Juan 11:55 - Dios Iwene

⁵⁵ Ja̧ mölema, judío jojodö pjiesta tjujunakwa̧ yöneawachinobe, Dios damötjö mönö öbaledina tjomukwati̧ pjiesta. Jo̧kwaobetjö̧ ba̧jekwadö judío jojodöma tji̧'yinobe Jerusalénbe tjotikwobö, Dios öba a'otjö otiwanö tjö̧jobö.

Juan 11:55 Referans Kwoze

Juan 12:1

Ja̧danö, Dios mönö öbaledina tjomukwati̧ pjiesta baledakwa̧ jelemutjö bakwöta möle abönö Jesúsma Betania comunidadnö ichibinobe. Betania comunidadma Lázaro, Jesús wobajaletjö yemidanö tjeatinökwe itebo.

Juan 6:4

Ja̧ mölema, judío jojodö pjiesta tjujuni̧ möle ida̧ökö yöneawachinobe, Dios mönö öbaledina omukwatö pjiesta mölema.

Juan 2:13

Ida̧ökö, judío jojodö, Dios damötjö, mönö öbaledina omukwatö pjiesta tjujuni̧ yöneawachobetjö̧ Jesúsma Jerusalénbe i̧'yinobe.

Éxodo 19:10

Ikenama Isabenö Jo̧ma webijetö Moisésnö: —Yemidanö yutubaji̧ jojodönö pjakato babe mölebi itekwayibi otiwanö tjotikwo, ja̧danö tjö̧kamisibi tjidicha̧lo.

Génesis 35:2

Jejenö weökwe Jacobma ömöledönö, ja̧danö okobe deinö jo̧bakwö ȩwa̧jadönö yöbawijetö: —Ökwödöma Betelbe dȩwa̧ja̧kobe, Diosnö ösödö. Jo̧kwaobetjö̧ dȩwa̧ja̧kwa̧ abönö okobe jwiinö jelobetjö o̧'wo̧ jawa kwichejebinawö̧duwi̧nöma loköbaduwobö jo̧be. ¡Loköbaduwodönö! Loköbaja̧duwa ikena ojwe kwibaduwo Dios öba a'otjö otiwanö dewadöda kwö̧jaduwobö. Kwibaja̧duwa ikena kamijido̧ balekwa̧do, dewado̧ 'dukawaduwo. Jemi ikenama Betelbe dȩwa̧jaduwo. Jobe ichibö juwö iyawemi chotidocha, Diosnö ösödö juwö iyawemima. Jo̧bama ajayinöma ötjönö pjaatinobe jwiinö cho̧'wo tjo̧bekwö, yebabinö chö̧jena. Ja̧ möletjö̧ babe möle ichibenanö jo̧bama ötjökwö jo̧, okobe jwiinö kwetachobema— yöbawijetö Jacobma.

Santiago 4:8

Ja̧danö chö̧ja̧wo̧dö, kwomukwataduwi̧ balewachö, böjȩ jawatjö 'da̧bachibö Diosnö tjekachajaduwo, kwo̧'wo̧ luwo̧duwi okwanö jo̧bakwö 'dötewinö ja̧nö. Ja̧danö, jo̧banö tjekachajaduwiökwe Diosma ökwödökwö 'dötewinö ö̧jobe. Chö̧ja̧wo̧dö, ökwödöma sulabenö ja̧bö ju̧kwadöja. Ja̧ sulabenö ja̧köbaduwi̧ kabatibö otiwanö ja̧bö kwö̧jaduwo. Yelösöda ökwödöma dötölatajanö omukwatadöja, Diosnö ösödöbi, böjȩ jawa ösödöbi. Ja̧ kwomajadeduwinö sulabenö kwomukwataduwi̧ma kabatibö otiwanöda kwomukwataduwo.

1 Corintios 11:28

Jo̧kwajabetjö̧, ökwödöma bakwo̧nökwena ökwödöda kwomukwataduwo, jweinö omukwatö kwukwojobö, kwowojobö jö̧ba̧lö. Jemi ikenama, ja̧ pan kwukwaduwo, ja̧danö kwowaduwo, Duluwo̧nö omukwatö.

