Diosnö ösödo̧ Job mikwo̧ usula emawina jawa 5:19 - Dios Iwene

¹⁹ —Jau Job, Diosnö kwa̧ja̧kwitjö̧ma, isabenö otiwanö kwö̧ji̧binö pjaatakwo̧ja. Jo̧banö ösödö kwa̧ja̧kwitjö̧ma, okobe jwiinö sulabenö baledi̧tjö̧ kwö̧jibinö pjaatakwo̧ Diosma, baikwö labebö lobö yötawa:

Diosnö ösödo̧ Job mikwo̧ usula emawina jawa 5:19 Referans Kwoze

1 Corintios 10:13

Ja̧danö chömöledö, nöinö baledobe otiwanö ja̧köbaduwojobö sulabenö ja̧köbaduwojobö jö̧ba̧lö. Ja̧danö, jejenö ökwödönö baledi̧ma, ju'wedö jojodönö baledi̧danö baledobe ökwödönöma. Ja̧danö, ökwödönö baledenama, Dios jö̧a̧linadanö ökwödönö pjaatakobe ja̧ baledi̧ma ökwödönö juluwapji jö̧ba̧lö chömöledö. Jau chömöledö, ja̧ jawa baledenama, ju'wibi Diosma ujulu iyobe ökwödönöma, kwo̧'wo̧ 'dibachibö waekwökönö kwöbaledaduwo jö̧ba̧lö.

Proverbios 24:16

Ja̧danö chitji̧, yötawakwö: Ökwöma otiwanö omukwatadö tjö̧ji̧danö kwö̧jo. Wanedö yötawakwö: Otiwanö omukwatadöma yemidanö yemidanöbi, jelemutjö dötölatajanö metjijayonö ba̧kwȩlö̧jatebö tja̧laiba̧lakwedö. Ja̧ jö̧ba̧löma, labi jawa jobadönö baledijayonö katjatibökakobe, jwaikwöda tji̧'yakwedö, wanekwachobe. Jobekwö baledokobe sulabenö ja̧badö metjena. Sulabenö ja̧badöma metjena yemidanöma ala̧iböködö, tjujulu jwitjobetjö̧. Ja̧ jö̧ba̧löma, labi̧ jawa sulabenö ja̧badönö baledena juluwanö söbekwö lotjakwedö jö̧ba̧lö wanekwachobe.

2 Pedro 2:9

Ja̧danö baikwö yötawaduwakwö chömöledö, ja̧ wene edö, baikwö döwaisachibobö jo̧be, Diosma ökwödö jo̧banö ösödadönö isabenö usula demawi̧tjö dö̧jibinö pjaatobö waiso̧, jö̧ba̧lö. Ja̧danö, ju'wibi waiso̧ chömöledö, Diosnö öpöjödadö iteda lȩebakwa̧tjö dötjibapji jö̧ba̧lö ite'ada̧lobö waiso̧, inesö jojodö ja̧tji̧ otiwojobö sulojobö jö̧ba̧lö yöawakwa̧ möle baibenanö kabatö.

2 Corintios 1:8

Jau chömöledö, baikwö yötawa Asia nijinö ja̧nö Dios ökwödönö pjaatina wenema, a̧ja̧kwö Dios isabenö otiwanö pjaati̧ wene kwöwaisaduwakobetjö̧. Asia nijinö ja̧nö, nöinö usula demawijatö chömöledö, döbaledökenanö usula demawijatö, ja̧danö nöinö do̧'wo̧ tjo̧dekwijatö, biya̧tjö ö'wö badibena jö̧ba̧lö.

Daniel 3:17

Yöka̧lajadanö ökwödönö ökwölanö ikwö loköbitjö̧ma, Duluwo̧ma, wei̧ a̧ja̧kwö dösödökwe Diosma isabenö juluwo̧, okwöla jwiinö tubinö ubolatjö dö̧jibanö pjaatobö. Ja̧danö duluwo̧ Nabucodonosor, dedemi Diosma isabenö kwujulutjö dö̧jibinö pjaatakwo̧.

Daniel 6:16

Yötja̧liökwe, la'aka luwo̧ Daríoma weinobe Danielnö ikwö lotjobö, ja̧danö ikwö lotjakwa̧ abönö Danielnö yöa̧linobe: —Daniel, ba̧kwȩlö̧jatebö kwuluwo̧ Dios wei̧ a̧ja̧kwö jo̧ja, ja̧danö kwösödökwe Dios kwö̧jibinö pjaatobö chösödakwö— jö̧ba̧lö.

Proverbios 6:16

Baikwö laebobe Salomón yöawina jawa, Isabenö Jo̧ öpöjödi̧ jawa. Ja̧danö, Isabenö Jo̧ma ju’wi jawabi ju’wi jawa jwiinö öpöjödobe, jojodö sulabenö omukwatö ja̧tji̧ma jelemutjö dötölataja jawa:

Isaías 43:2

Jau, wene kwöbaledaduwenama, pjatatakwo̧sa, baikwö wanedö yöta̧la: Ojwiyo da̧kwemi kwöbaledaduwena, ökwödökwö chö̧jakwo̧sa, ja̧danö ojwe da̧kwödö pekibaduwijayonö o̧kibaduwökakwedöja, ötjöda tjöbeba̧lö pjatatobetjö̧. Ja̧danö ökwöla nöinö ubola ö'wejenö kwöbaledaduwijayonö, kwubaduwökakwedöja, ökwöla neawanima suli̧ öwaedökakwawö̧ja.

Daniel 3:25

Tjatadiökwe Nabucodonosorma yöa̧linobe: —Ömadö wa̧medukwa nu'yawedönö lodajayonö, ömadö öwejemubedö jojodönö chedobe, ökwöla okwatjö ejatakwawedö kwetjachobe cheda, ja̧danö ökwölanö kwetjachijayonö uböködönö, wene jwiinö kwebachadönö chedobe. Ja̧danö ju'wibi, lodajawö̧kwö kwebacho̧ma diosdanö ichejekwo̧— jö̧ba̧lö yöa̧linobe Nabucodonosorma.

Daniel 6:17

Ja̧danö, Danielnö ikwö lotjaja̧ ikena, inaba tjichejebinobe i̧lȩdo̧ teachakwawemi tjutumatobö, ja̧danö tumatajadö, sello tjödinobe la'aka luwo̧ Daríobi, ju'wedö la'aka luwedöbi, jelo̧bi ichö Danielnö ö̧jibinö pjaatapji jö̧ba̧lö.