Diosnö ösödo̧ Job mikwo̧ usula emawina jawa 7:1 - Dios Iwene

¹ Tupakwö yöa̧linobe Jobma: —Isabenö waiya bö̧je jojodö dö̧ji̧ma, ina bö̧jȩnö dö̧jayi, ölakwabikwawa jojodö ölakwabikwawö tjö̧ji̧danö, 'diinö otidö dö̧jobö jo̧be. Baikwö wanedö yötawa bö̧jenö dö̧ji̧ma, ina 'ya̧dala̧yi, tjömöayedö 'diinö otidö tjö̧ji̧danö 'diinö otidö ju̧kwadösa.

Diosnö ösödo̧ Job mikwo̧ usula emawina jawa 7:1 Referans Kwoze

Diosnö ösödo̧ Job mikwo̧ usula emawina jawa 5:7

Baikwö wanedö yötawa bö̧je jojodö wene tjujuna̧li̧ma: Ökwöla ubenama, ökwöla ubö kaami̧ jawa ba̧kwelöjatebö möakwö kaamobe, jö̧tö? Ja̧danö, tjojo'do jeminelö, ö'wö batjibenanö kabatö, bö̧je jojodöma ba̧kwelöjatebö wene ju̧na̧ladö, bö̧je jojodötjobetjö̧, —jö̧ba̧lö yöa̧linobe.

Isaías 40:2

Dösölö̧jinö yöka̧lo chömöledö Jerusalennö ju̧kwadönö, jobadönö jwöbö yökawo: —Ölakwabikwawö kwö̧jaduwi̧ma ida̧ökö 'dö̧ibajabe. Ja̧danö sulabenö ja̧bö kwö̧jinaduwijayonö, Isabenö Jo̧ma ida̧ökö dötölatajanö ökwödönö lȩebajabe, ja̧danö kwusuladuwima söbebö loajabe, jö̧ba̧lö yöawobe.

Isaías 21:16

Jobekwö juluwanö baledakobe Arabia nijitjö chömöledö, Chuluwo̧ Diosma baikwö yöawajabe ja̧ jawa baledakwa̧ mölema: —O̧ba bakwabada 'dö̧ibakwa̧ abönö, inesö juluwemi Arabia niji comunidad Cedarma, söbebö loawemida ji̧bakobe. Jau, tjimidökwe otido̧ma, otiwanö otidakwa̧ ba̧ja̧dö waiso̧, tupakwö otidakwa̧ma, dokwa lekwe otidakwojobö jö̧ba̧lö, ja̧danö otido̧ ba̧ja̧dö öwaisi̧danö kwöwaisaduwobö jo̧be,

Deuteronomio 15:18

—Ja̧danö chömöledö, jelemutjö dötölataja o̧ba baibena, kwömöayedö latjebobö baibenama, kwo̧'wo suli̧nö, –Tajawedö chömöayedö weti̧tjö latjeboböjö, –jö̧ba̧lö a̧'dȩlanö kwomukwataduwoko chömöledö, baikwö yötawa: Jobadöma ida̧ökö jelemutjö bakwöta o̧biya baledibanö kwömöayedö ja̧nö tjotidajabe, jobadönö kwimidaduwokonö. Ja̧danö, jobadö tjotidaja̧ma, ju'wedönö midö tjotidobö weköbinatjö̧ma, isabenö nöinö kwimido jö̧ka̧linena jö̧ba̧lö. Ja̧danö, ju'wibi kwomukwataduwobö jo̧be chömöledö, –Bejenö chömöayedö tjö̧ji̧tjö otiwanö latebiökwe, chuluwo̧ Isabenö Jo̧ Diosma okobe jwiinö otidö chö̧ji̧ma pjaatakwo̧, –jö̧ba̧lö kwomukwataduwobö jo̧be, —jö̧ba̧lö yöawinobe Moisesma.

