Josué 23:11 - Dios Iwene

¹¹ Jo̧kwajabetjö teada̧lönö kwö̧jaduwo chömöledö, jwaikwöda kwuluwo̧duwi Isabenö Jo̧ Diosnö ösödö kwö̧jaduwakobetjö̧.

Josué 23:11 Referans Kwoze

Josué 22:5

Ja̧danö, kwiteboduwibe kwȩwa̧jaduwenama, ö'wiyakwawönö omukwatö kwö̧jaduwo, jwaikwöda Isabenö Jo̧ ömöayo̧bina Moises ökwödönö webö ö̧ba̧ja̧dinadanö ja̧bö kwö̧jaduwakobetjö̧. Jau chömöledö, Moises weinadanö, jwaikwöda kwuluwo̧duwi Isabenö Jo̧ Diosnö ösödö kwö̧jaduwo, jwaikwöda okobe jwiinö jo̧ba ösödi̧danö ja̧bö kwö̧jaduwo, okobe jwiinö jo̧ba wei̧ a̧ja̧kwö kwö̧jaduwo. Isabenö Jo̧nö ösödö, 'diinö kwö̧jaduwo, ja̧danö wamenöbi, okwanöbi jwaikwöda jo̧banöda ösödö kwö̧jaduwo, wei̧ a̧ja̧kwö, —jö̧ba̧lö weinobe Josuema, Rubensaso jojodönöbi, Gadsaso jojodönöbi, Manasessaso ja'ö jojodönöbi.

Romanos 8:28

Jau chömöledö, Diosma isabenö ökwödönö pjabato̧. Jo̧bada ökwödönö jwöinobe, iteda ömöledö badibobö. Ja̧danö, jemi tupakwöbi iteda jwöinawö̧nö pjabato̧ chömöledö. Ina böjȩnö ja̧nö, döpöjödi̧ jawa baledobe, ¿jö̧tö? Ja̧danö, sulabe jawa baledobe ökwödönöma, usula demawinö, ¿jö̧tö? Jo̧kwaijayonö, döpöjödi̧ jawa baledijayonö, ja̧danö sulabe jawa ökwödönö baledijayonö, okobe jwiinö ja̧ jawa balewö lobo̧ Diosma, ökwödönö pjaati̧ jawa baibanö. Jau chömöledö, ökwödö Diosnö ösödadöma, jo̧bada jwöinawö̧sa, iteda ömöledö badibobö. Ja̧danö, iteda ösödi̧danöda jwöinobe ökwödönöma chömöledö.

Proverbios 4:23

Ja̧danö, ju'wibi yötawakwö chitji̧: Kwomajadenö kwomukwati̧ma ö'wiyawakwawönö kwite'ada̧lakwawo sulabenö kwomukwatapji jö̧ba̧lö. Chitji̧, kwomajadenö otiwanö kwomukwatitjö̧ma otiwanö kwö̧jakwo̧ja. Jo̧kwaijayonö kwomajadenö sulabenö kwomukwatitjö̧ma sulabenö omukwatö kwö̧jakwo̧ja. Isabenö chitji̧, kwomajadenö kwomukwataja̧ma kwite'ada̧lobö jo̧be, otiwanö jweinö kwomukwatakobetjö̧.

Hebreos 12:15

Jejenö ja̧nö, ökwödödada kwite'ada̧laduwo ökwödötjö bakwo̧bi Diosnö sulabenö omukwatö kaatibapji jö̧ba̧lö, jo̧ba jwiinö otiwi̧ pjaati̧ma öpöjödö. Jejenö omukwatö jo̧ma labo̧, Diosnö o̧'wo̧ sulinö edö. Ja̧danö, ja̧ sulabenö edi̧ma jo̧ba okwatjöda laebobe, ö̧ja̧wo̧dönö yöawi̧danö yöbawö. Jejenö jo̧bama ö̧ja̧wo̧dönö jelobekwö öbibo̧, jobadöbi labidö batjibanö, jo̧ba sulabenö omukwati̧danö sulabenö tjomukwatobö. Chömöledö, ökwödödada tjöbeba̧lö̧jönö kwite'ada̧laduwo ökwödötjö bakwo̧ jejenö sulabenö omukwatapji jö̧ba̧lö, ju'wedönö jelobekwö tjomukwatobö öbibö.

1 Corintios 16:22

Duluwo̧nö ösödö̧kö̧ma, Dios lȩebakwo̧ jo̧bama. Duluwo̧ Jesúsnö ateba, Chuluwo̧ juluwanö ökwödönö emö kwicho jö̧ba̧lö.

1 Corintios 8:3

Jo̧kwaijayonö Diosnö ösödo̧ma, Dios öwaisökwe ö̧jobe jo̧bama.

Éxodo 20:6

Jo̧kwaijayonö ötjönö ösödadötjö, ötjö weti̧ a̧ja̧kwadötjö tupadanö jojodönöma, ba̧kwelö̧jatebö balewachökönö chösödakwo̧sa.

