Josué 24:19 - Dios Iwene

¹⁹ Tjatadökwe, Josuema jobadönö yöa̧linobe, —Chömöledö, chedemi Isabenö Jo̧ Diosnö dösödakwedösa jö̧ba̧lö yöka̧laduwaja̧ma waekwena. Isabenö Jo̧ Diosma jwiinö suli̧tjö 'da̧bachibö jo̧, ja̧danö sulabenö ja̧köbaduwitjö̧bi, Dios wei̧ öpöjödö kakataduwitjö̧bi, isabenö ökwödönö lȩebakwo̧. Jau chömöledö, kwuluwo̧duwi Diosma, kwösödaduwi̧ a̧'dȩlo̧, itenöda kwösödaduwo, ja'yubebi ju'wedö tjösödawö̧nö kwösödaduwoko, jö̧ba̧lö.

Josué 24:19 Referans Kwoze

Isaías 5:16

Jo̧kwaijayonö, bö̧jȩ jojodö ajayitjö nijakwönönö jo̧kwadabedö batjibonö, möakwö inesö otiwanö tjomukwatökwe baibanö ö̧jakwo̧ Isabenö Jo̧ Okobe Jwiinö Juluwo̧ Diosma. Jau, sulabedönö lȩbebö, inesö suli̧ jwibo̧ Diosma i̧sȩbakobe, inesö suli̧ jwibo̧ ö̧jima, jadanö jejenö i̧sȩbiawö̧ tjösödakwedö Diosnö, —Isabenö suli̧ jwibo̧, lȩebo jö̧a̧lidanö lȩbebo̧ Diosma, —jö̧ba̧lö.

Éxodo 23:21

Jo̧ba ángelso̧ wei̧ ö'wiyawakwalö̧jinö kwa̧ja̧kwaduwo. Jelobekwö kwomukwataduwoko, jo̧ba wei̧ a̧ja̧kwökönö, ötjö weti̧da webo̧obetjö̧. Jo̧ba wei̧ kwa̧ja̧kwaduwökötjö̧ma jwiinö ölabikobe ökwödönöma.

Éxodo 20:5

Ja̧jaye otikwa tjöba a'otjö kwöbaduwi bȩbachibö nijakwö kwuuduwinö kwösödaduwoko ötjöda Isabenö Jo̧chobetjö̧, Kwösödaduwökwe Dioschobetjö̧. Ile nibebo̧sa ökwödönöma, Ötjönöda kwösödaduwo, jö̧ba̧lö. Isabenö, o̧'wo jawa ösödadönöma lȩtebakwo̧sa, ja̧danö jobadönödamaö̧kö̧, ba̧kwȩlö̧jatebö̧ lȩtebakwo̧sa jobadötjö tupadanö jojodönöbi. Jao, ötjönö öpöjödö o̧'wo jawa ösödadö tji̧tji̧munöbi, tjö̧'dö̧dönöbi, ja̧danö tjö̧'dö̧dö tji̧tji̧munöbi, ja̧danö tupakwö, tjö̧'dö̧dö tjö̧'dö̧dönöbi lȩtebakwo̧sa.

1 Samuel 6:20

Ikenama Betsemesnö ju̧kwadöma yebabinö yötja̧linobe, —Isabenö bakwo̧bi deobe, Isabenö Jo̧ , bite suli̧ jwibo̧ Dios öba a'o jo̧ma. Dai wedakwa̧da jo̧ba iteapjo isapjoma, ökwödö ditebonö jo̧bö jwiobe jö̧ba̧lö.

Éxodo 34:14

Ötjönö, Isabenö Jo̧nöda kwösödaduwo, ju'wedö tjo̧'wo jawa tjöwa̧na̧lawö̧nö kwösödaduwoko. Ötjö chimima, ö'wiabinö edo̧ Diossa, jö̧ba̧lö. Jo̧kwaobetjö̧ ötjönöda kwösödaduwobö weta.

Mateo 6:24

Tupakwö yöawinobe Jesúsma: —Chömöledö, du̧ju̧taja tjömöayedö kwö̧jaduwoböma jwiobe. Du̧ju̧taja tjömöayedö kwö̧jaduwitjö̧ma, kwuluwo̧ bakwo̧nö kwösödaduwonö, jelo̧nö kwöpöjödaduwena, ja̧danö bakwo̧ wei̧ ja̧bö kwö̧jaduwonö, jelo̧nö kwöpöjödaduwena, mikwawö̧kö̧ jö̧ba̧lö. Jau chömöledö, jwaikwöda balada kwemaduwotö jö̧ba̧lö kwisakwaduwitjö̧ma, balada kwemobö kwösödi̧ ömöayedödanö kwö̧jaduwena. Ja̧danö, balada kwemobö kwösödi̧ ömöayedöbi, Dios ömöayedöbi kwö̧jaduwoböma jwiobe. Jau chömöledö, balada kwemaduwotö jö̧ba̧lö isakwö kwö̧jaduwitjö̧ma, Dios wei̧ ja̧bö kwö̧jaduwi̧ma waekwakobe.