Isaías 38:5

—Tjebachajö Ezequiasnö yökawajo baikwö: –Ezequias, baikwö yöawobe kwa'dömine David ösödinökwe Isabenö Jo̧ Diosma: -Ötjönö akebaja̧ cha̧ja̧kwajabe, ja̧danö chöba a'otjö kwubudekwaja̧ chedajabe. Jo̧kwajabetjö baikwö chatadakwö, bemi tupakwö ina quince o̧biya 'yaka̧lobö wetocha.

Diosnö ösödo̧ Job mikwo̧ usula emawina jawa 7:2

—Ja̧danö ötjö usula emawö chö̧ji̧ma, –Dianö 'dö̧ibakwajö, –jö̧ba̧lö teada̧lö̧ jo̧sa, baikwö wanedö yötawa: Midö tjeminökwe tjömöayo̧ tubobe otidenama, yö̧te juluwanö baibakwa̧ omukwatö teada̧lo̧, –Yö̧te juluwanö baibowe, –jö̧ba̧lö, jö̧tö? Ja̧danö, midö wetjökwe otidenama, tjimidakwa̧ omukwatö teada̧lo̧, –Juluwanö tjimidowe, –jö̧ba̧lö, jö̧tö? Ötjöbi ja̧danö, Diosma usula chemawobö wei̧tjö̧, mikwa jwiinö lekwe jawo̧dö chöbaledobe, –Dianö 'dö̧ibakwajö, –jö̧balö. Jau, Diosma ötjönö weajabe, yö̧te tenia yö̧te baledibanö inia tjöbö usula chemawobö,

Diosnö ösödo̧ Job mikwo̧ usula emawina jawa 10:17

Kabatökönö ju'wedönöbi, ju'wedönöbi kwöbadekwajobedanö ichejekwa, ötjönö –Jobma sulabenö ja̧bo̧, –jö̧ba̧lö yötja̧lakwedönö, ja̧danö ajayitjö bajalekwönönö ötjönö kwödameakwobe ichejekwa. Wanedö yötawa, ötjönö ölakwabikwawö, ba̧kwelöjatebö yabayedö ölakwabikwawadö weköbobedanö ichejekwa, ötjönö metjibakobetjö̧.

Diosnö ösödo̧ Job mikwo̧ usula emawina jawa 14:1

Tupakwö yöa̧linobe Jobma: —Ökwödö jojodö, dojo'dodö tjeminawö̧ma, lekwe möle jö̧ködösa, ja̧danö ina 'ya̧dalayi, ba̧kwelöjatebö wene juna̧lakwawadösa.

Isaías 16:14

ja̧danö babema 'yayi jawa yöawajabe jobadönö, baikwö yöawajabe Isabenö Jo̧ma ja̧ baledakwa̧ma: —Ida̧ökö ja̧ möle badekwachakwa̧ma yöneawachibobe. Kwöwaisaduwa, midö wetjökwema, tupakwö otidakwa̧ mölebiyama, otiwanö ba̧ja̧do̧, Ja̧ möleda chotidaja̧ mikwa chemakwo̧sa, jö̧ba̧lö, jö̧tö? Ja̧danö, jo̧banö tjimidakwa̧ möle öwaisi̧danö, Moabitas jojodönö baledakwa̧ möle kwöwaisaduwobö jo̧be, baikwö: O̧ba wapöbakwa baledakwa abönö, yötawinadanö baledakobe. Jau, babe Moabitas jojodöma juluwadö, jwiinö ba̧jȩkwadö tjö̧jijayonö, wapöbakwa o̧biya 'dö̧ibakwa̧ abönö, ida̧ökö jobekwö baledakobe, ja̧danö Moabitas jojodötjö ji̧badöma, sule o̧bukwedö juluwöködöda tjö̧jibakwedö, —jö̧ba̧lö yöawobe Isabenö Jo̧ma, ja̧ baledakwa̧ möle jawama.