Hechos 24:18

Jejenö Jerusalénnö ja̧nö, Dios eju a̧petu tebachajo̧nö tjedijatö bidöma, ötjönöma. Judío jojodö dichawajitjadanö, Dios öba a'otjö otiwanö tjö̧jobö dichawajitjadanö dichawajo̧nö tjedijatö bidöma, ötjönöma. Isabenö, jojodö ba̧jekwadö deobe tjedijatö ötjönöma, jojodö ölakwabikwawadöbi deobe. Ju'wedöbi, judío jojodö Asiatjö ichinadöma tjedijatö ötjönöma.

Juan 18:28

Ja̧danö, ju'wi dewachö judío jojodö la'aka luwedöma Jesúsnö öbibö tji̧'yinobe Caifás ejubetjö Roma la'aka luwo̧ Pilato ö̧jobekwö. 'Ya̧jadöma jobe ichibö judío jojodötjobetjö̧ Pilato, judío jojobö̧kö̧ eju okwa tetjachinokobe, sulabedö batjibapji jö̧ba̧lö. Judío jojodö pjiesta tjujuni̧ möle baibena tjukwakobetjö̧ tetjachinokobe, Dios öba a'otjö sulabedö batjibapji, jö̧ba̧lö.

Juan 13:1

Ja̧danö, Dios mönö öbaledina tjomukwati̧ pjiesta möle baledakwa̧ abönö möle yi̧bena baibena Jesúsma omukwatinobe, Tjo̧wi̧ böjȩtjö labebö Chabe'do ö̧jobe chȩwa̧jakwa̧ma lekwökö, jö̧ba̧lö. Jo̧bama iteda öba̧ja̧di̧ waisachadö batjibakwedönö ile nibebö ji̧ainobe, ajayinö ichinatjö tupakwö baibanö. Ja̧danö, jobadönö jwiinö ile niebi̧ma i̧sebö, midawö woakwo̧ Jesúsma.

Juan 5:1

Jemi ikenama, judío jojodö pjiesta tjujuni̧ möle baibobetjö̧ Jesúsma Jerusalénbe i̧'yinobe.

Juan 2:6

Ja̧danö, jobema o'diju jelemutjö bakwa'donö ji̧nobe, inawatjö otikwa o'diju. Judío jojodöma, suli̧ jwiinö batjibanö dichiatjinobe ja̧ o'dijunö ojwiyo okwi̧tjö, Dios öba a'o otiwanö babibadö tjö̧jobö. Ja̧ o'diju okwama jali̧. Yelösöda, cincuentabi, setentabi litros jenanö okwinö.

Marcos 14:1

Ina dötölataja möle jwiijetö pjiesta junö baledakwawa mölema. Ja̧ pjiesta, Dios damötjö Israel jojodö tjö̧jibinö pjabatö mö öbaledina omukwatö pjiestabi, pan 'ye'yeachökö kwakwawa pjiestabi ja̧kwama. Diostjö jojodötjö ö'weje pjabatadö tjuluwedöbi, Moisés iwȩyudina ba̧ja̧dadöbi kabatökönö omukwata̧lijadötö, ¿Dakwö ja̧dakwa̧da jojodö wajwitjonö Jesúsnö do̧batibö kwabö loawa wedoböma? jö̧ba̧lö.

Mateo 26:1

Jesúsma ja̧ jawa yöbawö kabatajo̧, iteda öba̧ja̧di̧ waisachadönö yöawinobe:

Diosnö ösödo̧ Job mikwo̧ usula emawina jawa 1:5

Jejenö ja̧biatjinobe Job itji̧muma, ja̧danö ba̧kwelöjatebö ba'ali tjujuni̧ mölebiya 'dö̧ibajenama, ikena möle ina yeayi a̧la̧ibinobe Jobma, ja̧danö itji̧mu bakwo̧nökwena tjusula dichö lootö jö̧ba̧lö, iyawa bakwonökwena kwabö juwö, jwiinö ubinö iyawa baibanö iyinobe Diosnö. Jobma omukwatinobe itedada, —Chitji̧muma Dios öpöjödi̧nö sulabenö ja̧tja̧jena, ja̧danö tjomajadenö sulabenö Diosnö tjomukwatajena, —jö̧ba̧lö omukwatinobe, ja̧danö jejenö omukwatö, iyawa kwabö juwö iyiainobe Diosnö, —Chitji̧munö tjusula söbebö loköbobö atebakwö, —jö̧ba̧lö.