Isaías 30:15

Jobekwö isabenö baledakwawö̧ja chömöledö, Dios yöawi̧ kwöpöjödinaduwobetjö̧. Jau chömöledö, Isabenö Jo, Israel jojodö tjösödökwe Sulabe Jwibo̧ Diosma ökwödönö yöawinobe, —Sulabenö kwomukwataduwi̧ kabatibö, tjebachajö ötjönö kwo̧'wo kwöwana̧laduwitjö̧ma, kwö̧jibaduwakwedöja. Kwujuluduwi̧ma, ökwödöda jawamaökö, wi̧inö ja̧nö, ötjönö ösödö kwo̧'wo kwöwana̧laduwitjö̧ma, ja̧ kwösödaduwi̧da kwujuluduwi̧danö ja̧kobe, —jö̧ba̧lö yöawinobe. Jo̧kwaijayonö yöawi̧ a̧ja̧kwajadö, kwösödaduwoböma öpöjödinadöja chömöledö.

Isaías 30:11

–Di̧'yama manatjö labebaduwi, jweinö dösödi̧danö di̧'yakobetjö̧, Israel jojodö tjösödökwe Sulabe Jwibo̧ Diosnö da̧ja̧kwobö döpöjöda, jo̧ba yöawi̧ yökawi̧ma kabatibi, –jö̧ba̧lö sulabenö webadö, jobadönö yötawi̧ tjaja̧kwapji jö̧ba̧lö.

1 Samuel 3:14

Jau Samuel, jejenö sulabenö ja̧tji̧tjö, jo̧banö yöbawö chujunajabe, Eli ömöledö sulabenö ja̧tji̧ma, la'akatjöda söbebö loawa jwiakobe jö̧ba̧lö, kwabö juwö tjiyitjö̧böbi, ju'wi iyawa tjiyitjö̧böbi la'akatjöda tjusula söbebö loawa jwiakobe ba̧kwelöjatebö, —jö̧ba̧lö yöawinobe Isabenö Jo̧ma Samuelnö.

Josué 24:23

Tjatadökwe, Josue yöa̧linobe, —Isabenö Jo̧nö kwösödaduwobö omudawö kwujunaduwitjö̧ma, ju'wedö tjösödawö̧ o̧'wo jawa kwö̧'da̧deduwinö ja̧dönö ikwö loköbaduwo. Ja̧danö, jwaikwöda Isabenö Jo̧ israel jojodö duluwo̧ Diosnöda kwösödaduwobö kwisakwaduwo, jo̧ba wei̧da a̧ja̧kwö, —jö̧ba̧lö.

Isaías 27:11

Towi ötjebiya kököbachibö 'debawö meakobe, ja̧danö ya̧döma ko̧ko̧dö tjichakobe, imi baibanö tjujuwobö. Jobekwö baledakobe ditebo israeltjö, dömöledö israel jojodöma okwa jawa omukwatökönö tjö̧jobetjö̧. Jau, jweinö omukwatökönö, Dios wei̧ a̧ja̧kwöködö israel jojodöma, jo̧kwajabetjö̧ ökwödönö otidina Diosma lȩlöjinö edökakwo̧, ökwödönö dadö otidinama, dösölö̧jinö pjaatökakwo̧ ökwödönö.

Éxodo 34:7

Ja̧danö, jojodönö ile nitebakwo̧sa ba̧kwȩlö̧jatebö, balewachökönö. Ja̧danö, jojodö tjusuli̧ma söbebö lotakwo̧sa, okobe jwiinö sulabenö omukwatö ja̧tji̧ma. Jo̧kwaijayonö jojodöma sulabenö ja̧tjenama jobadönö lȩtebakwo̧sa. Ja̧danö, jobadönödamaö̧kö̧ lȩtebakwawö̧, jobadö sulabenö ja̧tji̧ mikwawama tji̧tji̧munöbi, tjö̧'dö̧dönöbi, tjö̧'dö̧dö tji̧tji̧mu̧nöbi lȩtebakwo̧sa— yöba̧lijetö Isabenö Jo̧ma Moisésnöma.

Josué 24:18

Ja̧danö Isabenö Jo̧ Diosda okobe deinö bemi nijinö ju̧kwinadö, amorreos jojodönö döba a'otjö a'dewö lobinama, jo̧kwajabetjö̧ ökwö kwösödi̧danö, ökwödöbi bakwainö Isabenö Jo̧ wei̧ a̧ja̧kwö, jo̧banö dösödakwedösa, jo̧bada duluwo̧ Diosobetjö̧, —jö̧ba̧lö tjatadinobe israel jojodöma.

Isaías 2:9

Jobekwö sulabenö ja̧tjiökwe, mikwawöködö batjibanö webo̧ Diosma, okobe deinö nijakwönönö meatö lobo̧ jobadönö, taba lö̧jawö̧ tjö̧jakobetjö̧. Chuluwo̧ Dios, jobekwö o̧'wo jawa ösödadönö meatö loköbobö otiwa, jobadöjayedönö lȩlöjinö edökönö, jweinö lȩkebodönö chuluwo̧ Dios.