Josué 3:4 - Dios Iwene

⁴ Babe di̧'yakwa̧ma, la'akatjöda edajiköbaduwokobe di̧'yakobe, jo̧kwajabetjö̧ Dios iteapjo ökömanö lukibaduwo, kwi̧'yaduwakwa̧ma kwöwaisaduwakobetjö̧. Jo̧kwaijayonö, ökömanö 'ya̧nö, Dios iteapjo yöne kwichibaduwobö jwiobe, ödö, bakwöta kilometro jenanö ödökwönönö lukibaduwobö jo̧be, jo̧kwajabetjö̧ teada̧lönö kwö̧jaduwo, yöne kwichibaduwapji jö̧ba̧lö, —jojodönö webö yötjawinobe luwedöma.

Josué 3:4 Referans Kwoze

1 Crónicas 11:2

Isabenö ökwöda duluwo̧ kwö̧jobö jo̧be David, baikwö yöda̧la: Damötjö Saulmine duluwo̧ ö̧jayibi, ökwöda ökwödötjö ölakwabikwawa jojodönö ökibijatö, döpöjojodönö dujuluwobö. Ja̧danö ökwönöda yöbawö ujuninobe Isabenö Jo̧ma, –Chömöledö israel jojodönö öbibö kwiteada̧lakwo̧ja, ja̧danö chömöledö israel jojodö la'aka tjuluwo̧ kwö̧bakwo̧ja, –jö̧ba̧lö ökwönöda yöbawö ujuninobe. Jo̧kwajabetjö̧ isabenö inesö la'aka duluwo̧ kwö̧jobö jo̧be, —jö̧ba̧lö Davidnö yötja̧linobe.

Éxodo 3:5

Ikenama Isabenö Jo̧ma jö̧ba̧lijetö: —Moisés baikwö yö̧nema ichibökönuwi. Ötjöma Dioschobetjö̧ bemi niji kwö̧jatemima wainöemi, ötjö chö̧jemima. Jo̧kwaobetjö̧ sapatu yo̧bekwi, ötjönö jweinö omukwatö— jö̧ba̧lijetö.

Éxodo 19:12

Ja̧danö, Moisés mö'ösa'o la'akanö tjökebo jojodö tjöbaledibapji jö̧ba̧lö. Ja̧danö, yökawodönö mö'ösa'o la'aka yö̧nema tjichiboko, ja̧danö nöchöbi tjönöchoko, maböbi matjoko mö'ösa'oma. Bakwo̧ mö'ösa'o la'aka mabo̧nöma kwabö loköbaduwobö jo̧be.

Éxodo 4:10

—Chuluwo̧ jweinö yöta̧lakwö: Ötjöma otiwanö yöba̧lö̧kö̧sa jojodönöma. Ajayinö chöbötjachinemi baikwö yemidawo̧sa. Ja̧danö ina, babebi yöka̧lajemitjö̧ tupakwöbi ja̧danö. Juluwanö yöba̧lökösa, dakwö yöta̧lajö, jö̧ba̧lö. Wajwibo̧sa— jö̧ba̧lijetö Moisésma Isabenö Jo̧nöma.

Génesis 31:2

Ja̧danö, Jacobma öjaba Labánnö edö waisachibijetö, Chedemi chöjabama belö ötjönö ösödiainajayonö babema jwiinö öpöjöda ötjönöma, jö̧ba̧lö.

Isaías 30:33

Wanedö yöta̧la: Damötjö Asiria la'aka luwo̧nö juwö loakwemi omudawö ujuninobe Diosma, jalemi ja̧danö da̧kwemi juwö loakwemima, ja̧danö ida̧ökö imi jobe ujunajabe, nöinö imi ko̧ko̧dajo̧ ujunajabe. Ja̧danö, jobe junajo̧, inesö ubinö ubola nötedö pjuakwo̧ Isabenö Jo̧ma, Asiria la'aka luwo̧nö lȩbebö juwö loakobetjö̧.

Josué 3:3

—Duluwo̧ Isabenö Jo̧ Dios iteapjo, Dios wei̧ wȩyukwa öbiya döbölataja a̧ja̧pjoma, kabebö tje'ewakobe Levita jojodö Diostjö jojodötjö tjö̧'da̧de pjabatadöma. Jejenö kabebö tje'ewi̧ kwedaduwenama, ökwödöbi a̧la̧ibö ökömanö kwi̧'yaduwo.

Josué 3:5

Ja̧danö Josuema jojodönö weinobe, —Isabenö Jo̧ öba a'o tjichibakwedö tjidichawi̧danö, wame jawa kwusuladuwi babe dichawö loköbaduwo, itekwayi möle Isabenö Jo̧ma kwö'da̧deduwitjö kwöbajaleduwi jalaka baibanö iteda ujulu i̧sȩbakobetjö̧, —jö̧ba̧lö weinobe.

Isaías 48:17

Isabenö Jo̧, ökwödönö tjöbeba̧lö pjabato̧, Israel jojodö dösödökwe Suli̧ Jwibo̧ Diosma baikwö yöawobe ökwödönö: Ötjöma kwösödaduwökwe Isabenö Jo̧ Diossa. Ötjöda ökwödönö ba̧ja̧dö pjabato̧ma, otiwanö ja̧kwawa kwöwaisachibaduwakobetjö̧. Ja̧danö ökwödönö jwebebö öbibo̧ma ötjödasa, kwi̧'yaduwo jö̧ka̧laduwi̧danö otiwanö kwi̧'yaduwakobetjö̧.