Diosnö ösödo̧ Job mikwo̧ usula emawina jawa 36:10 - Dios Iwene

¹⁰ Ba̧jadö yöawi̧ tjajakwobö webo̧, –Sulabenö ja̧bö kwö̧jaduwi̧ kabatibö, otiwanö ja̧bö kwö̧jaduwo, –jö̧ba̧lö.

Diosnö ösödo̧ Job mikwo̧ usula emawina jawa 36:10 Referans Kwoze

Mateo 3:8

Isabenö sulabenö kwomukwataduwi̧ kabatibö kwöbalewachaduwitjö̧ma, otiwanö ja̧bö ja̧nö kwöbalewachaduwaja̧ wene kwi̧sebaduwo.

Diosnö ösödo̧ Job mikwo̧ usula emawina jawa 36:15

—Usula tjemawinö webö, jojodönö jwebebö ba̧ja̧do̧ Diosma, usula tjemawinö webö, jo̧banö tjomukwatobö webo̧, otiwanö jo̧banö tjöwaisachibakobetjö̧.

Isaías 50:5

Jau, chuluwo̧ Isabenö Jo̧ Diosma ötjönö ba̧ja̧dö yöa̧lajabe, ja̧danö yö̧a̧li̧tjö̧, otiwanö cha̧ja̧kwajabe. Wei̧tjö̧, wei̧ chöpöjödijökötö, jwaikwöda wei̧ a̧ja̧kwö chö̧jajabe.

Isaías 48:17

Isabenö Jo̧, ökwödönö tjöbeba̧lö pjabato̧, Israel jojodö dösödökwe Suli̧ Jwibo̧ Diosma baikwö yöawobe ökwödönö: Ötjöma kwösödaduwökwe Isabenö Jo̧ Diossa. Ötjöda ökwödönö ba̧ja̧dö pjabato̧ma, otiwanö ja̧kwawa kwöwaisachibaduwakobetjö̧. Ja̧danö ökwödönö jwebebö öbibo̧ma ötjödasa, kwi̧'yaduwo jö̧ka̧laduwi̧danö otiwanö kwi̧'yaduwakobetjö̧.

2 Reyes 17:13

Jobekwö sulabenö ja̧bö tjö̧jiökwe, yemidanöbi, yemidanöbi iteda yöawi̧ yöbawadönö webiainobe Isabenö Jo̧ma, Israel jojodönöbi Juda jojodönöbi yötjawobö: —Sulabenö ja̧bö kwö̧jaduwi̧ kabatibö, ja̧bö kwö̧jaduwobö weti̧bi, ju'wi weti̧bi a̧ja̧kwö kwö̧jaduwo, kwa'dödönö wetina Moises i̧wȩyudinadanö, ja̧danö ju'wedö yötawi̧ yöbawinadö yötjawinadanö a̧ja̧kwö kwö̧jaduwo, —jö̧ba̧lö iteda yöawi̧ yötjawobö weinobe.

Santiago 4:8

Ja̧danö chö̧ja̧wo̧dö, kwomukwataduwi̧ balewachö, böjȩ jawatjö 'da̧bachibö Diosnö tjekachajaduwo, kwo̧'wo̧ luwo̧duwi okwanö jo̧bakwö 'dötewinö ja̧nö. Ja̧danö, jo̧banö tjekachajaduwiökwe Diosma ökwödökwö 'dötewinö ö̧jobe. Chö̧ja̧wo̧dö, ökwödöma sulabenö ja̧bö ju̧kwadöja. Ja̧ sulabenö ja̧köbaduwi̧ kabatibö otiwanö ja̧bö kwö̧jaduwo. Yelösöda ökwödöma dötölatajanö omukwatadöja, Diosnö ösödöbi, böjȩ jawa ösödöbi. Ja̧ kwomajadeduwinö sulabenö kwomukwataduwi̧ma kabatibö otiwanöda kwomukwataduwo.

Hechos 17:30

¿Kwöwaisaduwiji̧? Diosma lekwe omukwatijökötö jo̧banö wajwibadö sulabenö ja̧tjinama, Ina lȩtebökö, jö̧ba̧lö. Jo̧kwaijayonö babema jejenömaökö. Babema Diosma weobe jojodönö, Sulabenö tjomukwati̧ kabatibö tjöbalewacho, jö̧ba̧lö.

Hechos 16:14

Ja̧danö, bakwuju, Lidia mikwujuma, Tiatiratjö ichinuju jö̧bijatö. Jobujuma sawana'wiju ö̧'dö̧wi o'wiju, nöinö mikwawi̧ o'wo iyuju, mikwanö jö̧ba̧lö. Ja̧danö, jobujuma judío jojosujubököjujayonö judío jojodö ja̧tji̧danö ja̧bö juju. Jobujuma, Pablo yöawi̧ a̧ja̧kwö jwiinö jösödijatö, Diosma jo̧'wo̧ luwo̧nö jösödinö pjaatinobetjö̧.

Hechos 3:19

Jo̧kwaobetjö̧ kwomukwataduwi̧ma kabatibö balewachaduwi, Diosnö omukwatö, Diosma ökwödö kwusuladuwi̧ söbebö loobö. Jejenö kwöbalewachaduwitjö̧ma kwo̧'wo̧ luwo̧duwi ösöwö kwö̧jaduwena, Duluwo̧ Diosma ökwödökwö ö̧jobetjö̧— yöbawijetö.

Isaías 48:8

Ja̧u, babe ökwödönö yötawi̧ma, ina kwa̧ja̧kwinaduwökö jawa, ina wajwiköbaduwii̧ jawa, ina ökwödönö yötjawinökö jawada yötawocha, a̧ja̧kwajadö, —Ida̧ökö chöwaisi̧ jawada yöawajabe Diosma, —jö̧ba̧lö yöka̧laduwapji jö̧ba̧lö. Ökwödönö chöwaisawö̧ja chömöledö, omöna yöba̧ladö kwö̧jaduwi̧ma. Ja̧danö israelsaso bakibinaduwelö, baikwö bajalenö ba̧kwelöjatebö, Dios wei̧ a̧ja̧kwöködö jö̧ba̧lö ötjabi̧wö̧ja, jö̧ba̧lö chöwaisawö̧ja.

Diosnö ösödo̧ Job mikwo̧ usula emawina jawa 36:21

Teada̧lönö kwö̧jo Job, sulabenö ja̧bö jö̧könui, baikwö yöta̧la: Jejenö sulabenö ja̧köbapji jö̧ba̧lö, usula emawö kwö̧jobö weajabe Diosma, jokwajabetjö̧ otiwanö omukwatö, sulabenö ja̧bö kwö̧joko.