Efesios 5:15

Jo̧kwaobetjö̧ chömöledö kwo̧'wo̧ luwo̧duwi okwanö otiwanö omukwatö jweinö 'ya̧duwi. Ökwödöma Dios iwene kwöwaisaduwobe. Jo̧kwaobetjö̧ ju'wedö Dios iwene wajwibadö tjuju̧kwi̧danöma kwuju̧kwaduwa.

Lucas 21:34

Tupakwö yöawinobe Jesúsma: —Wanedö yötawa: Te'ada̧lönö eda̧lö kwö̧jaduwo chömöledö, böjȩ jojodö tjösödi̧ jawama ökwödönö ömökapji jö̧ba̧lö. Jau chömöledö, nöinö pjiesta junö, ja̧danö nio ojwiyo owa̧lö, ja̧danö böjȩnö kwö̧ja̧duwi̧ omukwatö kwö̧jaduwitjö̧ma, yemidanö chichakwa̧ kwomukwataduwökena, ja̧danö chichakwa̧ te'ada̧lökönö kwö̧jaduwonö, juluwanö ja̧ möle baibena.

Deuteronomio 4:9

Tupakwö yöawinobe Moisesma, israel jojodönö: —Teada̧lönö kwö̧jaduwo chömöledö, ökwödö kwedinaduwa jawama kwo̧'wo jwikibaduwapji jö̧ba̧lö. Jau chömöledö, ba̧kwelöjatebö kwo̧'woduwi jwibibökönö, ina kwö̧jaduwayi ja̧ jawa omukwatö kwö̧jaduwobö jo̧be, ja̧danö kwitji̧muduwinöbi, kwö̧'dödöduwinöbi yökawaduwobö jo̧be, jobadöbi ba̧kwȩlöjatebö omukwatö tjö̧jakobetjö̧.

Deuteronomio 4:15

Tupakwö yöawinobe Moisesma, israel jojodönö: —Chömöledö, ja̧ möle Isabenö Jo̧ Sinai mösa'otjö yöawina möle kwomukwatibaduwo. Ja̧ möle ökwöla okwatjö Isabenö Jo̧ ökwödönö yöawenama, iteba'o kwedinaduwokobe, sule iwene ökwöi̧da kwa̧ja̧kwinaduwobe, jö̧tö? Jo̧kwajabetjö̧ ja̧ jawa omukwatö, teada̧lönö ja̧nö kwö̧jaduwo,

Josué 23:10

Jau chömöledö, iteda yöbawö ujuninadanö, kwuluwo̧duwi Isabenö Jo̧ Diosda döpöjojodönö ölakwabikwawobetjö̧, ökwödö israel jojodötjö bakwo̧da döpöjojodö milbedönö a'dewö loena. Jau, isabenö juluwadöja chömöledö, Diosda ökwödönö pjaatobetjö̧.

Josué 23:12

Jau chömöledö, isabenö Diosnö ösödö kwö̧jaduwobö jo̧be, baikwö yötawaduwakwö: Diosnö ösödö kwö̧jaduwi kabatibö, bemi nijinö ji̧nadötjö ji̧bajadökwö bakibaduwitjö̧ma, jobadötjö kwilekwamu batjibanö kwemaduwitjö̧ma, isabenö kwö̧jaduwima waekwakobe chömöledö.

Deuteronomio 30:16

Yötawaja̧danö yemidanö yötawaduwakwö: Kwuluwo̧duwi Isabenö Jo̧ Dios wei̧, babe ökwödönö yötawi̧ jawa a̧ja̧kwö ja̧nö, kwuluwo̧duwi Isabenö Jo̧ Diosnö ile nibebö ösödö ja̧nö, wei̧danö ja̧bö ja̧nö, ja̧bö kwö̧jaduwobö wei̧bi, ju'wi wei̧bi a̧ja̧kwö kwö̧jaduwitjö̧ma, isabenö otiwanö kwö̧jaduwakwedöja, ja̧danö kwö̧ba̧jekwachaduwinö kwö̧jaduwakwedöja. Jau chömöledö, babe juluwanö Dios iyakwa̧ nijibe tekachaduwakwedöja, ja̧danö yötawaja̧danö ja̧bö kwö̧jaduwitjö̧ma, jobe kwiteboduwinö otiwanö kwö̧jaduwobö pjaatakwo̧ kwuluwoduwi Isabenö Jo̧ Diosma.

Deuteronomio 30:20

Ja̧kwawa jawa omudawö, kwuluwo̧duwi Isabenö Jo̧ Diosnö ile nikebaduwo chömöledö, ja̧danö jo̧banö 'diinö do̧ba̧lö, wei̧ a̧ja̧kwö kwö̧ja̧duwo. Jo̧batjöda ichi̧ chömöledö, ja̧kwawa kwö̧jaduwi̧bi, lekwe möle kwö̧jaduwakwa̧bi, jo̧kwajabetjö̧ jo̧banö 'diinö do̧ba̧lö kwö̧jaduwo, Isabenö Jo̧ kwa'dödö Abrahamnöbi, Isaacnöbi, Jacobnöbi yöbawö ujunina nijinö kwiteboduwi baibanö lekwe kwö̧jaduwakobetjö̧, —jö̧ba̧lö yöawinobe Moisesma, israel jojodönö.