi Jesús otiwa jawa ja̧i̧ tjedenama, ja̧danö tjemu Jesúsnö ösödö jwötjeba̧li̧ tja̧ja̧kwenama, tjödameakwinobe,

Juan 12:18

Ja̧danö, jobe ju̧kwadötjö ju'wedöma ajayinö jejenö yötja̧lakwawina tja̧ja̧kwinobetjö̧ Jesúsnö edö tjichinobe.

Juan 12:20

Ja̧danö, Diosnö ösödö Jerusalénnö ichajadötjö ju'wedöma tjö̧jinobe, judío jojodöböködö.