Diosnö ösödo̧ Job mikwo̧ usula emawina jawa 34:18 - Dios Iwene

^18-19 —Diosda inesö la'aka luwo̧ma chömöledöso̧, ja̧danö jo̧bada okobe deinö jojodönö otidinobetjö̧, bakweminö edo̧ jojodönö, la'aka luwedönöbi, nöinö tea juna̧ladönöbi, usulasedönöbi. Jau Job, la'aka luwedö sulabenö ja̧tjenama, –Aaa, bidöma la'aka luwedötjobetjö̧, wene jwia, lȩtebö̧kö̧wö̧, –jö̧ba̧lö yöba̧lö̧kö̧. Bö̧jȩ inesö la'aka luwo̧ sulabenö ja̧iökwe, jweinö yöbawo̧, –Mikwawö̧kö̧ja, –jö̧balö, ja̧danö ju'wedö la'aka luwedö sulabenö ja̧tjenama, jweinö yöbawo̧, –Ökwödöma sulabedöja, –jö̧ba̧lö. Okobe deinö jojodönö jweinö lȩekwa yöbawo̧ Diosma

Diosnö ösödo̧ Job mikwo̧ usula emawina jawa 34:18 Referans Kwoze

Éxodo 22:28

Ina webijetö Isabenö Jo̧ma Moisésnö: —Ötjönöma sulabenö omukwatö jwökeba̧laduwoko. Ja̧danö, kwuluwedöduwinö sulabenö baledobö weto jö̧ba̧löma akeba̧laduwoko.

Proverbios 17:26

Ja̧danö, ju'wibi yötawa, wanedö: Bakwo̧ Dios wei̧ a̧ja̧kwo̧ma, sulabenö ja̧ököjayonö lȩekwa yöbawo̧ma yöawobe, wene juna̧lo̧, sulabenö ja̧inatjö̧ mikwa imidobö jo̧be, jö̧ba̧lö. Isabenö, sulabenö ja̧ököjayonö lȩekwa yöbawo̧ma imidobö aebobe. Jobekwö aeboböma sulobe, jo̧bama sulabenö ja̧inokobetjö̧. Ju'wibi yötawa, suli̧ jawa wanedöma: Bakwo̧ luwo̧ma, otiwanö omukwatö ö̧jijayonö jo̧banö lȩbebö kwakwatjinobe. Jobekwö otiwanö omukwatö luwo̧nö kwakwatjoböma sulobe.

Judas 1:8

Jo̧kwaijayonö sulabedönö isabenö lȩbebo̧ Diosma jö̧ba̧lö öwaetjöda öwawijayonö, bidö sulabenö yöbawadöma yayonö ja̧tji̧danö ja̧badö. Jobadöma yötjawobe, Diosma di̧'wi̧dinö i̧sebajabe, baikwö ja̧bö dö̧jo, jö̧ba̧lö, ja̧danö jejenö yöbawö sulabenö ja̧bö tjö̧jobe, ja̧danö tjuluwedö wetji̧ tjöpöjödobe, ja̧danö ju'wibi tjujuluwököjayonö, Aaa, juluwadösa jö̧ba̧lö omukwatö, yebabökönö sulabenö yöba̧ladö ángelesdö juluwadönöma, idö ángelesdöma, sulabedö lȩtebawö̧ jö̧ba̧lö.

Romanos 13:7

Jau chömöledö, okobe jwiinö impuesto jawa balada kwimidaduwo, wetji̧danö. Ja̧danö ju'wibi, kwuluwedönö kwöpöjödaduwoko chömöledö. Diosda bidönö juninama jö̧ba̧lö, jobadönö kwösödaduwo, otiwanö kwomukwataduwo luwedönöma.

Hechos 23:5

Jejenö jö̧tja̧liökwe Pabloma jö̧ba̧lijetö: —Chömöledö ötjöma wajwitatö jo̧bama Diostjö jojodötjö ö'weje la'aka pjabato̧ jö̧ba̧löma. Chöwaisitjö̧ma jejenöma jö̧ta̧lokochajena chömöledö, Dios iwenema, Kwo̧'wo̧ sulinö edöma yöka̧la kwuluwo̧nöma, jö̧ba̧lö, yöawobetjö̧— jö̧ba̧lijetö.

Hechos 23:3

Metjajökwema jö̧ba̧lijetö Diostjö jojodötjö ö'weje la'aka pjabato̧nöma: —Diosma ökwönöbi jejenö meakobe. Ökwöma dötölatajanö yöba̧lo̧ja. Wamenöda kwomukwati̧ma, Otiwo̧sa, jö̧ka̧lijayonö kwomajade okwanö sulabenö omukwato̧ja. Wanedö yötawa: Ökwöma o̧do 'waachineju wamenö dewinö dutjebi̧danö jo̧ja, wamenö otiwanö ichejekwijayonö sulejuda. Ökwöma, Moisés iwȩyudina eda̧lö weawa yöbawo̧sa, jö̧ka̧lijayonö ötjönö metjobö weköbena Moisés iwȩyudina ja̧bökönö weköbajabe— jö̧ba̧lijetö Pabloma.

2 Pedro 2:10

Ja̧danö chömöledö, ida̧ökö i̧sebinadanö isabenö ökwödönö sulabenö yöbawadönö lȩebobö waiso̧. Jau chömöledö, jobadöma sulabenö 'da̧'da̧akwawa ösödö jwaikwöda sulabenö ja̧bö tjuju̧kwobe, ja̧danö Dios wei̧ öpöjödö tjuju̧kwobe, jo̧kwaijayonö Dios lȩebi̧tjö dötjibajökakwedö. Jau chömöledö, damötjö ji̧nadö jojodönö lȩebinadanö, ökwödönö sulabenö yöbawadönöbi ite'ada̧lobö waiso̧ Diosma chömöledö, lȩebakwa̧tjö dötjibapji jö̧ba̧lö. Jau chömöledö, jobadö sulabenö yöbawadöma, tjujuluwököjayonö, Aaa, juluwadösa, jö̧ba̧lö omukwatö, yebabökönö sulabenö yöba̧ladö ángelesdö juluwadönöma, idö ángelesdöma sulabedö jö̧ba̧lö.

1 Pedro 2:17

Ja̧danö Dios ömöayedö ja̧nö, okobe deinö jojodönö otiwanö kwomukwataduwo. Kwömöledöduwi Jesúsnö ösödadönö ösödabikwawö kwö̧jaduwo. Diosnö yebabinö kwösödaduwo. La'aka luwo̧ emperador ötjabökwenö otiwanö omukwatö, wei̧ ja̧bö kwö̧jaduwo.

Diosnö ösödo̧ Job mikwo̧ usula emawina jawa 34:17

Bakwo̧ jweinö lȩekwa yöawobö öpöjödo̧ma, inesö la'aka luwo̧ ö̧jobö jȩnaji̧? Jwiena, jö̧tö? Jo̧kwajabetjö̧ tajawedö yöka̧lobeda inesö suli̧ jwibo̧ Diosnö, –Sulabenö lȩekwa yöbawo̧, –jö̧ba̧lö?