1 Samuel 16:5

Atjebökwe, —Jau, wene jwia, Isabenö Jo̧nö kwabö juwö chichajabe. Ökwödöbi Diosnö iyawa ba'ali kwanö kwichaduwo, jo̧kwajabetjö̧ Dios öba a'o tjichibakwedö tjidichawi̧danö otiwanö wame jawa kwusuladuwi dichawö loköbaduwo, otiwanö Dios öba a'otjö ba'ali kwukwaduwakobetjö̧, —jö̧ba̧lö atadinobe Samuelma. Ja̧danö Samuelma Isainöbi, i̧tji̧munöbi wame jawa tjusula dichö loinobe, ja̧danö Diosnö iyawa ba'ali tjukwobö a̧debinobe.

Mateo 26:2

—Kwöwaisaduwa chömöledö. Dios damötjö Israel jojodö tjö̧jibinö mönö öbaledina jawa pjiestama, dötölataja möle baledibajena jamatakobe, ja̧danö ju'wibi yötawaduwakwö, ötjö jojo baibanö jeminökwenö iyö lotjakobe, ja̧danö ötjönö towisa'onö bȩbö tjönakobe— jö̧ba̧lö.

Lucas 22:1

Jesúsma Jerusalénnö ö̧jenama, judío jojodö pan 'ye'yeachö̧kö̧ kwakwawa ötjabi̧ pjiesta, ju'wi imi Dios Israel jojodö tjö̧jibinö mönö öbaledina pjiesta tjujunakwa̧ma yöneawachibinobe, ja̧danö yöneawachibobetjö̧ jojodö tjöba̧jekwachinobe.

Hechos 21:24

Babema ökwöma jobadökwö 'ya̧wi Dios ejube. Jobe 'ya̧jo̧ma jobadö tjidichawi̧danö, Dios öba a'otjö otiwanö tjö̧jobö dichawajitjadanö ökwöbi kwidichawo. Jejenö kwidichawaja̧ ikena, jobadö juwö tjiyawö̧nö kwimido. Jejenö, kwimidiökwema Dios eju otikwa luwo̧, Diostjö jojodötjö ö'weje pjabato̧ma jobadö ö'wejemu jojodö tjöwö'yema 'wiakobe. Ja̧ tjöwö'ye 'wiawama jojodönö i̧sebakobe, Bidöma Diosnö yöbawö tjujunina ja̧tjakwa̧ wenema tjo̧wi̧ ja̧bö katjatajabe, jö̧ba̧lö. Ökwöma jejenö juwö tjiyawö̧nö midö pjakatitjö̧ma ju'wedö judío jojodöma, ökwönö labidöma, edö tjomukwati̧ balewachö tjomukwatena, Edaduwi, Pabloma Moisés weina ja̧bö jo̧, jö̧ba̧lö. Ju'wedöma omöna yötja̧linena Pablonöma, jö̧ba̧lö, tjomukwatena. Ökwödöma jelobekwö domukwatajena Pablonöma, jö̧ba̧lö, tjomukwati̧ tjöbalewachena— yötjawijatö. Ina yötjawijatö: —Pablo, ökwöma judío jojoja. Moisés weina ja̧bi babema, judío jojodönö i̧sebö, ökwöma Moisés weina kwöpöjödokobe.

Hechos 21:26

Jejenö lȩtjebiökwe Pabloma: —Jau, lȩköbaduwi̧ma ja̧tocha— jö̧a̧lijatö. Jo̧kwaobetjö̧ ju'wi dewachö Pabloma jobadö ö'wejemu jojodökwö, Diosnö isabenö ja̧tjakwa̧ yöbawö juninadökwö 'yi̧jetö idichawobö, judío jojodö Dios öba a'otjö otiwanö tjö̧jobö dichawajitjadanö. Tjidichawi̧ mölebiya ina 'dö̧ibajökena, Pabloma Dios eju a̧petube tebachö yöbawijetö jeju ö'wöje pjabato̧nö tjidichawi̧ katjatakwa̧ mölema. Jo̧banö yöbawijetö: —Ja̧ mölema jobadö Diosnö yöbawö juninadöma, bakwo̧nökwena juwö tjiyakwedö, Diosnö ösödö. Ötjöda jobadö juwö tjiyawö̧nö chimidocha— yöbawijetö Pabloma.